Read Akha 2 Laˬsaˬbaˬ 6 Bible Online

2 Laˬsaˬbaˬ 6 - Akha bible

2 Laˬsaˬbaˬ 6

¹Kʼoeˇ naˇ, sahˬ paˬ Sawˇlaˬmoˬ guiˬ lahˬ shaˇ-eu, “Sahˬpaˬ Miˬyehˇ-oˇ, mˬ dmˇ hawˇ-eu yaw zahˇ laꞈ kʼoeˇ jawˇ ma lehˇ nawˇ tseˇ geuꞈ-euˬ meh.

²Nymˬ-mˇ mˬ maˬ maˬ byaˆ zaˇ ziˇ, nawˇ bi jawˇ geuꞈ le-eu gʼaˇ duˬ, muiˬ dui dui-eu Uˬ duˬ tahˬ nymˇ, yaw huiˬ heu nymˇ ngaˇ tsoˆ-euˬ ma.”

³Iˇsaˬleˬlaˆ tsawˇ haˬ dawˬ tawˆ luꞈ kʼoeˇ gaˇ yawꞈ luꞈ-eu meh. Sahˬ paˬ Sawˇlaˬmoˬ aˬ yawꞈ maꞈ jawˇ paw ciˬ pyawˇ-awˇ, aˬ yawꞈ maꞈ-ahˇ dawˬ ngehˬ gʼeh nehˬ-euˬ meh.

⁴Aˬ yawꞈ ehˇ-eu, “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ. Ngaˬ da Daˬbiˇ-ahˇ aˬ yawꞈ neh saˇ jaˇ dzaˬ taˬ-euˬ dawˬ-ahˇ aˬ yawꞈ ziꞈ-eu meh. Daˬbiˇ-ahˇ aˬ yawꞈ heu loꞈ-ehˇ ehˇ nehˬ-euˬ meh.

⁵‘Ngaˬ-euˬ tsawˇ jeuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ laꞈ ngeh tiˬ nah neh iˬ nah keuˆ ni, ngaˬ-ahˇ uˬ duˬ tahˬ-eu uˬ duˬ tahˬ nymˇ bi tsoˆ-eu gʼaˇ duˬ, Iˇsaˬleˬlaˆ miˇ kʼahˬ kʼahˬ lah ni laꞈ kʼoeˇ jaˆ-eu meuˬ tiˬ meuˬ-iˬ ngaˇ maˬ tseˇ doˆ-ehˇ, ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ-ahˇ bi sheuˬ gʼeh-eu gʼaˇ duˬ, tsawˇ haˬ tiˬ gʼaˬ-iˬ ngaˇ maˬ tseˇ doˆ-aˬ siˬ.

⁶Ehˇ kʼawꞈ, nymˬ-mˇ ngaˬ-ahˇ uˬ duˬ tahˬ-eu jawˇ duˬ bi pyeuꞈ-eu gʼaˇ duˬ, Yeˬluˇsaˬlehˬ meuˬ-ahˇ ngaˇ tsaˬ tsoˆ-awˇ, ngaˬ-euˬ tsawˇ jeuˬ-ahˇ bi uˆ lahˇ-eu gʼaˇ duˬ, Daˬbiˇ nawˬ-ahˇ ngaˇ tseˇ doˆ-euˬ ma’ lehˇ ehˇ nehˬ-eu meh.

⁷Sawˇlaˬmoˬ paˇ ehˇ-eu, “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ-eu gʼaˇ duˬ, uˬ duˬ tahˬ nymˇ tiˬ nymˇ tsoˆ ma lehˇ ngaˬ da Daˬbiˇ lehˬ hmˬ-euˬ meh.

⁸Ehˇ kʼawꞈ, Sahˬpaˬ Miˬyehˇ aˬ yawꞈ-ahˇ ehˇ nehˬ-eu, ‘Ngaˬ-euˬ gʼaˇ duˬ nawˇ uˬ duˬ tahˬ nymˇ tiˬ nymˇ tsoˆ mawꞈ-eu-aˬ, muiˬ meh.

