Read Akha Neˬhaˬmiˇ 11 Bible Online

Neˬhaˬmiˇ 11 - Akha bible

Neˬhaˬmiˇ 11

¹Miˇ kʼahˬ-ahˇ uˆ lahˇ-eu aˬ yuiꞈ aˬ tsu deuˬ Yeˬluˇsaˬlehˬ meuˬ-ahˇ jawˇ-euˬ meh. Miˇ kʼahˬ zaˬ deuˬ laꞈ kʼoeˇ, muiˬ-eu shawˇ-eu Yeˬluˇsaˬlehˬ meuˬ-ahˇ bi jawˇ-eu gʼaˇ duˬ tseˇ zawꞈ-ahˇ tiˬ zawꞈ mehˇ beuˬ-awˇ[7] tseˇ doˆ-euˬ meh. Kʼaˇ dzeˇ laˇ-euˬ deuˬ dawˬ tawˆ luꞈ meuˬ nui deuˬ-ahˇ jawˇ-euˬ meh.

²Yeˬluˇsaˬlehˬ meuˬ-ahˇ jawˇ leˇ-eu gʼaˇ duˬ yawˬ haˇ yawˬ ha nui ma keuˆ-awˇ noeˬ tsehˆ-eu tsawˇ haˬ deuˬ-ahˇ, miˇ kʼahˬ zaˬ deuˬ ja ceuˬ-euˬ meh.

³Iˇsaˬleˬlaˆ tsawˇ haˬ deuˬ, piˇ ma deuˬ, Leˬbiˇ tsawˇ haˬ deuˬ, Uˬ duˬ tahˬ nymˇ nymˇ ma-ahˇ gaˇ mˇ-eu deuˬ hawˇ-eu, Sawˇlaˬmoˬ-euˬ zaˬ kʼaˆ deuˬ-euˬ zaˬ deuˬ uˆ deuˬ-aˬ, yawˬ ha-euˬ meuˬ hawˇ-eu yawˬ ha-euˬ myawˬ dahˬ yaˇ dahˬ baw-eu meuˬ nui deuˬ-ahˇ jawˇ-euˬ meh. Heu-aˬ, Yeˬluˇsaˬlehˬ meuˬ-ahˇ jawˇ-euˬ Yuˇdaˆ miˇ kʼahˬ kʼoeˇ taˆ aˬ yuiꞈ aˬ tsu geuꞈ-eu deuˬ-euˬ jaˇ laˇ meh.

⁴Yuˇdaˆ tsawˇ jeuˬ laꞈ kʼoeˇ Yeˬluˇsaˬlehˬ meuˬ-ahˇ jawˇ-euˬ deuˬ-aˬ, Awˇziˇ-euˬ aˬ li Aˬtaˬyaˇ. Aˬtaˬyaˇ-euˬ tsuiꞈ-a, Yuˇdaˆ, Paˬyehˆ, Maˬhaˬleˬlaˇ, Shaˬpaˬtiˇ, Aˬmaˬliˇ, Zaˬkaˬliˇ, Awˇziˇ, Aˬtaˬyaˇ lehˇ meh.

⁵Baˬluˆ-euˬ aˬ li Maˬseˬyaˇ. Maˬseˬyaˇ-euˬ tsuiꞈ-aˬ, Yuˇdaˆ, Sheˬlahˬ, Zaˬkaˬliˇ, Yawˇzaˬliˆ, Aˬdaˬyaˇ, Haˬzaˬyaˇ, Kawˇlaˆhawˇzaˬ, Baˬluˆ, Maˬseˬyaˇ lehˇ meh.

⁶Paˬyehˆ-euˬ zaˬ deuˬ uˆ deuˬ laꞈ kʼoeˇ, oeˬ yaˇ koꞈ tseˇ yehꞈ gʼaˬ Yeˬluˇsaˬlehˬ meuˬ-ahˇ jawˇ-euˬ meh.

