Read Akha Neˬhaˬmiˇ 10 Bible Online

Neˬhaˬmiˇ 10 - Akha bible

Neˬhaˬmiˇ 10

¹Laꞈ ma dehˬ beh beh-euˬ gʼaˬ-aˬ, Haˬkaˬliˇ-euˬ aˬ li Yuˇdaˆ miˇ kʼahˬ-ahˇ uˆ lahˇ-eu gʼaˬ pyeuꞈ-eu Neˬhaˬmiˇ meh. Nyiˬ gʼaˬ tiˬ gʼaˬ-aˬ, Zeˬdaˬkiˇ meh. Aˬ nyaꞈ-euˬ mehˬ nah laꞈ ma dehˬ-euˬ deuˬ-aˬ, heu deuˬ meh.

²Piˇ ma deuˬ laꞈ kʼoeˇ Seˬlehˇyaˬ, Aˬzaˬliˇ, Yeˬlaˬmiˇ,

³Paˬshuˇlaˆ, Aˬmaˬliˇ, Maˬlaˬkiˇyaˬ,

⁴Haˬtuˇshaˬ, Sheˬbaˬniˇ, Maˬluꞈ,

⁵Haˬlmˬ, Meˬlaˬmoˇ, Awˇbaˬdiˇ,

⁶Daˬyeˬlaˇ, Giˇneˬdoˬ, Baˬluˆ,

⁷Meˬshuˇlamˬ, Aˬbiˇyaˬ, Miˇyaˬmeˬ,

⁸Maˬziˇ, Biˇlaˬgeˬ hawˇ-eu Sheˬmaˇyaˬ meh.

⁹Leˬbiˇ tsawˇ jeuˬ laꞈ kʼoeˇ, Aˬzaˬniˇ-euˬ aˬ li Yeˬshah, Heˬnaˬdaˆ-euˬ aˬ li Biˇnuiˇ, Kaˬdaˬmeˬlaˇ,

¹⁰Sheˬbaˬniˇ, Hawˬdiˇyaˆ, Geˬliˇtaˬ, Peˬlaˇyaˬ, Haˬnaˬ,

¹¹Miˇgaˬ, Leˬhawˇbaˆ, Haˬshaˬbiˇ,

¹²Zaˬkuˬlaˇ, Sheˬleˬbiˇ, Sheˬbaˬniˇ,

¹³Hawˇdiˇyaˆ, Baˬniˬ hawˇ-eu, Beˬniˇnuiˇ meh.

¹⁴Aˬ yuiꞈ aˬ tsu deuˬ laꞈ kʼoeˇ, Paˬloˆ, Paˬhaˆmawˇbaˆ, Eˇlamˬ, Zaˬtuˬ, Baˬniˬ,

¹⁵Boˬniˬ, Aˬzaˬgaˆ, Beˬbaiˬ,

¹⁶Aˬdawˇniˇyaˆ, Biˇgaˬbeˬ, Aˬdeˬ,

¹⁷Aˬtaˬ, Heˬsaˬgiˇ, Aˬzuˆ,

¹⁸Hawˇdiˇyaˆ, Haˬshuˬ, Beˬzaiˇ,

¹⁹Haˬliˇpaˬ, Aˬnaˬtawˇ, Neˬbaiˬ,

²⁰Maˬgaˬpyaˬshaˇ, Meˬshuˇlamˬ, Heˬziˬlaˇ,

²¹Meˬsheˬzaˬbeˬlaˇ, Zaˬdoˆ, Yaˬduˇ,

²²Peˬlaˬtiˇ, Haˬnaˬ, Aˬnaˬyaˇ,

²³Awˇsheˬ, Haˬnaˬniˇyaˆ, Haˬshuˇbaˆ,

²⁴Haˬloˇhehˇ, Piˇlaˬhaˬ, Shawˇbehˆ,

²⁵Leˬhamˬ, Haˬshaˬbaˬnaˬ, Maˬseˬyaˇ,

²⁶Aˬhiˇyaˬ, Haˬnaˬ, Aˬnaˬ,

²⁷Maˬluꞈ, Haˬlmˬ hawˇ-eu Baˬnahˬ meh.

²⁸Nga maꞈ Iˇsaˬleˬlaˆ tsawˇ haˬ deuˬ, piˇ ma deuˬ, Leˬbiˇ tsawˇ haˬ deuˬ, Uˬ duˬ tahˬ nymˇ nymˇ ma-ahˇ loꞈ-eu deuˬ, Uˬ duˬ tahˬ nymˇ nymˇ ma-ahˇ caˇ dawˬ caˇ-eu deuˬ, Uˬ duˬ tahˬ nymˇ nymˇ ma laꞈ kʼoeˇ gaˇ mˇ-eu deuˬ hawˇ-eu, Miˬyehˇ-euˬ zahˇ dawˬ kʼoꞈ dawˬ-ahˇ naˇ haˬ geuꞈ-eu laꞈ kʼoeˇ nga maꞈ-euˬ miˇ kʼahˬ laꞈ kʼoeˇ jawˇ luꞈ-eu aˬ cawˬ tsawˇ jeuˬ deuˬ nehˬ-ehˇ kʼaˇ dehꞈ kʼaˇ jawˇ gʼawˬ-euˬ deuˬ dawˬ tawˆ luꞈ, yawˬ ha-euˬ miˬ zaˬ deuˬ hawˇ-eu noeˬ siˬ nya laˇ-euˬ yawˬ ha-euˬ zaˬ deuˬ ahˇ leˇ-ehˇ,