⁹Ehˇ kʼawꞈ, uˬ duˬ tahˬ nymˇ kʼoeˇ nawˇ maˬ ya tsoˆ-a. Nawˬ-euˬ aˬ li maˇ maˇ ni gʼeh-eu gʼaˬ, ngaˬ-euˬ gʼaˇ duˬ uˬ duˬ tahˬ nymˇ kʼoeˇ nymˇ tsoˆ tehꞈ-a’ lehˇ ehˇ nehˬ-euˬ meh.

¹⁰“Nymˬ-mˇ poˆ jawˇ, aˬ yawꞈ neh saˇ jaˇ dzaˬ taˬ-euˬ loꞈ-ehˇ Sahˬpaˬ Miˬyehˇ mˇ byah-euˬ meh. Ngaˬ da-euˬ dah zaˇ ngaˇ Iˇsaˬleˬlaˆ miˇ kʼahˬ-euˬ sahˬ paˬ pyeuꞈ laˇ-awˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ-eu gʼaˇ duˬ, Uˬ duˬ tahˬ nymˇ nymˇ ma ngaˇ tsoˆ gʼaˬ-euˬ ma.

¹¹Sahˬpaˬ Miˬyehˇ neh Iˇsaˬleˬlaˆ tsawˇ jeuˬ-ahˇ dzaˬ-euˬ Dawˬ ma saˇ jaˇ boꞈ taˬ-euˬ kʼaˬ lo teˇ byaꞈ ahˇ-eu Dawˬ ma saˇ jaˇ Bahˬ keuˆ-ahˇ, Uˬ duˬ tahˬ nymˇ nymˇ ma laꞈ kʼoeˇ ngaˇ bi jaˆ-euˬ ma.”

¹²Kʼoeˇ naˇ, Iˇsaˬleˬlaˆ tsawˇ haˬ deuˬ-euˬ mehˬ shi lawˇ duˬ dawˬ peh Sawˇlaˬmoˬ yawꞈ leˇ-awˇ, aˬ laꞈ baꞈ diˇ-awˇ guiˬ lahˬ shaˇ-euˬ meh.

¹³(Sawˇlaˬmoˬ-aˬ, guiˬ shuiˇ ja ciˬ tiˬ ciˬ jahˇ-awˇ, Uˬ duˬ tahˬ nymˇ nymˇ ma-euˬ kmˇ cehˇ laꞈ kʼoeˇ jaˆ-eu pu kaˬ gʼahˇ ceh bi jaˆ-euˬ meh. Ja ciˬ kʼoeˇ ciˬ ngaˬ caˆ oeˬ bawˬ byah-awˇ, smˬ caˆ goˆ-eu meh. Ja ciˬ kʼoeˇ-euˬ kʼoeˇ taˆ aˬ yawꞈ daˆ leˇ-awˇ, yawˬ gʼaˬ na luꞈ haw mawˇ gaˇ pawˬ tsuiꞈ pawˬ dmˬ dmˬ-awˇ, mˬ paw aˬ laꞈ baꞈ diˇ-euˬ meh.)

¹⁴Kʼoeˇ naˇ, aˬ yawꞈ heu loꞈ-ehˇ guiˬ lahˬ shaˇ-euˬ meh. “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, mˬ hawˇ-eu miˇ kʼoeˇ taˆ nawˬ-ahˇ duˇ-eu miˬ yehˇ maˬ jawˇ-a. Nawˬ-euˬ tsawˇ haˬ deuˬ nui ma gʼawˇ mawˇ dawˬ tawˆ luꞈ nawˬ-euˬ ehˇ dawˬ naˇ haˬ-awˇ dehꞈ ngeh, aˬ yawꞈ maꞈ nehˬ-ehˇ dzaˬ taˬ-euˬ Dawˬ ma saˇ jaˇ-ahˇ nawˇ ziꞈ-awˇ, nawˬ-euˬ gʼoeˇ-eu gaˬ-eu jeˬ aˬ yawꞈ maꞈ-ahˇ nawˇ bi mawˇ-euˬ meh.

