Read Akha Neˬhaˬmiˇ 13 Bible Online

Neˬhaˬmiˇ 13 - Akha bible

Neˬhaˬmiˇ 13

¹Yuˇdaˆ miˇ kʼahˬ zaˬ deuˬ-ahˇ Moˇseˬ-euˬ zahˇ dawˬ kʼoꞈ dawˬ gui gaˬ nehˬ luꞈ ngeh, Aˬmoˬ tsawˇ haˬ hawˇ-eu Mawˇbaˆ tsawˇ haˬ deuˬ-ahˇ Miˬyehˇ-euˬ tsawˇ jeuˬ nehˬ-ehˇ tiˬ jawˇ-iˬ maˬ ya bi dehꞈ bi jawˇ taꞈ-a lehˇ ehˇ taˬ-euˬ tsahˇ-ahˇ gui keuˆ-euˬ meh.

²Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ ngeh, Aˬmoˬ tsawˇ haˬ hawˇ-eu Mawˇbaˆ tsawˇ haˬ deuˬ dzaˬ dzaˬ dawˇ dawˇ hawˇ-eu iˇ cuꞈ maˬ biꞈ nehˬ-eu miˇ neh, zahˇ dawˬ kʼoꞈ dawˬ sahˬ boꞈ laꞈ kʼoeˇ kʼoeˇ loꞈ-ehˇ ehˇ taˬ-euˬ meh. Kʼoeˇ uˬ taꞈ, aˬ yawꞈ maꞈ Baˬlamˬ-ahˇ pyuˇ biꞈ-awˇ Iˇsaˬleˬlaˆ tsawˇ haˬ deuˬ-ahˇ yaˬ kʼehˇ bi yaˬ-euˬ meh. Ehˇ kʼawꞈ, aˬ yawꞈ maꞈ neh yaˬ kʼehˇ yaˬ-euˬ jeˬ-ahˇ guiˬ lahˬ biꞈ-eu jeˬ bi pyeuꞈ laˇ-euˬ meh.

³Zahˇ dawˬ kʼoꞈ dawˬ laꞈ kʼoeˇ kʼoeˇ loꞈ-ehˇ gui doˆ laꞈ gaˇ Iˇsaˬleˬlaˆ tsawˇ haˬ deuˬ ya gaˬ ngeh, aˬ yawꞈ maꞈ nehˬ-ehˇ kʼaˇ jawˇ luꞈ-eu aˬ cawˬ tsawˇ jeuˬ deuˬ-ahˇ teh dzeh-euˬ meh.

⁴Uˬ duˬ tahˬ nymˇ nymˇ ma laꞈ kʼoeˇ myawˬ gahˬ jeˬ hmˬ-eu lawˆ deuˬ-ahˇ haw-eu pyaˆ-eu gʼaˬ pyeuꞈ-eu Eˇlaˬshiˆ-aˬ, aˇ yamˬ gʼawˬ myahˇ ni Tawˇbyaˬ nehˬ-ehˇ cawˬ cawˬ taꞈ-euˬ meh.

⁵Aˬ yawꞈ-aˬ, Tawˇbyaˬ-ahˇ huiˬ dui dui-eu aˇ lawˆ tiˬ lawˆ biꞈ-awˇ bi zmˬ-euˬ meh. Aˇ lawˆ kʼoeˇ lawˆ-aˬ, damˬ nehˬ laˇ-euˬ dzaˬ la gʼo cehˇ hawˇ-eu tsiˇ yaw saw jeˬ, Uˬ duˬ tahˬ nymˇ nymˇ ma-ahˇ zmˬ-eu mˇ myawˬ keu ka deuˬ, piˇ ma deuˬ-ahˇ damˬ nehˬ-euˬ jeˬ hawˇ-eu, Leˬbiˇ tsawˇ haˬ deuˬ, Uˬ duˬ tahˬ nymˇ nymˇ ma laꞈ kʼoeˇ caˇ dawˬ caˇ-eu deuˬ hawˇ-eu Uˬ duˬ tahˬ nymˇ nymˇ ma-ahˇ loꞈ-eu deuˬ gʼaˇ duˬ damˬ taˬ-euˬ cehˇ, aˬ gaꞈ dzaˇ uiˇ hawˇ-eu saˬ loˬ tsiˇ tseˇ bymˇ tiˬ bymˇ, heu deuˬ jeˬ hmˬ taˬ-euˬ gʼaˇ duˬ bi jaˆ-eu lawˆ pyeuꞈ-eu meh.

