Read Akha Neˬhaˬmiˇ 4 Bible Online

Neˬhaˬmiˇ 4 - Akha bible

Neˬhaˬmiˇ 4

¹Yuˇdaˆ tsawˇ haˬ deuˬ meuˬ meuˬ lahˇ gawˬ muiˬ luꞈ-eu gaˇ kawˆ-ahˇ Sahˬbaˬlaˆ ya gaˬ ngeh, aˬ yawꞈ nui ma pehˇ dui dui-awˇ, nga maꞈ-ahˇ ja bu ja doeˇ-eu meh.

²Aˬ yawꞈ-euˬ cawˬ deuˬ hawˇ-eu Saˬmaˬliˆ guiˇ maꞈ mehˬ shi aˬ yawꞈ heu loꞈ-ehˇ ehˇ-eu meh. “Aˇ gʼehˇ maˬ gʼehˇ-eu Yuˇdaˆ tsawˇ haˬ tsawˇ teˬ zaˬ teu deuˬ aˬ pa jeˬ mˇ luꞈ-eu nga. Meuˬ teu meuˬ-ahˇ paˇ tsoˆ muiˬ geuꞈ-eu lehˇ gʼeh ta loˇ. Lawˇ-eu shehˇ-eu jeˬ mˇ-awˇ tiˬ nah laꞈ kʼoeˇ tehꞈ-ehˇ paˇ tsoˆ muiˬ nya ma lehˇ aˬ yawꞈ maꞈ noeˬ ta loˇ. Bi puiˆ byoˆ jiˇ-euˬ kʼaˬ lo tsaˬ byaˆ kʼoeˇ deuˬ tsaˬ byaˆ paˇ pyeuꞈ laˇ ni aˬ yawꞈ maꞈ jahˇ doˆ nya te jeˇ loˇ.”

³Aˬmoˬ tsawˇ jeuˬ pyeuꞈ-eu Tawˇbyaˬ gʼaˬ aˬ yawꞈ-euˬ dawˬ peh yawꞈ-awˇ, heu loꞈ-ehˇ naˬ gʼa-eu meh. “Aˬ yawꞈ maꞈ neh gawˬ-euˬ meuˬ lahˇ kʼoeˇ-aˬ kʼaˬ yehˇ tiˬ mawˇ tsawˬ daˆ leˇ naˇ ga byaˆ jiˇ tehꞈ-a.”

⁴Kʼoeˇ ngeh, ngaˇ heu loꞈ-ehˇ guiˬ lahˬ shaˇ-euˬ ma. “Miˬyehˇ-oˇ, aˬ yawꞈ maꞈ nga maꞈ-ahˇ yehˬ bawˬ sehˇ lu-ehˇ ehˇ niˇ gʼa luꞈ gaˇ naˇ haˬ sheˇ. Aˬ yawꞈ maꞈ neh ja bu ja doeˇ-euˬ jeˬ aˬ yawꞈ maꞈ kʼoeˇ taˆ bi keuˆ le-awˬ. Aˬ yawꞈ maꞈ kʼaˇ jaˆ-eu jeˬ aˬ cawˬ neh bi deh dzaˬ jiˇ-awˇ, aˬ yawꞈ maꞈ-ahˇ aˬ cawˬ-euˬ miˇ kʼahˬ-ahˇ bi nyehꞈ byoˆ jiˇ gʼeh-awˬ.

⁵Meuˬ meuˬ lahˇ gawˬ muiˬ luꞈ-eu nga maꞈ-ahˇ aˬ yawꞈ maꞈ yehˬ bawˬ sehˇ lu-ehˇ ehˇ-eu miˇ neh, aˬ yawꞈ maꞈ neh mˇ-euˬ yaw haiˬ jeˬ hawˇ-eu aˬ yawꞈ maꞈ-euˬ iˬ baˇ-ahˇ taˬ pyehˬ nehˬ.”

⁶Kʼoeˇ naˇ, nga maꞈ meuˬ lahˇ paˇ gawˬ daˆ leꞈ-awˇ, nui ma keuˆ dui dui-eu laꞈ kʼoeˇ mˇ-eu miˇ neh, gʼawˬ myahˇ maˬ gʼeh-ehˇ tiˬ kʼehˆ gawˬ kʼehˆ-euˬ ma.

⁷Sahˬbaˬlaˆ, Tawˇbyaˬ aˬ nyaꞈ hawˇ-eu, Aˬleˬbyaˇ miˇ kʼahˬ, Aˬmoˬ miˇ kʼahˬ hawˇ-eu Aˬshaˬdoˇ miˇ kʼahˬ-ahˇ jawˇ-eu tsawˇ haˬ deuˬ, nga maꞈ meuˬ lahˇ gawˬ daˆ leꞈ luꞈ-eu gaˇ kawˆ hawˇ-eu yaw pehꞈ-ehˇ jaˆ-eu meuˬ lahˇ gawˬ gʼoeˬ jiˇ-euˬ gaˇ kawˆ ya gaˬ-awˇ, nui ma pehˇ dui dui-eu meh.

