Read Akha Iˇsaˬtaˆ 5 Bible Online

Iˇsaˬtaˆ 5 - Akha bible

Iˇsaˬtaˆ 5

¹Iˇsaˬtaˆ-aˬ, aˬ yawꞈ maˬ dzaˬ maˬ dawˇ ni lah-euˬ smˬ nah tiˬ nah keuˆ laˇ ngeh, sahˬ paˬ miˬ zaˬ dm-eu mehˬ tsoeˬ dm-awˇ, dzoeˬ dzaˬ nuiˇ mahˬ jaˆ-eu lawˆ-euˬ mehˬ shi, laꞈ kʼoeˇ lawˆ-ahˇ le-awˇ yawꞈ leˇ-euˬ meh. Sahˬ paˬ-aˬ, laꞈ kʼoeˇ jaˆ-eu dzoeˬ dzaˬ nuiˇ mahˬ-ahˇ laˆ gʼoˆ paw pyawˇ-ehˇ nuiˇ luꞈ-eu meh.

²Sahˬ paˬ miˬ zaˬ Iˇsaˬtaˆ laꞈ nyiˇ yawꞈ luꞈ gaˇ sahˬ paˬ ya mawˇ ngeh, gʼawˬ shaˬ haw gaˬ-awˇ, shuiˇ gawˬ yoeˬ cawˬ miˇ nehˬ-euˬ meh. Kʼoeˇ ngeh, Iˇsaˬtaˆ mehˬ hu paw jiˆ leˇ-awˇ, gawˬ yoeˬ mehˬ dzaˬ-ahˇ toeˬ ciˆ-euˬ meh.

³Sahˬ paˬ ehˇ-eu, “Sahˬ paˬ miˬ zaˬ Iˇsaˬtaˆ-oˇ, nawˇ aˬ jeˬ gʼeh laˇ teˬ. Nawˇ aˬ jeˬ loˬ te lehˇ ehˇ-awˬ. Nawˇ kʼaˇ shaˇ-eu jeˬ ngaˇ biꞈ ma. Ngaˬ-euˬ miˇ kʼahˬ kʼahˬ ma heu tiˬ paˆ paˆ nehˬ laꞈ lehˇ ehˇ kʼawꞈ, nawˬ-ahˇ ngaˇ paˆ nehˬ ma.”

⁴Iˇsaˬtaˆ ehˇ-eu, “Sahˬ paˬ-oˇ, nawˇ nui ma tsaˬ naˇ, nawˇ hawˇ-eu Haˬmaˬ gʼaˇ duˬ nymˇ ciꞈ ngaˬ neh lehˬ hmˬ laˆ saˆ taˬ-euˬ dzaˬ byawˇ-ahˇ oe nehˬ laꞈ-awˬ.”

⁵Iˇsaˬtaˆ neh laˆ saˆ taˬ-euˬ dzaˬ byawˇ-ahˇ aˬ yawꞈ nyaꞈ dzaˬ-iˇ-eu gʼaˇ duˬ, Haˬmaˬ-ahˇ yaw kawˇ-ehˇ kuˇ laˬ-iˇ-awˬ lehˇ sahˬ paˬ dawˬ biꞈ-euˬ meh. Kʼoeˇ naˇ, sahˬ paˬ hawˇ-eu Haˬmaˬ aˬ nyaꞈ, Iˇsaˬtaˆ neh lawˇ-euˬ dzaˬ byawˇ-ahˇ iˇ-euˬ meh.

⁶Aˬ yawꞈ maꞈ aˬ gaꞈ dzaˇ uiˇ dawˇ luꞈ ngeh, Iˇsaˬtaˆ-ahˇ sahˬ paˬ heu loꞈ-ehˇ ehˇ nehˬ-euˬ meh. “Nawˇ kʼaˇ loˬ-eu jeˬ ngaˬ-ahˇ ehˇ-awˬ. Nawˇ kʼaˇ shaˇ-eu jeˬ nawˬ-ahˇ ngaˇ biꞈ nehˬ ma. Ngaˬ-euˬ miˇ kʼahˬ kʼahˬ ma heu tiˬ paˆ paˆ nehˬ laꞈ lehˇ shaˇ kʼawꞈ, nawˬ-ahˇ ngaˇ paˆ nehˬ ma.”

⁷Iˇsaˬtaˆ ehˇ-eu, “Nawˬ-ahˇ ngaˇ shaˇ mawꞈ-eu-aˬ, heu loꞈ-ehˇ ma.

⁸Ngaˬ neh shaˇ-euˬ dawˬ-ahˇ sahˬ paˬ nawˇ naˇ haˬ geuꞈ nehˬ laꞈ ma lehˇ ngeuˇ naˇ, ni shawˬ uˬ ciꞈ naw nyaꞈ gʼaˇ duˬ ngaˬ neh lehˬ hmˬ laˆ saˆ taˬ-euˬ dzaˬ byawˇ-ahˇ kʼawꞈ, Haˬmaˬ naw nyaꞈ tiˬ poˆ paˇ oe nehˬ laꞈ siˬ. Kʼoeˇ poˆ jawˇ ngaˇ shaˇ mawꞈ-eu jeˬ nawˬ-ahˇ ehˇ nehˬ ma” lehˇ eh ˇnehˬ-euˬ meh.