⁶Kʼoeˇ loꞈ-ehˇ pyeuꞈ luꞈ ngeh Yeˬluˇsaˬlehˬ meuˬ-ahˇ ngaˇ maˬ jawˇ tsaˬ-eu aˇ yamˬ pyeuꞈ-eu meh. Aˬ jeˬ miˇ neh ehˇ naˇ, Aˬtaˬdzeuˬsehˆ gʼaˬ Baˬbuˇloˬ sahˬpaˬ geuꞈ-eu smˬ tseˇ nyiꞈ kʼoꞈ tiˬ kʼoꞈ-ahˇ, aˬ yawꞈ-ahˇ miˇ kʼahˬ gaˇ kawˆ dzawˇ gaˬ-eu lehˇ ngaˇ iˇ-euˬ ma. Kʼoeˇ naˇ kʼah, sahˬpaˬ-ahˇ a kawˬ-aˬ shaˇ-awˇ,

⁷Yeˬluˇsaˬlehˬ meuˬ-ahˇ gʼoꞈ leˇ-euˬ ma. Kʼoeˇ ngeh hawˇ-eu Eˇlaˬshiˆ neh Uˬ duˬ tahˬ nymˇ nymˇ ma laꞈ kʼoeˇ jaˆ-eu aˇ lawˆ tiˬ lawˆ Tawˇbyaˬ-ahˇ bi zmˬ-euˬ gaˇ kawˆ ya siˬ-awˇ zahˬ leˇ-euˬ ma.

⁸Ngaˇ nui ma pehˇ laˇ-awˇ, Tawˇbyaˬ-euˬ mˇ myawˬ dawˬ tawˆ luꞈ laꞈ nyiˇ biˬ doˆ jiˇ-euˬ ma.

⁹Aˇ lawˆ kʼoeˇ deuˬ-ahˇ shawˇ-eu zahˇ jahˇ-awˇ, Uˬ duˬ tahˬ nymˇ nymˇ ma-ahˇ zmˬ-eu keu ka deuˬ, cehˇ daˬ deuˬ hawˇ-eu tsiˇ yaw saw jeˬ paˇ dawˆ ahˇ kʼoꞈ taˬ-awˬ lehˇ ngaˇ dawˬ biꞈ-euˬ ma.

¹⁰Uˬ duˬ tahˬ nymˇ nymˇ ma laꞈ kʼoeˇ caˇ dawˬ caˇ-eu deuˬ hawˇ-eu Leˬbiˇ tsawˇ haˬ deuˬ dehꞈ nya jawˇ nya ni miˇ kʼahˬ zaˬ deuˬ maˬ caw ba nehˬ-eu miˇ neh, aˬ yawꞈ maꞈ Yeˬluˇsaˬlehˬ meuˬ-ahˇ byehˇ yaꞈ-awˇ, yawˬ ha-euˬ myawˬ kʼahˬ yaˇ kʼahˬ jaˆ gaˇ gʼoꞈ-iˇ jiˇ-euˬ gaˇ kawˆ kʼawꞈ, ngaˇ ya siˬ-euˬ ma.

