Read Akha Doˆ-iˇ 12 Bible Online

Doˆ-iˇ 12 - Akha bible

Doˆ-iˇ 12

¹Iˇjiˇtuˆ miˇ kʼahˬ laꞈ kʼoeˇ, Moˇseˬ hawˇ-eu Aˬloˬ-ahˇ, Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

²“Ba la heu siˬ-aˬ, tiˬ kʼoꞈ laꞈ kʼoeˇ naw maꞈ gʼaˇ duˬ ba la yaw beh siˬ pyeuꞈ-eu meh.

³Iˇsaˬleˬlaˆ tsawˇ haˬ dawˬ tawˆ luꞈ-ahˇ heu loꞈ-ehˇ mehˬ nehˬ-awˬ. Ba la heu siˬ tseˇ nah tiˬ nah-ahˇ, tsawˇ haˬ yawˬ gʼaˬ yawˬ na luꞈ, yawˬ ha-euˬ nymˇ jiˇ gʼaˇ duˬ, yawˇ zaˬ tiˬ mawˇ maˬ ngeuˇ naˇ, ciꞈ myehꞈ ciꞈ zaˬ tiˬ mawˇ ya tseˇ doˆ taˬ meh.

⁴Yawˬ ha-euˬ nymˇ kʼahˬ zaˬ maˬ myaˬ-eu miˇ neh, jeˬ zaˬ tiˬ mawˇ mawˇ lah-ehˇ maˬ dzaˬ jiˇ coeˇ naˇ, yawˬ ha-ahˇ nymˇ kaˬ taꞈ-eu nymˇ jiˇ nehˬ-ehˇ taꞈ-awˇ, nyiˬ pehˬ zaˬ luꞈ dzaˬ loꞈ paˬ-ehˇ gʼeh-eu jeˬ zaˬ tiˬ mawˇ ya lehˬ hmˬ meh.

⁵Ciꞈ myehꞈ maˬ ehˇ, yawˇ maˬ ehˇ, geuꞈ nya tehꞈ-a. Ehˇ kʼawꞈ, tiˬ myaˇ byah laˇ-euˬ yawˇ zaˬ aˬ buˬ maˬ ngeuˇ naˇ, tiˬ myaˇ byah laˇ-euˬ ciꞈ myehꞈ ciꞈ buˬ zaˬ tehꞈ-ehˇ geuꞈ nya-eu meh.

⁶Ba la heu siˬ tseˇ oeˬ nah uˬ ciꞈ uˬ taw paw, Iˇsaˬleˬlaˆ tsawˇ haˬ dawˬ tawˆ luꞈ jeˬ zaˬ ya sehꞈ meh.

⁷Jeˬ zaˬ sehꞈ-awˇ dzaˬ-eu lehˇ lehˬ hmˬ taˬ-euˬ nymˇ deuˬ-euˬ nymˇ laˇ gʼoˆ kʼoeˇ dzeˇ heu dzeˇ jaˆ-eu laˇ gʼoˆ bahˬ hawˇ-eu laˇ gʼoˆ-euˬ kʼoeˇ taˆ paw dzaˬ-ahˇ, jeˬ zaˬ-euˬ shiˬ ui cuiˆ aˬ yawꞈ maꞈ ya lehꞈ meh.

⁸Kʼoeˇ ngeh miˇ, shaˬ jiˇ kʼoeˇ deuˬ tehˬ ba-awˇ, dehˬ tseˬ maˬ ahˇ-eu kaˬ muˇ hawˇ-eu yaw kʼaˬ kʼaˬ-eu gʼawˬ paꞈ gʼawˬ nyoeˇ nehˬ-ehˇ ya dzaˬ meh.

⁹Shaˬ jiˇ kʼoeˇ-ahˇ yaw jmˬ-ehˇ maˬ ehˇ, caꞈ jaꞈ-awˇ neh maˬ ehˇ, maˬ ya dzaˬ-a. Ehˇ kʼawꞈ, uˬ duˬ, aˬ kuiˇ aˬ laꞈ hawˇ-eu tsahˬ nahˬ uˇ jiˇ dawˬ tawˆ luꞈ ahˇ leˇ-ehˇ, mawˇ lah ehˇ tehˬ ba-awˇ ya dzaˬ meh.

¹⁰Uˬ bya maˬ bya laˇ mi naˆ-ehˇ dawˬ tawˆ luꞈ ya dzaˬ jiˇ-awˇ, maˬ dzaˬ jiˇ coeˇ ni kʼaˇ dzeˇ laˇ-euˬ dawˬ tawˆ luꞈ, miˬ dzaˬ ya keuˬ dzeh jiˇ meh.

