Read Akha Neˬhaˬmiˇ 3 Bible Online

Neˬhaˬmiˇ 3 - Akha bible

Neˬhaˬmiˇ 3

¹Yeˬluˇsaˬlehˬ meuˬ lahˇ paˇ gawˬ muiˬ-euˬ gaˇ kawˆ-aˬ, heu loꞈ-ehˇ meh. Piˇ ma Yaw huiˬ gʼaˬ pyeuꞈ-eu Eˇlaˬshiˆ hawˇ-eu aˬ yawꞈ-euˬ cawˬ piˇ ma deuˬ Yawˇ lahˇ kʼehˬ-ahˇ gawˬ muiˬ-awˇ, Miˬyehˇ-ahˇ a nehˬ-awˇ laˇ gʼoˆ paꞈ dawˆ tsoꞈ-euˬ meh. Tiˬ yaˇ gʼaˬ loꞈ-eu nymˇ goˇ hawˇ-eu Haˬnaˬneˬlaˇ-euˬ loꞈ-eu nymˇ goˇ-ahˇ keuˆ ni jaˆ-eu meuˬ meuˬ lahˇ-ahˇ aˬ yawꞈ maꞈ Miˬyehˇ-ahˇ a nehˬ-euˬ meh.

²Yeˬliˇkoˇ meuˬ-ahˇ jawˇ-eu tsawˇ haˬ deuˬ tiˬ deuˆ gawˬ tsaꞈ-awˇ, Ymˇliˬ-euˬ aˬ li Zaˬkuˬlaˇ gʼaˬ kʼawꞈ tiˬ deuˆ paˇ gawˬ tsaꞈ gʼeh-euˬ meh.

³Haˬseˬnaˬ aˇ jeuˬ deuˬ Ngaˬ shaˬ lahˇ kʼehˬ gawˬ-awˇ, laˇ gʼoˆ bahˬ hawˇ-eu laˇ gʼoˆ paꞈ dawˆ tsoꞈ-awˇ, gʼoˆ kaꞈ kaꞈ tehˬ-eu gʼaˇ duˬ, gʼoˆ sehˬ hawˇ-eu gʼoˆ sehˬ kahˬ kʼawꞈ jahˇ tsoꞈ-euˬ meh.

⁴Haˬkawˇzaˬ-euˬ zaˬ Uˇliˇyaˆ-euˬ aˬ li Meˬlaˬmoˇ gʼaˬ, kʼoeˇ gaˇ neh tiˬ deuˆ paˇ gawˬ tsaꞈ gʼeh-euˬ meh. Meˬsheˬzaˬbeˬlaˇ-euˬ zaˬ Beˬleˬkiˇ-euˬ aˬ li Meˬshuˇlamˬ gʼaˬ tiˬ deuˆ paˇ gawˬ tsaꞈ gʼeh-awˇ, Baˬnaˬ-euˬ aˬ li Zaˬdoˆ gʼaˬ tiˬ deuˆ paˇ gawˬ tsaꞈ gʼeh-euˬ meh.

⁵Kʼoeˇ gaˇ neh naˇ, Teˬkawˬ meuˬ-ahˇ jawˇ-eu tsawˇ haˬ deuˬ tiˬ deuˆ paˇ gawˬ tsaꞈ gʼeh-euˬ meh. Ehˇ kʼawꞈ, gaˇ mˇ gaˇ haw luꞈ pyaˆ luꞈ-eu deuˬ neh bi mˇ-euˬ loꞈ-ehˇ aˬ yawꞈ maꞈ maˬ mˇ-a.

⁶Paˬsah-euˬ aˬ li Yawˇyaˬdaˇ hawˇ-eu Beˬsawˇdeˬ-euˬ aˬ li Meˬshuˇlamˬ aˬ nyaꞈ Yeˬshaˬnahˬ[1] lahˇ kʼehˬ gawˬ muiˬ-awˇ, Laˇ gʼoˆ bahˬ hawˇ-eu laˇ gʼoˆ paꞈ dawˆ tsoꞈ-awˇ, gʼoˆ kaꞈ kaꞈ tehˬ-eu gʼaˇ duˬ gʼoˆ sehˬ hawˇ-eu gʼoˆ sehˬ kahˬ kʼawꞈ jahˇ tsoꞈ-euˬ meh.

