Read Akha Neˬhaˬmiˇ 1 Bible Online

Neˬhaˬmiˇ 1 - Akha bible

Neˬhaˬmiˇ 1

¹Heu-aˬ, Haˬkaˬliˇ-euˬ aˬ li Neˬhaˬmiˇ neh mˇ doˆ shaˇ doˆ yaꞈ-euˬ gaˇ deuˬ gaˇ kawˆ meh. Paˇshaˇ sahˬ paˬ Aˬtaˬdzeuˬsehˆ uˆ lahˇ-eu nyiˬ tseˇ kʼoꞈ tiˬ kʼoꞈ Giˇsaˬlehˆ ba la-ahˇ, ngaˇ Neˬhaˬmiˇ-aˬ, miˇ kʼahˬ kʼoeˇ kʼahˬ laꞈ kʼoeˇ huiˬ dzehˬ-eu meuˬ pyeuꞈ-eu Suˇsaˬ meuˬ-ahˇ jawˇ luꞈ-eu ma.

²Ngaˬ-euˬ mehˇ nmˇ Haˬnaˬniˇ hawˇ-eu aˬ yawꞈ-euˬ cawˬ tiˬ deuˬ Yuˇdaˆ miˇ kʼahˬ-ahˇ neh laˇ-euˬ meh. Baˬbuˇloˬ miˇ kʼahˬ-ahˇ neh gʼoꞈ jawˇ leˇ-euˬ aˬ yuiꞈ aˬ nyiˇ Yuˇdaˆ tsawˇ haˬ deuˬ-euˬ gaˇ kawˆ hawˇ-eu Yeˬluˇsaˬlehˬ meuˬ gaˇ kawˆ aˬ yawꞈ maꞈ-ahˇ ngaˇ ja naˇ haˬ-euˬ ma.

³Baˬbuˇloˬ miˇ kʼahˬ-ahˇ neh paˇ gʼoꞈ jawˇ-iˇ-euˬ deuˬ-ahˇ, dawˬ peh jawˇ luꞈ-eu aˬ cawˬ tsawˇ jeuˬ deuˬ taˬ nyiˇ dui dui-eu miˇ neh ya shaˬ ya zahˬ luꞈ-eu gaˇ kawˆ aˬ yawꞈ maꞈ ngaˬ-ahˇ dzawˇ nehˬ laꞈ-euˬ meh. Yeˬluˇsaˬlehˬ meuˬ-euˬ meuˬ lahˇ byaˆ-iˇ taˬ-awˇ, miˬ dzaˬ keuˬ dzeh taˬ-euˬ meuˬ lahˇ laˇ gʼoˆ deuˬ kʼawꞈ maˬ laˆ muiˬ-ehˇ jaˆ luꞈ meh lehˇ dzawˇ-eu meh.

⁴Gaˇ kawˆ kʼoeˇ deuˬ-ahˇ ngaˇ ya gaˬ ngeh, nuiˇ-awˇ ngoeˇ-euˬ ma. Gʼawˬ mya nah byah ni ngaˇ maˬ dzaˬ maˬ dawˇ-ehˇ ngoeˇ-eu laꞈ kʼoeˇ, Miˬyehˇ-ahˇ heu loꞈ-ehˇ guiˬ lahˬ shaˇ-euˬ ma.

⁵“Mˬ taˆ Miˬyehˇ pyeuꞈ-eu Sahˬpaˬ Miˬyehˇ-oˇ, nawˇ-aˬ huiˬ dui mahˇ dui dui-awˇ, nga maꞈ nawˬ-ahˇ guˆ-eu laꞈ kʼoeˇ yawꞈ luꞈ-eu ma. Nawˬ-ahˇ gaˬ-awˇ nawˬ neh kʼaˇ ehˇ taˬ-euˬ loꞈ-ehˇ mˇ-eu tsawˇ haˬ deuˬ-ahˇ nawˇ dawˬ ma saˇ jaˇ ziꞈ-eu meh.

