Read Akha 2 Laˬsaˬbaˬ 5 Bible Online

2 Laˬsaˬbaˬ 5 - Akha bible

2 Laˬsaˬbaˬ 5

¹Uˬ duˬ tahˬ nymˇ nymˇ ma tsoˆ gaˇ taꞈ leˇ-eu gaˇ yawˬ jeˬ na luꞈ-ahˇ, sahˬ paˬ Sawˇlaˬmoˬ mˇ luiˆ gʼaˬ jiˇ ngeh, aˬ yawꞈ aˬ da Daˬbiˇ neh Sahˬpaˬ Miˬyehˇ-ahˇ damˬ nehˬ-euˬ shuiˇ deuˬ, pyuˇ deuˬ hawˇ-eu, nui jeˬ dawˬ tawˆ luꞈ-ahˇ,uˬ duˬ tahˬ nymˇ nymˇ ma laꞈ kʼoeˇ jaˆ-eu myawˬ jeˬ hmˬ-eu aˇ lawˆ deuˬ laꞈ kʼoeˇ jeˬ hmˬ taˬ-euˬ meh.

²Kʼoeˇ naˇ, Ziˇoˬ lehˇ kuˇ-eu Daˬbiˇ-euˬ meuˬ-ahˇ jaˆ-eu Dawˬ ma saˇ jaˇ Bahˬ keuˆ-ahˇ, Uˬ duˬ tahˬ nymˇ nymˇ ma laꞈ kʼoeˇ baꞈ ahˇ-eu gʼaˇ duˬ, Iˇsaˬleˬlaˆ tsawˇ jeuˬ tsawˇ ca deuˬ-euˬ aˬ yuiꞈ aˬ tsu dawˬ tawˆ luꞈ-ahˇ, Yeˬluˇsaˬlehˬ meuˬ-ahˇ aˬ yawꞈ jawˇ gaˇ uiˬ laˇ-awˬ lehˇ sahˬ paˬ Sawˇlaˬmoˬ kuˇ-euˬ meh.

³Ba la shiꞈ siˬ tiˬ siˬ pyeuꞈ-eu Eˇdaˬneˬ ba la, Sehˬ gʼawˆ-euˬ Bawˬ-iˬ gʼeh ngeh yamˬ-ahˇ, aˬ yawꞈ maꞈ dawˬ tawˆ luꞈ kʼoeˇ gaˇ laˇ uiˬ-euˬ meh.

⁴Aˬ yuiꞈ aˬ tsu dawˬ tawˆ luꞈ uiˬ laˇ jiˇ ngeh jawˇ, piˇ ma deuˬ Dawˬ ma saˇ jaˇ Bahˬ keuˆ baꞈ diˇ-euˬ meh.

⁵Kʼoeˇ naˇ, Leˬbiˇ tsawˇ haˬ deuˬ-aˬ, Dawˬ ma saˇ jaˇ Bahˬ keuˆ maˬ ehˇ, Sahˬpaˬ Miˬyehˇ-euˬ Sehˬ gʼawˆ maˬ ehˇ, kʼoeˇ gaˇ jaˆ-eu keu ka dawˬ tawˆ luꞈ maˬ ehˇ, Uˬ duˬ tahˬ nymˇ nymˇ ma-ahˇ baꞈ ahˇ gʼeh-euˬ meh.

⁶Sahˬ paˬ Sawˇlaˬmoˬ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ, Dawˬ ma saˇ jaˇ Bahˬ keuˆ mehˬ shi uiˬ leˇ-awˇ, maˬ gui jiˇ coeˇ gaˇ keuˆ ni myaˬ-eu yawˇ hawˇ-eu mawˇ neˇ deuˬ lawˇ-euˬ meh.

⁷Kʼoeˇ naˇ, piˇ ma deuˬ Dawˬ ma saˇ jaˇ Bahˬ keuˆ-ahˇ Uˬ duˬ tahˬ nymˇ nymˇ ma laꞈ kʼoeˇ baꞈ ahˇ gʼeh-awˇ, Muiˬ dui shawˇ dui dui-eu Jawˇ duˬ-ahˇ jeˬluˇbeˬ[4] mawˇ kawˇ-euˬ uˬ moˆ baꞈ taˬ-euˬ meh.

⁸Cawˬ ja taˬ-euˬ jeˬluˇbeˬ-euˬ aˬ dahˇ kʼoeˇ, bahˬ keuˆ hawˇ-eu bahˬ keuˆ baꞈ kawˬ-ahˇ joe shmˇ taˬ-euˬ meh.