⁸Kʼoeˇ miˇ neh, aˬ yawꞈ maꞈ dawˬ tawˆ luꞈ Yeˬluˇsaˬlehˬ meuˬ-ahˇ guiˇ deuˆ laˇ-awˇ laˆ bahˬ laˆ muˆ-eu gʼaˇ duˬ mehˬ bawˬ mˇ kʼoeˬ-euˬ meh.

⁹Ehˇ kʼawꞈ, nga maꞈ Miˬyehˇ-ahˇ guiˬ lahˬ shaˇ-awˇ, aˬ yawꞈ maꞈ laˇ gaˇ uˬ ciꞈ nah gʼahˇ maˬ ehˇ bi loꞈ-euˬ ma.

¹⁰Yuˇdaˆ tsawˇ haˬ deuˬ heu loꞈ-ehˇ caˇ dawˬ tiˬ bymˇ caˇ-euˬ meh. 2 “Kʼaˆ behˆ baꞈ-eu maˬ gʼaˬ leˇ nya. 2 Meu lahˇ coˬ pyaˆ taˬ-awˇ jaˆ-eu, yaw cawˆ maˬ baꞈ dzeh jiˇ coeˇ nya. 2 Iˬ nah meuˬ lahˇ aˬ joˇ gawˬ nmˇ.”

¹¹Aˬ yawꞈ maꞈ nga maꞈ jawˇ gaˇ oe tehˬ leꞈ-awˇ, nga maꞈ-ahˇ sehꞈ-awˇ nga maꞈ-euˬ gaˇ heu maˬ paˇ mˇ nya ni ya naˬ leˇ ngeh maˬ ngeuˇ naˇ, aˬ yawꞈ maꞈ-ahˇ nga maꞈ maˬ mawˇ nya-ehˇ, aˬ jeˬ keuˆ le luꞈ-eu gaˇ kawˆ maˬ siˬ nya-aˇ lehˇ nga maꞈ-ahˇ muiˇ-eu deuˬ noeˬ luꞈ meh.

¹²Nga maꞈ-ahˇ muiˇ-eu tsawˇ haˬ deuˬ nga maꞈ-ahˇ kʼoeˇ loꞈ-ehˇ jahˇ laˇ-eu lehˇ lehˬ hmˬ luꞈ-eu gaˇ kawˆ, muiˇ-eu tsawˇ haˬ kʼoeˇ deuˬ nehˬ-ehˇ jawˇ luꞈ-eu Yuˇdaˆ tsawˇ haˬ deuˬ tiˬ poˆ saˇ-iˬ tiˬ poˆ ehˇ gaˬ laˇ tehˇ tehˬ-eu meh.

¹³Kʼoeˇ miˇ neh, nga maꞈ-euˬ tsawˇ haˬ deuˬ-ahˇ, mi cehˇ, gahˬ hawˇ-eu kaˆ bi baꞈ-awˇ, yawˬ ha aˇ jeuˬ yawˬ ha, maˬ gawˬ goˇ keuˆ-euˬ meuˬ lahˇ aˇ deuˆ kʼaˇ jaˆ-eu naˇ kʼah bi loꞈ-euˬ ma.

¹⁴Ngaˬ-euˬ tsawˇ haˬ deuˬ noeˬ shaˬ luꞈ gaˇ ngaˇ ya mawˇ-awˇ, aˬ yawꞈ maꞈ-ahˇ maˬ ehˇ, aˬ yuiꞈ aˬ tsu deuˬ hawˇ-eu yaw huiˬ yaw mahˇ deuˬ-ahˇ maˬ ehˇ, ngaˇ heu loꞈ-ehˇ ehˇ nehˬ-euˬ ma. “Aˬ dui-ahˇ muiˇ-eu deuˬ-ahˇ taˬ guˆ. Sahˬpaˬ miˬyehˇ-aˬ, huiˬ dui mahˇ dui dui-awˇ guˆ laˇ paˬ-ehˇ gʼeh-eu gʼaˬ pyeuꞈ gaˇ noeˬ keuˆ-awˇ, yawˬ ha-euˬ cawˬ miˇ kʼahˬ zaˬ deuˬ, yawˬ ha-euˬ miˬ sawˇ zaˬ deuˬ hawˇ-eu, yawˬ ha-euˬ nymˇ jiˇ gʼaˇ duˬ guiˇ deuˆ-awˬ.”

