Read Akha Neˬhaˬmiˇ 8 Bible Online

Neˬhaˬmiˇ 8 - Akha bible

Neˬhaˬmiˇ 8

¹Ba la shiꞈ siˬ tiˬ siˬ-ahˇ, Iˇsaˬleˬlaˆ tsawˇ haˬ deuˬ yawˬ ha-euˬ meuˬ deuˬ-ahˇ jawˇ duˬ dah jiˇ-euˬ meh. Ba la kʼoeˇ siˬ yaw beh nah-ahˇ, Yeˬluˇsaˬlehˬ laꞈ kʼoeˇ Iˇ cuꞈ lahˇ kʼehˬ dawˬ peh jaˆ-eu pu kaˬ kʼoeˇ tsahˇ-ahˇ aˬ yawꞈ maꞈ uiˬ laˇ jiˇ-euˬ meh. Sahˬpaˬ Miˬyehˇ neh Iˇsaˬleˬlaˆ tsawˇ haˬ deuˬ-ahˇ biꞈ taˬ-euˬ Moˇseˬ-euˬ zahˇ dawˬ kʼoꞈ dawˬ sahˬ boꞈ yuˇ doˆ leꞈ-awˬ lehˇ, piˇ ma hawˇ-eu zahˇ dzoeˬ miˬ ma pyeuꞈ-eu Eˇzaˬlaˬ-ahˇ aˬ yawꞈ maꞈ shaˇ-euˬ meh.

²Kʼoeˇ miˇ neh, ba la shiꞈ siˬ tiˬ siˬ yaw beh nah-ahˇ, noeˬ siˬ nya laˇ-euˬ kʼaˬ dzeˇ zaˬ deuˬ, zaˬ miˬ zaˬ deuˬ hawˇ-eu zaˬ deuˬ uiˬ leˇ taˬ-euˬ mehˬ shi, zahˇ dawˬ kʼoꞈ dawˬ sahˬ boꞈ kʼoeˇ dmˬ Eˇzaˬlaˬ yuˇ doˆ laꞈ-euˬ meh.

³Meuˬ lahˇ gʼoˆ kʼehˬ dawˬ peh jaˆ-eu pu kaˬ kʼoeˇ tsahˇ-ahˇ, gʼoˆ shaw nya laˇ-euˬ deuˬ pyeuꞈ-eu kʼaˬ dzeˇ zaˬ, zaˬ miˬ zaˬ hawˇ-eu zaˬ deuˬ-ahˇ, uˬ bya bya laˇ ngeh neh nah loˆ ceh laˇ ngeh keuˆ ni aˬ yawꞈ gui mehˬ ngeh, aˬ yawꞈ maꞈ nui ma keuˆ-eu laꞈ kʼoeˇ naˇ haˬ luꞈ-eu meh.

⁴Kʼoeˇ loꞈ-ehˇ gui mehˬ ngeh bi zmˬ-eu gʼaˇ duˬ teˇ byaꞈ neh tsoˆ taˬ-euˬ guiˇ ga kʼoeˇ taˆ Eˇzaˬlaˬ yawꞈ-euˬ meh. Maˬtiˇdiˇ, Sheˬmaˬ, Aˬnaˬyaˆ, Uˇliˇyaˆ, Hiˇlaˬkiˇ, Maˬseˬyaˇ aˬ ha maꞈ aˬ yawꞈ-euˬ aˇ maˇ paw yawꞈ-awˇ, Peˬdehˇyaˬ, Miˇsheˬlaˇ, Maˬlaˬkiˇyaˬ, Haˬshuˬ, Haˬshaˬbaˬdaˬnaˬ, Zaˬkaˬliˇ, Meˬshuˇlamˬ aˬ ha maꞈ aˬ yawꞈ-euˬ aˇ caˇ paw yawꞈ-euˬ meh.

⁵Eˇzaˬlaˬ gʼaˬ guiˇ ga kʼoeˇ taˆ yaw goˇ-ahˇ yawꞈ luꞈ-awˇ, tsawˇ haˬ dawˬ tawˆ luꞈ aˬ yawꞈ-ahˇ haw tsoˆ taˬ-euˬ meh. Aˬ yawꞈ sahˬ boꞈ pah-eu nehˬ-ehˇ, aˬ yawꞈ maꞈ dawˬ tawˆ luꞈ tuˇ-euˬ meh.

⁶“Huiˬ dui mahˇ dui dui-eu Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ” lehˇ Eˇzaˬlaˬ ehˇ ngeh, tsawˇ haˬ dawˬ tawˆ luꞈ aˬ laꞈ baꞈ diˇ-awˇ, “Aˬ miˬ, aˬ miˬ” lehˇ ehˇ-eu meh. Aˬ yawꞈ maꞈ baˬ ba miˇ tsa tuˆ ni pawˬ tsuiꞈ pawˬ dmˬ dmˬ-awˇ uˬ duˬ tahˬ-euˬ meh.

