Read Akha Doˆ-iˇ 10 Bible Online

Doˆ-iˇ 10 - Akha bible

Doˆ-iˇ 10

¹Kʼoeˇ naˇ, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Sahˬ paˬ kʼoeˇ gʼaˬ jawˇ gaˇ iˇ-awˬ. Zahˬ leˇ paˬ-ehˇ gʼeh-eu gaˇ heu deuˬ Iˇjiˇtuˆ tsawˇ haˬ deuˬ-ahˇ ngaˇ ya mˇ mehˬ nehˬ ni maˬ ehˇ,

²zahˬ leˇ paˬ-ehˇ gʼeh-eu gaˇ heu deuˬ mˇ mehˬ nehˬ-eu laꞈ kʼoeˇ, Iˇjiˇtuˆ tsawˇ haˬ deuˬ-ahˇ ngaˬ neh aˬ joˆ-ehˇ laˆ shaˬ laˆ zahˬ nehˬ-euˬ gaˇ kawˆ, naw maꞈ-euˬ zaˬ deuˬ hawˇ-eu oeˬ paˬ oeˬ ma deuˬ-ahˇ naw maꞈ dzawˇ nehˬ nya ni maˬ ehˇ, sahˬ paˬ kʼoeˇ gʼaˬ hawˇ-eu, aˬ yawꞈ-euˬ gaˇ mˇ-eu yaw huiˬ yaw mahˇ deuˬ nui ma gʼahˇ ni ngaˇ jahˇ nehˬ taˬ-euˬ ma. Ngaˇ-aˬ, Sahˬpaˬ Miˬyehˇ pyeuꞈ-eu gaˇ kawˆ, naw maꞈ dawˬ tawˆ luꞈ ya siˬ ya mawˇ tehꞈ-a.”

³Kʼoeˇ naˇ, Moˇseˬ hawˇ-eu Aˬloˬ aˬ nyaꞈ sahˬ paˬ kʼoeˇ gʼaˬ jawˇ gaˇ iˇ-awˇ, heu loꞈ-ehˇ ehˇ nehˬ-euˬ meh. “Heˬbyehˇ tsawˇ haˬ-euˬ Miˬyehˇ pyeuꞈ-eu Sahˬpaˬ Miˬyehˇ ehˇ-eu, ‘Aˇ myah keuˆ ni nawˇ ngaˬ-euˬ laꞈ oꞈ maˬ awꞈ-ehˇ, nui ma gʼahˇ-eu gʼeh te. Ngaˬ-ahˇ uˬ duˬ bi tahˬ laˇ-eu gʼaˇ duˬ, ngaˬ-euˬ tsawˇ haˬ deuˬ-ahˇ pyehˬ nehˬ-awˬ.

⁴Ngaˬ-euˬ tsawˇ haˬ-ahˇ nawˇ maˬ pyehˬ nehˬ ni jawˇ naˇ, nawˬ-euˬ miˇ kʼahˬ laꞈ kʼoeˇ, ni shawˬ nah ngaˇ nyehˇ bahˇ bi doˆ laˇ ma.

⁵Nyehˇ bahˇ kʼoeˇ deuˬ myaˬ dui dui-eu miˇ neh, miˇ tsaˬ-ahˇ tiˬ gʼoeˬ dawꞈ gʼoeˬ jiˇ tehꞈ-a. Uˬ yehˇ aˇ siˬ ga le ngeh maˬ cawˆ-iˇ ni kʼaˇ dzeˇ yaꞈ-euˬ jeˬ dawˬ tawˆ luꞈ-ahˇ aˬ yawꞈ maꞈ dzaˬ jiˇ-awˇ, maˬ cawˆ-iˇ ni kʼaˇ dzeˇ yaꞈ-euˬ aˇ bawˇ yawˬ bawˇ na luꞈ-ahˇ kʼawꞈ, dzaˬ byoˆ jiˇ tehꞈ-a.

