Read Akha 2 Laˬsaˬbaˬ 8 Bible Online

2 Laˬsaˬbaˬ 8 - Akha bible

2 Laˬsaˬbaˬ 8

¹Sawˇlaˬmoˬ-aˬ, Uˬ duˬ tahˬ nymˇ nymˇ ma hawˇ-eu aˬ yawꞈ jawˇ-eu gʼaˇ duˬ sahˬ paˬ-euˬ hawˇ nymˇ-ahˇ, nyiˬ tseˇ kʼoꞈ tsoˆ-awˇ tsoˆ gʼaˬ-euˬ meh.

²Sahˬ paˬ Hiˇlamˬ neh aˬ yawꞈ-ahˇ biꞈ-euˬ meuˬ deuˬ-ahˇ aˬ yawꞈ paˇ tsoˆ muiˬ-awˇ, Iˇsaˬleˬlaˆ tsawˇ haˬ deuˬ-ahˇ bi jawˇ-iˇ-euˬ meh.

³Haˬmaˆ meuˬ gahˬ kaˬ hawˇ-eu, Zoˇbaˬ meuˬ gahˬ kaˬ-ahˇ aˬ yawꞈ deuˆ geuꞈ-euˬ meh.

⁴Kʼaˇ shuiꞈ deh yaˇ-ahˇ jaˆ-eu Paˬlaˬmeˬlaˇ meuˬ-ahˇ kʼawꞈ, meuˬ lahˇ ziꞈ dah ni aˬ yawꞈ gawˬ muiˬ-euˬ meh. Haˬmaˆ gahˬ kaˬ laꞈ kʼoeˇ, myawˬ gahˬ hawˇ-eu dzaˬ dzaˬ dawˇ dawˇ tawˬ taˬ-awˇ jeˬ hmˬ taˬ-eu gʼaˇ duˬ, gʼahˇ ceh tsaˬ-eu meuˬ dawˬ tawˆ luꞈ-ahˇ aˬ yawꞈ tsoˆ muiˬ-euˬ meh.

⁵Sawˇlaˬmoˬ neh paˇ tsoˆ muiˬ geuꞈ-euˬ meuˬ nui deuˬ-aˬ, meuˬ meuˬ lahˇ gawˬ ziꞈ taˬ-awˇ, meuˬ lahˇ laˇ gʼoˆ ziꞈ dah ni piˬ tehˬ ziꞈ nya-eu meuˬ nyiˬ meuˬ pyeuꞈ-eu Behˬhawˇleuˬ laꞈ taˆ meuˬ hawˇ-eu Behˬhawˇleuˬ laꞈ oˆ meuˬ,

⁶Baˬlaˆ meuˬ, aˬ yawꞈ neh myawˬ gahˬ hawˇ-eu dzaˬ dzaˬ dawˇ dawˇ tawˬ taˬ-awˇ jeˬ hmˬ-euˬ meuˬ dawˬ tawˆ luꞈ hawˇ-eu, aˬ yawꞈ-euˬ mahˬ deuˬ hawˇ-eu mahˬ laˆ lawˬ deuˬ bi jawˇ-euˬ meuˬ deuˬ meh. Yeˬluˇsaˬlehˬ meuˬ-ahˇ maˬ ehˇ, Leˬbaˬnoˬ miˇ kʼahˬ laꞈ kʼoeˇ maˬ ehˇ, aˬ yawꞈ kʼaˇ uˆ lahˇ keuˆ-eu miˇ kʼahˬ deuˬ doe ni maˬ ehˇ, aˬ yawꞈ neh kʼaˇ lehˬ hmˬ taˬ-euˬ loꞈ-ehˇ, meuˬ tsoˆ pu tsoˆ-eu gaˇ aˬ yawꞈ mˇ doˆ gʼeh-euˬ meh.

⁷Iˇsaˬleˬlaˆ tsawˇ haˬ deuˬ Kaˬnaˬ miˇ kʼahˬ-ahˇ jawˇ uˇ leˇ ngeh yamˬ-ahˇ, Iˇsaˬleˬlaˆ tsawˇ haˬ deuˬ neh maˬ bi sehꞈ jiˇ-ehˇ kʼaˇ dzeˇ-eu kʼoeˇ gaˇ jawˇ-eu tsawˇ jeuˬ deuˬ-euˬ zaˬ deuˬ uˆ deuˬ-ahˇ, Sawˇlaˬmoˬ neh myawˬ kʼaˆ bi mˇ-euˬ meh. Aˬ yawꞈ neh myawˬ kʼaˆ bi mˇ-euˬ deuˬ laꞈ kʼoeˇ ahˇ-eu tsawˇ jeuˬ deuˬ-aˬ, Heˬtaˆ tsawˇ jeuˬ, Aˬmoˬ tsawˇ jeuˬ, Paˬyehˇ tsawˇ jeuˬ, Hiˇbiˇ tsawˇ jeuˬ, Yeˬbuˇ tsawˇ jeuˬ heu deuˬ meh. Aˬ yawꞈ maꞈ-euˬ zaˬ deuˬ uˆ deuˬ iˬ nah keuˆ ni zaˬ kʼaˆ geuꞈ ka leꞈ-euˬ meh.