⁷Giˇbyoˬ meuˬ-ahˇ jawˇ-eu Meˬlaˬtiˇ hawˇ-eu Meˬlawˇnawˆ meuˬ-ahˇ jawˇ-eu Yaˬdoˬ aˬ nyaꞈ nehˬ-ehˇ, Giˇbyoˬ meuˬ hawˇ-eu Miˇzaˬpaˬ meuˬ-ahˇ jawˇ-eu tsawˇ haˬ deuˬ gm leˇ-awˇ, Uˇpaˬlaˇ lawˇ baˬ nahˇ ma ga kʼehˬ paw miˇ kʼahˬ-ahˇ uˆ lahˇ-eu gʼaˬ jawˇ-eu nymˇ-ahˇ keuˆ ni gawˬ keuˆ gʼeh-euˬ meh.

⁸Haˬhaˬyaˇ-euˬ aˬ li shuiˇ myawˬ guˇ tehˆ-eu gʼaˬ pyeuꞈ-eu Awˇzeˬlaˇ gʼaˬ tiˬ deuˆ paˇ gawˬ tsaꞈ gʼeh-awˇ, tsiˇ yaw saw jeˬ jahˇ doˆ-eu gʼaˬ pyeuꞈ-eu Haˬnaˬniˇyaˆ gʼaˬ neh Meuˬ lahˇ lahˇ ma-ahˇ keuˆ ni gawˬ keuˆ gʼeh-euˬ meh.

⁹Huˇyaˆ-euˬ aˬ li Yeˬluˇsaˬlehˬ meuˬ tiˬ paˆ dzaˬ-eu gʼaˬ pyeuꞈ-eu Leˬpaˬyaˆ gʼaˬ tiˬ deuˆ paˇ gawˬ tsaꞈ gʼeh-euˬ meh.

¹⁰Haˬluˇmaˆ-euˬ aˬ li Yeˬdaˬyaˇ gʼaˬ-aˬ, aˬ yawꞈ-euˬ nymˇ dawˬ peh jaˆ-eu deuˆ paˇ gawˬ tsaꞈ gʼeh-awˇ, Haˬshaˬbaˬniˇ-euˬ aˬ li Haˬtuˇshaˬ gʼaˬ tiˬ deuˆ paˇ gawˬ tsaꞈ gʼeh-euˬ meh.

¹¹Haˬlmˬ-euˬ a li Maˬlaˬkiˇyaˬ hawˇ-eu Paˬhaˆmawˇbaˆ-euˬ aˬ li Haˬshuˇbaˆ aˬ nyaꞈ tiˬ deuˆ paˇ gawˬ tsaꞈ gʼeh-awˇ, Tsawˬ bu nymˇ goˇ-ahˇ kʼawꞈ aˬ yawꞈ nyaꞈ gawˬ-euˬ meh.

¹²Haˬloˇhehˇ-euˬ aˬ li Yeˬluˇsaˬlehˬ meuˬ tiˬ paˆ dzaˬ-eu Shaˬlmˬ gʼaˬ tiˬ deuˆ paˇ gawˬ tsaꞈ gʼeh-euˬ meh. Aˬ yawꞈ-euˬ aˬ buˇ deuˬ kʼawꞈ aˬ yawꞈ-ahˇ caw mˇ-euˬ meh.