¹¹Uˬ duˬ tahˬ nymˇ nymˇ ma-ahˇ maˬ haw ni kʼoeˇ loꞈ-ehˇ byehˇ dzeh taˬ-euˬ miˇ neh, yaw huiˬ yaw mahˇ deuˬ-ahˇ ngaˇ dehˬ-awˇ, Leˬbiˇ tsawˇ haˬ deuˬ hawˇ-eu caˇ dawˬ caˇ-eu deuˬ-ahˇ Uˬ duˬ tahˬ nymˇ nymˇ ma-ahˇ paˇ sheuˬ kʼoꞈ laꞈ-awˇ, gaˇ bi mˇ-euˬ ma.

¹²Kʼoeˇ naˇ, Iˇsaˬleˬlaˆ tsawˇ haˬ dawˬ tawˆ luꞈ, aˬ yawꞈ maꞈ-eu dzaˬ la gʼo cehˇ, aˬ gaꞈ dzaˇ uiˇ hawˇ-eu saˬ loˬ tsiˇ heu deuˬ tseˇ bymˇ tiˬ bymˇ, Uˬ duˬ tahˬ nymˇ nymˇ ma-euˬ myawˬ taˬ-eu aˇ lawˆ-ahˇ paˇ sha ha laˇ-euˬ meh.

¹³Kʼoeˇ naˇ, piˇ ma Sheˬleˬmiˇyaˆ, zahˇ dawˬ kʼoꞈ dawˬ siˬ nya-eu zahˇ dzoeˬ miˬ ma zaˬ doˆ hawˇ-eu, Leˬbiˇ tsawˇ haˬ Peˬdehˇyaˬ aˬ ha maꞈ-ahˇ, myawˬ taˬ-eu lawˆ deuˬ-ahˇ haw-eu pyaˆ-eu tsawˇ haˬ bi geuꞈ-euˬ ma. Maˬtaˬniˇ-euˬ aˬ li Zaˬkuˬlaˇ-euˬ aˬ li Haˬnaˬ gʼaˬ-ahˇ, aˬ yawꞈ maꞈ-ahˇ caw ba-eu gʼaˬ bi geuꞈ-euˬ ma. Tsawˇ haˬ heu deuˬ-aˬ, aˬ yawꞈ maꞈ-euˬ gaˇ mˇ cawˬ deuˬ-ahˇ dzaˬ dzaˬ dawˇ dawˇ biˇ nehˬ ngeh dawˇ coe ni mˇ meh lehˇ jah coeˇ-eu tsawˇ haˬ pyeuꞈ-eu meh.

¹⁴Ngaˬ-euˬ Miˬyehˇ-oˇ, nawˬ-euˬ Uˬ duˬ tahˬ nymˇ nymˇ ma hawˇ-eu kʼoeˇ gaˇ nawˬ-ahˇ uˬ duˬ ya tahˬ ni ngaˬ neh leh jeh-euˬ gaˇ heu deuˬ-ahˇ noeˬ keuˆ-eu laꞈ kʼoeˇ yawˬ ngehꞈ-ehˇ taˬ bi pyeuꞈ-iˇ nehˬ laꞈ.

¹⁵Aˇ yamˬ kʼoeˇ yamˬ laꞈ kʼoeˇ, Yuˇdaˆ miˇ kʼahˬ zaˬ deuˬ jawˇ nah-ahˇ aˬ gaꞈ dzaˇ uiˇ nawˬ luꞈ-eu ngaˇ ya mawˇ-euˬ ma. Tiˬ paˆ na deuˬ-aˬ, cehˇ, aˬ gaꞈ dzaˇ uiˇ, aˬ gaꞈ aˇ siˬ, siˬ guˬ aˇ siˬ hawˇ-eu aˬ nah aˬ dzeˇ gʼawˬ mya jeˬ mahˬ tahˬ laˆ neh tawˬ-awˇ, Yeˬluˇsaˬlehˬ meuˬ-ahˇ laˇ luꞈ-eu ya mawˇ-euˬ ma. Jawˇ nah-ahˇ tiˬ jeˬ-iˬ taˬ ahˬ lehˇ aˬ yawꞈ maꞈ-ahˇ ngaˇ ehˇ nehˬ-euˬ ma.