⁹Iˇsaˬleˬlaˆ tsawˇ haˬ deuˬ-ahˇ-aˬ, myawˬ kʼaˆ maˬ bi mˇ-ehˇ, yehˇ deuˬ, yaw huiˬ yaw mahˇ deuˬ, mahˬ laˆ lawˬ deuˬ-ahˇ haw-eu pyaˆ-eu aˬ yuiꞈ deuˬ hawˇ-eu, mahˬ dziˬ-eu yehˇ deuˬ bi geuꞈ-euˬ meh.

¹⁰Meuˬ tsoˆ pu tsoˆ-eu gaˇ paw taꞈ leˇ-awˇ, myawˬ kʼaˆ mˇ gaˇ haw-eu pyaˆ-eu yaw huiˬ yaw mahˇ nyiˬ yaˇ ngaˬ tseˇ gʼaˬ jawˇ-eu meh.

¹¹Sawˇlaˬmoˬ-aˬ, Iˇjiˇtuˆ sahˬ paˬ-euˬ aˬ buˇ pyeuꞈ-eu aˬ yawꞈ-euˬ miˬ zaˬ-ahˇ, Daˬbiˇ-euˬ meuˬ-ahˇ neh aˬ yawꞈ-euˬ gʼaˇ duˬ tsoˆ nehˬ taˬ-euˬ nymˇ-ahˇ bi jawˇ paˇ-iˇ-euˬ meh. Sawˇlaˬmoˬ ehˇ-eu, “Ngaˬ-euˬ miˬ zaˬ heu gʼaˬ Iˇsaˬleˬlaˆ miˇ kʼahˬ-euˬ sahˬ paˬ Daˬbiˇ-euˬ nymˇ-ahˇ jawˇ-eu maˬ tsaˬ-a. Aˬ jeˬ miˇ neh ehˇ naˇ, Dawˬ ma saˇ jaˇ Bahˬ keuˆ kʼaˇ bi jaˆ haw-euˬ jawˇ duˬ aˬ geu tsahˇ maˬ kaˬ, muiˬ-eu shawˇ-eu jawˇ duˬ pyeuꞈ-eu meh.”

¹²Sawˇlaˬmoˬ-aˬ, Uˬ duˬ tahˬ nymˇ nymˇ ma-euˬ mehˬ shi aˬ yawꞈ neh tsoˆ taˬ-euˬ lawˇ duˬ kʼoeˇ hmˬ kʼoeˇ taˆ, Sahˬpaˬ Miˬyehˇ-ahˇ lawˇ nehˬ shehˇ nehˬ-euˬ meh.

¹³Jawˇ nah ngeh nah maˬ ehˇ, la shuiꞈ lah-eu bawˬ-iˬ jahˇ ngeh nah maˬ ehˇ, tiˬ kʼoꞈ laꞈ kʼoeˇ keuˆ le-eu bawˬ-iˬ smˇ bawˬ-iˬ pyeuꞈ-eu, Dehˬ tseˬ maˬ ahˇ-eu kaˬ muˇ dzaˬ-eu Bawˬ-iˬ gʼeh-eu aˇ nah, Cehˇ laˆ luiˆ-eu Bawˬ-iˬ gʼeh-eu aˇ nah , Sehˬ gʼawˆ-euˬ Bawˬ-iˬ gʼeh-eu aˇ nah heu deuˬ-ahˇ maˬ ehˇ, muiˬ-eu shawˇ-eu aˇ nah yawˬ nah na luꞈ laꞈ kʼoeˇ, Moˇseˬ-euˬ Zahˇ dawˬ kʼoꞈ dawˬ laꞈ kʼoeˇ kʼaˇ ehˇ taˬ-euˬ loꞈ-ehˇ, miˬ dzaˬ dzah puiˆ-awˇ lawˇ-eu jeˬ aˬ yawꞈ lawˇ-euˬ meh.