⁷Beˬyaˬmiˬ tsawˇ jeuˬ laꞈ kʼoeˇ Yeˬluˇsaˬlehˬ meuˬ-ahˇ jawˇ-euˬ deuˬ-aˬ, Meˬshuˇlamˬ-euˬ aˬ li Saˬluˬ. Saˬluˬ-euˬ tsuiꞈ-aˬ, Yeˬshaˬyaˆ, Iˇdeˬlaˇ, Maˬseˬyaˇ, Gawˬlaˇyaˬ, Peˬdehˇyaˬ, Yawˇdaˆ, Shuˇlamˬ, Saˬluˬ lehˇ meh.

⁸Saˬluˬ-euˬ aˬ yuiꞈ aˬ nyiˇ pyeuꞈ-eu Gaˬbaiˬ hawˇ-eu Saˬlai kʼawꞈ Yeˬluˇsaˬlehˬ meuˬ-ahˇ jawˇ-euˬ meh. Yeˬluˇsaˬlehˬ meuˬ-ahˇ jawˇ-euˬ Beˬyaˬmiˬ tsawˇ jeuˬ dawˬ tawˆ luꞈ gʼoeˬ yaˇ nyiˬ tseˇ yehꞈ gʼaˬ byah-eu meh.

⁹Ziˇkaˬliˇ-euˬ aˬ li Yawˇlaˆ gʼaˬ aˬ yawꞈ maꞈ kʼoeˇ taˆ aˬ yuiꞈ geuꞈ-awˇ, Haˬseˬnahˬ-euˬ aˬ li Yuˇdaˆ gʼaˬ, Yeˬluˇsaˬlehˬ meuˬ laꞈ kʼoeˇ yaw huiˬ yaw mahˇ nyiˬ gʼaˬ tiˬ gʼaˬ pyeuꞈ-eu meh.

¹⁰Piˇ ma deuˬ laꞈ kʼoeˇ Yeˬluˇsaˬlehˬ meuˬ-ahˇ jawˇ-euˬ deuˬ-aˬ, Yawˇyaˬliˆ-euˬ aˬ li Yeˬdaˬyaˇ hawˇ-eu Yaˬciˬ, Hiˇlaˬkiˇ-euˬ aˬ li Seˬlehˇyaˬ.

¹¹Seˬlehˇyaˬ-euˬ tsuiꞈ-aˬ, Piˇ ma yaw huiˬ gʼaˬ pyeuꞈ-eu Aˬhiˇtu, Meˬyaˬyoˇ, Zaˬdoˆ, Meˬshuˇlamˬ, Seˬlehˇyaˬ, Hiˇlaˬkiˇ, Seˬlehˇyaˬ lehˇ meh.

¹²Aˬ yawꞈ-euˬ aˇ jeuˬ laꞈ kʼoeˇ, Uˬ duˬ tahˬ nymˇ nymˇ ma laꞈ kʼoeˇ gaˇ mˇ-eu deuˬ dawˬ tawˆ luꞈ, yehꞈ yaˇ nyiˬ tseˇ nyiꞈ gʼaˬ byah-eu meh. Yeˬloˇhamˬ-euˬ aˬ li Aˬdaˬyaˇ. Aˬdaˬyaˇ gʼaˬ-euˬ tsuiꞈ-aˬ, Maˬlaˬkiˇyaˬ, Paˬshuˇlaˆ, Zaˬkaˬliˇ, Mˬziˇ, Peˬlaˬliˆ, Yeˬloˇhamˬ, Aˬdaˬyaˇ lehˇ meh.

¹³Yawˬ ha-euˬ aˇ jeuˬ aˇ ca kʼoeˇ taˆ aˬ yuiꞈ aˬ tsu geuꞈ luꞈ-eu aˬ yawꞈ-euˬ aˬ yuiꞈ aˬ nyiˇ dawˬ tawˆ luꞈ nyiˬ yaˇ oeˬ tseˇ nyiꞈ gʼaˬ byah-eu meh. Aˬzaˬyeˬlaˇ-euˬ aˬ li Aˬmaˬshaiˇ gʼaˬ kʼawꞈ Yeˬluˇsaˬlehˬ meuˬ-ahˇ jawˇ-euˬ piˇ ma aˇ jeuˬ pyeuꞈ-eu meh. Aˬ yawꞈ-euˬ tsuiꞈ-aˬ, Iˇmeˬlaˇ, Meˬshiˇleˬmoˇ, Aˬhaˬzaiˇ, Aˬzaˬyeˬlaˇ, Aˬmaˬshaiˇ lehˇ meh.