¹⁵Ngaˬ da Daˬbiˇ-ahˇ nawˬ neh saˇ jaˇ dzaˬ taˬ-euˬ dawˬ-ahˇ nawˇ ziꞈ-awˇ, dawˬ yawˬ dawˬ yawˬ na luꞈ, iˬ nah byah laˇ gʼaˬ-euˬ meh.

¹⁶Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˬ-euˬ zahˇ dawˬ kʼoꞈ dawˬ-ahˇ ngaˬ da yaw muiˬ paˬ-ehˇ caw teh-awˇ dehꞈ-euˬ loꞈ-ehˇ, aˬ yawꞈ-euˬ aˬ li deuˬ kʼawꞈ kʼoeˇ loꞈ-ehˇ dehꞈ naˇ, aˬ yawꞈ-euˬ zaˬ deuˬ uˆ deuˬ laꞈ kʼoeˇ Iˇsaˬleˬlaˆ miˇ kʼahˬ-ahˇ sahˬ paˬ geuꞈ-awˇ uˆ lahˇ-eu tiˬ gʼaˬ aˬ myah luꞈ doˆ laˇ tehꞈ-a lehˇ ngaˬ da-ahˇ nawˇ ehˇ nehˬ-awˇ saˇ jaˇ dzaˬ taˬ-euˬ dawˬ-ahˇ taˬ ngehˇ nehˬ laꞈ lehˇ, nymˬ-mˇ ngaˇ nawˬ-ahˇ shaˇ-eu ma.

¹⁷Kʼoeˇ miˇ neh, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˬ-euˬ zaˬ kʼaˆ Daˬbiˇ-ahˇ nawˬ neh saˇ jaˇ dzaˬ taˬ-euˬ yawˬ jeˬ na luꞈ nymˬ-mˇ bi byah laˇ-awˬ.

¹⁸“Ehˇ kʼawꞈ ni Sahˬpaˬ Miˬyehˇ-oˇ, tsawˇ haˬ zaˬ deuˬ nehˬ-ehˇ miˇ tsaˬ kʼoeˆ taˆ nawˇ aˬ diˇ aˬ maˇ jawˇ nya ma loˇ. Mˬ mˬ lah-ehˇ nawˇ jawˇ kʼaˇ maˬ deˇ-eu-aˬ, ngaˬ neh tsoˆ taˬ-euˬ Uˬ duˬ tahˬ nymˇ nymˇ ma heu nymˇ laꞈ kʼoeˇ aˬ joˆ-ehˇ jawˇ kʼaˇ deˇ nmˇ.

¹⁹Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, ngaˇ-aˬ, nawˬ-euˬ zaˬ kʼaˆ pyeuꞈ-eu ma. Ngaˬ-euˬ shaˇ dawˬ-ahˇ naˇ haˬ-awˇ, ngaˬ neh kʼaˇ shaˇ-euˬ loꞈ-ehˇ caw ba nehˬ laꞈ-awˬ.

²⁰Uˬ duˬ tahˬ nymˇ nymˇ ma heu nymˇ-ahˇ uˬ ciꞈ nah gʼahˇ maˬ ehˇ haw piˇ nehˬ laꞈ-awˬ. Heu gaˇ nawˬ-ahˇ uˬ duˬ ya tahˬ meh lehˇ nawˇ saˇ jaˇ dzaˬ taˬ-euˬ meh. Kʼoeˇ miˇ neh, Uˬ duˬ tahˬ nymˇnymˇ ma heu nymˇ-ahˇ ngaˇ mehˬ shiˬ pyawˇ-awˇ guiˬ lahˬ shaˇ ngeh, ngaˬ-eu shaˇ dawˬ-ahˇ naˇ haˬ nehˬ laꞈ-awˬ.

²¹Ngaˇ maˬ ehˇ, nawˬ-euˬ tsawˇ haˬ deuˬ maˬ ehˇ, jawˇ duˬ heu tsahˇ-ahˇ mehˬ shiˬ pyawˇ-awˇ guiˬ lahˬ shaˇ ngeh, nawˇ naˇ haˬ geuꞈ nehˬ laꞈ-awˬ. Mˬ kʼoeˇ taˆ jaˆ-eu nawˬ-euˬ nymˇ laꞈ kʼoeˇ nga maꞈ-euˬ shaˇ dawˬ-ahˇ naˇ haˬ-awˇ, nga maꞈ-ahˇ iˬ baˇ pyehˬ nehˬ laꞈ-awˬ.