¹⁶Duˇlu meuˬ-ahˇ jawˇ-euˬ tsawˇ haˬ tiˬ paˆ na deuˬ Yeˬluˇsaˬlehˬ meuˬ-ahˇ jawˇ luꞈ-awˇ, aˬ yawꞈ maꞈ ngaˬ shaˬ hawˇ-eu aˬ nah aˬ dzeˇ gʼawˬ mya jeˬ tawˬ laꞈ-awˇ, jawˇ nah-ahˇ nga maꞈ-euˬ tsawˇ haˬ deuˬ-ahˇ ahˬ nehˬ-eu lehˇ gʼeh-eu meh.

¹⁷Yuˇdaˆ tsawˇ haˬ aˬ yuiꞈ aˬ tsu deuˬ-ahˇ ngaˇ dehˬ-awˇ heu loꞈ-ehˇ ehˇ nehˬ-euˬ ma. “Naw maꞈ neh mˇ-euˬ maˬ muiˬ maˬ jaˬ-eu jeˬ-ahˇ haw sheˇ. Jawˇ nah-ahˇ maˬ muiˬ maˬ shawˇ ni naw maꞈ mˇ luꞈ-eu meh.

¹⁸Teu loꞈ-ehˇ mˇ-euˬ baˬ da neh naw maꞈ-euˬ aˬ poeˬ aˬ bawˇ deuˬ-ahˇ Miˬyehˇ kʼehˬ nehˬ-awˇ, meuˬ heu meuˬ-ahˇ laˆ luˬ laˆ seˇ-euˬ meh. Ehˇ kʼawꞈ ni naw maꞈ-aˬ, Jawˇ nah-ahˇ laˆ jawꞈ-eu laꞈ kʼoeˇ, yaw beh naˆ maˬ tseˇ Miˬyehˇ nui ma pehˇ-eu jeˬ Iˇsaˬleˬlaˆ tsawˇ jeuˬ kʼoeˇ taˆ keuˆ le ni naw maꞈ mˇ luꞈ-eu nga” lehˇ ehˇ nehˬ-euˬ ma.

¹⁹Kʼoeˇ miˇ neh, Jawˇ nah ngeh nah maˬ keuˆ laˇ mi naˆ-ehˇ, yawˬ nah yawˬ uˬ ciꞈ uˬ taw paw neh meuˬ-euˬ lahˇ kʼehˬ dawˬ tawˆ luꞈ piˬ tehˬ jiˇ-awˇ, jawˇ nah maˬ dzeuˇ kʼoeˇ keuˆ ni maˬ pah-ehˇ bi jaˆ-awˬ lehˇ ngaˇ dawˬ biꞈ-euˬ ma. Jawˇ nah ngeh nah meuˬ laꞈ kʼoeˇ tiˬ jeˬ-iˬ maˬ bi hehˇ ahˇ laꞈ-eu gʼaˇ duˬ, ngaˬ-euˬ tsawˇ haˬ tiˬ paˆ na deuˬ-ahˇ meuˬ-euˬ lahˇ kʼehˬ deuˬ-ahˇ bi loꞈ-euˬ ma.

²⁰Myawˬ gʼawˬ mya jeˬ ahˬ-eu baw gaꞈ deuˬ, jawˇ nah dzeuˇ ngaˬ nah uˬ ciꞈ-ahˇ, meuˬ lahˇ laꞈ nyiˇ paw tiˬ poˆ nyiˬ poˆ ya yaꞈ-eu meh.