¹⁴Aˬ yawꞈ-euˬ aˇ jeuˬ aˇ ca laꞈ kʼoeˇ tsawˇ myahˇ doˆ-eu yehˇ tiˬ yaˇ nyiˬ tseˇ yehꞈ gʼaˬ jawˇ-awˇ, aˬ yawꞈ maꞈ kʼoeˇ taˆ aˬ yuiꞈ geuꞈ-euˬ gʼaˬ-aˬ, aˬ yuiꞈ aˬ tsu-euˬ nymˇ jiˇ-ahˇ dehꞈ le-euˬ Aˬbaˬdeˬlaˇ meh.

¹⁵Leˬbiˇ tsawˇ jeuˬ laꞈ kʼoeˇ Yeˬluˇsaˬlehˬ meuˬ-ahˇ jawˇ-euˬ deuˬ-aˬ, Haˬshuˇbaˆ-euˬ aˬ li Sheˬmaˇyaˬ. Aˬ yawꞈ-euˬ tsuiꞈ-aˬ, Boˬniˬ, Haˬshaˬbiˇ, Aˬzaˬliˇkmˬ, Haˬshuˇbaˆ, Sheˬmaˇyaˬ lehˇ meh.

¹⁶Uˬ duˬ tahˬ nymˇ nymˇ ma-euˬ laꞈ nyiˇ gaˇ mˇ gaˇ haw-eu pyaˆ-eu Leˬbiˇ tsawˇ haˬ nyiˬ gʼaˬ pyeuꞈ-eu Shaˬbaˬdehˇ hawˇ-eu Yawˇzaˬbaˆ.

¹⁷Miˇgaˬ-euˬ a li Maˬtaˬniˇ kʼawꞈ, Yeˬluˇsaˬlehˬ meuˬ-ahˇ jawˇ-euˬ Leˬbiˇ tsawˇ haˬ pyeuꞈ-eu meh. Aˬ yawꞈ-euˬ tsuiꞈ-aˬ, Aˬsaˆ, Zaˬbaˬdiˇ, Miˇgaˬ, Maˬtaˬniˇ lehˇ meh. Aˬ yawꞈ-aˬ, Uˬ duˬ tahˬ nymˇ nymˇ ma laꞈ kʼoeˇ ja ceuˬ-eu caˇ dawˬ caˇ-awˇ guiˬ lahˬ shaˇ-eu paw sheuˬ gʼeh-euˬ meh. Maˬtaˬniˇ-ahˇ caw ba-eu gʼaˬ pyeuꞈ-eu Baˬkaˬbuˇkiˇ kʼawꞈ, Yeˬluˇsaˬlehˬ meuˬ-ahˇ jawˇ-euˬ meh. Shaˬmeuˬ-euˬ aˬ li Aˬbaˬdaˬ gʼaˬ kʼawꞈ Yeˬluˇsaˬlehˬ meuˬ-ahˇ jawˇ-euˬ meh. Aˬ yawꞈ-euˬ tsuiꞈ-aˬ, Yeˬduˇdoˬ, Gaˬlaˬlaˆ, Shaˬmeuˬ, Aˬbaˬdaˬ lehˇ meh.

¹⁸Yeˬluˇsaˬlehˬ meuˬ-ahˇ jawˇ-euˬ Leˬbiˇ tsawˇ haˬ dawˬ tawˆ luꞈ nyiˬ yaˇ yehꞈ tseˇ oeˬ gʼaˬ byah-eu meh.

