Read Akha Eˇzaˬlaˬ 6 Bible Online

Eˇzaˬlaˬ 6 - Akha bible

Eˇzaˬlaˬ 6

¹Kʼoeˇ naˇ, Baˬbuˇloˬ meuˬ-ahˇ bi jaˆ-euˬ sahˬ paˬ-euˬ sahˬ boꞈ paˇ dmˬ-ahˇ poˆ tseˇ haw-eu gʼaˇ duˬ, sahˬ paˬ Daˬliˇ dawˬ biꞈ-euˬ meh.

²Ehˇ kʼawꞈ, Meˬdiˇ miˇ kʼahˬ Eˇbaˬtaˬnaˬ meuˬ-ahˇ sahˬ boꞈ tiˬ yoˆ mawˇ-euˬ meh. Sahˬ boꞈ kʼoeˇ yoˆ laꞈ kʼoeˇ heu loꞈ-ehˇ boꞈ taˬ-euˬ meh.

³“Sahˬ paˬ Guˇluˆ sahˬ paˬ geuꞈ-awˇ uˆ lahˇ beh beh-euˬ kʼoꞈ-ahˇ, Yeˬluˇsaˬlehˬ meuˬ-ahˇ jaˆ-eu Uˬ duˬ tahˬ nymˇ nymˇ ma bi tsoˆ muiˬ-awˇ, lawˇ-eu shehˇ-eu jeˬ kʼoeˇ gaˇ paˇ bi mˇ-eu gʼaˇ duˬ dawˬ biꞈ-euˬ meh. Uˬ duˬ tahˬ nymˇ nymˇ ma-ahˇ yaw goˇ paw tseˇ ngaˬ lmˇ hawˇ-eu yaw jeˇ paw tseˇ ngaˬ lmˇ byah ni tsoˆ-awˬ lehˇ ehˇ taˬ-euˬ meh.

⁴Kaˇ pyawˇ gawˬ gaˇ kʼaˬ lo tsaˬ byaˆ smˬ cehˆ kaˬ-ahˇ daˇ kawˬ tiˬ cehˆ gawˬ ahˇ-awˇ ya tsoˆ meh lehˇ ehˇ taˬ-euˬ meh. Jiˇ leˇ-euˬ pyuˇ dawˬ tawˆ luꞈ, sahˬ paˬ-euˬ pyuˇ shuiˇ myawˬ gahˬ laꞈ kʼoeˇ ya yuˇ doˆ meh lehˇ ehˇ taˬ-euˬ meh.

⁵Yeˬluˇsaˬlehˬ meuˬ Uˬ duˬ tahˬ nymˇ nymˇ ma laꞈ kʼoeˇ jaˆ gaˇ sahˬ paˬ Neˬbuˬkaˬneˬzaˬ neh yuˇ kʼoꞈ laꞈ-awˇ Baˬbuˇloˬ meuˬ-ahˇ bi jaˆ-euˬ shuiˇ hawˇ-eu pyuˇ keu ka dawˬ tawˆ luꞈ, yaw beh jaˆ-euˬ tsahˇ pyeuꞈ-eu Yeˬluˇsaˬlehˬ meuˬ Uˬ duˬ tahˬ nymˇ nymˇ ma-ahˇ ya bi yuˇ kʼoꞈ gʼeh meh lehˇ ehˇ taˬ-euˬ meh.”

⁶Kʼoeˇ naˇ, sahˬ paˬ Daˬliˇ heu loꞈ-ehˇ sahˬ boꞈ boꞈ kʼoꞈ nehˬ-euˬ meh. “Uˇpaˬlaˇ lawˇ baˬ nahˇ ma ga kʼehˬ paw miˇ kʼahˬ-ahˇ uˆ lahˇ-eu gʼaˬ pyeuꞈ-eu Taˬteˬnehˇ, Sheˬdaˬbawˇzaˬnehˇ hawˇ-eu naw nyaꞈ-euˬ cawˬ deuˬ jawˇ gaˇ heu loꞈ-ehˇ sahˬ boꞈ boꞈ ahˇ laꞈ-eu ma. Uˬ duˬ tahˬ nymˇ nymˇ ma tsoˆ gaˇ maˬ iˇ ni jawˇ-awˬ.

