Read Akha Eˇzaˬlaˬ 4 Bible Online

Eˇzaˬlaˬ 4 - Akha bible

Eˇzaˬlaˬ 4

¹Baˬbuˇloˬ miˇ kʼahˬ-ahˇ neh gʼoꞈ laˇ-euˬ tsawˇ haˬ deuˬ Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma tsoˆ luꞈ-eu gaˇ kawˆ-ahˇ, Yuˇdaˆ tsawˇ jeuˬ hawˇ-eu Beˬyaˬmiˬ tsawˇ jeuˬ-ahˇ muiˇ-eu tsawˇ haˬ deuˬ ya gaˬ-euˬ meh.

²Kʼoeˇ miˇ neh, Zeˬluˇbaˬbeˬlaˇ hawˇ-eu tsawˇ jeuˬ tsawˇ ca deuˬ kʼoeˇ taˆ aˬ yuiꞈ geuꞈ-eu deuˬ jawˇ gaˇ aˬ yawꞈ maꞈ iˇ-awˇ, heu loꞈ-ehˇ ehˇ nehˬ-euˬ meh. “Nga maꞈ jiˇ naw maꞈ Uˬ duˬ tahˬ nymˇ nymˇ ma tsoˆ gaˇ caw ba ma. Nga maꞈ gʼeh naw maꞈ uˬ duˬ tahˬ luꞈ-eu Miˬyehˇ-ahˇ uˬ duˬ tahˬ luꞈ-awˇ, Aˬshuˇliˆ sahˬ paˬ Eˇsaˬhaˬdoˬ neh nga maꞈ-ahˇ heu gaˇ bi jawˇ laˇ ngeh neh, naw maꞈ-euˬ Miˬyehˇ-ahˇ nga maꞈ lawˇ luꞈ shehˇ luꞈ-eu ma.”

³Zeˬluˇbaˬbeˬlaˇ, Yawˇshuˆ hawˇ-eu, tsawˇ jeuˬ tsawˇ ca deuˬ kʼoeˇ taˆ aˬ yuiꞈ aˬ tsu geuꞈ-eu deuˬ aˬ yawꞈ maꞈ-ahˇ heu loꞈ-ehˇ ehˇ kʼoꞈ nehˬ-euˬ meh. “Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ gʼaˇ duˬ Uˬ duˬ tahˬ nymˇ nymˇ ma tsoˆ gaˇ naw maꞈ caw ba nehˬ laꞈ-eu maˬ loˬ-a. Paˇshaˇ sahˬ paˬ Guˇluˆ neh nga maꞈ-ahˇ dawˬ biꞈ taˬ-euˬ loꞈ-ehˇ, nga maꞈ yawˬ haˇ yawˬ ha tsoˆ ma.”

⁴Kʼoeˇ naˇ, miˇ kʼahˬ kʼoeˇ kʼahˬ-ahˇ jawˇ luꞈ-eu aˬ cawˬ tsawˇ jeuˬ kʼoeˇ deuˬ-aˬ, Yuˇdaˆ tsawˇ haˬ deuˬ Uˬ duˬ tahˬ nymˇ nymˇ ma maˬ ya tsoˆ ni ja guˆ ja guˆ-ehˇ laˆ tsoeˬ-euˬ meh.

⁵Yuˇdaˆ tsawˇ haˬ kʼoeˇ loꞈ-ehˇ mˇ luꞈ gaˇ laˆ tsoeˬ ni, Paˇshaˇ tsawˇ haˬ pyeuꞈ-eu miˇ kʼahˬ-ahˇ uˆ lahˇ-eu yaw huiˬ yaw mahˇ deuˬ-ahˇ kʼawꞈ, aˬ yawꞈ maꞈ laꞈ nmꞈ nmꞈ nehˬ-euˬ meh. Sahˬ paˬ Guˇluˆ uˆ lahˇ-eu yamˬ-ahˇ neh sahˬ paˬ Daˬliˇ uˆ lahˇ-eu yamˬ-ahˇ keuˆ ni, aˬ yawꞈ maꞈ kʼoeˇ loꞈ-ehˇ laˆ bahˬ laˆ bahˬ-ehˇ jawˇ-euˬ meh.

