Read Akha Eˇzaˬlaˬ 10 Bible Online

Eˇzaˬlaˬ 10 - Akha bible

Eˇzaˬlaˬ 10

¹Eˇzaˬlaˬ ngoeˇ ngoeˇ-ehˇ iˬ baˇ kʼoeˇ deuˬ shaˇ pyehˬ-eu laꞈ kʼoeˇ Uˬ duˬ tahˬ nymˇ nymˇ ma mehˬ shi pawˬ tsuiꞈ paw dmˬ dmˬ-awˇ guiˬ lahˬ shaˇ luꞈ ngeh, Iˇsaˬleˬlaˆ tsawˇ jeuˬ kʼaˬ dzeˇ zaˬ deuˬ, zaˬ miˬ zaˬ deuˬ hawˇ-eu zaˬ deuˬ kʼawꞈ ngoeˇ ngoeˇ-ehˇ aˬ yawꞈ dawˬ peh uiˬ laˇ-euˬ meh.

²Kʼoeˇ naˇ, Eˇlamˬ aˇ jeuˬ Yeˬheˬlaˇ-euˬ aˬ li Sheˬkaˬniˇ gʼaˬ, Eˇzaˬlaˬ-ahˇ heu loꞈ-ehˇ ehˇ nehˬ-euˬ meh. “aˬ cawˬ tsawˇ jeuˬ-ahˇ sheuˬ dahˬ dzaˬ-eu laꞈ kʼoeˇ, Miˬyehˇ-ahˇ nga maꞈ puiˬ-euˬ ma. Ehˇ kʼawꞈ, Iˇsaˬleˬlaˆ tsawˇ jeuˬ gʼaˇ duˬ noeˬ tmˬ kʼaˇ za-a siˬ.

³Nymˬ-mˇ, miˬ zaˬ kʼoeˇ deuˬ hawˇ-eu aˬ yawꞈ maꞈ-euˬ zaˬ deuˬ-ahˇ byehˇ dzeh ma lehˇ aˬ dui-euˬ Miˬyehˇ-ahˇ nga maꞈ saˇ jaˇ dzaˬ ma. Nawˇ hawˇ-eu Miˬyehˇ-euˬ zahˇ dawˬ kʼoꞈ dawˬ-ahˇ yaw zeu baw-eu deuˬ neh ehˇ nehˬ laꞈ-euˬ loꞈ-ehˇ tehꞈ-ehˇ nga maꞈ mˇ ma. Miˬyehˇ-euˬ zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ nga maꞈ dehꞈ ma.

⁴Gaˇ heu hmˬ nawˬ-euˬ aˬ laꞈ laꞈ kʼoeˇ jaˆ-eu loꞈ-ehˇ nawˇ mˇ gʼeh-awˬ. Nga maꞈ nawˬ-eu mehˬ nah caw teh ma.”

⁵Kʼoeˇ naˇ, piˇ ma deuˬ kʼoeˇ taˆ aˬ yuiꞈ aˬ tsu geuꞈ-eu deuˬ-ahˇ maˬ ehˇ, Leˬbiˇ tsawˇ haˬ deuˬ kʼoeˇ taˆ aˬ yuiꞈ aˬ tsu geuꞈ-eu deuˬ-ahˇ maˬ ehˇ, Iˇsaˬleˬlaˆ tsawˇ haˬ dawˬ tawˆ luꞈ-ahˇ maˬ ehˇ, Sheˬkaˬniˇ kʼaˇ ehˇ-euˬ loꞈ-ehˇ mˇ ma lehˇ Eˇzaˬlaˬ neh saˇ jaˇ bi dzaˬ-euˬ meh.

⁶Kʼoeˇ naˇ, Uˬ duˬ tahˬ nymˇ nymˇ ma mehˬ shi neh aˬ yawꞈ doˆ-iˇ-awˇ, Eˇlaˬshiˆ-euˬ aˬ li Yeˬhawˇhaˬnaˬ-euˬ nymˇ-ahˇ iˇ-awˇ, Baˬbuˇloˬ miˇ kʼahˬ-ahˇ neh gʼoꞈ laˇ-euˬ tsawˇ haˬ deuˬ saˇ jaˇ maˬ jawˇ-eu gaˇ kawˆ ahˇ noeˬ shaˬ-eu laꞈ kʼoeˇ, tiˬ jeˬ-iˬ maˬ dzaˬ maˬ dawˇ ni uˬ ciꞈ ngoeˇ bya-euˬ meh.