⁷Miˬyehˇ-euˬ Uˬ duˬ tahˬ nymˇ nymˇ ma tsoˆ-eu gaˇ-ahˇ maˬ laˆ bahˬ ni jawˇ-awˬ. Yuˇdaˆ miˇ kʼahˬ-ahˇ uˆ lahˇ-eu gʼaˬ hawˇ-eu Yuˇdaˆ tsawˇ haˬ aˬ yuiꞈ aˬ tsu deuˬ Miˬyehˇ-euˬ Uˬ duˬ tahˬ nymˇ nymˇ ma kʼoeˇ nymˇ-ahˇ aˬ yawꞈ yaw oeˇ tsahˇ-ahˇ tsoˆ luꞈ-uˇ.

⁸Aˬ yawꞈ maꞈ kʼoeˇ loꞈ-ehˇ tsoˆ gaˇ caw ba nehˬ-awˬ lehˇ ngaˇ naw maꞈ-ahˇ dawˬ biꞈ-eu ma. Gaˇ maˬ tsehˆ leˇ ni mˇ daˆ leꞈ nya ni, kʼoeˇ gaˇ jiˇ leˇ-euˬ pyuˇ deuˬ-ahˇ, Uˇpaˬlaˇ lawˇ baˬ nahˇ ma ga kʼehˬ paw miˇ kʼahˬ-ahˇ taꞈ za-euˬ sahˬ paˬ-euˬ pyuˇ laꞈ kʼoeˇ yuˇ doˆ-awˇ yaw kawˇ-ehˇ biꞈ nehˬ-awˬ.

⁹Aˬ yawꞈ nah yawꞈ Yeˬluˇsaˬlehˬ meuˬ-ahˇ jawˇ-eu piˇ ma deuˬ loˬ nya lehˇ kʼaˇ ehˇ-eu jeˬ-ahˇ tiˬ jeˬ-iˬ maˬ bi teˬ-iˇ ni biꞈ nehˬ-awˬ. Miˬ dzaˬ dzah puiˆ-awˇ mˬ taˆ Miˬyehˇ-ahˇ lawˇ nehˬ-eu gʼaˇ duˬ loˬ-eu mawˇ neˇ mawˇ gaw zaˬ deuˬ, yawˇ deuˬ, yawˇ zaˬ deuˬ maˬ ehˇ, cehˇ, saˬ deuꞈ, aˬ gaꞈ dzaˇ uiˇ hawˇ-eu saˬ loˬ tsiˇ maˬ ehˇ, aˬ yawꞈ nah yawꞈ kʼaˇ shaˇ-eu loꞈ-ehˇ biꞈ-awˬ.

¹⁰Mˬ taˆ Miˬyehˇ nui ma tsaˬ-eu lawˇ-eu shehˇ-eu jeˬ aˬ yawꞈ maꞈ mˇ-awˇ, ngaˇ hawˇ-eu ngaˬ li deuˬ kʼoeˇ taˆ guiˬ lahˬ biꞈ nehˬ laꞈ ni aˬ yawꞈ maꞈ guiˬ lahˬ bi shaˇ-eu gʼaˇ duˬ, aˬ yawꞈ maꞈ-ahˇ kʼoeˇ loꞈ-ehˇ caw ba nehˬ-awˬ.

¹¹Ngaˬ-euˬ ehˇ dawˬ-ahˇ maˬ naˇ haˬ geuꞈ-eu tsawˇ haˬ jawˇ naˇ, aˬ yawꞈ-euˬ nymˇ nyoeˇ ngawˬ kʼehꞈ-awˇ, daˇ ceh pyaꞈ ceh-awˇ, aˬ yawꞈ-euˬ gʼawˇ mawˇ-ahˇ daˇ siˇ siˇ byoe nehˬ-awˬ. Aˬ yawꞈ-euˬ nymˇ-ahˇ kʼawꞈ deh byaˆ-awˇ, aˬ nyoˬ ceˬ ceˬ bymˇ taˬ-euˬ loꞈ-ehˇ bi jaˆ-awˬ.