⁶Paˇshaˇ sahˬ paˬ Dzeuˬsehˆ[2] uˆ lahˇ dahˬ beh ngeh yamˬ-ahˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ muiˇ-eu deuˬ, aˬ yawꞈ maꞈ-euˬ gaˇ kawˆ sahˬ boꞈ boꞈ-awˇ daˬ-euˬ meh.

⁷Paˇshaˇ sahˬ paˬ Aˬtaˬdzeuˬsehˆ gʼaˬ uˆ lahˇ-eu yamˬ paˇ keuˆ laˇ ngeh kʼawꞈ, Biˇshaˬlamˬ, Miˇdaˬleˬdaˇ, Taˬbeˬlaˇ aˬ ha maꞈ hawˇ-eu aˬ ha maꞈ-euˬ cawˬ deuˬ neh, sahˬ paˬ Aˬtaˬdzeuˬsehˆ-ahˇ sahˬ boꞈ tiˬ taꞈ paˇ boꞈ daˬ-euˬ meh. Sahˬ boꞈ kʼoeˇ taꞈ-ahˇ Aˬlaˬmiˇ[3] dawˬ zmˬ-awˇ, Aˬlaˬmiˇ sahˬ boꞈ neh boꞈ taˬ-euˬ meh.

⁸Yuˇdaˆ miˇ kʼahˬ-ahˇ bi uˆ lahˇ-euˬ gʼaˬ pyeuꞈ-eu Leˬhamˬ hawˇ-eu jaˇ laˇ yuˇ-eu paw aˬ yuiꞈ geuꞈ luꞈ-eu Shmˇshehˆ aˬ nyaꞈ kʼawꞈ, Yeˬluˇsaˬlehˬ meuˬ gaˇ kawˆ sahˬ boꞈ boꞈ-awˇ, Aˬtaˬdzeuˬsehˆ-ahˇ daˬ-euˬ meh. Sahˬ boꞈ kʼoeˇ taꞈ heu loꞈ-ehˇ boꞈ taˬ-euˬ meh.

⁹“Sahˬ boꞈ heu taꞈ-ahˇ boꞈ-euˬ deuˬ-aˬ, Yuˇdaˆ miˇ kʼahˬ-ahˇ uˆ lahˇ-eu Leˬhamˬ, jaˇ laˇ yuˇ-eu paw aˬ yuiꞈ geuꞈ luꞈ-eu Shmˇshehˆ aˬ nyaꞈ hawˇ-eu aˬ nyaꞈ-euˬ cawˬ deuˬ, yaˇ kʼaˬ daˇ-eu deuˬ uˬ taꞈ, Ehˇlehˆ meuˬ, Baˬbuˇloˬ meuˬ, Eˇlamˬ miˇ kʼahˬ-ahˇ jaˆ-eu Suˇsaˬ meuˬ heu deuˬ-ahˇ neh laˇ-euˬ yaw huiˬ yaw mahˇ geuꞈ luꞈ-eu deuˬ hawˇ-eu,

¹⁰baoˬ huiˬ-awˇ tsawˇ myahˇ doˆ-eu Aˬshuˇbaˬniˬpaˆ neh sheuˬ laꞈ-awˇ, Saˬmaˬliˆ meuˬ hawˇ-eu Uˇpaˬlaˇlawˇ baˬ-euˬ nahˇ ma ga kʼehˬ paw miˇ kʼahˬ-ahˇ[4] bi jawˇ-euˬ deuˬ pyeuꞈ-eu ma.”

¹¹Boꞈ taˬ-euˬ gaˇ kawˆ-aˬ, heu loꞈ-ehˇ meh. “Sahˬ paˬ Aˬtaˬdzeuˬsehˆ jawˇ gaˇ, Uˇpaˬlaˇ lawˇ baˬ nahˇ ma ga kʼehˬ paw jawˇ-eu nawˬ-euˬ zaˬ kʼaˆ deuˬ sahˬ boꞈ boꞈ ahˇ leꞈ-eu ma.