²²Tsawˇ haˬ tiˬ gʼaˬ aˬ cawˬ-ahˇ mˇ lehˬ laˆ lehˬ-euˬ meh lehˇ dehˬ lehꞈ gaˇ ya daˬ-awˇ, aˬ yawꞈ iˬ baˇ maˬ ahˇ lehˇ bi kamˬ-eu gʼaˇ duˬ, Uˬ duˬ tahˬ nymˇ nymˇ ma laꞈ kʼoeˇ jaˆ-eu nawˬ-euˬ lawˇ duˬ-ahˇ sheuˬ keuˆ laꞈ ngeh,

²³Sahˬpaˬ Miˬyehˇ nawˇ mˬ kʼoeˇ taˆ jawˇ-awˇ naˇ haˬ geuꞈ-eu laꞈ kʼoeˇ, nawˬ-euˬ zaˬ kʼaˆ deuˬ-ahˇ yaˇ kʼaˬ daˇ nehˬ-awˬ. Yaw lehˬ gʼaˬ-ahˇ lehˬ-eu shaˬ bymˇ bi tawˆ-awˇ, yaw tsaˬ gʼaˬ-ahˇ tsaˬ-eu shaˬ bymˇ bi tawˆ-awˬ.

²⁴“Nawˬ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ nawˬ-ahˇ mˇ lehˬ-euˬ miˇ neh, muiˇ-eu deuˬ neh bi deuˆ gʼaˬ-awˇ, Uˬ duˬ tahˬ nymˇ nymˇ ma heu nymˇ-ahˇ nawˇ jawˇ gaˇ aˬ yawꞈ maꞈ paˇ gʼoꞈ laˇ-eu laꞈ kʼoeˇ, iˬ baˇ byehˬ nehˬ laꞈ lehˇ nui ma nahˬ yu ni taˬ-awˇ nawˬ-ahˇ shaˇ laˇ ngeh,

²⁵mˬ kʼoeˇ taˆ jawˇ-awˇ aˬ yawꞈ maꞈ-euˬ shaˇ dawˬ-ahˇ naˇ haˬ nehˬ-awˬ. Aˬ yawꞈ maꞈ-ahˇ nawˇ iˬ baˇ pyehˬ nehˬ-awˇ, aˬ yawꞈ maꞈ-euˬ aˬ poeˬ aˬ bawˇ deuˬ hawˇ-eu aˬ yawꞈ maꞈ-ahˇ nawˬ neh biꞈ taˬ-euˬ miˇ kʼahˬ-ahˇ, aˬ yawꞈ maꞈ-ahˇ nawˇ sheuˬ kʼoꞈ gʼeh nehˬ-awˬ.

²⁶“Nawˬ-euˬ tsawˇ haˬ deuˬ nawˬ-ahˇ mˇ lehˬ-euˬ miˇ neh, nawˇ uˬ yehˇ maˬ bi yehˇ le ni byehˇ ngeh, aˬ yawꞈ maꞈ nui ma paˇ laˇ-awˇ Uˬ duˬ tahˬ nymˇ nymˇ ma jaˆ-eu paw ciˬ pyawˇ-awˇ nui ma nahˬ yu ni taˬ-eu laꞈ kʼoeˇ guiˬ lahˬ shaˇ ngeh,

²⁷Sahˬpaˬ Miˬyehˇ nawˇ mˬ kʼoeˇ taˆ jawˇ-awˇ aˬ yawꞈ maꞈ-euˬ shaˇ dawˬ-ahˇ naˇ haˬ nehˬ-eu laꞈ kʼoeˇ, nawˬ-euˬ zaˬ kʼaˆ pyeuꞈ-eu Iˇsaˬleˬlaˆ tsawˇ haˬ deuˬ-ahˇ iˬ baˇ pyehˬ nehˬ-awˇ, aˬ yawꞈ maꞈ yaw tsaˬ yaw dawˇ jeˬ mˇ ni mehˬ nehˬ tsoˆ nehˬ-awˬ. Sahˬpaˬ Miˬyehˇ-oˇ, kʼoeˇ ngeh jawˇ, nawˬ-euˬ tsawˇ jeuˬ-ahˇ nawˬ neh biꞈ tsehˆ tsehˆ nehˬ-euˬ nawˬ-euˬ miˇ kʼahˬ heu kʼahˬ kʼoeˇ taˆ uˬ yehˇ bi yehˇ le-awˬ.