⁷Baˬbuˇloˬ miˇ kʼahˬ-ahˇ neh gʼoꞈ laˇ-euˬ tsawˇ haˬ dawˬ tawˆ luꞈ Yeˬluˇsaˬlehˬ meuˬ-ahˇ ya uiˬ laˇ meh lehˇ, Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ doe ni bi tsaꞈ gaˬ doe-euˬ meh.

⁸Smˬ nah laꞈ kʼoeˇ maˬ laˇ keuˆ-eu tsawˇ haˬ-euˬ pyuˇ shuiˇ myawˬ gahˬ dawˬ tawˆ luꞈ yuˇ jiˇ nehˬ-awˇ, yaw sahˇ gʼaˬ-ahˇ kʼawꞈ, Baˬbuˇloˬ miˇ kʼahˬ-ahˇ neh gʼoꞈ laˇ-euˬ aˇ maꞈ aˇ muˇ laꞈ kʼoeˇ maˬ bi ahˇ ni teh doˆ ma lehˇ, yaw huiˬ yaw mahˇ deuˬ hawˇ-eu aˬ yuiꞈ aˬ tsu deuˬ neh bawˬ dzaˬ tsehˆ-euˬ gaˇ kawˆ bi gaˬ doe-iˇ-euˬ meh.

⁹Smˬ nah laꞈ kʼoeˇ Yuˇdaˆ miˇ kʼahˬ hawˇ-eu Beˬyaˬmiˬ miˇ kʼahˬ laꞈ kʼoeˇ jawˇ-eu tsawˇ haˬ dawˬ tawˆ luꞈ Yeˬluˇsaˬlehˬ meuˬ-ahˇ laˇ uiˬ jiˇ-euˬ meh. Ba la gʼoeˬ siˬ tiˬ siˬ nyiˬ tseˇ nah-ahˇ, tsawˇ haˬ dawˬ tawˆ luꞈ Uˬ duˬ tahˬ nymˇ nymˇ ma-euˬ poˆ ka uiˬ laˇ taˬ-euˬ meh. Uˬ yehˇ yaw kʼaˆ-ehˇ yehˇ-eu miˇ neh maˬ ehˇ, huiˬ dui dui-eu gaˇ gʼaˇ duˬ uiˬ laˇ taˬ-euˬ miˇ neh maˬ ehˇ, tsawˇ haˬ yawˬ gʼaˬ na luꞈ yaw dzuˬ dzuˬ-euˬ meh.

¹⁰Piˇ ma Eˇzaˬlaˬ tuˇ laˇ-awˇ aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. “Naw maꞈ saˇ jaˇ maˬ jawˇ-ehˇ aˬ cawˬ tsawˇ jeuˬ-ahˇ sheuˬ dahˬ dzaˬ-eu laꞈ kʼoeˇ, Iˇsaˬleˬlaˆ tsawˇ jeuˬ kʼoeˇ taˆ iˬ baˇ keuˆ le ni mˇ-euˬ meh.

¹¹Nymˬ-mˇ naw maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ naw maꞈ iˬ baˇ saˇ pyehˬ-awˇ, aˬ yawꞈ nui ma tsaˬ ni mˇ-awˬ. Aˬ dui-euˬ miˇ kʼahˬ-ahˇ jawˇ luꞈ-eu aˬ cawˬ tsawˇ jeuˬ nehˬ-ehˇ naw maꞈ dehꞈ gʼawˬ-awˇ, aˬ cawˬ tsawˇ jeuˬ pyeuꞈ-eu naw maꞈ-euˬ miˬ zaˬ deuˬ-ahˇ kʼoꞈ-awˬ.”

¹²Kʼoeˇ ngeh, tsawˇ haˬ kʼoeˇ deuˬ yaw kʼaˆ-ehˇ guˇ-awˇ heu loꞈ-ehˇ ehˇ kʼoꞈ nehˬ-euˬ meh. “Nawˇ kʼaˇ ehˇ-eu loꞈ-ehˇ nga maꞈ mˇ ma.