²¹Aˬ yawꞈ maꞈ-ahˇ ngaˇ heu loꞈ-ehˇ ehˇ-awˇ yaw kʼaˆ-ehˇ mehˬ nehˬ-euˬ ma. “Naw maꞈ teu gaˇ uˬ bya loꞈ bya-eu tiˬ jeˬ-iˬ gaˇ dahˇ maˬ tsoeˬ-a. Yawˬ poˆ yawˬ toˆ-ehˇ paˇ jahˇ naˇ nyehꞈ ma” lehˇ ehˇ nehˬ-euˬ ma. Kʼoeˇ ngeh poˆ neh naˇ, Jawˇ nah-ahˇ aˬ yawꞈ maꞈ maˬ laˇ ni byehˇ-euˬ meh.

²²Jawˇ nah-ahˇ bi muiˬ bi shawˇ-eu gʼaˇ duˬ, yawˬ ha-euˬ gʼawˇ mawˇ shawˇ-awˇ meuˬ-euˬ lahˇ kʼehˬ deuˬ-ahˇ loꞈ-iˇ-awˬ lehˇ, Leˬbiˇ tsawˇ haˬ deuˬ-ahˇ ngaˇ ehˇ nehˬ-euˬ meh. Miˬyehˇ-oˇ, ngaˇ kʼoeˇ loꞈ-ehˇ mˇ-euˬ gaˇ kʼawꞈ, noeˬ keuˆ nehˬ laꞈ-awˇ, huiˬ dui dui-eu nawˬ-eu gʼoeˇ-eu gaˬ-eu jeˬ baˬ da neh ngaˬ-ahˇ gʼawˬ shaˬ gaˬ nehˬ laꞈ-awˬ.

²³Aˇ yamˬ kʼoeˇ yamˬ laꞈ kʼoeˇ, Yuˇdaˆ tsawˇ haˬ gʼawˬ mya ni, Aˬshaˬdoˇ, Aˬmoˇ hawˇ-eu Mawˇbaˆ miˇ kʼahˬ-ahˇ jawˇ-eu zaˬ miˬ zaˬ deuˬ-ahˇ sheuˬ-euˬ gaˇ ya mawˇ-euˬ ma.

²⁴Aˬ yawꞈ maꞈ-euˬ zaˬ tiˬ paˆ-aˬ, Aˬshaˬdoˇ dawˬ hawˇ-eu tsawˇ jeuˬ nui deuˬ-euˬ dawˬ ngehˬ-awˇ, Yuˇdaˆ dawˬ maˬ ngehˬ nya-a.

²⁵Tsawˇ haˬ kʼoeˇ deuˬ-ahˇ ngaˇ dehˬ-awˇ, yaˬ kʼehˇ yaˬ-awˇ diˬ-euˬ uˬ taꞈ, uˬ duˬ tsehˇ kahˇ gʼawˇ doˆ nehˬ-euˬ ma. Kʼoeˇ naˇ, aˬ yawꞈ maꞈ maˬ ehˇ, aˬ yawꞈ maꞈ-euˬ zaˬ deuˬ maˬ ehˇ, aˬ cawˬ tsawˇ jeuˬ nehˬ-ehˇ maˬ paˇ bi sheuˬ dahˬ dzaˬ taꞈ ma lehˇ aˬ yawꞈ maꞈ-ahˇ Miˬyehˇ-euˬ tsawˇ myahˇ uˬ moꞈ saˇ jaˇ bi dzaˬ-euˬ ma.

