Read Akha Eˇzaˬlaˬ 9 Bible Online

Eˇzaˬlaˬ 9 - Akha bible

Eˇzaˬlaˬ 9

¹Gaˇ kʼoeˇ deuˬ mˇ gʼaˬ jiˇ ngeh, Iˇsaˬleˬlaˆ tsawˇ haˬ aˬ yuiꞈ aˬ tsu tiˬ paˆ na deuˬ ngaˇ jawˇ gaˇ laˇ-awˇ, Iˇsaˬleˬlaˆ tsawˇ haˬ deuˬ, piˇ ma deuˬ hawˇ-eu Leˬbiˇ tsawˇ haˬ deuˬ-aˬ, aˬ yawꞈ maꞈ-euˬ dawˬ peh jawˇ-eu aˬ cawˬ tsawˇ jeuˬ deuˬ pyeuꞈ-eu Aˬmoˬ tsawˇ jeuˬ Mawˇbaˆ tsawˇ jeuˬ, Iˇjiˇtuˆ tsawˇ jeuˬ, Kaˬnaˬ tsawˇ jeuˬ, Heˬtaˆ tsawˇ jeuˬ, Paˬyehˆ tsawˇ jeuˬ, Yeˬbuˇ tsawˇ jeuˬ, Aˬmawˇliˆ tsawˇ jeuˬ kʼoeˇ deuˬ hawˇ-eu aˬ yawꞈ maꞈ-euˬ jawꞈ dui dui-eu zahˇ sahˇ kʼoꞈ deuˬ-ahˇ maˬ dehꞈ beu ni, dehꞈ keuˬ dehꞈ sho luꞈ-eu gaˇ kawˆ ehˇ laˇ-euˬ meh.

²Yuˇdaˆ tsawˇ haˬ deuˬ-aˬ, aˬ cawˬ tsawˇ jeuˬ-ahˇ sheuˬ-eu laꞈ kʼoeˇ Miˬyehˇ-euˬ muiˬ-eu shawˇ-eu tsawˇ jeuˬ-ahˇ tsawˇ keuˬ bi keuˬ iˇ-euˬ meh. Aˬ yuiꞈ aˬ tsu deuˬ hawˇ-eu yaw huiˬ yaw mahˇ geuꞈ-eu deuˬ kʼoeˇ loꞈ-ehˇ mehˬ huˬ huˬ-awˇ mˇ-eu meh lehˇ ehˇ laˇ-euˬ meh.

³Gaˇ kawˆ kʼoeˇ ngaˇ ya gaˬ ngeh, nui ma cawˆ dui dui-eu laꞈ kʼoeˇ mehˬ tsoeˬ cehˬ pyaˬ-awˇ, uˬ duˬ tsehˇ kahˇ hawˇ-eu mehˬ mahˬ gʼawˇ doˆ-awˇ dzuˇ-euˬ ma.

⁴Ngaˇ noeˬ shaˬ dui dui-eu laꞈ kʼoeˇ uˬ ciꞈ uˬ taw paw poˆ lawˇ-eu shehˇ-eu yamˬ keuˆ laˇ ngeh keuˆ ni kʼoeˇ loꞈ-ehˇ dzuˇ luꞈ ngeh, Baˬbuˇloˬ miˇ kʼahˬ-ahˇ neh gʼoꞈ laˇ-euˬ tsawˇ haˬ kʼoeˇ deuˬ neh mˇ-euˬ iˬ baˇ gaˇ kawˆ-ahˇ Iˇsaˬleˬlaˆ tsawˇ jeuˬ-euˬ Miˬyehˇ neh ehˇ-euˬ gaˇ kʼaˇ guˆ-eu tsawˇ haˬ dawˬ tawˆ luꞈ ngaˬ-euˬ dawˬ peh uiˬ laˇ-euˬ meh.

⁵Uˬ ciꞈ uˬ taw paw poˆ lawˇ-eu shehˇ-eu jeˬ mˇ yamˬ keuˆ laˇ ngeh, ngaˇ noeˬ shaˬ-eu laꞈ kʼoeˇ dzuˇ luꞈ-eu tsawˬ tuˇ-awˇ, cehˬ pyaˬ taˬ-euˬ mehˬ tsoeˬ dm luꞈ-eu laꞈ kʼoeˇ, pawˬ tsuiꞈ pawˬ dmˬ dmˬ-awˇ ngaˬ-euˬ aˬ laꞈ cawˬ ja-awˇ neh, ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guiˬ lahˬ shaˇ-euˬ ma.