¹⁴Aˬ yawꞈ-euˬ aˬ da Daˬbiˇ neh taˬ yaꞈ-euˬ zahˇ sahˇ kʼoꞈ-ahˇ caw teh-eu laꞈ kʼoeˇ, tiˬ nah saˇ-iˬ tiˬ nah gaˇ ya mˇ-eu piˇ ma deuˬ-ahˇ maˬ ehˇ, ja ceuˬ-eu caˇ dawˬ caˇ ngeh hawˇ-eu gaˇ mˇ ngeh, piˇ ma deuˬ-ahˇ ya caw ba-eu Leˬbiˇ tsawˇ haˬ deuˬ-ahˇ maˬ ehˇ, aˬ yawꞈ aˇ muˇ muˇ baw nehˬ taˬ-euˬ meh. Aˬ yawˬ nah yawꞈ, Uˬ duˬ tahˬ nymˇ nymˇ ma-euˬ lahˇ kʼehˬ aˬ yawꞈ kʼehˬ yawꞈ-ahˇ loꞈ piˇ-eu tsawˇ haˬ deuˬ-ahˇ kʼawꞈ, Miˬyehˇ-euˬ tsawˇ haˬ pyeuꞈ-eu Daˬbiˇ neh dawˬ biꞈ taˬ-euˬ loꞈ-ehˇ, aˇ muˇ muˇ baw nehˬ-euˬ meh.

¹⁵Myawˬ jeˬ hmˬ-eu nymˇ deuˬ-ahˇ taꞈ leˇ-eu gaˇ deuˬ hawˇ-eu, gaˇ nui deuˬ-ahˇ taꞈ leˇ-awˇ, piˇ ma deuˬ hawˇ-eu Leˬbiˇ tsawˇ haˬ deuˬ-ahˇ Daˬbiˇ neh mehˬ nehˬ tsoˆ nehˬ yaꞈ-euˬ loꞈ-ehˇ, tiˬ dawˬ-iˬ maˬ byehˇ yaꞈ ni mˇ doˆ gʼeh-euˬ meh.

¹⁶Nymˬ-mˇ poˆ jawˇ, Sawˇlaˬmoˬ neh kʼaˇ noeˬ taˬ-euˬ yawˬ jeˬ na luꞈ mˇ luiˆ jiˇ-euˬ meh. Uˬ duˬ tahˬ nymˇ nymˇ ma gawˬ dahˬ beh gaˇ neh, tsoˆ gʼaˬ gaˇ keuˆ ni, yawˬ jeˬ na luꞈ yaw muiˬ paˬ-ehˇ mˇ luiˆ gʼaˬ jiˇ-euˬ meh.

¹⁷Kʼoeˇ naˇ, Eˬdoˬ miˇ kʼahˬ laꞈ kʼoeˇ, Aˬgaˬbaˬ lehˇ kuˇ-eu iˬ ma laˆ shaˆ lahˇ gʼoꞈ-euˬ lawˇ deh-ahˇ jaˆ-eu saˇ baoˬ naˬ duˬ pyeuꞈ-eu Eˬzoˇgeˇbaˬ meuˬ hawˇ-eu Eˇlaˆ meuˬ-ahˇ Sawˇlaˬmoˬ iˇ-euˬ meh.

¹⁸Sahˬ paˬ Hiˇlamˬ-aˬ, iˬ ma laˆ shaˆ laꞈ kʼoeˇ iˇ haw laˇ haw-euˬ saˇ baoˬ kʼoeˇ taˆ gaˇ mˇ-eu aˬ yawꞈ-eu tsawˇ haˬ deuˬ hawˇ-eu, aˬ yawꞈ-euˬ yaw huiˬ yaw mahˇ deuˬ-ahˇ, saˇ baoˬ dziˬ-awˇ sahˬ paˬ Sawˇlaˬmoˬ jawˇ gaˇ bi oe-euˬ meh. Aˬ yawꞈ maꞈ-aˬ, Sawˇlaˬmoˬ-euˬ gaˇ mˇ-eu yaw huiˬ yaw mahˇ deuˬ nehˬ-ehˇ Awˇpiˇlaˆ miˇ kʼahˬ-ahˇ saˇ baoˬ dziˬ-awˇ iˇ-awˇ, Sawˇlaˬmoˬ gʼaˇ duˬ shuiˇ gʼoeˬ heˇ ngaˬ yaˇ jawꞈ-i dzehˬ ni tawˬ kʼoꞈ laꞈ-euˬ meh.