¹³Ehˇ kʼawꞈ, nga maꞈ tsawˇ haˬ aˇ dzehˬ myaˬ dzeuˇ-awˇ, uˬ yehˇ yehˇ ma ma luꞈ-eu miˇ neh, pu kaˬ-ahˇ maˬ paˇ jawˇ tehˬ coeˇ miˇ-a. Tiˬ nah nyiˬ nah laꞈ kʼoeˇ tehꞈ-ehˇ gaˇ heu hmˬ jahˇ jiˇ nya-eu jeˬ maˬ ngeuˇ-a. Aˬ jeˬ miˇ neh ehˇ naˇ, nga maꞈ laꞈ kʼoeˇ iˬ baˇ heu jeˬ mˇ taˬ-euˬ tsawˇ haˬ gʼawˬ mya ni jawˇ luꞈ-eu ma.

¹⁴Nga maꞈ kʼoeˇ taˆ yaw huiˬ yaw mahˇ geuꞈ luꞈ-eu deuˬ-ahˇ gaˇ heu hmˬ a nehˬ-awˇ, Yeˬluˇsaˬlehˬ meuˬ-ahˇ jawˇ-awˇ bi mˇ luiˆ-awˬ. Aˬ cawˬ tsawˇ jeuˬ zaˬ miˬ zaˬ-ahˇ sheuˬ taˬ-euˬ tsawˇ haˬ yawˬ gʼaˬ na luꞈ, nah paˇ paˇ taˬ-euˬ aˇ nah-ahˇ, yawˬ ha-euˬ meuˬ-ahˇ jawˇ-eu aˬ yuiꞈ aˬ tsu deuˬ hawˇ-eu yaˇ kʼaˬ daˇ-eu deuˬ sheuˬ-awˇ laˇ luꞈ-uˇ. Kʼoeˇ loꞈ-ehˇ jahˇ-eu laꞈ kʼoeˇ, gaˇ kawˆ heu hmˬ kʼoeˇ taˆ Miˬyehˇ nui ma pehˇ-eu jeˬ byoˆ-iˇ ni mˇ luꞈ-uˇ.”

¹⁵Meˬshuˇlamˬ hawˇ-eu Leˬbiˇ tsawˇ haˬ Shaˬbaˬdehˇ neh gʼaˬ biꞈ-euˬ deuˬ pyeuꞈ-eu Aˬsaˬheˬlaˇ-euˬ aˬ li Yawˇnaˆshaˬ hawˇ-eu Tiˇkaˬbaˬ-euˬ aˬ li Yaˬhaˬzehˇ aˬ nyaꞈ maˬ ngeuˇ naˇ, kʼoeˇ loꞈ-ehˇ mˇ ma lehˇ ehˇ-euˬ gaˇ nui ma maˬ tsaˬ ni laˆ tsoeˬ-eu tiˬ gʼaˬ-iˬ maˬ jawˇ-a.

¹⁶Baˬbuˇloˬ miˇ kʼahˬ-ahˇ neh gʼoꞈ laˇ-euˬ deuˬ-aˬ, ehˇ taˬ-euˬ loꞈ-ehˇ mˇ ma lehˇ nui ma tsaˬ-euˬ meh. Kʼoeˇ naˇ, piˇ ma Eˇzaˬlaˬ gʼaˬ aˇ jeuˬ aˇ ca deuˬ kʼoeˇ taˆ aˬ yuiꞈ aˬ tsu geuꞈ luꞈ-eu deuˬ laꞈ kʼoeˇ tsawˇ haˬ tseˇ doˆ-awˇ, tsawˇ myahˇ boꞈ ahˇ taˬ-euˬ meh. Ba la tseˇ siˬ tiˬ siˬ yaw beh nah-ahˇ, gaˇ kʼoeˇ deuˬ-ahˇ aˬ yawꞈ maꞈ pyehˆ tseˇ dahˬ beh-euˬ meh.

¹⁷Ba la smˇ siˬ laꞈ kʼoeˇ, aˬ cawˬ tsawˇ jeuˬ-ahˇ sheuˬ taˬ-euˬ tsawˇ haˬ kʼoeˇ deuˬ-euˬ gaˇ-ahˇ aˬ yawꞈ maꞈ pyehˆ tseˇ duˬ jiˇ-euˬ meh.