¹¹Naw maꞈ gaˇ ma doˆ-iˇ-eu gʼaˇ duˬ lehˬ hmˬ taˬ-euˬ tsawˇ haˬ loꞈ-ehˇ, joꞈ paꞈ paꞈ, sehˬ nawˆ nawˆ-awˇ, gawˬ yoeˬ tuˆ tehˬ taˬ-eu laꞈ kʼoeˇ, dzaˇ kʼoeˇ ya dzaˬ meh. Heu-aˬ, Sahˬpaˬ Miˬyehˇ pyeuꞈ-eu ngaˬ-ahˇ taˬ huiˬ taˬ mahˇ-eu laꞈ kʼoeˇ jahˇ-eu Baˬsaˬkaˬ Bawˬ-iˬ pyeuꞈ-eu meh.

¹²“Kʼoeˇ ngeh miˇ, Iˇjiˇtuˆ miˇ kʼahˬ-ahˇ ngaˇ iˇ paˆ gʼeh-awˇ, dehꞈ beh beh le-euˬ aˬ li aˬ yuiꞈ yawˬ gʼaˬ na luꞈ hawˇ-eu, jeˬ zaˬ deuˬ laꞈ kʼoeˇ dehꞈ beh beh le-euˬ aˬ buˬ deuˬ yawˬ mawˇ na luꞈ bi shiˇ-awˇ, Iˇjiˇtuˆ tsawˇ haˬ deuˬ-euˬ miˬ yehˇ dawˬ tawˆ luꞈ-ahˇ ngaˇ kʼehˬ nehˬ kʼaˆ nehˬ ma.

¹³Laˇ gʼoˆ-ahˇ lehꞈ taˬ-euˬ shiˬ kʼoeˇ-aˬ, naw maꞈ jawˇ-eu nymˇ deuˬ-ahˇ tseˇ paˆ-awˇ haw siˬ nya-eu gʼaˇ duˬ, bi siˬ bi mawˇ-eu jeˬ pyeuꞈ-eu ma. Iˇjiˇtuˆ tsawˇ haˬ-ahˇ ngaˇ kʼehˬ nehˬ kʼaˆ nehˬ luꞈ ngeh, shiˬ kʼoeˇ-ahˇ ngaˇ ya mawˇ naˇ, naw maꞈ-ahˇ maˬ laˆ tahˬ maˬ laˆ naˇ ni, bi buˬ bi law-iˇ ma.

¹⁴Aˇ nah heu nah-ahˇ, Sahˬpaˬ Miˬyehˇ pyeuꞈ-eu ngaˇ mˇ-eu gaˇ-ahˇ noeˬ keuˆ-awˇ, lah-eu daw-eu laꞈ kʼoeˇ, ngaˬ-ahˇ uˬ duˬ tahˬ-eu jeˬ-ahˇ taꞈ leˇ-eu bawˬ-iˬ naw maꞈ ya gʼeh tehꞈ-a. Tiˬ ziˇ saˇ-iˬ tiˬ ziˇ, bawˬ-iˬ heu hmˬ naw maꞈ ya jahˇ daˆ leꞈ meh.”

¹⁵Sahˬpaˬ Miˬyehˇ ehˇ-eu, “Shiꞈ nah keuˆ ni dehˬ tseˬ ahˇ-eu kaˬ muˇ naw maꞈ maˬ dzaˬ ni, dehˬ tseˬ maˬ ahˇ-eu kaˬ muˇ tehꞈ-ehˇ ya dzaˬ meh. Yaw beh nah laꞈ kʼoeˇ, naw maꞈ-euˬ nymˇ-ahˇ jaˆ-eu dehˬ tseˬ naw maꞈ ya biˬ dzeh jiˇ meh. Aˬ jeˬ miˇ neh ehˇ naˇ, kʼoeˇ shiꞈ nah laꞈ kʼoeˇ, tsawˇ haˬ tiˬ gʼaˬ na, dehˬ tseˬ ahˇ-eu kaˬ muˇ dzaˬ naˇ, tsawˇ haˬ kʼoeˇ gʼaˬ-ahˇ ngaˬ-euˬ tsawˇ haˬ lehˇ maˬ paˇ sawˇ nya meh.

¹⁶Yaw beh nah hawˇ-eu shiꞈ nah tiˬ nah laꞈ kʼoeˇ, naw maꞈ tiˬ gaˇ tehꞈ-ehˇ uiˬ leˇ-awˇ uˬ duˬ ya tahˬ meh. Aˇ nah kʼoeˇ shiꞈ nah laꞈ kʼoeˇ naw maꞈ gaˇ maˬ ya mˇ-a. Ehˇ kʼawꞈ, yawˬ ha dzaˬ-eu dzaˇ laˆ saˆ dzaˬ nya meh.

¹⁷Bawˬ-iˬ heu hmˬ maˬ byehˇ ni aˬ myah luꞈ jahˇ-awˬ. Aˬ jeˬ miˇ neh ehˇ naˇ, aˇ nah kʼoeˇ nah-ahˇ, Iˇjiˇtuˆ miˇ kʼahˬ laꞈ kʼoeˇ neh, naw maꞈ-ahˇ ngaˇ sheuˬ doˆ nehˬ-euˬ ma. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, tiˬ ziˇ saˇ-iˬ tiˬ ziˇ, aˇ nah kʼoeˇ nah-ahˇ naw maꞈ lah daw-eu laꞈ kʼoeˇ, bawˬ-iˬ ya jahˇ daˆ leꞈ tehꞈ-a.