⁷Kʼoeˇ naˇ, aˬ yawꞈ maꞈ yawˬ ha jawˇ duˬ-ahˇ yawˬ ha tuˇ-awˇ, Leˬbiˇ tsawˇ haˬ deuˬ pyeuꞈ-eu Yeˬshah, Baˬniˬ, Sheˬleˬbiˇ, Yaˬmeˬ, Aˬkuˇ, Shaˬbaˬdehˇ, Hawˇdiˇyaˆ, Maˬseˬyaˇ, Geˬliˇtaˬ, Aˬzaˬliˇ, Yawˇzaˬbaˆ, Haˬnaˬ, Peˬlaˇyaˬ aˬ ha maꞈ neh aˬ yawꞈ maꞈ-ahˇ Zahˇ dawˬ kʼoꞈ dawˬ-euˬ dawˬ tsuiꞈ ja mehˬ nehˬ-euˬ meh.

⁸Miˇ kʼahˬ zaˬ deuˬ yaw muiˬ paˬ-ehˇ gʼoˆ shaw nya ni, Miˬyehˇ-euˬ zahˇ dawˬ kʼoꞈ dawˬ-ahˇ dawˬ tsuiꞈ yuˇ doˆ-awˇ yaw muiˬ paˬ-ehˇ ja sawˇ mehˬ nehˬ-euˬ meh.

⁹Zahˇ dawˬ kʼoꞈ dawˬ-ahˇ tsawˇ haˬ kʼoeˇ deuˬ gʼoˆ siˬ gʼaˬ ngeh, nui ma-ahˇ zaw dui dui leˇ-awˇ ngoeˇ-euˬ meh. Kʼoeˇ ngeh, Yuˇdaˆ miˇ kʼahˬ-ahˇ uˆ lahˇ-eu gʼaˬ pyeuꞈ-eu Neˬhaˬmiˇ, piˇ ma hawˇ-eu zahˇ dawˬ kʼoꞈ dawˬ siˬ nya-eu zahˇ dzoeˬ miˬ ma pyeuꞈ-eu Eˇzaˬlaˬ hawˇ-eu, zahˇ dawˬ kʼoꞈ dawˬ-euˬ dawˬ tsuiꞈ mehˬ nehˬ-eu Leˬbiˇ tsawˇ haˬ deuˬ aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. “Iˬ nah-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ gʼaˇ duˬ muiˬ-eu shawˇ-eu aˇ nah meh. Kʼoeˇ miˇ neh naw maꞈ taˬ ngoeˇ.

¹⁰Iˇ kahˇ-ahˇ gʼoꞈ-iˇ-awˇ dzaˬ-iˇ dawˇ-iˇ-awˬ. Naw maꞈ-euˬ dzaˬ dzaˬ dawˇ dawˇ hawˇ-eu aˬ gaꞈ dzaˇ uiˇ-ahˇ, maˬ jaˆ-eu tsawˇ haˬ deuˬ-ahˇ kʼawꞈ biˇ nehˬ-awˇ bi dzaˬ-awˬ. Iˬ nah-aˬ, aˬ dui-euˬ Sahˬpaˬ Miˬyehˇ gʼaˇ duˬ muiˬ-eu shawˇ-eu aˇ nah pyeuꞈ-eu miˇ neh, nui ma shaˬ zahˬ taˬ mˇ. Sahˬpaˬ Miˬyehˇ laꞈ kʼoeˇ laˬ kʼaˬ cehˇ-eu jeˬ-aˬ, naw maꞈ-euˬ gʼaˬ meh.”

¹¹Leˬbiˇ tsawˇ haˬ deuˬ tsawˇ haˬ kʼoeˇ deuˬ jawˇ gaˇ iˇ doe-awˇ, aˬ yawꞈ maꞈ ngoeˇ luꞈ-eu bi taˬ leˇ-eu gʼaˇ duˬ, Heu loꞈ-ehˇ muiˬ-eu shawˇ-eu aˇ nah-ahˇ noeˬ shaˬ noeˬ zahˬ-eu jeˬ taˬ bi ahˇ lehˇ ehˇ nehˬ-euˬ meh.