¹²“Sahˬ paˬ-oˇ, nawˇ jawˇ gaˇ neh laˇ-euˬ Yuˇdaˆ tsawˇ haˬ kʼoeˇ deuˬ Yeˬluˇsaˬlehˬ meuˬ-ahˇ jawˇ uˇ leˇ-awˇ, nawˬ-ahˇ puiˬ-eu meuˬ pyeuꞈ-eu haiˬ-eu meuˬ kʼoeˇ meuˬ-ahˇ paˇ tsoˆ muiˬ luꞈ-eu gaˇ kawˆ nawˬ-ahˇ bi siˬ-eu ma. Aˬ yawꞈ maꞈ meuˬ meuˬ lahˇ paˇ gawˬ muiˬ luꞈ-awˇ, gawˬ gʼaˬ-eu keuˆ laˇ-euˬ meh.

¹³Sahˬ paˬ-oˇ, meuˬ kʼoeˇ meuˬ-ahˇ paˇ tsoˆ muiˬ gʼaˬ-awˇ, meuˬ meuˬ lahˇ paˇ gawˬ muiˬ gʼaˬ naˇ, tsawˇ haˬ kʼoeˇ deuˬ nawˬ-ahˇ kawˬ maˬ paˇ doˆ ni byehˇ-awˇ, nawˇ kawˬ taꞈ za-eu pyuˇ paw teˬ dui dui-iˇ tehꞈ-a.

¹⁴Nga maꞈ-aˬ, nawˬ-euˬ laꞈ oˆ gaˇ mˇ-eu deuˬ pyeuꞈ-eu loꞈ-ehˇ, kʼoeˇ loꞈ-ehˇ maˬ bi pyeuꞈ laˇ mawꞈ-eu miˇ neh, heu loꞈ-ehˇ ehˇ gaˬ-eu ma.

¹⁵Nawˬ-euˬ aˬ poeˬ aˬ bawˇ deuˬ neh boꞈ ahˇ taˬ yaꞈ-euˬ gaˇ kawˆ deuˬ laꞈ kʼoeˇ bi poˆ haw naˇ, Yeˬluˇsaˬlehˬ meuˬ-aˬ, aˇ hu ba neh sahˬ paˬ sahˬ ma deuˬ-ahˇ bahˬ-eu muˆ-eu meuˬ pyeuꞈ-awˇ, kʼoeˇ gaˇ jawˇ-eu tsawˇ haˬ deuˬ-ahˇ uˆ lahˇ-eu shaˬ dui dui-eu miˇ neh, meuˬ kʼoeˇ meuˬ-ahˇ laˆ luˬ laˆ seˇ nehˬ-euˬ gaˇ kawˆ boꞈ taˬ-euˬ gaˇ ya mawˇ tehꞈ-a.

¹⁶Kʼoeˇ miˇ neh, sahˬpaˬ-oˇ, meuˬ kʼoeˇ meuˬ-ahˇ aˬ yawꞈ maꞈ aˬ diˇ aˬ maˇ tsoˆ muiˬ gʼaˬ-awˇ, meuˬ meuˬ lahˇ gawˬ ziꞈ gʼaˬ naˇ, Uˇpaˬlaˇ lawˇ baˬ nahˇ ma ga kʼehˬ paw jaˆ-eu miˇ kʼahˬ-ahˇ nawˇ maˬ haw lahˇ nya-ehˇ pyeuꞈ laˇ tehꞈ-a.”

¹⁷Sahˬ paˬ Daˬliˇ gʼaˬ heu loꞈ-ehˇ paˇ boꞈ kʼoꞈ nehˬ-euˬ meh. “Yuˇdaˆ miˇ kʼahˬ-ahˇ uˆ lahˇ-eu gʼaˬ pyeuꞈ-eu Leˬhamˬ, jaˇ laˇ yuˇ-eu paw aˬ yuiꞈ geuꞈ-eu Shmˇshehˆ hawˇ-eu, Saˬmaˬliˆ meuˬ hawˇ-eu Uˇpaˬlaˇ lawˇ baˬ nahˇ ma ga kʼehˬ paw miˇ kʼahˬ-ahˇ jawˇ-eu naw nyaꞈ-euˬ cawˬ deuˬ-ahˇ ngaˇ sahˬ boꞈ boꞈ ahˇ laꞈ-eu ma. Naw maꞈ dawˬ tawˆ luꞈ yaw muiˬ jawˇ saˇ doˆ luꞈ-uˇ.