¹²Dawˬ heu dawˬ-ahˇ puiˬ-awˇ Uˬ duˬ tahˬ nymˇ nymˇ ma kʼoeˇ nymˇ-ahˇ laˆ cawˆ-eu lehˇ kʼaˇ leh jeh-eu sahˬ paˬ aˬ geu gʼaˬ-ahˇ maˬ kaˬ, Yeˬluˇsaˬlehˬ meuˬ-ahˇ aˬ yawꞈ-ahˇ uˬ duˬ tahˬ-eu jawˇ duˬ bi pyeuꞈ-eu lehˇ tsaˬ tsoˆ-euˬ Miˬyehˇ neh aˇ yaˬ bi yuˇ dzeh luꞈ-uˇ. Ngaˇ Daˬliˇ dawˬ heu dawˬ biꞈ-eu ma. Tiˬ pawꞈ-iˬ maˬ bi dzeˇ ni naˇ haˬ geuꞈ-awˬ.”

¹³Kʼoeˇ naˇ, Uˇpaˬlaˇ lawˇ baˬ nahˇ ma ga kʼehˬ paw miˇ kʼahˬ-ahˇ uˆ lahˇ-eu gʼaˬ pyeuꞈ-eu Taˬteˬnehˇ, Sheˬdaˬbawˇzaˬnehˇ hawˇ-eu aˬ nyaꞈ-euˬ cawˬ yaw huiˬ yaw mahˇ dawˬ tawˆ luꞈ, sahˬ paˬ Daˬliˇ neh dawˬ kʼaˇ biꞈ nehˬ-euˬ loꞈ-ehˇ mˇ byah-euˬ meh.

¹⁴Miˬyehˇ gʼaˇ duˬ ngehˬ dah-eu nyiˬ gʼaˬ pyeuꞈ-eu Haˬgaiˇ hawˇ-eu Zaˬkaˬliˇ aˬ nyaꞈ neh gʼaˬ biꞈ nehˬ-euˬloꞈ-ehˇ, Yuˇdaˆ tsawˇ haˬ aˬ yuiꞈ aˬ tsu deuˬ Uˬ duˬ tahˬ nymˇ nymˇ ma tsoˆ-eu gaˇ-ahˇ tiˬ tiˆ saˇ-iˬ tiˬ tiˆ mˇ daˆ leꞈ-euˬ meh. Iˇsaˬleˬlaˆ-euˬ Miˬyehˇ hawˇ-eu Paˇshaˇ sahˬ paˬ deuˬ pyeuꞈ-eu Guˇluˆ, Daˬliˇ hawˇ-eu Aˬtaˬdzeuˬsehˆmaꞈ neh dawˬ biꞈ-euˬ loꞈ-ehˇ, Uˬ duˬ tahˬ nymˇ nymˇ ma-ahˇ aˬ yawꞈ maꞈ tsoˆ gʼaˬ-euˬ meh.

¹⁵Sahˬ paˬ Daˬliˇ uˆ lahˇ-eu koꞈ kʼoꞈ tiˬ kʼoꞈ Aˬdaˬlaˬ ba la smˬ nah tiˬ nah-ahˇ, aˬ yawꞈ maꞈ Uˬ duˬ tahˬ nymˇ nymˇ ma tsoˆ gʼaˬ-euˬ meh.

¹⁶Kʼoeˇ naˇ, Iˇsaˬleˬlaˆ tsawˇ haˬ pyeuꞈ-eu piˇ ma deuˬ, Leˬbiˇ tsawˇ haˬ deuˬ hawˇ-eu, Baˬbuˇloˬ miˇ kʼahˬ-ahˇ neh gʼoꞈ laˇ-euˬ deuˬ dawˬ tawˆ luꞈ, laˬ kʼaˬ tiˬ cehˇ Uˬ duˬ tahˬ nymˇ nymˇ ma a nehˬ-euˬ meh.

¹⁷Uˬ duˬ tahˬ nymˇ nymˇ ma a nehˬ-eu gʼaˇ duˬ, mawˇ neˇ tiˬ yaˇ mawˇ, yawˇ nyiˬ yaˇ mawˇ hawˇ-eu, yawˇ zaˬ oeˬ yaˇ mawˇ aˬ yawꞈ maꞈ lawˇ nehˬ-euˬ meh. Iˬ baˇ shawˇ-eu lawˇ-eu jeˬ gʼaˇ duˬ kʼawꞈ, Iˇsaˬleˬlaˆ tsawˇ jeuˬ tiˬ jeuˬ-euˬ ciꞈ myehꞈ tiˬ mawˇ doˇ leˇ-ehˇ, ciꞈ myehꞈ tseˇ nyiꞈ mawˇ aˬ yawꞈ maꞈ lawˇ-euˬ meh.

