Read Akha Iˇsaˬtaˆ 7 Bible Online

Iˇsaˬtaˆ 7 - Akha bible

Iˇsaˬtaˆ 7

¹Kʼoeˇ naˇ, sahˬ paˬ hawˇ-eu Haˬmaˬ aˬ nyaꞈ Iˇsaˬtaˆ nehˬ-ehˇ paˇ dzaˬ paˇ dawˇ taꞈ-euˬ meh.

²Nyiˬ nah tiˬ nah aˬ yawꞈ maꞈ kʼoeˇ loꞈ-ehˇ dzaˬ taꞈ-awˇ aˬ gaꞈ dzaˇ uiˇ dawˇ luꞈ ngeh, Iˇsaˬtaˆ-ahˇ sahˬ paˬ heu loꞈ-ehˇ paˇ ehˇ nehˬ-euˬ meh. “Sahˬ paˬ miˬ zaˬ Iˇsaˬtaˆ-oˇ, nawˇ aˬ jeˬ mawꞈ-eu nya. Nawˇ ngaˬ-ahˇ kʼaˇ shaˇ-eu jeˬ ngaˇ biꞈ ma. Ngaˬ-euˬ miˇ kʼahˬ kʼahˬ ma heu tiˬ paˆ paˆ nehˬ laꞈ lehˇ shaˇ naˇ kʼawꞈ, nawˬ-ah ngaˇ paˆ nehˬ ma.”

³Sahˬ paˬ miˬ zaˬ Iˇsaˬtaˆ ehˇ-eu, “Sahˬ paˬ-oˇ, nawˇ ngaˬ-ahˇ gʼawˬ shaˬ gaˬ nehˬ laꞈ-awˇ ngaˬ neh shaˇ-euˬ jeˬ biꞈ nehˬ laꞈ ma lehˇ ngeuˇ naˇ, ngaˇ hawˇ-eu ngaˬ-euˬ tsawˇ jeuˬ-ahˇ maˬ sehꞈ ni bi dehꞈ nehˬ laꞈ-awˬ.

⁴Ngaˇ hawˇ-eu ngaˬ-euˬ tsawˇ jeuˬ-aˬ, aˬ cawˬ neh bi sehꞈ-eu lehˇ bi ahˬ dzaˬ taˬ-euˬ tsawˇ haˬ deuˬ pyeuꞈ-eu ma. Zaˬ kʼaˆ bi geuꞈ-eu gʼaˇ duˬ tehꞈ-ehˇ nga maꞈ-ahˇ ahˬ dzaˬ-euˬ law nmˇ-aˬ, nawˬ-ahˇ heu loꞈ-ehˇ shaˇ shaˇ-ehˇ maˬ paˇ laˆ bahˬ-eu ma. Nymˬ-mˇ-aˬ, nga maꞈ tsawˇ jeuˬ aˇ yoeˬ bi sehꞈ cuˆ-eu keuˆ laˇ taˬ-euˬ meh.”

⁵Kʼoeˇ naˇ, sahˬ paˬ miˬ zaˬ Iˇsaˬtaˆ-ahˇ sahˬ paˬ Dzeuˬsehˆ ehˇ nehˬ-eu, “Teu naˆ naˆ-ehˇ gʼeh-eu jeˬ mˇ peuˬ-eu aˬ suˇ gʼaˬ-a. Tsawˇ haˬ kʼoeˇ gʼaˬ aˬ gaˇ jawˇ ta.”

⁶Iˇsaˬtaˆ ehˇ-eu, “Nga maꞈ-ahˇ muiˇ-awˇ kʼehˬ-eu lehˇ gʼeh-eu gʼaˬ-aˬ, haiˬ dui dui-eu Haˬmaˬ heu gʼaˬ meh.” Kʼoeˇ ngeh, Haˬmaˬ-aˬ, sahˬ paˬ hawˇ-eu sahˬ paˬ miˬ zaˬ mehˬ shi guˆ-awˇ yaw dzuˬ dzuˬ-eu meh.

