Read Akha Doˆ-iˇ 1 Bible Online

Doˆ-iˇ 1 - Akha bible

Doˆ-iˇ 1

¹Yawˬ ha-euˬ miˬ sawˇ zaˬ deuˬ sheuˬ-awˇ, Yaˬkoˆ nehˬ-ehˇ,

²Iˇjiˇtuˆ miˇ kʼahˬ-ahˇ iˇ-euˬ Yaˬkoˆ-euˬ aˬ li deuˬ-aˬ, heu deuˬ meh. Luˇbeˬ, Suˇmoˬ, Leˬbiˇ, Yuˇdaˆ,

³Iˇsaˬkaˬ, Zeˬbuˬloˬ, Beˬyaˬmiˬ,

⁴Daˬ, Naˬtaˬliˇ, Gaˆ hawˇ-eu Aˬsaˬ meh.

⁵Yaˬkoˆ-euˬ zaˬ deuˬ uˆ deuˬ pyeuꞈ-eu heu deuˬ dawˬ tawˆ luꞈ shiꞈ tseˇ gʼaˬ byah-eu meh. Aˬ yawꞈ-euˬ aˬ li Yoˇsehˆ-aˬ, aˬ yawꞈ maꞈ-euˬ mehˬ hu neh, Iˇjiˇtuˆ miˇ kʼahˬ laꞈ kʼoeˇ jawˇ luꞈ-eu meh.

⁶Aˇ kʼoꞈ aˇ la myahˇ laˇ ngeh, Yoˇsehˆ maˬ ehˇ, aˬ yawꞈ-euˬ mehˇ nmˇ deuˬ maˬ ehˇ, aˬ yawꞈ maꞈ nehˬ-ehˇ tiˬ cawˬ pyeuꞈ-eu tsawˇ haˬ deuˬ maˬ ehˇ, ziˇ dehꞈ jiˇ-euˬ meh.

⁷Ehˇ kʼawꞈ, aˬ yawꞈ maꞈ-euˬ zaˬ deuˬ uˆ deuˬ pyeuꞈ-eu Iˇsaˬleˬlaˆ tsawˇ haˬ deuˬ behˇ laˇ-awˇ, myaˬ dui dui laˇ-euˬ miˇ neh, Iˇjiˇtuˆ miˇ kʼahˬ laꞈ kʼoeˇ jawˇ byah-euˬ meh.

⁸Kʼoeˇ ngeh, Yoˇsehˆ-ahˇ maˬ siˬ nya-eu sahˬ paˬ yaw shuiꞈ tiˬ gʼaˬ Iˇjiˇtuˆ miˇ kʼahˬ-ahˇ uˆ lahˇ-euˬ meh.

⁹Sahˬ paˬ kʼoeˇ gʼaˬ aˬ yawꞈ-euˬ tsawˇ haˬ deuˬ-ahˇ ehˇ nehˬ-eu, “Iˇsaˬleˬlaˆ tsawˇ jeuˬ heu deuˬ tsawˇ haˬ myaˬ dui dui-eu miˇ neh aˬ dui kʼahˬ lahˇ duˬ jaˆ-eu meh.

¹⁰Guiˇ pyeuꞈ laˇ naˇ, aˬ dui-ahˇ muiˇ-eu deuˬ nehˬ-ehˇ aˬ yawꞈ maꞈ gm leˇ-awˇ, aˬ dui-ahˇ guiˇ deuˆ laˇ tehꞈ-a. Kʼoeˇ naˇ, miˇ kʼahˬ heu kʼahˬ laꞈ kʼoeˇ neh aˬ yawꞈ maꞈ doˆ-iˇ tehꞈ-a. Aˬ yawꞈ maꞈ tsawˇ haˬ heu naˆ maˬ tseˇ maˬ myaˬ laˇ nya ni, aˬ dui tiˬ jeˬ paˬ ya jahˇ meh.”

¹¹Kʼoeˇ miˇ neh, aˬ yawꞈ maꞈ-ahˇ gaˇ yaw kʼaˆ-ehˇ bi mˇ-awˇ, nui ma bi cawˆ-iˇ-eu gʼaˇ duˬ, zaˬ kʼaˆ deuˬ gaˇ mˇ gaˇ haw-eu tsawˇ haˬ deuˬ-eu aˬ laꞈ laꞈ kʼoeˇ a nehˬ-euˬ meh. Sahˬ paˬ-euˬ myawˬ taˬ-eu gʼaˇ duˬ, Piˇdmˬ hawˇ-eu Laˬmaˬsehˇ meuˬ aˬ yawꞈ maꞈ ya tso-eu meh.

¹²Ehˇ kʼawꞈ, Iˇjiˇtuˆ tsawˇ haˬ deuˬ aˬ yawꞈ maꞈ-ahˇ ngehˬ-ehˇ kʼehˬ naˇ, aˬ yawꞈ maꞈ tsawˇ haˬ ngehˬ-ehˇ paˇ behˇ laˇ-awˇ, Iˇjiˇtuˆ miˇ kʼahˬ doe ni ngehˬ-ehˇ paˇ jawˇ byah gʼeh-euˬ meh.