⁹Muiˬ dui shawˇ dui dui-eu jawˇ duˬ-euˬ mehˬ shi nyiˬ paˆ-ehˇ yawꞈ-awˇ haw ngeh tehꞈ-ehˇ, baꞈ kawˬ-euˬ mehˬ dzaˬ-ahˇ haw mawˇ nya-eu meh. Yawˬ gaˇ yawˬ jawˇ-awˇ maˬ haw mawˇ nya-a. (Baꞈ kawˬ kʼoeˇ iˬ nah keuˆ ni kʼoeˇ gaˇ jaˆ luꞈ-eu meh.)

¹⁰Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ ngeh, Sahˬpaˬ Miˬyehˇ aˬ yawꞈ maꞈ-ahˇ Dawˬ ma saˇ jaˇ dzaˬ-euˬ jawˇ duˬ pyeuꞈ-eu Siˇnaˆ Gawˬ jawˬ-ahˇ, Moˇseˬ neh dawˆ ahˇ-euˬ kʼaˬ lo teˇ byaꞈ kʼoeˇ nyiˬ byaꞈ maˬ ngeuˇ naˇ, nui jeˬ tiˬ jeˬ-iˬ Dawˬ ma saˇ jaˇ Bahˬ keuˆ laꞈ kʼoeˇ maˬ ahˇ-a.

¹¹Kʼoeˇ naˇ, piˇ ma deuˬ Muiˬ-eu shawˇ-eu jawˇ duˬ-ahˇ neh jiˆ gʼoꞈ ka le-euˬ meh. Kʼoeˇ gaˇ kʼaˇ jawˇ-eu piˇ ma dawˬ tawˆ luꞈ, aˇ muˇ maˬ biˇ paˆ ni, yawˬ ha-euˬ gʼawˇ mawˇ Miˬyehˇ-ahˇ a nehˬ gʼaˬ-euˬ meh.

¹²Aˬsaˆ, Heˬmaˬ, Yeˬduˇdoˬ aˬ ha maꞈ hawˇ-eu, aˬ yawꞈ maꞈ-euˬ aˬ li deuˬ, aˬ yuiꞈ aˬ nyiˇ deuˬ dawˬ tawˆ luꞈ ahˇ leˇ-ehˇ, caˇ dawˬ kʼaˇ caˇ nya-eu Leˬbiˇ tsawˇ haˬ dawˬ tawˆ luꞈ, shawˇ jehˆ ni gʼeh-eu saˬ paˇ paˇ pyuˇ dm-eu laꞈ kʼoeˇ, lawˇ duˬ-euˬ nahˇ ma doˆ kʼehˬ paw yawꞈ-awˇ, cehˇ lehˇ ciˆ-awˇ deuˇ-mˬ diˬ luꞈ-eu meh. Piˇ ma tiˬ yaˇ nyiˬ tseˇ gʼaˬ aˬ yawꞈ maꞈ-ahˇ daˇ heh baw caw nehˬ-euˬ meh.

¹³Daˇ heh teˇ saˇ hawˇ-eu caˇ dawˬ caˇ-eu deuˬ-euˬ teˇ saˇ tiˬ teˇ tehꞈ-ehˇ gawꞈ leˇ-awˇ, Sahˬpaˬ Miˬyehˇ-ahˇ ja ceuˬ-euˬ meh. Daˇ heh teˇ saˇ, cehˇ lehˇ ciˆ-eu teˇ saˇ hawˇ-eu, teˇ saˇ gʼawˬ mya jeˬ laˆ mahˇ-eu nehˬ-ehˇ aˬ yawꞈ maꞈ yaw kʼaˆ-ehˇ guˇ kʼaˆ laˇ-awˇ, Sahˬpaˬ Miˬyehˇ-ahˇ heu loꞈ-ehˇ caˇ-awˇ ja ceuˬ-euˬ meh. “Aˬ yawꞈ muiˬ dui dui-awˇ, Aˬ yawꞈ-euˬ gʼoeˇ-eu gaˬ-eu jeˬ, mˬ maˬ maˬ byaˆ ziꞈ-eu miˇ neh, Sahˬpaˬ Miˬyehˇ-ahˇ ja ceuˬ-awˬ.” Kʼoeˇ naˇ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ juˬ kʼoeˬ tmˬ byah-euˬ meh.

¹⁴Juˬ kʼoeˬ kʼoeˇ baˬ da neh, piˇ ma deuˬ yawˬ ha ya mˇ-eu gaˇ maˬ mˇ nya-ehˇ pyeuꞈ-iˇ-euˬ meh. Aˬ jeˬ miˇ neh ehˇ naˇ, Sahˬpaˬ Miˬyehˇ-euˬ yaw shehꞈ kʼahˬ sehˇ, Uˬ duˬ tahˬ nymˇ nymˇ ma laꞈ kʼoeˇ byah luꞈ-eu meh.