²⁸“Miˇ kʼahˬ heu kʼahˬ kʼoeˇ taˆ, mehꞈ-eu shuꞈ-eu jeˬ hawˇ-eu yaw jaw naˇ-eu naˇ gawˇ gawˇ ma keuˆ le ngeh maˬ ehˇ, lahˇ dui dui-eu jaˬ lehˇ hawˇ-eu nyoiˬ oiˬ nyehˇ bahˇ gʼawˬ mya jeˬ baˬ da neh dzaˬ la gʼo cehˇ deuˬ ya cawˆ -iˇ ngeh maˬ ehˇ, muiˇ-eu deuˬ nawˬ-euˬ tsawˇ jeuˬ-ahˇ guiˇ deuˆ le ngeh maˬ ehˇ, shaˬ zahˬ naˇ gawˇ keuˆ le ngeh maˬ ehˇ,

²⁹aˬ yawꞈ maꞈ-euˬ guiˬ lahˬ shaˇ dawˬ-ahˇ naˇ haˬ nehˬ-awˬ. Nawˬ-euˬ tsawˇ jeuˬ Iˇsaˬleˬlaˆ tsawˇ haˬ tiˬ gʼaˬ na, noeˬ shaˬ noeˬ zahˬ dui dui-eu laꞈ kʼoeˇ, Uˬ duˬ tahˬ nymˇ nymˇ ma heu nymˇ jaˆ-eu paw aˬ laꞈ cawˬ ja-awˇ guiˬ lahˬ shaˇ ngeh,

³⁰aˬ yawꞈ maꞈ-euˬ shaˇ dawˬ-ahˇ naˇ haˬ nehˬ-awˬ. Mˬ kʼoeˇ taˆ jaˆ-eu nawˬ-euˬ nymˇ-ahˇ jawˇ-awˇ, aˬ yawꞈ maꞈ-euˬ shaˇ dawˬ-ahˇ naˇ haˬ-eu laꞈ kʼoeˇ, aˬ yawꞈ maꞈ-ahˇ iˬ baˇ pyehˬ nehˬ-awˬ. Nawˇ tiˬ gʼaˬ tehꞈ-ehˇ tsawˇ haˬ zaˬ aˬ joˆ-ehˇ noeˬ luꞈ-eu gaˇ kawˆ siˬ nya-eu meh. Nga maꞈ-euˬ aˬ poeˬ aˬ bawˇ deuˬ-ahˇ nawˬ neh biꞈ nehˬ-euˬ miˇ kʼahˬ laꞈ kʼoeˇ, nawˬ-euˬ tsawˇ haˬ deuˬ kʼaˇ jawˇ kʼoeˇ keuˆ ni, nawˬ-ahˇ yaw zeu baw-awˇ nawˬ-euˬ ehˇ dawˬ-ahˇ aˬ myah luꞈ naˇ haˬ geuꞈ nya ni, tsawˇ haˬ yawˬ gʼaˬ na luꞈ-ahˇ yawˬ ha neh kʼaˇ mˇ-euˬ loꞈ-ehˇ daˇ nehˬ-awˬ.