¹⁸Moˇseˬ-euˬ sahˬ boꞈ paˇ dmˬ laꞈ kʼoeˇ mehˬ taˬ tsoˆ taˬ-euˬ jaˆ-eu loꞈ-ehˇ, Yeˬluˇsaˬlehˬ meuˬ Uˬ duˬ tahˬ nymˇ nymˇ ma laꞈ kʼoeˇ gaˇ bi mˇ-eu gʼaˇ duˬ, piˇ ma deuˬ hawˇ-eu Leˬbiˇ tsawˇ haˬ deuˬ-ahˇ aˬ yawꞈ maꞈ aˇ muˇ muˇ baw nehˬ-euˬ meh.

¹⁹Ba la yaw beh siˬ tseˇ oeˬ nah tiˬ nah-ahˇ, Baˬbuˇloˬ miˇ kʼahˬ-ahˇ neh gʼoꞈ laˇ-euˬ tsawˇ haˬ deuˬ Baˬsaˬkaˬ bawˬ-iˬ gʼeh-euˬ meh.

²⁰Piˇ ma deuˬ hawˇ-eu Leˬbiˇ tsawˇ haˬ deuˬ dawˬ tawˆ luꞈ gʼawˇ mawˇ shawˇ-eu zahˇ jahˇ gʼaˬ-awˇ lehˬ hmˬ dah taˬ-euˬ meh. Leˬbiˇ tsawˇ haˬ deuˬ-aˬ, Baˬbuˇloˬ miˇ kʼahˬ-ahˇ neh gʼoꞈ laˇ-euˬ deuˬ dawˬ tawˆ luꞈ gʼaˇ duˬ maˬ ehˇ, piˇ ma deuˬ gʼaˇ duˬ maˬ ehˇ, yawˬ ha-euˬ gʼaˇ duˬ maˬ ehˇ, Baˬsaˬkaˬ yawˇ zaˬ sehꞈ-euˬ meh.

²¹Baˬbuˇloˬ miˇ kʼahˬ-ahˇ neh gʼoꞈ laˇ-euˬ Iˇsaˬleˬlaˆ tsawˇ haˬ dawˬ tawˆ luꞈ maˬ ehˇ, miˇ kʼahˬ kʼoeˇ kʼahˬ-ahˇ jawˇ-eu aˬ cawˬ tsawˇ jeuˬ tawˬ luꞈ-eu lawˇ ciꞈ zaˬ-euˬ zahˇ sahˇ kʼoꞈ-ahˇ byehˇ dzeh-awˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ kʼaˇ tahˬ laˇ-euˬ tsawˇ haˬ dawˬ tawˆ luꞈ maˬ ehˇ, Baˬsaˬkaˬ bawˬ-iˬ-ahˇ lawˇ-euˬ shaˬ jiˇ dzaˬ-euˬ meh.

²²Shiꞈ nah keuˆ ni, laˬ kʼaˬ tiˬ cehˇ Dehˬ tseˬ maˬ ahˇ-eu kaˬ muˇ dzaˬ-eu bawˬ-iˬ aˬ yawꞈ maꞈ gʼeh-euˬ meh. Aˬshuˇliˆ sahˬ paˬ aˬ yawꞈ maꞈ-ahˇ nui ma taꞈ laˇ-awˇ, Iˇsaˬleˬlaˆ tsawˇ jeuˬ-euˬ Miˬyehˇ-euˬ Uˬ duˬ tahˬ nymˇ nymˇ ma tsoˆ gaˇ aˬ yawꞈ maꞈ-ahˇ caw ba nehˬ laꞈ ni Sahˬpaˬ Miˬyehˇ jahˇ-euˬ miˇ neh, aˬ yawꞈ maꞈ laˬ kʼaˬ cehˇ dui dui-eu meh.