⁹Haˬmaˬ-aˬ, dzaˬ byawˇ kʼoeˇ dzaˬ gʼaˬ ngeh jawˇ, nui ma saˇ lehˆ ni laˬ kʼaˬ cehˇ cehˇ-ehˇ doˆ-iˇ-euˬ meh. Ehˇ kʼawꞈ, sahˬ paˬ-euˬ nymˇ gʼoˆ kʼehˬ-ahˇ Mawˬdaˬkehˇ-ahˇ ya mawˇ-awˇ, aˬ yawꞈ iˇ tsehˆ gʼeh luꞈ gaˇ Mawˬdaˬkehˇ tsawˬ tuˇ-awˇ yaw zeu maˬ baw nehˬ-euˬ miˇ neh, Mawˬdaˬkehˇ-ahˇ aˬ yawꞈ nui ma pehˇ-euˬ meh.

¹⁰Ehˇ kʼawꞈ, aˬ yawꞈ nui ma laꞈ kʼoeˇ dzahˬ tehˬ-awˇ iˇ kahˇ-ahˇ gʼoꞈ keuˆ-iˇ-euˬ meh. Kʼoeˇ naˇ, aˬ yawꞈ-euˬ cawˬ deuˬ-ahˇ aˬ yawꞈ-euˬ nymˇ-ahˇ kuˇ uiˬ-awˇ, aˬ yawꞈ-euˬ miˬ zaˬ Zaˬlehˆ-ahˇ kʼawꞈ kʼoeˇ gaˇ kuˇ taˬ-euˬ meh.

¹¹Aˬ yawꞈ aˇ naˆ ni smˇ muiˬ muiˬ-eu gaˇ kawˆ maˬ ehˇ, aˬ yawꞈ-euˬ aˬ li aˇ myaˆ li jawˇ-eu gaˇ kawˆ maˬ ehˇ, sahˬ paˬ neh aˬ yawꞈ-ahˇ aˬ joˆ-ehˇ aˇ yaˬ yuˇ daˆ nehˬ-euˬ gaˇ kawˆ maˬ ehˇ, sahˬ paˬ-euˬ gaˇ mˇ-eu yaw huiˬ yaw mahˇ dawˬ tawˆ luꞈ naˆ maˬ tseˇ aˬ yawꞈ aˇ naˆ ni gaˇ dahˇ tsoeˬ dzehˬ-eu gaˇ kawˆ maˬ ehˇ, aˬ yawꞈ maꞈ-euˬ mehˬ shi ja-awˇ kʼahˬ sehˇ jehˆ-euˬ meh.

¹²Aˬ yawꞈ paˇ ehˇ-eu, “Aˬ jeˬ ehˇ kʼaˇ paˇ za nmˇ. Sahˬ paˬ miˬ zaˬ Iˇsaˬtaˆ gʼaˬ aˬ cawˬ tiˬ gʼaˬ-ahˇ-iˬ maˬ kuˇ ni, sahˬ paˬ nga nyaꞈ-ahˇ tehꞈ-ehˇ kuˇ-awˇ hawˬ byawˇ lawˇ nehˬ laꞈ-euˬ meh. Ni shawˬ uˬ ciꞈ kʼawꞈ tiˬ poˆ paˇ kuˇ taˬ-aˬ siˬ.

¹³Ehˇ kʼawꞈ, Yuˇdaˆ tsawˇ haˬ Mawˬdaˬkehˇ kʼoeˇ gʼaˬ sahˬ paˬ-euˬ nymˇ gʼoˆ kʼehˬ-ahˇ nuiˇ luꞈ gaˇ kʼaˇ ya mawˇ kʼoeˇ keuˆ ni, nymˬ-mˇ ngaˬ neh kʼaˇ ja dzeuˇ yaꞈ-euˬ heu deuˬ dawˬ tawˆ luꞈ ngaˬ-euˬ gʼaˇ duˬ poeˬ sawˇ lawˬ maˬ baw nya.”

¹⁴Kʼoeˇ ngeh, aˬ yawꞈ-euˬ miˬ zaˬ hawˇ-eu aˬ yawꞈ-euˬ cawˬ kʼoeˇ deuˬ dawˬ tawˆ luꞈ aˬ yawꞈ-ahˇ heu loꞈ-ehˇ ja sawˇ nehˬ-euˬ meh. “Aˬ jeˬ miˇ neh ngaˬ tseˇ caˆ byah-eu tsawˇ haˬ paꞈ gʼeu sehꞈ-eu kʼawˇ zeuˇ tiˬ zeuˇ nawˇ maˬ bi jahˇ te. Ni shawˬ uˬ shawˬ kʼawˇ zeuˇ kʼoeˇ zeuˇ kʼoeˇ taˆ Mawˬdaˬkehˇ-ahˇ bi paꞈ sehꞈ-awˬ lehˇ sahˬ paˬ-ahˇ nawˇ shaˇ-awˇ, uˬ ciꞈ paw laˬ kʼaˬ cehˇ taˆ ni dzaˬ byawˇ lawˇ gaˇ iˇ-awˬ tawˇ.” Kʼoeˇ loꞈ-ehˇ jahˇ naˇ muiˬ tehꞈ-a lehˇ Haˬmaˬ noeˬ-awˇ, tsawˇ haˬ paꞈ gʼeu sehꞈ-eu kʼawˇ zeuˇ bi jahˇ-euˬ meh.