¹³Haˬnuˬ hawˇ-eu Zaˬnoˇaˬ meuˬ-ahˇ jawˇ-eu tsawˇ haˬ deuˬ Deh kʼawꞈ lahˇ kʼehˬ gawˬ muiˬ-awˇ, Laˇ gʼoˆ bahˬ, laˇ gʼoˆ paꞈ hawˇ-eu gʼoˆ sehˬ jahˇ tsoꞈ-euˬ meh. Mawˇ neˇ ceˬ lahˇ kʼehˬ-ahˇ keuˆ ni jaˆ-eu meuˬ meuˬ lahˇ nyiˬ yaˇ ngaˬ tseˇ lmˇ kʼawꞈ aˬ yawꞈ maꞈ gawˬ muiˬ-euˬ meh.

¹⁴Leˬkaˆ-euˬ a li Behˬhaˬsheˬleˬ meuˬ-ahˇ uˆ lahˇ-eu gʼaˬ pyeuꞈ-eu Maˬlaˬkiˇyaˬ gʼaˬ Mawˇ neˇ ceˬ lahˇ kʼehˬ-ahˇ gawˬ muiˬ-euˬ meh. Laˇ gʼoˆ bahˬ hawˇ-eu gʼoˆ paꞈ aˬ yawꞈ dawˆ tsoꞈ-awˇ, gʼoˆ kaꞈ kaꞈ tehˬ nya-eu gʼaˇ duˬ gʼoˆ sehˬ hawˇ-eu gʼoˆ sehˬ kahˬ kʼawꞈ jahˇ tsoꞈ-euˬ meh.

¹⁵Miˇzaˬpaˬ meuˬ tiˬ paˆ dzaˬ-eu Kawˇlaˆhawˇzaˬ-euˬ aˬ li Shaˬlmˬ gʼaˬ, Lawˇ kʼawꞈ lahˇ kʼehˬ-ahˇ gawˬ muiˬ-euˬ meh. Gʼoˆ kʼehˬ kʼoeˇ kʼehˬ-ahˇ aˬ yawꞈ joe shmˇ-awˇ, laˇ gʼoˆ hawˇ-eu gʼoˆ sehˬ jahˇ tsoꞈ-euˬ meh. Sahˬpaˬ-euˬ yaˇ kmˇ nui paw Sheˬlahˬ-euˬ lah dawˬ peh jaˆ-eu meuˬ meuˬ lahˇ kʼoeˇ deuˆ-ahˇ, Daˬbiˇ-euˬ meuˬ-ahˇ neh zaꞈ ka le-eu dawˬ dzm dawˬ tehꞈ jaˆ-eu tsahˇ-ahˇ keuˆ ni aˬ yawꞈ gawˬ muiˬ-euˬ meh.

¹⁶Behˬzuˇlaˆ meuˬ tiˬ paˆ dzaˬ-eu Aˬzaˬboˆ-euˬ aˬ li Neˬhaˬmiˇ gʼaˬ tiˬ deuˆ paˇ gawˬ tsaꞈ gʼeh-awˇ, Daˬbiˇ-euˬ lmˬ bymˇ, lah hawˇ-eu tsawˇ myahˇ doˆ dui dui-eu yehˇ deuˬ-euˬ nymˇ-ahˇ keuˆ ni gawˬ keuˆ-euˬ meh.

¹⁷Leˬbiˇ tsawˇ haˬ deuˬ neh meuˬ meuˬ lahˇ paˇ gawˬ tsaꞈ gʼeh-euˬ meh. Baˬniˬ-euˬ aˬ li Leˬhamˬ gʼaˬ neh tiˬ deuˆ gawˬ tsaꞈ gʼeh-awˇ, Kiˇlahˬ meuˬ tiˬ paˆ dzaˬ-eu Haˬshaˬbiˇ gʼaˬ aˬ yawꞈ uˆ lahˇ-eu meuˬ-euˬ dah zaˇ tiˬ deuˆ paˇ gawˬ tsaꞈ gʼeh-euˬ meh.

¹⁸Kiˇlahˬ meuˬ tiˬ paˆ dzaˬ-eu Heˬnaˬdaˆ-euˬ aˬ li Baˬbehˇ gʼaˬ, tiˬ deuˆ paˇ gawˬ tsaꞈ gʼeh-euˬ meh.