⁶Ngaˇ heu loꞈ-ehˇ shaˇ-euˬ ma. “Miˬyehˇ-oˇ, nawˬ-euˬ mehˬ shi ngaˇ myaˆ pyawˬ maˬ ciˬ daˬ saˇ nya. Nga maꞈ-euˬ iˬ baˇ-aˬ, nga maꞈ-euˬ uˬ duˬ jaˆ dzeuˇ-awˇ, mˬ-ahˇ keuˆ ni jaˆ keuˆ taˬ-euˬ meh.

⁷Nga maꞈ-euˬ aˬ poeˬ aˬ bawˇ deuˬ-euˬ ziˇ-ahˇ neh iˬ nah keuˆ ni, nawˬ-euˬ tsawˇ jeuˬ pyeuꞈ-eu nga maꞈ iˬ baˇ mˇ dui dui-euˬ ma. Nga maꞈ-euˬ iˬ baˇ baˬ da neh, nga maꞈ maˬ ehˇ, nga maꞈ-euˬ sahˬ paˬ deuˬ hawˇ-eu piˇ ma deuˬ maˬ ehˇ, aˬ cawˬ tsawˇ jeuˬ sahˬ paˬ deuˬ-euˬ laꞈ-ahˇ ahˇ leˇ-awˇ, aˬ cawˬ neh sehꞈ-eu, tahˇ joe joe-eu hawˇ-eu bi nyehꞈ geuꞈ gʼeh-eu jeˬ-ahˇ ya daˬ-euˬ ma. Shaꞈ dawˇ dui dui-eu jeˬ-ahˇ nga maꞈ ya daˬ yaꞈ-awˇ, iˬ nah keuˆ ni ya shaˬ ya zahˬ luꞈ-eu ma.

⁸Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nymˬ-mˇ tiˬ kʼehˬ tiˬ yamˬ laꞈ kʼoeˇ nawˇ nga maꞈ-ahˇ gʼawˬ shaˬ gaˬ nehˬ laꞈ-awˇ, nga maꞈ tiˬ paˆ na deuˬ-ahˇ aˬ cawˬ zaˬ kʼaˆ ya geuꞈ luꞈ gaˇ neh bi buˬ bi law-iˇ nehˬ laꞈ-eu laꞈ kʼoeˇ, muiˬ-eu shawˇ-eu jawˇ duˬ heu tsahˇ-ahˇ nui ma saˇ lehˆ ni bi jawˇ laꞈ-euˬ meh. Nga maꞈ aˬ cawˬ-euˬ zaˬ kʼaˆ geuꞈ geuꞈ-ehˇ jawˇ-euˬ kʼawꞈ, nawˇ nga maꞈ-ahˇ yaw shuiꞈ shuiꞈ-ehˇ paˇ bi dehꞈ laꞈ-euˬ meh.

⁹Nga maꞈ aˬ cawˬ zaˬ kʼaˆ geuꞈ luꞈ kʼawꞈ, nawˇ nga maꞈ-ahˇ byehˇ dzeh-awˇ kʼoeˇ loꞈ-ehˇ tehꞈ-ehˇ maˬ bi dehꞈ laꞈ-aˬ. Paˇshaˇ sahˬ paˬ deuˬ nga maꞈ-ahˇ gʼawˬ shaˬ gaˬ-awˇ, cawˆ-iˇ taˬ-euˬ nawˬ-euˬ Uˬ duˬ tahˬ nymˇ nymˇ ma-ahˇ paˇ bi tsoˆ muiˬ leˇ nehˬ laꞈ-awˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ laꞈ kʼoeˇ guˆ kʼaˇ maˬ za ni nga maꞈ ya dehꞈ ya jawˇ-eu gʼaˇ duˬ, aˬ yawꞈ maꞈ-euˬ nui ma-ahˇ nawˇ laˆ saˆ nehˬ-euˬ meh.