¹⁸aˬ cawˬ tsawˇ jeuˬ-ahˇ sheuˬ-euˬ tsawˇ haˬ deuˬ-euˬ jaˇ laˇ-aˬ, heu loꞈ-ehˇ meh. Piˇ ma aˇ jeuˬ aˇ ca deuˬ laꞈ kʼoeˇ aˬ cawˬ tsawˇ jeuˬ-ahˇ sheuˬ-euˬ deuˬ-aˬ, Yeˬhawˇzaˬdaˆ-euˬ aˬ li Yawˇshuˆ hawˇ-eu aˬ yawꞈ-euˬ mehˇ nmˇ deuˬ-euˬ zaˬ deuˬ uˆ deuˬ pyeuꞈ-eu Mawˇseˬyaˇ, Eˇliˇzaˬ, Yaˬliˆ hawˇ-eu, Geˬdaˬliˇ meh.

¹⁹Aˬ yawꞈ maꞈ miˬ zaˬ kʼoꞈ ma lehˇ saˇ jaˇ dzaˬ-awˇ, aˬ yawꞈ maꞈ-euˬ iˬ baˇ aˇ poeˬ yawˇ tiˬ mawˇ lawˇ nehˬ-euˬ meh.

²⁰Iˇmeˬlaˇ-euˬ zaˬ deuˬ uˆ deuˬ laꞈ kʼoeˇ, Haˬnaˬniˇ hawˇ-eu Zeˬbaˬdiˇ meh.

²¹Haˬlmˬ-euˬ zaˬ deuˬ uˆ deuˬ laꞈ kʼoeˇ, Mawˇseˬyaˇ, Eˇliˇyaˆ, Sheˬmaˇyaˬ, Yeˬheˬlaˇ hawˇ-eu Awˇziˇ meh.

²²Paˬshuˇlaˆ-euˬ zaˬ deuˬ uˆ deuˬ laꞈ kʼoeˇ, Eˇlawˇneˬ, Mawˇseˬyaˇ, Iˇshaˬmeˬlaˇ, Neˬdaˬneˬlaˇ, Yawˇzaˬbaˆ hawˇ-eu, Eˇlaˬsaˬ meh.

²³Leˬbiˇ tsawˇ haˬ laꞈ kʼoeˇ, aˬ cawˬ tsawˇ jeuˬ-ahˇ sheuˬ-euˬ deuˬ-aˬ, Yawˇzaˬbaˆ, Shiˇmiˇ, Geˬliˇtaˬ lehˇ kʼawꞈ kuˇ-eu Giˇlaˬ, Peˬdaˬhiˇ, Yuˇdaˆ hawˇ-eu Eˇliˇzaˬ meh.

²⁴Caˇ dawˬ caˇ-eu gaˇ mˇ-eu deuˬ laꞈ kʼoeˇ, aˬ cawˬ tsawˇ jeuˬ-ahˇ sheuˬ-euˬ gʼaˬ-aˬ, Eˇlaˬshiˆ meh. Uˬ duˬ tahˬ nymˇ nymˇ ma-ahˇ loꞈ-eu deuˬ laꞈ kʼoeˇ aˬ cawˬ tsawˇ jeuˬ-ahˇ sheuˬ-euˬ deuˬ-aˬ, Shaˬlmˬ, Teˬlmˬ hawˇ-eu Uˇliˆ meh.

²⁵Aˬ cawˬ tsawˇ jeuˬ-ahˇ sheuˬ-euˬ Iˇsaˬleˬlaˆ tsawˇ haˬ nui deuˬ-aˬ, Paˬloˆ-euˬ zaˬ deuˬ uˆ deuˬ laꞈ kʼoeˇ, Laˬmiˇ, Yeˬzuˇ, Maˬlaˬkiˇyaˬ, Miˇyaˬmeˬ, Eˇlaˬzaˬ, Maˬlaˬkiˇyaˬ hawˇ-eu Baˬnaˇyaˬ.

²⁶Eˇlamˬ-euˬ zaˬ deuˬ uˆ deuˬ laꞈ kʼoeˇ, Maˬtaˬniˇ, Zaˬkaˬliˇ, Yeˬheˬlaˇ, Aˬbaˬdiˇ, Yeˬlaˬmoˇ hawˇ-eu Eˇliˇyaˆ.