¹⁹Yeˬluˇsaˬlehˬ meuˬ-ahˇ jawˇ-euˬ Uˬ duˬ tahˬ nymˇ nymˇ ma-ahˇ loꞈ-eu deuˬ-aˬ, Aˬkuˇ, Taˬlaˬmoˬ hawˇ-eu aˬ yawꞈ nyaꞈ-euˬ aˬ yuiꞈ aˬ nyiˇ dawˬ tawˆ luꞈ tiˬ yaˇ shiꞈ tseˇ nyiꞈ gʼaˬ meh.

²⁰Dzeˇ luꞈ-eu Iˇsaˬleˬlaˆ tsawˇ haˬ deuˬ, piˇ ma deuˬ hawˇ-eu Leˬbiˇ tsawˇ haˬ deuˬ-aˬ, Yuˇdaˆ miˇ kʼahˬ laꞈ kʼoeˇ yawˬ ha-euˬ myawˬ dahˬ yaˇ dahˬ jaˆ-eu meuˬ deuˬ-ahˇ jawˇ-euˬ meh.

²¹Uˬ duˬ tahˬ nymˇ nymˇ ma laꞈ kʼoeˇ gaˇ mˇ-euˬ deuˬ-aˬ, Yeˬluˇsaˬlehˬ meuˬ laꞈ kʼoeˇ jaˆ-eu Awˇpeˬlaˇ lehˇ kuˇ-eu jawˇ duˬ-ahˇ jawˇ-awˇ, Ziˇhaˬ hawˇ-eu Giˇshaˬpaˬ aˬ nyaꞈ haw-eu pyaˆ-eu laꞈ oˆ gaˇ mˇ-euˬ meh.

²²Yeˬluˇsaˬlehˬ meuˬ-ahˇ jawˇ-eu Leˬbiˇ tsawˇ haˬ-ahˇ haw-eu pyaˆ-eu gʼaˬ-aˬ, Baˬniˬ-euˬ aˬ li Awˇzeˬ meh. Aˬ yawꞈ-euˬ tsuiꞈ-aˬ, Aˬsaˆ, Miˇgaˬ, Maˬtaˬniˇ, Haˬshaˬbiˇ, Baˬniˬ, Awˇzeˬ lehˇ meh. Aˬ yawꞈ-euˬ aˇ jeuˬ-aˬ, Uˬ duˬ tahˬ nymˇ nymˇ ma laꞈ kʼoeˇ uˬ duˬ tahˬ ngeh caˇ dawˬ caˇ-eu gaˇ mˇ-eu aˇ jeuˬ pyeuꞈ-eu meh.

²³Caˇ dawˬ caˇ-eu aˇ jeuˬ aˇ ca deuˬ Uˬ duˬ tahˬ nymˇ nymˇ ma laꞈ kʼoeˇ caˇ dawˬ caˇ-eu laꞈ kʼoeˇ, sahˬpaˬ neh dawˬ biꞈ-awˇ gaˇ biˇ nehˬ-euˬ loꞈ-ehˇ, yawˬ nah na luꞈ yawˬ ha-ahˇ doˇ-eu aˇ muˇ caˇ dawˬ ya caˇ-eu meh.

²⁴Yuˇdaˆ tsawˇ jeuˬ Zeˬlahˬ aˇ jeuˬ pyeuꞈ-eu Meˬsheˬzaˬbeˬlaˇ-euˬ aˬ li Peˬdaˬhiˇ gʼaˬ, Paˇshaˇ sahˬpaˬ-euˬ saˇ naˇ-ahˇ Iˇsaˬleˬlaˆ tsawˇ jeuˬ-euˬ dah zaˇ dah-euˬ meh.

²⁵Yuˇdaˆ miˇ kʼahˬ zaˬ gʼawˬ mya ni, yawˬ ha-euˬ myawˬ kʼahˬ yaˇ kʼahˬ beh ziꞈ taˬ-euˬ dawˬ peh jaˆ-eu meuˬ deuˬ-ahˇ jawˇ-euˬ meh. Yuˇdaˆ tsawˇ jeuˬ deuˬ-aˬ, Giˇliˇyaˆaˬbaˬ meuˬ, Diˇboˬ meuˬ, Zeˬkaˆzeˬlaˇ meuˬ hawˇ-eu meuˬ kʼoeˇ deuˬ-euˬ tahˬ gʼoꞈ tahˬ jawˇ jaˆ-eu pu deuˬ-ahˇ jawˇ-euˬ meh.