¹²Kʼoeˇ ngeh, tsawˇ haˬ kʼoeˇ deuˬ iˇ kahˇ-ahˇ gʼoꞈ-iˇ-awˇ, laˬ kʼaˬ cehˇ taˆ ni dzaˬ-awˇ dawˇ-awˇ, yawˬ ha kʼaˇ jaˆ-eu jeˬ aˬ cawˬ-ahˇ kʼawꞈ biˇ nehˬ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ-ahˇ mehˬ nehˬ-euˬ jeˬ-ahˇ aˬ yawꞈ maꞈ gʼoˆ shaw-euˬ meh.

¹³Yawˬ nah yawˬ-ahˇ, aˇ jeuˬ aˇ ca deuˬ-euˬ aˬ yuiꞈ aˬ tsu deuˬ, piˇ ma deuˬ hawˇ-eu, Leˬbiˇ tsawˇ haˬ deuˬ Eˇzaˬlaˬ jawˇ gaˇ iˇ-awˇ zahˇ dawˬ kʼoꞈ dawˬ dzaw geuꞈ-iˇ-euˬ meh.

¹⁴Sehˬ gʼawˆ-euˬ bawˬ-iˬ gʼeh ngeh Iˇsaˬleˬlaˆ tsawˇ haˬ deuˬ sehˬ gʼawˆ gʼawˆ-awˇ ya jawˇ meh lehˇ, Moˇseˬ-ahˇ gʼoe-awˇ Sahˬpaˬ Miˬyehˇ neh biꞈ taˬ-euˬ zahˇ dawˬ kʼoꞈ dawˬ laꞈ kʼoeˇ boꞈ taˬ-euˬ gaˇ, aˬ yawꞈ maꞈ ya mawˇ-euˬ meh.

¹⁵Kʼoeˇ miˇ neh, zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ sehˬ gʼawˆ gʼawˆ-eu gʼaˇ duˬ, gawˬ jawˬ-ahˇ daˆ leˇ-awˇ miˬ shuˬ uˬ laꞈ, saˬ loˬ aˇ bawˇ uˬ laꞈ, meuˬ laˬ tuˇ[3] uˬ laꞈ hawˇ-eu daoˇ uˬ laꞈ deuˬ deuˆ laˬ leˇ-awˬ lehˇ, Yeˬluˇsaˬlehˬ meuˬ hawˇ-eu meuˬ yawˬ meuˬ na luꞈ doe ni bi tsaꞈ gaˬ-iˇ-euˬ meh.

¹⁶Kʼoeˇ naˇ, Iˇsaˬleˬlaˆ tsawˇ haˬ deuˬ aˇ bawˇ uˬ laꞈ deuˆ uiˬ leꞈ-awˇ, saˇ lehˆ ni gʼeh-eu aˬ yawꞈ maꞈ-euˬ nymˇ mˬ kʼoeˇ taˆ maˬ ehˇ, yawˬ ha-euˬ kmˇ cehˇ laꞈ kʼoeˇ maˬ ehˇ, Uˬ duˬ tahˬ nymˇ nymˇ ma-euˬ pu ka maˬ ehˇ, Iˇ cuꞈ lahˇ kʼehˬ hawˇ-eu Eˇpaˬleˬ lahˇ kʼehˬ-ahˇ jaˆ-eu pu kaˬ-ahˇ maˬ ehˇ, sehˬ gʼawˆ gʼawˆ-euˬ meh.

¹⁷Baˬbuˇloˬ miˇ kʼahˬ-ahˇ neh kʼaˇ gʼoꞈ laˇ-euˬ tsawˇ haˬ dawˬ tawˆ luꞈ, sehˬ gʼawˆ gʼawˆ-awˇ, sehˬ gʼawˆ laꞈ kʼoeˇ jawˇ-euˬ meh. Kʼoeˇ poˆ-aˬ, Nuˬ-euˬ aˬ li Yawˇshuˆ-euˬ ziˇ-ahˇ neh naˇ sehˬ gʼawˆ-euˬ bawˬ-iˬ jahˇ beh beh-eu poˆ pyeuꞈ-awˇ, yawˬ gʼaˬ na luꞈ laˬ kʼaˬ cehˇ dui dui-euˬ meh.

¹⁸Bawˬ-iˬ gʼeh dahˬ beh-euˬ nah-ahˇ neh aˇ saˬ saˬ-eu nah-ahˇ keuˆ ni, aˬ yawꞈ nah yawꞈ Miˬyehˇ-euˬ zahˇ dawˬ kʼoꞈ dawˬ gui-euˬ meh. Shiꞈ nah keuˆ ni aˬ yawꞈ maꞈ bawˬ-iˬ gʼeh-awˇ, zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ, yehꞈ nah tiˬ nah-ahˇ bawˬ-iˬ gʼeh-eu piˬ tehˬ-eu bawˬ-iˬ jahˇ-euˬ meh.