⁶Nawˬ-euˬ nymˇ laꞈ kʼoeˇ maˬ ehˇ, nawˬ-euˬ gaˇ mˇ-eu yaw huiˬ yaw mahˇ deuˬ-euˬ nymˇ laꞈ kʼoeˇ maˬ ehˇ, nawˬ-euˬ tsawˇ haˬ deuˬ-euˬ nymˇ deuˬ dawˬ tawˆ luꞈ laꞈ kʼoeˇ maˬ ehˇ, uˇ byah jiˇ tehꞈ-a. Nyehˇ bahˇ kʼoeˇ deuˬ-aˬ, naw maꞈ-euˬ aˬ poeˬ aˬ bawˇ deuˬ-euˬ ziˇ-ahˇ neh, iˬ nah keuˆ ni kʼaˇ ya tahˬ puˬ haw-euˬ yawˬ jeˬ na luꞈ laꞈ kʼoeˇ, aˬ cawˬ naˆ maˬ tseˇ doeˇ dui dui-eu jeˬ pyeuꞈ-eu meh’ lehˇ ehˇ-eu meh.”

⁷Kʼoeˇ naˇ, sahˬ paˬ-euˬ gaˇ mˇ-eu yaw huiˬ yaw mahˇ deuˬ sahˬ paˬ -ahˇ ehˇ nehˬ-eu, “Tsawˇ haˬ heu gʼaˬ aˬ dui-ahˇ aˇ myah keuˆ ni laˆ bahˬ-eu lehˇ gʼeh-eu nga. Aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ-iˇ-eu gʼaˇ duˬ, Iˇsaˬleˬlaˆ tsawˇ haˬ-ahˇ pyehˬ nehˬ-awˬ. Iˇjiˇtuˆ miˇ kʼahˬ cawˆ-iˇ-eu keuˆ laˇ taˬ-euˬ nymˬ-mˇ keuˆ ni nawˇ maˬ siˬ duˬ-aˬ siˬ loˇ.”

⁸Kʼoeˇ naˇ, Moˇseˬ hawˇ-eu Aˬloˬ-ahˇ, sahˬ paˬ jawˇ gaˇ paˇ bi sheuˬ laꞈ-awˇ, heu loꞈ-ehˇ ehˇ nehˬ-euˬ meh. “Naw maꞈ-euˬ Miˬyehˇ pyeuꞈ-eu Sahˬ paˬ Miˬ yehˇ-ahˇ naw maꞈ uˬ duˬ tahˬ-iˇ nya tehꞈ-a. Ehˇ kʼawꞈ, naw maꞈ laꞈ kʼoeˇ tsawˇ haˬ aˬ geu deuˬ iˇ-eu lehˇ gʼeh te lehˇ ehˇ duˬ-awˬ.”

⁹Moˇseˬ ehˇ-eu, “Nga maꞈ huiˬ zaˬ nyiˇ zaˬ dawˬ tawˆ luꞈ iˇ-eu gʼeh-eu ma. Nga maꞈ-euˬ aˬ buˇ aˬ li dawˬ tawˆ luꞈ sheuˬ gʼeh jiˇ-awˇ, nga maꞈ-euˬ yawˇ deuˬ hawˇ-eu ciꞈ myehꞈ deuˬ maˬ ehˇ, nga maꞈ-euˬ mawˇ neˇ dawˬ tawˆ luꞈ maˬ ehˇ, teh gʼeh ma. Aˬ jeˬ miˇ neh ehˇ naˇ, nga maꞈ-euˬ Sahˬpaˬ Miˬyehˇ-ahˇ taˬ huiˬ taˬ mahˇ nehˬ-eu bawˬ-iˬ nga maꞈ ya jahˇ meh.”

¹⁰Sahˬ paˬ kʼoeˇ gʼaˬ ehˇ-eu, “Naw maꞈ-euˬ zaˬ deuˬ hawˇ-eu zaˬ miˬ zaˬ deuˬ maˬ bi sheuˬ gʼeh lehˇ, Sahˬpaˬ Miˬyehˇ-euˬ mehˬ shi nymˬ-mˇ ngaˇ nawˬ-ahˇ ehˇ tsehˆ nehˬ-eu ma. Naw maꞈ-aˬ, nga maꞈ-ahˇ puiˬ-eu lehˇ gʼeh-eu yaw duˬ baw meh.

