Read Akha Doˆ-iˇ 11 Bible Online

Doˆ-iˇ 11 - Akha bible

Doˆ-iˇ 11

¹Kʼoeˇ naˇ, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Iˇjiˇtuˆ sahˬ paˬ hawˇ-eu aˬ yawꞈ-euˬ tsawˇ haˬ deuˬ kʼoeˇ taˆ bi keuˆ le-eu lehˇ ngaˇ lehˬ hmˬ taˬ-euˬ kʼehˬ-eu kʼaˆ-eu jeˬ tiˬ jeˬ dzeˇ-eu tehꞈ meh. Kʼoeˇ jeˬ jiˇ naˇ, naw maꞈ-ahˇ aˬ yawꞈ pyehˬ nehˬ laꞈ tehꞈ-a. Aˬ diˇ aˬ maˇ, aˬ yawꞈ-aˬ, naw maꞈ dawˬ tawˆ luꞈ-ahˇ, miˇ kʼahˬ heu kʼahˬ laꞈ kʼoeˇ neh teh doˆ tehꞈ-a.

²Yawˬ ha dawˬ peh jawˇ-eu Iˇjiˇtuˆ tsawˇ haˬ deuˬ-ahˇ pyuˇ myawˬ guˇ hawˇ-eu shuiˇ myawˬ guˇ shaˇ-awˬ lehˇ, Iˇsaˬleˬlaˆ tsawˇ haˬ deuˬ-ahˇ, nymˬ-mˇ nawˇ ehˇ nehˬ-awˬ.”

³Iˇsaˬleˬlaˆ tsawˇ haˬ deuˬ-ahˇ Iˇjiˇtuˆ tsawˇ haˬ deuˬ yaw zeu baw ni, Sahˬpaˬ Miˬyehˇ jahˇ-euˬ meh. Maˇ maˇ ni, Iˇjiˇtuˆ sahˬ paˬ-euˬ gaˇ mˇ-eu yaw huiˬ yaw mahˇ deuˬ hawˇ-eu, Iˇjiˇtuˆ tsawˇ haˬ deuˬ-euˬ mehˬ shi, Moˇ seˬ-aˬ, Iˇjiˇtuˆ miˇ kʼahˬ laꞈ kʼoeˇ huiˬ dui dui-eu tsawˇ haˬ tiˬ gʼaˬ loꞈ -ehˇ pyeuꞈ-eu meh.

⁴Kʼoeˇ naˇ, sahˬ paˬ kʼoeˇ gʼaˬ-ahˇ Moˇseˬ heu loꞈ-ehˇ ehˇ nehˬ-euˬ meh. “Sahˬpaˬ Miˬyehˇ ehˇ-eu, ‘Uˬ ciꞈ sehˇ gʼahˇ ceh laˇ naˇ, Iˇjiˇtuˆ miˇ kʼahˬ-euˬ gʼahˇ ceh ngaˇ iˇ gʼeh ma.

⁵Kʼoeˇ ngeh, Iˇjiˇtuˆ miˇ kʼahˬ laꞈ kʼoeˇ kʼaˇ jawˇ-eu dehꞈ beh beh le-euˬ aˬ li aˬ yuiꞈ deuˬ shiˇ jiˇ tehꞈ-a. Sahˬ paˬ geuꞈ-eu gʼaˇ duˬ, sahˬ paˬ-euˬ jeˬ biˇ ya gʼaˬ-euˬ sahˬ paˬ-euˬ aˬ li-ahˇ neh, cehˇ tahˬ tahˬ-eu zaˬ miˬ zaˬ zaˬ kʼaˆ-euˬ aˬ li-ahˇ keuˆ ni, ya shiˇ tehꞈ-a. Jeˬ zaˬ deuˬ laꞈ kʼoeˇ kʼawꞈ, dehꞈ beh beh le-euˬ deuˬ ya shiˇ tehꞈ-a.