¹⁹Miˇzaˬpaˬ meuˬ dzaˬ-eu Yeˬshah-euˬ aˬ li Eˇzaˬ gʼaˬ, guiˇ deuˆ-eu keu ka deuˬ taˬ-eu nymˇ-euˬ mehˬ shi jaˆ-eu kʼoeˇ deuˆ gawˬ tsaꞈ gʼeh-awˇ, meuˬ lahˇ laꞈ gʼoꞈ-ahˇ keuˆ ni gawˬ keuˆ-euˬ meh.

²⁰Zaˬbaiˇ-euˬ aˬ li Baˬluˆ gʼaˬ tiˬ deuˆ paˇ gawˬ tsaꞈ gʼeh-awˇ, Piˇ ma yaw huiˬ gʼaˬ pyeuꞈ-eu Eˇlaˬshiˇ-euˬ nymˇ gʼoˆ kʼeh keuˆ ni gawˬ keuˆ-euˬ meh.

²¹Haˬkawˇzaˬ-euˬ zaˬ Uˇliˇyaˆ-euˬ aˬ li Meˬlaˬmoˇ gʼaˬ, Eˇlaˬshiˆ-euˬ nymˇ gʼoˆ kʼehˬ-ahˇ neh nymˇ laꞈ coeˇ-ahˇ keuˆ ni gawˬ tsaꞈ gʼeh-euˬ meh.

²²Piˇ ma deuˬ neh meuˬ meuˬ lahˇ paˇ gawˬ tsaꞈ gʼeh-euˬ meh. Yeˬluˇsaˬlehˬ meuˬ-euˬ tahˬ gʼoꞈ tahˬ jawˇ jawˇ-eu piˇ ma deuˬ tiˬ deuˆ paˇ gawˬ tsaꞈ gʼeh-euˬ meh.

²³Beˬyaˬmiˬ hawˇ-eu Haˬshuˇbaˆ aˬ nyaꞈ neh aˬ yawꞈ nyaꞈ-euˬ nymˇ mehˬ shi jaˆ-eu deuˆ gawˬ tsaꞈ gʼeh-awˇ, Aˬnaˬniˇyaˆ-euˬ Maˬsaˬyaˇ-euˬ aˬ li Aˬzaˬliˇ gʼaˬ, aˬ yawꞈ-euˬ nymˇ mehˬ shi jaˆ-eu deuˆ gawˬ tsaꞈ gʼeh-euˬ meh.

²⁴Heˬnaˬdaˆ-euˬ aˬ li Biˇnuiˇ gʼaˬ, Aˬzaˬliˇ-euˬ nymˇ-ahˇ neh meuˬ lahˇ laꞈ gʼoꞈ-ahˇ keuˆ ni gawˬ tsaꞈ gʼeh-euˬ meh.

²⁵Uˇzehˇ-euˬ aˬ li Paˬlaˬlaˆ gʼaˬ, meuˬ lahˇ laꞈ gʼoꞈ kʼoeˇ tsahˇ-ahˇ neh, meuˬ-ahˇ loꞈ-eu yehˇ deuˬ-euˬ saˇ naˇ dawˬ peh jaˆ-eu sahˬ paˬ-euˬ nymˇ laꞈ taˆ paw pyawˬ-ahˇ loꞈ-eu nymˇ goˇ-ahˇ keuˆ ni gawˬ muiˬ-euˬ meh. Paˬloˆ-euˬ aˬ li Peˬdehˇyaˬ gʼaˬ, nahˇ ma doˆ kʼehˬ paw jaˆ-eu Iˇ cuꞈ lahˇ kʼehˬ hawˇ-eu Uˬ duˬ tahˬ nymˇ nymˇ ma-ahˇ loꞈ-eu nymˇ goˇ dawˬ peh keuˆ ni gawˬ keuˆ-euˬ meh. Kʼoeˇ tsahˇ-aˬ, Uˬ duˬ tahˬ nymˇ nymˇ ma laꞈ kʼoeˇ gaˇ mˇ-eu deuˬ jawˇ-eu Awˇpeˬlaˇ lehˇ kuˇ-eu jawˇ duˬ dawˬ peh meh.