²⁹nga maꞈ-euˬ aˬ yuiꞈ aˬ tsu deuˬ nehˬ-ehˇ tiˬ kawˆ loꞈ-ehˇ heu loꞈ-ehˇ saˇ jaˇ dzaˬ-euˬ ma. Miˬyehˇ neh aˬ yawꞈ-euˬ zaˬ kʼaˆ Moˇseˬ-ahˇ gʼoe-awˇ biꞈ laꞈ-euˬ Miˬyehˇ-euˬ zahˇ dawˬ kʼoꞈ dawˬ-ahˇ caw teh-awˇ dehꞈ-eu gʼaˇ duˬ maˬ ehˇ, Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh dawˬ kʼaˇ biꞈ-euˬ jeˬ-ahˇ naˇ haˬ geuꞈ-eu gʼaˇ duˬ maˬ ehˇ, aˬ yawꞈ-euˬ zahˇ dawˬ kʼoꞈ dawˬ deuˬ hawˇ-eu zahˇ sahˇ kʼoꞈ deuˬ-ahˇ aˬ myah luꞈ caw teh-awˇ dehꞈ-eu gʼaˇ duˬ maˬ ehˇ, nga maꞈ saˇ jaˇ dzaˬ-awˇ, kʼoeˇ loꞈ-ehˇ maˬ mˇ naˇ, kʼehˬ-eu kʼaˆ-eu jeˬ nga maꞈ-euˬ kʼoeˇ taˆ bi keuˆ le ma lehˇ kamˬ tsehˆ-euˬ ma.

³⁰Nga maꞈ-euˬ miˇ kʼahˬ-ahˇ jawˇ luꞈ-eu aˬ cawˬ tsawˇ jeuˬ nehˬ-ehˇ nga maꞈ maˬ sheuˬ dahˬ dzaˬ taꞈ.

³¹Jawˇ nah hawˇ-eu zahˇ sahˇ kʼoꞈ-ahˇ taꞈ leˇ-awˇ ya lah ya daw-eu aˇ nah deuˬ-ahˇ, aˬ cawˬ tsawˇ jeuˬ deuˬ nga maꞈ-ahˇ cehˇ hawˇ-eu aˬ nah aˬ dzeˇ ahˬ laˇ kʼawꞈ, nga maꞈ maˬ zeuˇ geuꞈ. Shiꞈ kʼoꞈ tiˬ kʼoꞈ-ahˇ, nga maꞈ-euˬ deh yaˇ deuˬ-ahˇ maˬ mˇ dzaˬ ni bi naˬ-awˇ, za paˬ-ehˇ gʼeh-eu dziˇ dzoˆ deuˬ kʼawꞈ maˬ yuˇ kʼoꞈ ni byehˇ ma.

³²Uˬ duˬ tahˬ nymˇ nymˇ ma laꞈ kʼoeˇ bi zmˬ-eu gʼaˇ duˬ, yawˬ gʼaˬ na luꞈ tiˬ kʼoꞈ-euˬ pyuˇ tiˬ ja-euˬ smˬ bymˇ tiˬ bymˇ[5] damˬ ma.

³³Uˬ duˬ tahˬ nymˇ nymˇ ma laꞈ kʼoeˇ uˬ duˬ tahˬ ngeh loˬ-eu deuˬ pyeuꞈ-eu muiˬ-eu shawˇ-eu kaˬ muˇ deuˬ maˬ ehˇ, aˬ yawꞈ nah yawꞈ ya lawˇ-eu dzaˬ la gʼo cehˇ maˬ ehˇ, aˬ yawꞈ nah yawꞈ miˬ dzaˬ-ahˇ dzah puiˆ-awˇ ya lawˇ-eu jeˬ zaˬ deuˬ maˬ ehˇ, jawˇ nah ngeh nah, la shuiꞈ lah ngeh nah hawˇ-eu, uˬ duˬ tahˬ-eu zahˇ sahˇ kʼoꞈ-ahˇ taꞈ-eu bawˬ-iˬ gʼeh ngeh ya lawˇ-eu muiˬ-eu shawˇ-eu lawˇ-eu jeˬ maˬ ehˇ, Iˇsaˬleˬlaˆ tsawˇ jeuˬ gʼaˇ duˬ Iˬ baˇ shawˇ-eu lawˇ-eu jeˬ maˬ ehˇ, Uˬ duˬ tahˬ nymˇ nymˇ ma gʼaˇ duˬ kʼaˇ loˬ-eu jeˬ maˬ ehˇ, yawˬ jeˬ na luꞈ nga maꞈ damˬ ma.