³¹

³²“Gaˇ mahˇ kaˬ-eu miˇ kʼahˬ-ahˇ jawˇ-eu boeˇ miˬ siˬ kʼaˬ tiˬ gʼaˬ na, nawˇ huiˬ dui mahˇ dui dui-eu gaˇ kawˆ, nawˇ baoˬ huiˬ dui dui-eu gaˇ kawˆ hawˇ-eu, nawˬ neh mˇ-euˬ gaˇ deuˬ gaˇ kawˆ ya gaˬ-awˇ, Uˬ duˬ tahˬ nymˇ nymˇ ma heu nymˇ-ahˇ laˇ-awˇ guiˬ lahˬ shaˇ ngeh,

³³aˬ yawꞈ-euˬ shaˇ dawˬ-ahˇ naˇ haˬ nehˬ-awˬ. Nawˬ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ nawˬ-ahˇ siˬ nya-awˇ nawˬ-euˬ ehˇ dawˬ naˇ haˬ geuꞈ-eu loꞈ-ehˇ, miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ kʼawꞈ, nawˬ-ahˇ siˬ nya-awˇ nawˬ-euˬ ehˇ dawˬ naˇ haˬ geuꞈ ni, Mˬ kʼoeˇ taˆ jawˇ-awˇ aˬ yawꞈ-euˬ shaˇ dawˬ-ahˇ naˇ haˬ nehˬ-eu laꞈ kʼoeˇ, aˬ yawꞈ kʼaˇ shaˇ-eu jeˬ ngehˬ gʼeh nehˬ-awˬ. Kʼoeˇ ngeh, ngaˬ neh tsoˆ taˬ-euˬ Uˬ duˬ tahˬ nymˇ nymˇ ma heu nymˇ-aˬ, nawˬ-ahˇ uˬ duˬ tahˬ-eu jawˇ duˬ pyeuꞈ-eu gaˇ kawˆ aˬ yawꞈ maꞈ siˬ nya tehꞈ-a.

³⁴“Muiˇ-eu deuˬ-ahˇ guiˇ deuˆ-iˇ-eu gʼaˇ duˬ, nawˬ-euˬ tsawˇ haˬ deuˬ-ahˇ nawˇ dawˬ biꞈ-awˇ bi iˇ ngeh, aˬ yawꞈ maꞈ aˬ geu gaˇ iˇ keuˆ-euˬ maˬ kaˬ, nawˬ neh tseˇ doˆ-euˬ meuˬ heu meuˬ hawˇ-eu ngaˬ neh tsoˆ taˬ-euˬ Uˬ duˬ tahˬ nymˇ nymˇ ma heu nymˇ jaˆ-eu paw aˬ yawꞈ maꞈ aˬ laꞈ cawˬ ja-awˇ guiˬ lahˬ shaˇ ngeh,

³⁵aˬ yawꞈ maꞈ-euˬ shaˇ dawˬ-ahˇ naˇ haˬ nehˬ-awˬ. Mˬ kʼoeˇ taˆ jawˇ-awˇ, aˬ yawꞈ maꞈ-euˬ shaˇ dawˬ-ahˇ naˇ haˬ nehˬ-eu laꞈ kʼoeˇ, aˬ yawꞈ maˬ guiˇ deuˆ-eu bi gʼaˬ leˇ-awˬ.

³⁶“Nawˬ-euˬ tsawˇ haˬ deuˬ nawˬ-ahˇ mˇ lehˬ-awˇ, iˬ baˇ maˬ ahˇ-eu tsawˇ haˬ tiˬ gʼaˬ-iˬ maˬ jawˇ-ehˇ pyeuꞈ-iˇ ngeh, nawˇ nui ma pehˇ laˇ-awˇ, muiˇ-eu deuˬ neh aˬ yawꞈ maꞈ-ahˇ bi deuˆ gʼaˬ-eu laꞈ kʼoeˇ, aˬ cawˬ-euˬ miˇ kʼahˬ-ahˇ aˬ yawꞈ maꞈ-ahˇ bi nyehꞈ gʼeh ngeh, kaˬ dui dui-eu miˇ kʼahˬ-ahˇ aˬ yawꞈ maꞈ ya iˇ keuˆ kʼawꞈ,

³⁷nawˬ-euˬ tsawˇ haˬ deuˬ-euˬ guiˬ lahˬ shaˇ dawˬ-ahˇ nawˇ naˇ haˬ nehˬ-awˬ. Miˇ kʼahˬ kʼoeˇ kʼahˬ laꞈ kʼoeˇ aˬ yawꞈ maꞈ iˬ baˇ noeˬ poˆ-awˇ, aˬ yawꞈ maꞈ maˬ tsaˬ maˬ dawˇ-eu laꞈ kʼoeˇ dehꞈ-euˬ miˇ neh iˬ baˇ ahˇ dui dui-eu gaˇ kawˆ ehˇ doˆ-eu laꞈ kʼoeˇ, nawˬ-ahˇ guiˬ lahˬ shaˇ ngeh, Sahˬpaˬ Miˬyehˇ-oˇ, aˬ yawꞈ maꞈ-euˬ shaˇ dawˬ-ahˇ naˇ haˬ nehˬ-awˬ.