¹³Kʼoeˇ ngeh, Iˇjiˇtuˆ tsawˇ haˬ deuˬ Iˇsaˬleˬlaˆ tsawˇ haˬ deuˬ-ahˇ guˆ laˇ taˬ-euˬ meh. Kʼoeˇ miˇ neh, Iˇsaˬleˬlaˆ tsawˇ haˬ deuˬ-ahˇ zaˬ kʼaˆ bi geuꞈ-awˇ, kʼehˬ nehˬ kʼaˆ nehˬ-eu laꞈ kʼoeˇ, gaˇ bi mˇ-euˬ meh.

¹⁴Iˇsaˬleˬlaˆ tsawˇ haˬ deuˬ-ahˇ aˬ yawꞈ maꞈ gʼawˬ shaˬ maˬ gaˬ ni, nymˇ tsoˆ gaˇ maˬ ehˇ, deh yaˇ mˇ gaˇ maˬ ehˇ, maˬ mˇ coeˇ gaˇ keuˆ ni myawˬ kʼaˆ bi mˇ-euˬ meh.

¹⁵Kʼoeˇ naˇ, Heˬbyehˇ tsawˇ haˬ zaˬ miˬ zaˬ deuˬ aˬ nyiˇ ciˬ gaˇ laˆ saˆ nehˬ-eu zaˬ miˬ zaˬ nyiˬ gʼaˬ pyeuꞈ-eu Shiˇpaˬlahˬ hawˇ-eu Puˇhaˬ-ahˇ Iˇjiˇtuˆ sahˬ paˬ kuˇ-awˇ, dawˬ ngehˬ cawˬ-euˬ meh.

¹⁶“Heˬbyehˇ tsawˇ haˬ zaˬ miˬ zaˬ deuˬ aˬ nyiˇ ciˬ gaˇ naw nyaꞈ laˆ saˆ ngeh, aˬ li dehꞈ le naˇ laˆ sehꞈ-awˬ. Ehˇ kʼawꞈ, aˬ buˇ dehꞈ le naˇ, maˬ laˆ sehꞈ ni bi buˬ-iˇ-awˬ” lehˇ, zaˬ miˬ zaˬ kʼoeˇ nyiˬ gʼaˬ-ahˇ sahˬ paˬ ehˇ nehˬ-euˬ meh.

¹⁷Ehˇ kʼawꞈ, zaˬ miˬ zaˬ kʼoeˇ nyiˬ gʼaˬ Miˬyehˇ-ahˇ guˆ-eu miˇ neh, sahˬ paˬ neh ehˇ taˬ-euˬ loꞈ-ehˇ maˬ mˇ-ehˇ, dehꞈ le-euˬ aˬ li deuˬ-ahˇ maˬ laˆ sehꞈ ni bi jawˇ-euˬ meh.

¹⁸Kʼoeˇ ngeh, zaˬ miˬ zaˬ kʼoeˇ nyiˬ gʼaˬ-ahˇ bi kuˇ laˬ-iˇ-awˇ, “Naw nyaꞈ aˬ jeˬ miˇ neh kʼoeˇ loꞈ-ehˇ mˇ teˬ. Aˬ jeˬ miˇ neh aˬ li deuˬ-ahˇ maˬ laˆ sehꞈ ni bi dehꞈ teˬ” lehˇ naˇ haˬ-euˬ meh.

¹⁹Zaˬ miˬ zaˬ kʼoeˇ nyiˬ gʼaˬ ehˇ-eu, “Heˬbyehˇ tsawˇ jeuˬ zaˬ miˬ zaˬ deuˬ-aˬ, Iˇjiˇtuˆ tsawˇ jeuˬ zaˬ miˬ zaˬ deuˬ-ahˇ maˬ duˇ-a. Aˬ yawꞈ maꞈ aˬ nyiˇ ciˬ-eu yaw awˬ miˇ neh, nga nyaꞈ maˬ iˇ keuˆ mi naˆ-ehˇ zaˬ dehꞈ le gʼaˬ-euˬ meh.”

²⁰Aˬ nyiˇ ciˬ gaˇ laˆ saˆ-eu zaˬ miˬ zaˬ kʼoeˇ nyiˬ gʼaˬ-ahˇ Miˬyehˇ yaw muiˬ-ehˇ ngehˬ gʼeh nehˬ-euˬ miˇ neh, Iˇsaˬleˬlaˆ tsawˇ haˬ myaˬ laˇ behˇ laˇ luꞈ-eu meh.

²¹Zaˬ miˬ zaˬ kʼoeˇ nyiˬ gʼaˬ Miˬyehˇ-ahˇ yaw zeu baw-eu miˇ neh, aˬ yawꞈ nyaꞈ-ahˇ kʼawꞈ zaˬ gʼawˬ mya ni Miˬyehˇ bi jawˇ le-euˬ meh.

²²Kʼoeˇ naˇ, “Kʼaˇ dehꞈ le-euˬ Heˬbyehˇ tsawˇ jeuˬ aˬ li deuˬ-ahˇ Niˬlaˇ lawˇ baˬ laꞈ kʼoeˇ biˬ puꞈ-awˬ. Ehˇ kʼawꞈ, aˬ buˇ deuˬ bi dehꞈ-awˬ” lehˇ, aˬ yawꞈ-euˬ tsawˇ haˬ deuˬ-ahˇ sahˬ paˬ dawˬ biꞈ-euˬ meh.