²⁶Aˬ yawꞈ maꞈ-ahˇ ngaˇ heu loꞈ-ehˇ ehˇ nehˬ-euˬ ma. “Aˬ cawˬ tsawˇ jeuˬ zaˬ miˬ zaˬ baˬ da neh sahˬpaˬ Sawˇlaˬmoˬ iˬ baˇ mˇ-euˬ maˬ ngeuˇ-a loˇ. Aˬ yawꞈ-aˬ, aˬ cawˬ tsawˇ jeuˬ-euˬ sahˬpaˬ deuˬ naˆ maˬ tseˇ huiˬ dzehˬ mahˇ dzehˬ-eu gʼaˬ pyeuꞈ-eu meh. Miˬyehˇ aˬ yawꞈ-ahˇ gaˬ-awˇ Iˇsaˬleˬlaˆ tsawˇ jeuˬ dawˬ tawˆ luꞈ kʼoeˇ taˆ sahˬpaˬ bi geuꞈ-euˬ kʼawꞈ, aˬ cawˬ tsawˇ jeuˬ zaˬ miˬ zaˬ baˬ da neh aˬ yawꞈ kʼoeˇ loꞈ-ehˇ iˬ baˇ mˇ-euˬ meh.

²⁷Nga maꞈ naw maꞈ-ahˇ paˇ dzaw geuꞈ-eu laꞈ kʼoeˇ aˬ cawˬ tsawˇ jeuˬ zaˬ miˬ zaˬ deuˬ-ahˇ sheuˬ-awˇ Miˬyehˇ-euˬ ehˇ dawˬ-ahˇ maˬ naˇ haˬ ni ya dehꞈ nmˇ loˇ.”

²⁸Yawˇyaˬdaˇ-aˬ, Piˇ ma yaw huiˬ gʼaˬ pyeuꞈ-eu Eˇlaˬshiˆ-euˬ aˬ li meh. Ehˇ kʼawꞈ, Yawˇyaˬdaˇ-euˬ aˬ li tiˬ li-aˬ, Behˬhawˇleuˬ meuˬ-ahˇ jawˇ-eu Sahˬbaˬlaˆ-euˬ aˬ buˇ-ahˇ sheuˬ-euˬ meh. Kʼoeˇ miˇ neh, Yawˇyaˬdaˇ-ahˇ Yeˬluˇsaˬlehˬ meuˬ-ahˇ neh ngaˇ teh doˆ-euˬ ma.

²⁹Miˬyehˇ-oˇ, piˇ ma-euˬ aˇ yaˬ-ahˇ maˬ ehˇ, piˇ ma deuˬ hawˇ-eu Leˬbiˇ tsawˇ haˬ deuˬ-ahˇ nawˬ neh jaˇ taˬ-euˬ saˇ jaˇ-ahˇ maˬ ehˇ, tsawˇ haˬ kʼoeˇ deuˬ yawˬ ha-euˬ aˇ yaˬ-ahˇ yehˬ bawˬ sehˇ lu-ehˇ gʼeh-euˬ gaˇ taˬ ngehˇ nehˬ.

³⁰Aˬ yawꞈ maꞈ nehˬ-ehˇ aˬ cawˬ tsawˇ jeuˬ-ahˇ taꞈ-eu jeˬ tiˬ jeˬ-iˬ maˬ bi jaˆ ni, ngaˬ neh shawˇ nehˬ-euˬ ma. Piˇ ma deuˬ hawˇ-eu Leˬbiˇ tsawˇ haˬ deuˬ yawˬ ha-euˬ gaˇ yawˬ ha baw ni, ngaˇ gaˇ biˇ nehˬ-euˬ ma.

³¹Lawˇ gaˇ shehˇ gaˇ doꞈ-eu miˬ dzaˬ aˇ yamˬ tsaˬ tsaˬ ni yuˇ laꞈ-eu gʼaˇ duˬ maˬ ehˇ, keuˆ beh beh le-euˬ dzaˬ la gʼo cehˇ hawˇ-eu aˇ siˬ aˇ lu deuˬ sha laˇ-eu gʼaˇ duˬ maˬ ehˇ, ngaˇ gaˇ kawˆ laˆ saˆ nehˬ-euˬ meh. Miˬyehˇ-oˇ, kʼoeˇ deuˬ dawˬ tawˆ luꞈ-ahˇ noeˬ keuˆ-awˇ, ngaˬ-ahˇ taˬ ngehˇ nehˬ laꞈ.