³⁸Miˇ kʼahˬ kʼoeˇ kʼahˬ laꞈ kʼoeˇ aˬ yawꞈ maꞈ aˬ diˇ aˬ maˇ iˬ baˇ noeˬ poˆ-awˇ, nga maꞈ-euˬ aˬ poeˬ aˬ bawˇ deuˬ-ahˇ nawˬ neh biꞈ taˬ-euˬ miˇ kʼahˬ heu kʼahˬ, nawˬ neh tseˇ doˆ taˬ-euˬ meuˬ heu meuˬ hawˇ-eu, nawˬ-euˬ gʼaˇ duˬ ngaˬ neh tsoˆ taˬ-euˬ Uˬ duˬ tahˬ nymˇ nymˇ ma heu nymˇ jaˆ-eu paw aˬ yawꞈ maꞈ ciˬ pyawˇ-awˇ nawˬ-ahˇ guiˬ lahˬ shaˇ ngeh,

³⁹aˬ yawꞈ maꞈ-euˬ shaˇ dawˬ-ahˇ nawˇ naˇ haˬ nehˬ-awˬ. Mˬ kʼoeˇ taˆ jaˆ-eu nawˬ-euˬ nymˇ laꞈ kʼoeˇ aˬ yawꞈ maꞈ-euˬ shaˇ dawˬ-ahˇ naˇ haˬ-awˇ, aˬ yawꞈ maꞈ-ahˇ gʼawˬ shaˬ gaˬ-eu laꞈ kʼoeˇ nawˬ-euˬ tsawˇ haˬ deuˬ-euˬ iˬ baˇ dawˬ tawˆ luꞈ pyehˬ nehˬ-awˬ.

⁴⁰“Ngaˬ-eu Miˬyehˇ-oˇ, nga maꞈ-ahˇ haw ka leꞈ-awˇ, jawˇ duˬ heu tsahˇ-ahˇ shaˇ-euˬ guiˬ lahˬ shaˇ dawˬ-ahˇ naˇ haˬ nehˬ laꞈ-awˬ.

⁴¹Miˬyehˇ pyeuꞈ-eu Sahˬpaˬ Miˬyehˇ-oˇ, nymˬ-mˇ tuˇ laˇ-awˇ, nawˬ-euˬ baoˬ pyeuꞈ-eu Dawˬ ma saˇ jaˇ Bahˬ keuˆ nehˬ-ehˇ Uˬ duˬ tahˬ nymˇ nymˇ ma laꞈ kʼoeˇ uˇ le-awˇ, mˬ maˬ maˬ byaˆ zaˇ ziˇ jawˇ-awˬ. Piˇ ma deuˬ kʼaˇ mˇ kʼaˇ shaˇ-eu jeˬ-ahˇ nawˇ guiˬ lahˬ biꞈ-awˬ. Nawˬ-euˬ guiˬ lahˬ baˬ da neh, nawˬ-euˬ tsawˇ haˬ dawˬ tawˆ luꞈ laˬ kʼaˬ cehˇ luꞈ-uˇ.

⁴²Miˬyehˇ pyeuꞈ-eu Sahˬpaˬ Miˬyehˇ-oˇ, nawˬ neh tseˇ doˆ-euˬ sahˬ paˬ-ahˇ taˬ byehˇ dzeh nehˬ laꞈ. Nawˬ-euˬ zaˬ kʼaˆ Daˬbiˇ-ahˇ nawˇ gaˬ-euˬ gaˇ kawˆ-ahˇ taˬ ngehˇ nehˬ laꞈ.”[5]