¹¹Naw maꞈ dawˬ tawˆ luꞈ maˬ ya iˇ-a. Naw maꞈ ehˇ-eu loꞈ-ehˇ iˇ mawꞈ-naˇ, kʼaˬ dzeˇ zaˬ deuˬ tehꞈ-ehˇ iˇ-awˇ, Sahˬpaˬ Miˬyehˇ-ahˇ uˬ duˬ tahˬ-iˇ awˬ.” Kʼoeˇ naˇ, aˬ yawꞈ nyaꞈ-ahˇ sahˬ paˬ kʼoeˇ gʼaˬ jawˇ gaˇ neh teh doˆ gʼeh-euˬ meh.

¹²Kʼoeˇ naˇ, “Iˇjiˇtuˆ miˇ kʼahˬ laꞈ kʼoeˇ nyehˇ bahˇ doˆ le ni, Iˇjiˇtuˆ miˇ kʼahˬ kʼoeˇ taˆ nawˬ-euˬ aˬ laꞈ cawˬ ja-awˬ. Nyehˇ bahˇ deuˬ oe-awˇ, uˬ yehˇ aˇ siˬ neh maˬ laˆ cawˆ jiˇ ni dzeˇ-eu sahˬ lahˬ aˇ bawˇ baw duˆ dawˬ tawˆ luꞈ-ahˇ dzaˬ byoˆ jiˇ tehꞈ-a.” lehˇ, Moˇseˬ-ahˇ Sahˬpaˬ Miˬyehˇ ehˇ nehˬ-euˬ meh.

¹³Moˇseˬ aˬ yawꞈ-euˬ gawˬ yoeˬ yuˇ-awˇ, Iˇjiˇtuˆ miˇ kʼahˬ kʼoeˇ taˆ cawˬ ja ngeh, Iˇjiˇtuˆ miˇ kʼahˬ kʼoeˇ taˆ, nahˇ ma doˆ kʼehˬ paw-euˬ jaˬ lehˇ tiˬ nah tiˬ miˇ keuˆ ni Sahˬpaˬ Miˬyehˇ neh bi baw-euˬ meh. Uˬ shawˬ keuˆ le ngeh, jaˬ lehˇ kʼoeˇ nyehˇ bahˇ hehˇ ahˇ laꞈ-euˬ meh.

¹⁴Nyehˇ bahˇ kʼoeˇ deuˬ baˬ maꞈ puˇ jeˬ-ehˇ oe-awˇ, miˇ kʼahˬ kʼoeˇ kʼahˬ laꞈ kʼoeˇ jawˇ byah jiˇ-euˬ meh. Nyehˇ bahˇ kʼoeˇ maꞈ-aˬ, dzeuˇ laˇ ngeh tiˬ jawˇ-iˬ maˬ ya mawˇ haw-euˬ uˬ taꞈ, aˬ kaˇ kaˇ ziˇ keuˆ ni tiˬ jawˇ-iˬ maˬ paˇ ya mawˇ haw-eu myaˬ dui dui-eu nyehˇ bahˇ aˇ maꞈ maꞈ ma pyeuꞈ-eu meh.

¹⁵Miˇ tsaˬ naˆ puiˆ ni pyeuꞈ-iˇ ngeh keuˆ ni, aˬ yawꞈ maꞈ miˇ tsaˬ-ahˇ jawˇ gʼoeˬ taˬ-euˬ meh. Aˇ bawˇ-ahˇ kʼaˇ siˬ-eu aˇ siˬ deuˬ ahˇ leˇ-ehˇ, uˬ yehˇ aˇ siˬ ga le ngeh maˬ cawˆ-iˇ ni kʼaˇ dzeˇ yaꞈ-euˬ yawˬ jeˬ na luꞈ-ahˇ aˬ yawꞈ maꞈ dzaˬ jiˇ-euˬ meh. Iˇjiˇtuˆ miˇ kʼahˬ doe ni kʼaˇ bawˇ-eu sahˬ lahˬ aˇ bawˇ baw duˆ dawˬ tawˆ luꞈ kʼoeˇ taˆ, aˇ paꞈ paꞈ nyoeˇ tiˬ paꞈ-iˬ maˬ tsoꞈ ni pyeuꞈ-iˇ-euˬ meh.

