Read Akha Iˇsaˬtaˆ 6 Bible Online

Iˇsaˬtaˆ 6 - Akha bible

Iˇsaˬtaˆ 6

¹Uˬ ciꞈ kʼoeˇ miˇ sahˬ paˬ maˬ yuꞈ kʼaˆ leˇ-a. Kʼoeˇ miˇ neh miˇ kʼahˬ-euˬ gaˇ kawˆ boꞈ taˬ-euˬ sahˬ boꞈ bi yuˇ laꞈ-awˇ aˬ yawꞈ-ahˇ gui mehˬ laˇ-awˬ lehˇ aˬ yawꞈ dawˬ biꞈ-euˬ meh.

²Aˬ yawꞈ maꞈ neh gui mehˬ-euˬ laꞈ kʼoeˇ, sahˬ paˬ jawˇ-eu lawˆ-ahˇ bi loꞈ-euˬ sahˬ paˬ-euˬ zaˬ miˬ zaˬ deuˬ-ahˇ haw-eu pyaˆ-eu gaˇ mˇ-eu Biˇdaˬnaˬ hawˇ-eu Teˬlehˆ aˬ nyaꞈ sahˬ paˬ-ahˇ sehꞈ kʼoeˬ-eu lehˇ lehˬ hmˬ luꞈ-eu gaˇ kawˆ-ahˇ Mawˬdaˬkehˇ siˬ nya-awˇ ehˇ doˆ nehˬ-euˬ gaˇ kawˆ kʼoeˇ hmˬ kʼawꞈ, gui mawˇ-euˬ meh.

³“Kʼoeˇ loꞈ-ehˇ siˬ nya-awˇ ehˇ doˆ-euˬ baˬ da neh Mawˬdaˬkehˇ-ahˇ aˬ dui maꞈ aˬ joˆ-ehˇ taˬ huiˬ nehˬ-awˇ, aˬ jeˬ laꞈ sawˬ biꞈ taˬ-euˬ jaˆ te” lehˇ aˬ yawꞈ maꞈ-ahˇ sahˬ paˬ naˇ haˬ nehˬ ngeh, “Aˬ yawꞈ-ahˇ jahˇ nehˬ-euˬ tiˬ jeˬ-iˬ maˬ jaˆ-a” lehˇ, zaˬ kʼaˆ deuˬ ehˇ-eu meh.

⁴Kʼoeˇ naˇ, “Sahˬ paˬ-euˬ nymˇ laꞈ kʼoeˇ ngaˬ-euˬ gaˇ mˇ-eu yaw huiˬ yaw mahˇ deuˬ tiˬ gʼaˬ-iˬ maˬ jawˇ-a loˇ” lehˇ sahˬ paˬ naˇ haˬ-eu meh. Kʼoeˇ ngeh, Haˬmaˬ gʼaˬ sahˬ paˬ-euˬ nymˇ-ahˇ laˇ keuˆ-euˬ tiˬ dehˬ pyeuꞈ-eu meh. Lehˬ hmˬ dah taˬ-euˬ tsawˇ haˬ paꞈ sehꞈ-eu kʼawˇ zeuˇ kʼoeˇ taˆ Mawˬdaˬkehˇ-ahˇ bi paꞈ sehꞈ-eu lehˇ sahˬ paˬ-ahˇ shaˇ-eu lehˇ laˇ keuˆ taˬ-euˬ meh.

⁵Kʼoeˇ miˇ neh, “Nawˇ jawˇ gaˇ laˇ-eu lehˇ Haˬmaˬ heu gaˇ loꞈ luꞈ meh” lehˇ, zaˬ kʼaˆ kʼoeˇ deuˬ sahˬ paˬ-ahˇ ehˇ nehˬ-euˬ meh. Sahˬ paˬ gʼeh, “Bi laˇ-awˬ” lehˇ ehˇ kʼoꞈ nehˬ-euˬ meh.

⁶Kʼoeˇ naˇ, Haˬmaˬ uˇ laˇ-awˇ, aˬ yawꞈ-ahˇ sahˬ paˬ ehˇ nehˬ-eu, “Ngaˇ yaw kʼaˆ-ehˇ ciˬ huiˬ ciˬ mahˇ nehˬ mawꞈ-eu tsawˇ haˬ tiˬ gʼaˬ jawˇ-eu ma. Aˬ yawꞈ-ahˇ ngaˇ aˬ joˆ-ehˇ jahˇ nehˬ-eu tsaˬ nmˇ” lehˇ ehˇ nehˬ-euˬ meh. “Sahˬ paˬ aˇ dzehˬ-ehˇ ciˬ huiˬ ciˬ mahˇ neh mawꞈ-eu gʼaˬ-aˬ, ngaˇ maˬ ngeuˇ-ehˇ aˬ suˇ gʼaˬ paˇ jawˇ nmˇ” lehˇ Haˬmaˬ noeˬ kʼoeˬ-euˬ meh.

⁷Kʼoeˇ miˇ neh sahˬ paˬ-ahˇ aˬ yawꞈ heu loꞈ-ehˇ ehˇ kʼoꞈ nehˬ-euˬ meh. “Tsawˇ haˬ kʼoeˇ gʼaˬ gʼaˇ duˬ nawˇ dm luꞈ-eu sahˬ paˬ-euˬ pehˇ kʼahˬ pehˇ mahˇ yuˇ laꞈ-awˬ lehˇ dawˬ biꞈ-awˬ. Nawˬ-euˬ dziˬ mahˬ kʼoeˇ taˆ sahˬ paˬ-euˬ aˇ poeˬ kʼaˆ-eu dziˬ gʼa laˆ dawˆ-awˬ lehˇ dawˬ biꞈ-awˬ.