²⁷Zaˬtuˬ-euˬ zaˬ deuˬ uˆ deuˬ laꞈ kʼoeˇ, Eˇlawˇneˬ, Eˇlaˬshiˆ, Maˬtaˬniˇ, Yeˬlaˬmoˇ, Zaˬbaˆ hawˇ-eu Aˬziˇzaˬ.

²⁸Beˬbaiˬ-euˬ zaˬ deuˬ uˆ deuˬ laꞈ kʼoeˇ, Yeˬhawˇhaˬnaˬ, Haˬnaˬniˇ, Zaˬbaiˇ hawˇ-eu Aˬdaˬlai.

²⁹Baˬniˬ-euˬ zaˬ deuˬ uˆ deuˬ laꞈ kʼoeˇ, Meˬshuˇlamˬ, Maˬluꞈ, Aˬdaˬyaˇ, Yaˬshuˇbaˬ, Shaˬlaˆ hawˇ-eu Yeˬlaˬmoˇ.

³⁰Paˬhaˆmawˇbaˆ-euˬ zaˬ deuˬ uˆ deuˬ laꞈ kʼoeˇ, Aˬdaˬnaˬ, Sheˬlaˬlaˆ, Baˬnaˇyaˬ, Mawˇseˬyaˇ, Maˬtaˬniˇ, Baˬzeˬlaˇ, Biˇnuiˇ hawˇ-eu Maˬnaˇseˬ.

³¹Haˬlmˬ-euˬ zaˬ deuˬ uˆ deuˬ laꞈ kʼoeˇ, Eˇliˇzaˬ, Iˇshiˇyaˬ, Maˬlaˬkiˇyaˬ, Sheˬmaˇyaˬ, Shuˇmoˬ,

³²Beˬyaˬmiˬ, Maˬluꞈ hawˇ-eu Sheˬmaˬliˇ.

³³Haˬshuˬ-euˬ zaˬ deuˬ uˆ deuˬ laꞈ kʼoeˇ, Maˬteˬnehˇ, Maˬtaˬtahˇ, Zaˬbaˆ, Eˇliˇpaˬlehˇ, Yeˬlaˬmehˇ, Maˬnaˇseˬ hawˇ-eu Shiˇmiˇ.

³⁴Baˬniˬ-euˬ zaˬ deuˬ uˆ deuˬ laꞈ kʼoeˇ, Mawˇdehˇ, Aˬmaˬlamˬ, Gʼoeˇlaˆ,

³⁵Baˬnaˇyaˬ, Beˬdiˇ, Sheˬluˇhi,

³⁶Baˬniˇyaˆ, Meˬlaˬmoˇ, Eˇlaˬshiˆ,

³⁷Maˬtaˬniˇ, Maˬteˬnehˇ hawˇ-eu Yaˬsuˆ.

³⁸Biˇnuiˇ-euˬ zaˬ deuˬ uˆ deuˬ laꞈ kʼoeˇ, Shiˇmiˇ,

³⁹Sheˬleˬmiˇ, Naˬdaˬ, Aˬdaˬyaˇ,

⁴⁰Maˬkaˬnaˬdeˬbehˇ, Shaˬshah, Shaˬlehˇ,

⁴¹Aˬzaˬyeˬlaˇ, Sheˬleˬmiˇ, Sheˬmaˬliˇ,

⁴²Shaˬlmˬ, Aˬmaˬliˇ hawˇ-eu Yoˇsehˆ.

⁴³Neˬboˬ-euˬ zaˬ deuˬ uˆ deuˬ laꞈ kʼoeˇ, Yeˬyeˬlaˇ, Maˬtiˇdiˇ, Zaˬbaˆ, Zeˬbiˇnaˬ, Yaˬdah, Yawˇlaˆ hawˇ-eu Baˬnaˇyaˬ heu deuˬ meh.

⁴⁴Heu deuˬ dawˬ tawˆ luꞈ aˬ cawˬ tsawˇ jeuˬ-ahˇ sheuˬ dahˬ dzaˬ-awˇ, tiˬ paˆ na deuˬ zaˬ kʼawꞈ jawˇ le gʼaˬ-euˬ meh.