¹⁶Kʼoeˇ naˇ, sahˬ paˬ kʼoeˇ gʼaˬ Moˇseˬ hawˇ-eu Aˬloˬ-ahˇ yaw kawˇ-ehˇ bi kuˇ laˬ-iˇ-awˇ ehˇ nehˬ-eu, “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ maˬ ehˇ, naw maꞈ-ahˇ maˬ ehˇ, ngaˇ mˇ lehˬ gʼaˬ-euˬ ma.

¹⁷Teu miˇ neh, nymˬ-mˇ poˆ ngaˬ-ahˇ iˬ baˇ pyehˬ nehˬ laꞈ-awˬ, shiˇ gaˇ keuˆ-eu kʼehˬ-eu kʼaˆ-eu jeˬ yuˇ dzeh nehˬ laꞈ-eu gʼaˇ duˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guiˬ lahˬ shaˇ nehꞈ laꞈ-awˬ lehˇ, naw nyaꞈ-ahˇ ngaˇ shaˇ-eu ma.”

¹⁸Kʼoeˇ naˇ, sahˬ paˬ kʼoeˇ gʼaˬ jawˇ gaˇ neh Moˇseˬ doˆ-iˇ awˇ, Sahˬpaˬ Miˬyehˇ-ahˇ guiˬ lahˬ shaˇ-euˬ meh.

¹⁹Sahˬpaˬ Miˬyehˇ-aˬ, kʼaˆ dui dui-eu jaˬ lehˇ tiˬ bahˬ nahˇ ma ga kʼehˬ paw neh paˇ bi baw gʼeh laꞈ-awˇ, jaˬ lehˇ kʼoeˇ bahˬ neh nyehˇ bahˇ kʼoeˇ deuˬ-ahˇ iˬ ma laˆ shaˆ Yaw neˇ laꞈ kʼoeˇ hehˇ puꞈ gʼeh-euˬ meh. Kʼoeˇ ngeh, Iˇjiˇtuˆ miˇ kʼahˬ kʼahˬ lah ni, nyehˇ bahˇ tiˬ mawˇ-iˬ maˬ jawˇ-ehˇ pyeuꞈ-iˇ-euˬ meh.)

²⁰Ehˇ kʼawꞈ, sahˬ paˬ kʼoeˇ gʼaˬ-ahˇ Sahˬpaˬ Miˬyehˇ neh nui ma bi gʼahˇ-awˇ, sahˬ paˬ kʼoeˇ gʼaˬ Iˇsaˬleˬlaˆ tsawˇ haˬ-ahˇ maˬ pyehˬ nehˬ ni jawˇ-euˬ meh.

²¹Kʼoeˇ naˇ, “Tsawˇ haˬ zaˬ-euˬ aˬ laꞈ neh sawˆ haw ngeh, sawˆ zaꞈ nya paˬ-ehˇ zahˇ-eu, zahˇ tsui ni gʼeh-eu jeˬ, Iˇjiˇtuˆ miˇ kʼahˬ kʼoeˇ taˆ bi keuˆ le-eu gʼaˇ duˬ, nawˬ-euˬ aˬ laꞈ mˬ paw cawˬ diˇ-awˬ” lehˇ, Moˇseˬ-ahˇ Sahˬpaˬ Miˬyehˇ ehˇ nehˬ-euˬ meh.

²²Moˇseˬ-euˬ aˬ laꞈ mˬ paw cawˬ diˇ ngeh, zahˇ dui dui-eu zahˇ tsui ni gʼeh-eu jeˬ, smˬ nah keuˆ ni Iˇjiˇtuˆ miˇ kʼahˬ kʼoeˇ taˆ keuˆ le-euˬ meh.