⁶Aˇ hu ba neh tiˬ jawˇ-iˬ maˬ ya gaˬ haw-euˬ loꞈ-ehˇ, aˬ kaˇ kaˇ ziˇ keuˆ ni tiˬ jawˇ-iˬ maˬ paˇ ya gaˬ haw-eu guˇ guˇ-ehˇ ngoeˇ-eu jeˬ, Iˇjiˇtuˆ miˇ kʼahˬ kʼoeˇ taˆ keuˆ le tehꞈ-a.

⁷Ehˇ kʼawꞈ, Iˇsaˬleˬlaˆ tsawˇ haˬ deuˬ hawˇ-eu aˬ yawꞈ maꞈ-euˬ jeˬ zaˬ deuˬ-ahˇ, aˬ kuiˬ tiˬ mawˇ tehꞈ-ehˇ kʼawꞈ, tsehꞈ nehˬ-eu maˬ jawˇ-aˇ. Kʼoeˇ ngeh, Sahˬpaˬ Miˬyehˇ pyeuꞈ-eu ngaˇ-aˬ, Iˇsaˬleˬlaˆ tsawˇ haˬ hawˇ-eu Iˇjiˇtuˆ tsawˇ haˬ tseˇ paˆ gaˇ, naw maꞈ ya mawˇ tehꞈ-a’ lehˇ ehˇ-eu meh.”

⁸Moˇseˬ paˇ ehˇ-eu, “ Kʼoeˇ ngeh jawˇ, nawˬ-euˬ gaˇ mˇ-eu yaw huiˬ yaw mahˇ dawˬ tawˆ luꞈ, ngaˬ-euˬ mehˬ shi laˇ-awˇ, aw byaˆ-eu laꞈ kʼoeˇ, ngaˬ-euˬ tsawˇ haˬ dawˬ tawˆ luꞈ sheuˬ-awˇ doˆ-iˇ nehˬ laꞈ-awˬ lehˇ ngaˬ-ahˇ ya shaˇ laˇ tehꞈ-a. Kʼoeˇ sawˇ miˇ tsa teh-ehˇ ngaˇ doˆ-iˇ ma.” Moˇseˬ kʼoeˇ loꞈ-ehˇ dawˬ saˬ saˬ yaꞈ-awˇ, nui ma pehˇ-eu laꞈ kʼoeˇ sahˬ paˬ kʼoeˇ gʼaˬ jawˇ gaˇ neh doˆ-iˇ-euˬ meh.

⁹“Zahˬ leˇ paˬ-ehˇ gʼeh-eu jeˬ Iˇjiˇtuˆ miˇ kʼahˬ kʼoeˇ taˆ paˇ bi keuˆ le ni, sahˬ paˬ kʼoeˇ gʼaˬ nawˬ-euˬ ehˇ dawˬ maˬ naˇ haˬ-ehˇ jawˇ tehꞈ-a” lehˇ, Moˇseˬ-ahˇ Sahˬpaˬ Miˬyehˇ ehˇ nehˬ taˬ-euˬ meh.

¹⁰Zahˬ leˇ paˬ-ehˇ gʼeh-eu heu deuˬ dawˬ tawˆ luꞈ, sahˬ paˬ kʼoeˇ gʼaˬ-euˬ mehˬ shi Moˇseˬ hawˇ-eu Aˬloˬ mˇ mehˬ nehˬ-euˬ meh. Ehˇ kʼawꞈ, sahˬ paˬ kʼoeˇ gʼaˬ nui ma gʼahˇ ni, Sahˬpaˬ Miˬyehˇ neh jahˇ nehˬ-awˇ, Iˇsaˬleˬlaˆ tsawˇ haˬ deuˬ-ahˇ aˬ yawꞈ-euˬ miˇ kʼahˬ laꞈ kʼoeˇ neh, sahˬ paˬ kʼoeˇ gʼaˬ maˬ bi doˆ-iˇ-a.