¹⁰“Ehˇ kʼawꞈ ni, Miˬyehˇ-oˇ, nymˬ-mˇ heu loꞈ-ehˇ pyeuꞈ laˇ gʼaˬ taˬ-euˬ miˇ neh, nga maꞈ aˬ joˆ-ehˇ paˇ ya ehˇ nmˇ. Nawˬ-euˬ gʼaˇ duˬ ngehˬ dah-eu nawˬ-euˬ zaˬ kʼaˆ deuˬ-ahˇ gʼoe-awˇ nawˇ nga maꞈ-ahˇ biꞈ taˬ-euˬ zahˇ dawˬ kʼoꞈ dawˬ deuˬ-ahˇ nga maꞈ byehˇ dzeh gʼaˬ-euˬ ma. Aˬ yawꞈ maꞈ-ahˇ gʼoe-awˇ nawˇ nga maꞈ-ahˇ ehˇ taˬ-eu dawˬ heu loꞈ-ehˇ jaˆ-eu meh. Naw maꞈ jawˇ uˇ leˇ-eu lehˇ gʼeh-eu miˇ kʼahˬ kʼoeˇ kʼahˬ-aˬ, maˬ muiˬ maˬ shawˇ-eu miˇ kʼahˬ pyeuꞈ-eu meh. Aˬ jeˬ miˇ neh ehˇ naˇ, kʼoeˇ gaˇ jawˇ luꞈ-eu tsawˇ haˬ deuˬ-aˬ, miˇ kʼahˬ kʼoeˇ kʼahˬ-euˬ kʼoeˇ dzeˇ heu dzeˇ doˆ ni jawꞈ dui dui-eu jeˬ tehꞈ-ehˇ mˇ byah jiˇ taˬ-euˬ meh.

¹²Kʼoeˇ miˇ neh, naw maꞈ-euˬ zaˬ miˬ zaˬ yo deuˬ hawˇ-eu aˬ yawꞈ maꞈ-euˬ zaˬ miˬ zaˬ yo deuˬ taˬ bi sheuˬ dahˬ dzaˬ taꞈ. Miˇ kʼahˬ kʼoeˇ kʼahˬ naw maꞈ dzaˬ mawꞈ-awˇ, naw maꞈ-euˬ zaˬ deuˬ uˆ deuˬ-euˬ laꞈ-ahˇ bi jaˆ yaꞈ mawꞈ naˇ, kʼoeˇ gaˇ jawˇ-eu tsawˇ haˬ deuˬ dehꞈ dzaˬ laˇ-awˇ baw le za le ni naw maꞈ taˬ caw ba nehˬ lehˇ nawˬ neh ehˇ taˬ-euˬ dawˬ jaˆ-eu meh.

¹³Nga maꞈ-euˬ iˬ baˇ baˬ da neh nawˇ nga maꞈ-ahˇ kʼehˬ nehˬ kʼaˆ nehˬ laꞈ-eu laꞈ kʼoeˇ nga maꞈ ya daˬ dzeuˇ laꞈ-euˬ jeˬ-ahˇ haw ngeh jawˇ, nga maꞈ-ahˇ geuˇ-eu kʼehˬ-eu kʼaˆ-eu jeˬ naˆ maˬ tseˇ teˬ dui nyiˇ dui dui-eu kʼehˬ-eu kʼaˆ-eu jeˬ nawˇ nga maꞈ kʼoeˇ taˆ bi keuˆ le-awˇ, nga maꞈ-ahˇ heu loꞈ-ehˇ bi dehꞈ bi jawˇ dzeuˇ laꞈ-euˬ meh.

¹⁴Nawˬ-euˬ zahˇ dawˬ kʼoꞈ dawˬ-ahˇ nga maꞈ yaw zeu maˬ paˇ baw-ehˇ, maˬ muiˬ maˬ jaˬ-eu tsawˇ haˬ heu deuˬ-ahˇ nga maꞈ paˇ sheuˬ dahˬ dzaˬ taꞈ kʼmˬ tehꞈ-a loˇ. Nga maꞈ kʼoeˇ loꞈ-ehˇ jahˇ naˇ, nawˇ nui ma pehˇ dui dui-eu laꞈ kʼoeˇ, tiˬ gʼaˬ-iˬ maˬ dehꞈ dzeuˇ nya gaˇ keuˆ ni kʼehˬ nehˬ kʼaˆ nehˬ laꞈ tehꞈ-a.

¹⁵Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˇ-aˬ tsaˬ-eu dawˇ-eu Miˬyehˇ pyeuꞈ kʼawꞈ, nga maꞈ-ahˇ nawˇ bi dzeuˇ-iˇ laꞈ-euˬ meh. Nawˬ-eu mehˬ shi nga maꞈ-euˬ iˬ baˇ shaˇ pyehˬ-eu ma. Nga maꞈ-aˬ, nawˬ-eu mehˬ shi laˇ-eu maˬ geuˇ-eu tsawˇ haˬ pyeuꞈ-eu ma.”