⁹Kʼoeˇ naˇ, nawˬ-euˬ gaˇ mˇ-eu yaw huiˬ yaw mahˇ deuˬ laꞈ kʼoeˇ aˬ cawˬ naˆ maˬ tseˇ huiˬ dzehˬ-eu tiˬ gʼaˬ tseˇ doˆ-awˇ, tsawˇ haˬ kʼoeˇ gʼaˬ-ahˇ sahˬ paˬ-euˬ pehˇ kʼahˬ pehˇ mahˇ bi dm-awˇ mahˬ-ahˇ bi dziˬ-awˇ, meuˬ gʼahˇ lahˇ ceh mahˬ kʼoeˇ mawˇ tsahˇ-awˇ bi cah jawˬ-awˬ. Kʼoeˇ naˇ, mahˬ tsahˇ-eu yaw huiˬ yaw mahˇ kʼoeˇ gʼaˬ-ahˇ, ‘Sahˬ paˬ nui kʼahˇ shiˇ-awˇ ciˬ huiˬ ciˬ mahˇ mawꞈ-eu gʼaˬ-ahˇ aˬ joˆ-ehˇ taˬ hui nehˬ-eu nga lehˇ haw yawˬ’ lehˇ guˇ guˇ-ehˇ bi cah-awˬ.”

¹⁰Kʼoeˇ naˇ, Haˬmaˬ-ahˇ sahˬ paˬ ehˇ nehˬ-eu, “Yaw kawˇ-ehˇ iˇ-awˇ pehˇ kʼahˬ pehˇ mahˇ hawˇ-eu mahˬ tsahˇ laˬ-iˇ-awˇ, Yuˇdaˆ tsawˇ haˬ Mawˬdaˬkehˇ kʼoeˇ gʼaˬ-ahˇ nawˬ neh kʼaˇ ehˇ-euˬ loꞈ-ehˇ jahˇ-awˇ ciˬ huiˬ ciˬ mahˇ nehˬ-awˬ. Sahˬ paˬ-euˬ nymˇ gʼoˆ kʼehˬ-ahˇ aˬ yawꞈ nuiˇ luꞈ gaˇ nawˇ ya mawˇ tehꞈ-a.”

¹¹Kʼoeˇ naˇ, Haˬmaˬ gʼaˬ pehˇ kʼahˬ pehˇ mahˇ hawˇ-eu mahˬ tsahˇ laꞈ-awˇ, Mawˬdaˬkehˇ-ahˇ pehˇ kʼahˬ pehˇ mahˇ bi dm-euˬ meh. Mawˬdaˬkehˇ gʼaˬ mahˬ-ahˇ dziˬ leˇ-awˇ, Haˬmaˬ gʼaˬ mahˬ tsahˇ-awˇ, “Sahˬ paˬ nui kʼahˇ shiˇ-awˇ ciˬ huiˬ ciˬ mahˇ mawꞈ-eu gʼaˬ-ahˇ aˬ joˆ-ehˇ taˬ huiˬ nehˬ-eu nga lehˇ haw yawˬ” lehˇ, tsawˇ haˬ kʼaˇ jawˇ gaˇ guˇ gaˬ guˇ gaˬ-ehˇ cah-euˬ meh.

¹²Kʼoeˇ loꞈ-ehˇ cah gʼaˬ-awˇ, Haˬmaˬ gʼaˬ myaˆ pyawˬ dehˬ kaˬ-awˇ toˇ toˇ-ehˇ iˇ kahˇ-ahˇ yaw kawˇ-ehˇ gʼoꞈ-iˇ ngeh, Mawˬdaˬkehˇ gʼaˬ sahˬ paˬ-euˬ nymˇ gʼoˆ kʼehˬ-ahˇ gʼoꞈ leˇ-euˬ meh.

¹³Kʼaˇ pyeuꞈ laˇ-euˬ dawˬ tawˆ luꞈ, aˬ yawꞈ-euˬ cawˬ deuˬ hawˇ-eu aˬ yawꞈ-euˬ miˬ zaˬ-ahˇ Haˬmaˬ dzawˇ nehˬ-euˬ meh. Kʼoeˇ ngeh, aˬ yawꞈ-euˬ miˬ zaˬ hawˇ-eu zaˬ siˬ tsawˇ gahˇ ahˇ-eu aˬ yawꞈ-euˬ cawˬ deuˬ aˬ yawꞈ-ahˇ ehˇ nehˬ-eu, “Nawˇ-aˬ, Mawˬdaˬkehˇ-euˬ baoˬ-ahˇ maˬ gʼaˬ leˇ-ehˇ pyeuꞈ-iˇ-euˬ nga. Aˬ yawꞈ-aˬ, Yuˇdaˆ tsawˇ haˬ meh. Aˬ yawꞈ-ahˇ nawˇ maˬ gʼaˬ leˇ nya-a. Aˬ diˇ aˬ maˇ aˬ yawꞈ nawˬ-ahˇ gʼaˬ leˇ tehꞈ-a.”

¹⁴Aˬ yawꞈ maꞈ kʼoeˇ loꞈ-ehˇ ja ja-ehˇ jawˇ ngeh, sahˬ paˬ-euˬ zaˬ miˬ zaˬ deuˬ-ahˇ haw-eu pyaˆ-eu tiˬ gʼaˬ cehˆ keuˆ leꞈ-awˇ, Haˬmaˬ-ahˇ Iˇsaˬtaˆ neh dzaˬ byawˇ laˆ saˆ taˬ gaˇ laˇ-awˬ lehˇ kuˇ laˬ le-euˬ meh.