²⁶Yeˬshah meuˬ, Mawˇlaˬdaˇ meuˬ, Behˬpeˬlehˆ meuˬ,

²⁷Haˬzaˇshawˇlaˆ meuˬ, Beˬlaˇsheˬba meuˬ hawˇ-eu kʼoeˇ-euˬ tahˬ gʼoꞈ tahˬ jawˇ jaˆ-eu pu deuˬ-ahˇ kʼawꞈ aˬ yawꞈ maꞈ jawˇ-euˬ meh.

²⁸Ziˇkaˬlehˆ meuˬ, Meˬkawˇnaˬ meuˬ hawˇ-eu kʼoeˇ-euˬ jawˬ jawˬ-ehˇ jaˆ-eu pu deuˬ-ahˇ maˬ ehˇ,

²⁹Eˬyeˬmoˬ meuˬ, Zoˇlahˬ meuˬ hawˇ-eu, Jaˬmuˆ meuˬ-ahˇ maˬ ehˇ,

³⁰Zaˬnoˇaˬ meuˬ, Aˬduˬlamˬ meuˬ hawˇ-eu meuˬ kʼoeˇ nyiˬ meuˬ-euˬ tahˬ gʼoꞈ tahˬ jawˇ jaˆ-eu pu deuˬ-ahˇ maˬ ehˇ, aˬ yawꞈ maꞈ jawˇ-euˬ meh. Laˬkiˇshaˬ meuˬ hawˇ-eu kʼoeˇ-euˬ dawˬ peh jaˆ-eu yaˇ kʼahˬ yaˇ lahˬ-ahˇ maˬ ehˇ, Aˬzeˬkaˬ meuˬ hawˇ-eu kʼoeˇ-euˬ tahˬ gʼoꞈ tahˬ jawˇ jaˆ-eu pu deuˬ-ahˇ maˬ ehˇ, aˬ yawꞈ maꞈ jawˇ-euˬ meh. Kʼoeˇ miˇ neh, Yuˇdaˆ tsawˇ jeuˬ-aˬ, laꞈ oˆ paw jaˆ-eu Beˬlaˇsheˬba meuˬ-ahˇ neh laꞈ taˆ paw jaˆ-eu Hiˬnoˬ deh kʼawꞈ-ahˇ keuˆ ni jawˇ byah taˬ-euˬ meh.

³¹Beˬyaˬmiˬ tsawˇ jeuˬ-aˬ, Geˬbaˬ meuˬ, Miˇkaˬmaˆ meuˬ, Aˬiˇ meuˬ, Beˬdeˬlaˇ meuˬ hawˇ-eu kʼoeˇ-euˬ tahˬ gʼoꞈ tahˬ jawˇ jaˆ-eu pu deuˬ,

³²Aˬnaˬtawˇ meuˬ, Noˇbaˆ meuˬ, Aˬnaˬniˇyaˆ meuˬ,

³³Haˬzawˇ meuˬ, Laˬmaˬhaˬ meuˬ, Giˇdeˬ meuˬ,

³⁴Haˬdiˇ meuˬ, Zeˬbaiˬ meuˬ, Neˬbaˬlaˆ meuˬ,

³⁵Lawˇdaˆ meuˬ, Oˇnoˇ meuˬ hawˇ-eu Laꞈ myawˬ laꞈ muˆ mˇ-eu deuˬ-eu deh kʼawꞈ-ahˇ jawˇ-euˬ meh.

³⁶Yuˇdaˆ miˇ kʼahˬ-ahˇ jawˇ-eu Leˬbiˇ tsawˇ haˬ tiˬ paˆ na deuˬ-ahˇ Beˬyaˬmiˬ tsawˇ haˬ deuˬ nehˬ-ehˇ bi jawˇ-euˬ meh.