³⁴Zahˇ dawˬ kʼoꞈ dawˬ laꞈ kʼoeˇ kʼaˇ ehˇ taˬ-euˬ loꞈ-ehˇ, nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ lawˇ-eu shehˇ-eu jeˬ mˇ nehˬ gaˇ zmˬ-eu miˬ dzaˬ kʼehꞈ-eu gaˇ, aˇ jeuˬ aˬ geu jeuˬ-ahˇ daˇ nga lehˇ, nga maꞈ Iˇsaˬleˬlaˆ tsawˇ jeuˬ miˇ kʼahˬ zaˬ deuˬ, piˇ ma deuˬ hawˇ-eu Leˬbiˇ tsawˇ haˬ deuˬ mehˇ beuˬ-awˇ[6] tseˇ doˆ ma.

³⁵Aˬ yawꞈ kʼoꞈ yawꞈ, keuˆ beh beh le-euˬ dzaˬ la gʼo cehˇ deuˬ hawˇ-eu awꞈ beh beh laˇ-euˬ aˇ siˬ aˇ lu deuˬ, Uˬ duˬ tahˬ nymˇ nymˇ ma-ahˇ nga maꞈ damˬ nehˬ leˇ ma.

³⁶Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ, dehꞈ beh beh le-euˬ nga maꞈ-euˬ aˬ li aˬ yuiꞈ deuˬ-ahˇ, Uˬ duˬ tahˬ nymˇ nymˇ ma-ahˇ piˇ ma deuˬ jawˇ gaˇ sheuˬ gʼeh-awˇ Miˬyehˇ-ahˇ a nehˬ ma. Gʼaw beh beh-euˬ mawˇ neˇ, yawˇ hawˇ-eu ciꞈ myehꞈ deuˬ kʼawꞈ, kʼoeˇ loꞈ-ehˇ a nehˬ ma.

³⁷Aˬ yawꞈ kʼoꞈ yawꞈ keuˆ beh beh le-euˬ cehˇ shuiꞈ mˇ-awˇ teˇ-euˬ hawˬ tahˬ maˬ ehˇ, aˬ gaꞈ dzaˇ uiˇ, saˬ loˬ tsiˇ hawˇ-eu aˇ siˬ aˇ lu yawˬ jeˬ na luꞈ damˬ-eu jeˬ maˬ ehˇ, Uˬ duˬ tahˬ nymˇ nymˇ ma-ahˇ piˇ ma deuˬ jawˇ gaˇ nga maꞈ yuˇ gʼeh nehˬ ma. Nga maꞈ-euˬ deh yaˇ-ahˇ doˆ-eu dzaˬ la gʼo cehˇ tseˇ bymˇ tiˬ bymˇ-ahˇ, nga maꞈ-euˬ pu-ahˇ jawˇ-awˇ tseˇ bymˇ tiˬ bymˇ taꞈ uiˬ luꞈ-eu Leˬbiˇ tsawˇ haˬ deuˬ-ahˇ nga maꞈ biꞈ nehˬ ma.

³⁸Leˬbiˇ tsawˇ haˬ deuˬ tseˇ bymˇ tiˬ bymˇ taꞈ uiˬ gaˇ, Aˬloˬ-euˬ zaˬ deuˬ uˆ deuˬ pyeuꞈ-eu piˇ ma deuˬ kʼawꞈ ya jawˇ-awˇ, Leˬbiˇ tsawˇ haˬ deuˬ-aˬ, aˬ yawꞈ maꞈ neh taꞈ uiˬ taˬ-euˬ tseˇ bymˇ tiˬ bymˇ laꞈ kʼoeˇ, Uˬ duˬ tahˬ nymˇ nymˇ ma gʼaˇ duˬ tseˇ bymˇ tiˬ bymˇ paˇ yuˇ doˆ-awˇ, Uˬ duˬ tahˬ nymˇ nymˇ ma-ahˇ jaˆ-eu myawˬ taˬ-eu lawˆ-ahˇ ya tawˬ taˬ leˇ meh.

³⁹Iˇsaˬleˬlaˆ tsawˇ haˬ deuˬ hawˇ-eu Leˬbiˇ tsawˇ haˬ deuˬ-aˬ, damˬ taˬ-eu cehˇ, aˬ gaꞈ dzaˇ uiˇ hawˇ-eu saˬ loˬ tsiˇ deuˬ-ahˇ, Uˬ duˬ tahˬ nymˇ nymˇ ma laꞈ kʼoeˇ jaˆ-eu mˇ myawˬ keu ka taˬ-eu lawˆ-ahˇ hawˇ-eu, gaˇ mˇ luꞈ-eu piˇ ma deuˬ, Uˬ duˬ tahˬ nymˇ nymˇ ma-ahˇ loꞈ-eu deuˬ hawˇ-eu, Uˬ duˬ tahˬ nymˇ nymˇ ma-ahˇ kawˇ yehˬ caˇ-eu tsawˇ haˬ deuˬ-euˬ aˇ lawˆ deuˬ-ahˇ ya yuˇ taˬ-iˇ meh. Nga maꞈ-euˬ Miˬyehˇ-euˬ Uˬ duˬ tahˬ nymˇ nymˇ ma-ahˇ nga maꞈ maˬ byehˇ dzeh.