¹⁸“Naw maꞈ neh boꞈ laꞈ-eu sahˬ boꞈ kʼoeˇ taꞈ, dawˬ tsuiꞈ yuˇ doˆ-awˇ ngaˬ-euˬ mehˬ shi bi gui mehˬ gʼaˬ-euˬ ma.

¹⁹Ngaˇ dawˬ biꞈ-awˇ, aˇ hu boꞈ ahˇ taˬ-euˬ gaˇ kawˆ deuˬ-ahˇ bi poˆ tseˇ duˬ haw ngeh, Yeˬluˇsaˬlehˬ meuˬ kʼoeˇ meuˬ aˇ hu ba neh sahˬ paˬ sahˬ ma deuˬ-ahˇ puiˬ-awˇ, miˇ kʼahˬ zahˇ sahˇ kʼoꞈ-ahˇ bahˬ-eu tsawˇ haˬ deuˬ hawˇ-eu laˆ suˬ saˬ nya-eu tsawˇ haˬ tiˬ byah ni jawˇ luꞈ-eu gaˇ kawˆ pyehˆ tseˇ duˬ-euˬ ma.

²⁰Uˇpaˬlaˇ lawˇ baˬ nahˇ ma ga kʼehˬ paw jaˆ-eu miˇ kʼahˬ kʼahˬ lah ni-ahˇ uˆ lahˇ-eu laꞈ kʼoeˇ kawˬ taꞈ dzaˬ-euˬ baoˬ huiˬ-eu sahˬ paˬ deuˬ kʼawꞈ, meuˬ kʼoeˇ meuˬ laꞈ kʼoeˇ aˇ hu jawˇ-euˬ meh.

²¹Kʼoeˇ miˇ neh, ngaˬ-euˬ dawˬ maˬ gaˬ keuˆ laˇ kʼoeˇ keuˆ ni, meuˬ kʼoeˇ meuˬ maˬ paˇ tsoˆ muiˬ ni naˬ-eu gʼaˇ duˬ, tsawˇ haˬ kʼoeˇ deuˬ-ahˇ naw maꞈ dawˬ biꞈ nehˬ-awˬ.

²²Ngaˬ-euˬ miˇ kʼahˬ-ahˇ deuˬ laˇ-eu gaˇ kʼoeˇ maˬ paˇ bi mˇ ni tiˬ poˆ tehꞈ-ehˇ bi naˬ-awˬ.”

²³Leˬhamˬ hawˇ-eu Shmˇshehˆ aˬ nyaꞈ hawˇ-eu aˬ nyaꞈ-euˬ cawˬ deuˬ-ahˇ Aˬtaˬdzeuˬsehˆ neh boꞈ ahˇ laꞈ-euˬ sahˬ boꞈ kʼoeˇ taꞈ gui mehˬ nehˬ ngeh, aˬ yawꞈ maꞈ Yeˬluˇsaˬlehˬ meuˬ-ahˇ yaw kawˇ-ehˇ le-awˇ, Yuˇdaˆ tsawˇ haˬ deuˬ-ahˇ meuˬ maˬ paˇ bi tsoˆ muiˬ ni laˆ tsoeˬ-euˬ meh.

²⁴Kʼoeˇ miˇ neh, Paˇshaˇ sahˬ paˬ Daˬliˇ uˆ lahˇ-eu nyiˬ kʼoꞈ tiˬ kʼoꞈ-ahˇ keuˆ ni, Uˬ duˬ tahˬ nymˇ nymˇ ma tsoˆ muiˬ-eu gaˇ kʼawˆ maˬ mˇ nya ni byehˇ taˬ-euˬ meh.