²⁶

²⁷Teˬkawˬ meuˬ-ahˇ jawˇ-eu tsawˇ haˬ deuˬ-aˬ, Uˬ duˬ tahˬ nymˇ nymˇ ma-ahˇ loꞈ-eu nymˇ goˇ goˇ ma-euˬ kʼoeˇ paˆ gawˬ tsaꞈ gʼeh-awˇ, Awˇpeˬlaˇ lehˇ kuˇ-eu jawˇ duˬ kʼoeˇ tsahˇ-ahˇ keuˆ ni gawˬ muiˬ-euˬ meh.

²⁸Piˇ ma tiˬ deuˬ-aˬ, Mahˬ lahˇ kʼehˬ kʼoeˇ tsahˇ-ahˇ neh, yawˬ ha nymˇ mehˬ shi yawˬ ha gawˬ gawˬ-ehˇ, Laˬtaˆ paw pyawˬ-ahˇ gawˬ daˆ leꞈ-euˬ meh.

²⁹Iˇmeˬlaˇ-euˬ aˬ li Zaˬdoˆ-aˬ, aˬ yawꞈ-euˬ nymˇ mehˬ shi jaˆ-eu kʼoeˇ deuˆ gawˬ-awˇ, Nahˇ ma doˆ kʼehˬ paw-euˬ gʼoˆ kehˬ-ahˇ loꞈ-eu gʼaˬ pyeuꞈ-eu Sheˬkaˬniˇ-euˬ aˬ li Sheˬmaˇyaˬ gʼaˬ tiˬ deuˆ paˇ gawˬ tsaꞈ gʼeh-euˬ meh.

³⁰Sheˬleˬmiˇyaˆ-euˬ aˬ li Haˬnaˬniˇyaˆ hawˇ-eu Zaˬlaˆ-euˬ aˬ li koꞈ gʼaˬ tiˬ gʼaˬ pyeuꞈ-eu Haˬnuˬ aˬ nyaꞈ tiˬ deuˆ paˇ gawˬ tsaꞈ gʼeh-awˇ, Beˬleˬkiˇ-euˬ aˬ li Meˬshuˇlamˬ gʼaˬ aˬ yawꞈ-euˬ nymˇ mehˬ shi jaˆ-eu deuˆ gawˬ-euˬ meh.

³¹Shuiˇ myawˬ guˇ tehˆ-eu gʼaˬ pyeuꞈ-eu Maˬlaˬkiˇyaˬ-aˬ, laꞈ taˆ paw dzeˇ nahˇ ma doˆ kʼehˬ paw pyawˬ-ehˇ jaˆ-eu meuˬ lahˇ laꞈ gʼoꞈ kʼoeˇ taˆ tsoˆ daˆ taˬ-euˬ nymˇ dawˬ peh Miˇpaˬkaˆ lahˇ kʼehˬ-ahˇ tawꞈ ni jaˆ-eu, Uˬ duˬ tahˬ nymˇ nymˇ ma-ahˇ gaˇ mˇ-eu deuˬ hawˇ-eu baw gaꞈ deuˬ jawˇ-eu nymˇ-ahˇ keuˆ ni gawˬ tsaꞈ gʼeh-euˬ meh.

³²Shuiˇ myawˬ guˇ tehˆ-eu deuˬ hawˇ-eu baw gaꞈ deuˬ-aˬ, jaˆ saˬ saˬ-eu deuˆ pyeuꞈ-eu meuˬ lahˇ laꞈ gʼoꞈ-ahˇ tsoˆ taˬ-euˬ nymˇ kʼoeˇ nymˇ-ahˇ neh, Yawˇ lahˇ kʼehˬ-ahˇ keuˆ ni gawˬ tawꞈ-euˬ meh.