⁷Sahˬ paˬ nui ma pehˇ-eu laꞈ kʼoeˇ tuˇ-awˇ, laꞈ nyiˇ doˆ-iˇ-awˇ yaˇ kmˇ-ahˇ iˇ-euˬ meh. Gaˇ kawˆ kʼoeˇ baˬ da neh aˬ yawꞈ-ahˇ sahˬ paˬ kʼehˬ-eu lehˇ noeˬ tsehˆ taˬ-euˬ gaˇ Haˬmaˬ haw siˬ-awˇ, naˇ kʼah paw jawˇ yaꞈ-awˇ, aˬ yawꞈ maˬ ya shiˇ ni sahˬ paˬ miˬ zaˬ Iˇsaˬtaˆ-ahˇ shaˇ ju-euˬ meh.

⁸Sahˬ paˬ yaˇ kmˇ-ahˇ neh nymˇ laꞈ kʼoeˇ paˇ gʼoꞈ uˇ keuˆ laˇ ngeh, Haˬmaˬ gʼaˬ Iˇsaˬtaˆ nuiˇ luꞈ-eu nuiˇ mahˬ dawˬ peh coˬ lah-awˇ gʼawˬ shaˬ bi gaˬ nehˬ-eu gʼaˇ duˬ tahˬ shaˇ luꞈ-eu tiˬ dehˬ pyeuꞈ-eu meh. Kʼoeˇ loꞈ-ehˇ coꞈ lah gʼeh gaˇ sahˬ paˬ ya mawˇ ngeh, “Tsawˇ haˬ heu gʼaˬ ngaˬ-euˬ nymˇ laꞈ kʼoeˇ, ngaˬ-euˬ mehˬ shi nyiˬ paˆ-ehˇ, sahˬ paˬ miˬ zaˬ-ahˇ dawꞈ-awˇ yehˬ bawˬ-ehˇ jahˇ-eu gʼeh ta loˇ” lehˇ yaw kʼaˆ-ehˇ guˇ-eu meh. Sahˬ paˬ kʼoeˇ loꞈ-ehˇ guˇ doˆ laˇ-euˬ nehˬ-ehˇ, sahˬ paˬ-euˬ zaˬ miˬ zaˬ deuˬ-ahˇ haw luꞈ pyaˆ luꞈ-eu tsawˇ haˬ deuˬ Haˬmaˬ-euˬ uˬ duˬ-ahˇ dehˬ kaˬ-euˬ meh.

⁹Kʼoeˇ ngeh, tsawˇ haˬ kʼoeˇ deuˬ laꞈ kʼoeˇ Haˬbawˇnaˬ lehˇ myahˇ-euˬ gʼaˬ ehˇ-eu, “Sahˬ paˬ-oˇ, nawˬ-ahˇ ka kʼoꞈ-euˬ gʼaˬ pyeuꞈ-eu Mawˬdaˬkehˇ-ahˇ sehꞈ-eu lehˇ, Haˬmaˬ heu gʼaˬ ngaˬ tseˇ caˆ byah-eu tsawˇ haˬ paꞈ gʼeu sehꞈ-eu kʼawˇ zeuˇ tiˬ zeuˇ aˬ yawꞈ-euˬ nymˇ-ahˇ lehˬ hmˬ taˬ-awˇ jaˆ-eu meh.” Sahˬ paˬ ehˇ-eu, “Haˬmaˬ-ahˇ kʼoeˇ gaˇ paꞈ gʼeu sehꞈ-awˬ.”

¹⁰Kʼoeˇ miˇ neh, Mawˬdaˬkehˇ-ahˇ paꞈ gʼeu sehꞈ-eu gʼaˇ duˬ Haˬmaˬ aˬ yawꞈ neh lehˬ hmˬ taˬ-euˬ kʼawˇ zeuˇ-ahˇ, aˬ yawꞈ gʼaˬ-ahˇ paˇ paꞈ sehꞈ-euˬ meh. Kʼoeˇ naˇ, sahˬ paˬ nui ma pehˇ-eu taˬ leˇ-euˬ meh.