⁶Sahˬpaˬ Miˬyehˇ-oˇ, nawˬ-euˬ zaˬ kʼaˆ pyeuꞈ-eu Iˇsaˬleˬlaˆ tsawˇ haˬ deuˬ gʼaˇ duˬ uˬ ciꞈ nah gʼahˇ maˬ ehˇ ngaˇ guiˬ lahˬ shaˇ luꞈ ngeh, ngaˬ-ahˇ haw-awˇ ngaˬ-euˬ shaˇ dawˬ-ahˇ naˇ haˬ nehˬ laꞈ-awˬ. Iˇsaˬleˬlaˆ tsawˇ jeuˬ pyeuꞈ-eu nga maꞈ neh mˇ lehˬ-euˬ iˬ baˇ-ahˇ ngaˇ shaˇ pyehˬ-eu ma. Ngaˬ-euˬ aˬ poeˬ aˬ bawˇ deuˬ hawˇ-eu ngaˇ kʼawꞈ iˬ baˇ ahˇ-eu ma.

⁷Nawˬ neh ehˇ taˬ-euˬ jeˬ-ahˇ nga maꞈ maˬ mˇ ni, nawˬ-euˬ mehˬ shi yaw haiˬ jeˬ-ahˇ nga maꞈ mˇ-euˬ ma. Nawˬ-euˬ zaˬ kʼaˆ Moˇseˬ-ahˇ gʼoe-awˇ nawˬ neh nga maꞈ-ahˇ biꞈ taˬ-euˬ zahˇ dawˬ kʼoꞈ dawˬ deuˬ-ahˇ nga maꞈ maˬ caw teh ni dehꞈ-euˬ ma.

⁸Moˇseˬ-ahˇ nawˬ neh ehˇ taˬ yaꞈ-euˬ dawˬ kʼoeˇ dawˬ-ahˇ noeˬ keuˆ nehˬ laꞈ-awˬ. Nawˇ aˬ yawꞈ-ahˇ heu loꞈ-ehˇ ehˇ taˬ yaꞈ-euˬ meh. Naw maꞈ Iˇsaˬleˬlaˆ tsawˇ haˬ deuˬ ngaˬ-ahˇ saˇ jaˇ maˬ ziꞈ naˇ, aˬ cawˬ tsawˇ jeuˬ yaw kaˬ-ahˇ naw maꞈ-ahˇ bi jawˇ byoˆ jiˇ ma.

⁹Ehˇ kʼawꞈ, naw maꞈ ngaˇ jawˇ paw paˇ gʼoꞈ poˆ laˇ-awˇ, ngaˇ naw maꞈ-ahˇ ehˇ taˬ-euˬ loꞈ-ehˇ mˇ naˇ, mˬ dzeˇ miˇ dzeˇ keuˆ ni naw maꞈ ya jawˇ byoˆ taˬ-euˬ kʼawꞈ, ngaˬ-ahˇ uˬ duˬ bi tahˬ-eu lehˇ ngaˬ neh tseˇ doˆ taˬ-euˬ jawˇ duˬ-ahˇ naw maꞈ-ahˇ ngaˇ paˇ sheuˬ kʼoꞈ laꞈ ma lehˇ nawˇ ehˇ taˬ-euˬ meh.

¹⁰“Sahˬpaˬ Miˬyehˇ-oˇ, tsawˇ haˬ heu deuˬ-aˬ nawˬ-euˬ zaˬ kʼaˆ pyeuꞈ-awˇ, nawˬ-euˬ tsawˇ jeuˬ pyeuꞈ-eu meh. Nawˬ-euˬ huiˬ-eu baoˬ hawˇ-eu gʼaˬ-ahˇ gʼoe-awˇ, aˬ yawꞈ maꞈ-ahˇ nawˇ ka kʼoꞈ doˆ nehˬ-euˬ meh.

¹¹Ngaˬ-euˬ shaˇ dawˬ hawˇ-eu, nawˬ-ahˇ yaw zeu baw-eu nawˬ-euˬ zaˬ kʼaˆ deuˬ-euˬ shaˇ dawˬ-ahˇ naˇ haˬ nehˬ laꞈ-awˬ. Ngaˇ mˇ-eu gaˇ pyeuꞈ leˇ-eu gʼaˇ duˬ sahˬ paˬ ngaˬ-ahˇ nui ma tsaˬ ni iˬ nah nawˇ caw ba nehˬ laꞈ-awˬ lehˇ ngaˇ guiˬ lahˬ shaˇ-euˬ ma.” Ngaˇ-aˬ, sahˬ paˬ-ahˇ kʼmˬ maˬ ciˬ miˇ nehˬ-eu gʼaˬ pyeuꞈ-eu ma.