²³Iˇjiˇtuˆ tsawˇ haˬ deuˬ tiˬ gʼaˬ tiˇ gʼaˬ maˬ haw mawˇ nya-ehˇ, aˇ yamˬ kʼoeˇ yamˬ laꞈ kʼoeˇ, tsawˇ haˬ tiˬ gʼaˬ-iˬ tsawˬ dahˬ laꞈ nyiˇ maˬ doˆ-iˇ ni jawˇ-euˬ meh. Ehˇ kʼawꞈ, Iˇsaˬleˬlaˆ tsawˇ haˬ kʼaˇ jawˇ gaˇ yaw shehꞈ jaˆ-euˬ meh.

²⁴Kʼoeˇ ngeh, sahˬ paˬ kʼoeˇ gʼaˬ Moˇseˬ-ahˇ kuˇ-awˇ ehˇ nehˬ-eu, “Naw maꞈ iˇ-awˇ Sahˬpaˬ Miˬyehˇ-ahˇ uˬ duˬ tahˬ-iˇ nya tehꞈ-a. Naw maꞈ-euˬ zaˬ deuˬ hawˇ-eu zaˬ miˬ zaˬ deuˬ kʼawꞈ, naw maꞈ nehˬ-ehˇ iˇ nya tehꞈ-a. Ehˇ kʼawꞈ, naw maꞈ-euˬ yawˇ, ciꞈ myehꞈ hawˇ-eu mawˇ neˇ deuˬ-ahˇ, heu gaˇ ya bi jawˇ yaꞈ meh.”

²⁵Ehˇ kʼawꞈ, Moˇseˬ ehˇ-eu, “Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ lawˇ nehˬ-eu gʼaˇ duˬ maˬ ehˇ, miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ maˬ ehˇ, nga maꞈ-ahˇ nawˇ jeˬ zaˬ biꞈ laꞈ-eu tsaˬ meh.

²⁶Nga maꞈ-euˬ jeˬ zaˬ deuˬ nga maꞈ ya teh gʼeh tehꞈ-a. Tiˬ mawˇ-iˬ ma bi jawˇ yaꞈ nya-a. Aˬ jeˬ miˇ neh ehˇ naˇ, jeˬ zaˬ kʼoeˇ deuˬ laꞈ kʼoeˇ, nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ lawˇ nehˬ-eu jeˬ zaˬ nga maꞈ ya tseˇ doˆ meh. Kʼoeˇ gaˇ maˬ iˇ keuˆ kʼoeˇ keuˆ ni, aˬ yawꞈ-ahˇ jeˬ zaˬ aˬ geu deuˬ ya lawˇ nehˬ-eu nga maꞈ maˬ siˬ duˬ nya-a.”

²⁷Sahˬ paˬ kʼoeˇ gʼaˬ-ahˇ Sahˬpaˬ Miˬyehˇ nui ma bi gʼahˇ-awˇ, sahˬ paˬ kʼoeˇ gʼaˬ Iˇsaˬleˬlaˆ tsawˇ haˬ deuˬ-ahˇ maˬ pyehˬ nehˬ ni jawˇ-euˬ meh.

²⁸Sahˬ paˬ kʼoeˇ gʼaˬ Moˇseˬ-ahˇ ehˇ nehˬ-eu, “Ngaˇ mawˇ gaˇ maˬ jawˇ ni yaw kawˇ-ehˇ doˆ-iˇ-awˬ. Aˬ kaˇ naˇ, nawˬ-euˬ myaˆ pyawˬ ngaˬ-ahˇ tiˬ jawˇ-iˬ taˬ paˇ ciˬ haw laˇ. Nawˬ-ahˇ ngaˇ ya mawˇ ngeh nah, nawˇ ya shiˇ tehꞈ-a.”

²⁹Moˇseˬ ehˇ-eu, “Nawˇ ehˇ-eu tsaˬ tehꞈ-a. Aˬ kaˇ naˇ, ngaˬ-ahˇ nawˇ tiˬ jawˇ-iˬ maˬ paˇ yaˬ mawˇ-aˇ.”