¹⁵Aˬ yawꞈ maꞈ mˇ-eu lehˇ lehˬ hmˬ taˬ-euˬ jeˬ-ahˇ nga maꞈ ya siˬ gʼaˬ-euˬ gaˇ kawˆ nga maꞈ-ahˇ muiˇ-eu deuˬ ya gaˬ ngeh, gaˇ kʼoeˇ-ahˇ Miˬyehˇ laˆ tsoeˬ-euˬ meh lehˇ aˬ yawꞈ maꞈ siˬ duˬ-euˬ meh. Kʼoeˇ ngeh, nga maꞈ dawˬ tawˆ luꞈ meuˬ lahˇ gawˬ muiˬ-eu gaˇ-ahˇ paˇ dawꞈ leˇ-euˬ ma.

¹⁶Kʼoeˇ ngeh neh naˇ, ngaˬ-euˬ tsawˇ haˬ tiˬ paˆ gaˇ mˇ-awˇ, tiˬ paˆ-aˬ, shmˇ pehˇ kʼahˬ dm-awˇ, gahˬ, dehˬ daˬ duˬ hawˇ-eu kaˆ baꞈ-awˇ bi loꞈ-euˬ ma. Aˬ yuiꞈ aˬ tsu deuˬ kʼawꞈ meuˬ lahˇ gawˬ ziꞈ-eu gaˇ mˇ luꞈ-eu Yuˇdaˆ tsawˇ haˬ deuˬ-ahˇ tiˬ byah tiˬ loꞈ caw ba nehˬ-euˬ meh. Meuˬ lahˇ gawˬ gaˇ mˇ myawˬ sha miˇ nehˬ-eu deuˬ kʼawꞈ, tiˬ paw laꞈ neh mˇ myawˬ sha-awˇ tiˬ paw laꞈ-ahˇ guiˇ deuˆ-eu keu ka tuˆ tehˬ taˬ-euˬ meh.

¹⁸Meuˬ lahˇ gawˬ luꞈ-eu deuˬ kʼawꞈ, joꞈ-ahˇ mi cehˇ dawꞈ-awˇ gawˬ-euˬ meh. Daˇ heh baw gaˬ nehˬ-eu gʼaˬ-aˬ, ngaˬ nehˬ-ehˇ jawˇ-euˬ meh.

¹⁹Aˬ yuiꞈ aˬ tsu deuˬ, yaw huiˬ yaw mahˇ deuˬ hawˇ-eu, miˇ kʼahˬ zaˬ deuˬ-ahˇ ngaˇ heu loꞈ-ehˇ ehˇ nehˬ-euˬ ma. “Aˬ dui-aˬ, meuˬ-euˬ tiˬ jawˬ meuˬ lahˇ gawˬ-eu gaˇ mˇ luꞈ-eu miˇ neh, tiˬ muˇ tiˇ muˇ gaˇ mahˇ kaˬ kaˬ-ehˇ ya mˇ luꞈ-eu meh.

²⁰Naw maꞈ daˇ heh baw-eu teˇ saˇ kʼaˇ ya gaˬ ngeh, ngaˇ jawˇ gaˇ uiˬ laˇ-awˬ. Aˬ dui-euˬ Miˬyehˇ aˬ dui gʼaˇ duˬ guiˇ deuˆ tehꞈ-a.”

²¹Kʼoeˇ loꞈ-ehˇ, aˬ yawꞈ nah yawꞈ mˬ bya laˇ ngeh neh uˬ ciꞈ paw aˬ guiˇ tsehˬ laˇ ngeh keuˆ ni, nga maꞈ tsawˇ haˬ tiˬ paˆ meuˬ lahˇ gawˬ muiˬ-eu gaˇ mˇ-awˇ, tiˬ paˆ-aˬ, gahˬ baꞈ-awˇ bi loꞈ-euˬ ma.

²²Aˇ yamˬ kʼoeˇ yamˬ laꞈ kʼoeˇ, uˬ ciꞈ paw meuˬ-ahˇ loꞈ piˇ nya-awˇ, nah gʼahˇ paw gaˇ mˇ nya-eu gʼaˇ duˬ, meuˬ lahˇ gawˬ gaˇ haw-eu pyaˆ-eu deuˬ hawˇ-eu aˬ yawꞈ maꞈ-ahˇ caw ba-eu deuˬ dawˬ tawˆ luꞈ, Yeˬluˇsaˬlehˬ meuˬ laꞈ kʼoeˇ uˬ ciꞈ ya yaꞈ meh lehˇ ngaˇ ehˇ nehˬ-euˬ ma.

²³Ngaˇ maˬ ehˇ, ngaˬ-euˬ cawˬ deuˬ maˬ ehˇ, ngaˬ-euˬ zaˬ kʼaˆ deuˬ maˬ ehˇ, ngaˬ-ahˇ loꞈ piˇ-eu deuˬ maˬ ehˇ, uˬ ciꞈ paw kʼawꞈ tiˬ gʼaˬ-iˬ mehˬ tsoeˬ maˬ lehˆ-ehˇ, yawˬ gʼaˬ na luꞈ guiˇ deuˆ-eu keu ka maˬ pyehˬ dzeh ni aˬ myah luꞈ tuˆ tehˬ-awˇ jawˇ-euˬ ma.