¹⁸Ba la yaw beh siˬ tseˇ oeˬ nah uˬ ciꞈ uˬ taw paw neh aˇ dahˬ beh-awˇ, nyiˬ tseˇ tiꞈ nah ngeh nah uˬ ciꞈ uˬ taw paw keuˆ ni, dehˬ tseˬ ahˇ-eu kaˬ muˇ maˬ dzaˬ ni naw maꞈ ya jawˇ meh.

¹⁹Shiꞈ nah keuˆ ni, naw maꞈ-euˬ nymˇ laꞈ kʼoeˇ dehˬ tseˬ maˬ ya bi jaˆ-a. Aˬ jeˬ miˇ neh ehˇ naˇ, miˇ kʼahˬ heu kʼahˬ laꞈ kʼoeˇ dehꞈ le-euˬ maˬ kaˬ, aˬ cawˬ miˇ kʼahˬ-ahˇ neh oe-euˬ maˬ kaˬ, tsawˇ haˬ tiˬ gʼaˬ na dehˬ tseˬ ahˇ-eu dzaˇ dzaˬ naˇ, tsawˇ haˬ kʼoeˇ gʼaˬ-ahˇ ngaˬ-euˬ tsawˇ haˬ lehˇ ngaˇ maˬ paˇ sawˇ ma.

²⁰Naw maꞈ kʼaˇ jawˇ luꞈ-eu jawˇ duˬ laꞈ kʼoeˇ, dehˬ tseˬ ahˇ-eu kaˬ muˇ maˬ dzaˬ ni, dehˬ tseˬ maˬ ahˇ-eu kaˬ muˇ tehꞈ-ehˇ ya dzaˬ meh.”

²¹Iˇsaˬleˬlaˆ tsawˇ haˬ aˬ yuiꞈ aˬ tsu deuˬ dawˬ tawˆ luꞈ-ahˇ Moˇseˬ kuˇ uiˬ-awˇ, heu loꞈ-ehˇ ehˇ nehˬ-euˬ meh. “Yawˬ ha-euˬ nymˇ jiˇ Baˬ saˬ ka bawˬ-iˬ jahˇ nya ni, naw maꞈ dawˬ tawˆ luꞈ, ciꞈ myehꞈ ciꞈ zaˬ maˬ ngeuˇ naˇ, yawˇ zaˬ tiˬ mawˇ tseˇ doˆ taˬ-awˬ.

²²Hiˇsoˆ uˬ pyaˬ kʼehꞈ-awˇ, jeˬ zaˬ-euˬ shiˬ dahˬ-eu kʼmˬ maˬ-ahˇ cawˬ duiˆ-awˇ, naw maꞈ-euˬ laˇ gʼoˆ kʼoeˇ dzeˇ ma dzeˇ jaˆ-eu laˇ gʼoˆ bahˬ hawˇ-eu, laˇ gʼoˆ-euˬ kʼoeˇ taˆ paw jaˆ-eu pyaꞈ dmˬ-ahˇ shiˬ kʼoeˇ lehꞈ-awˬ. Uˬ shawˬ uˬ bya maˬ bya laˇ kʼoeˇ keuˆ ni, naw maꞈ tiˬ gʼaˬ-iˬ nymˇ laꞈ nyiˇ paw taˬ doˆ-iˇ.

²³Iˇjiˇtuˆ tsawˇ haˬ deuˬ-ahˇ sehꞈ-eu lehˇ, Sahˬpaˬ Miˬyehˇ Iˇjiˇtuˆ miˇ kʼahˬ-ahˇ oe paˆ ngeh, laˇ gʼoˆ bahˬ hawˇ-eu pyaꞈ dmˬ-ahˇ lehꞈ taˬ-euˬ shiˬ-ahˇ aˬ yawꞈ ya mawˇ naˇ, Shiˇ-eu jeˬ-euˬ Mˬ taˆ gʼaˬ kʼehˇ-ahˇ, naw maꞈ-ahˇ laˆ sehꞈ-eu gʼaˇ duˬ, naw maꞈ-euˬ nymˇ laꞈ kʼoeˇ maˬ bi uˇ le-aˇ.

²⁴Naw maꞈ hawˇ-eu naw maꞈ-euˬ zaˬ deuˬ, zahˇ dawˬ heu dawˬ-ahˇ aˬ myah luꞈ ya caw teh tehꞈ-a.

²⁵Sahˬpaˬ Miˬyehˇ neh naw maꞈ-ahˇ biꞈ ma lehˇ ehˇ tsehˆ taˬ-euˬ miˇ kʼahˬ-ahˇ naw maꞈ le uˇ ngeh, bawˬ-iˬ heu hmˬ naw maꞈ ya jahˇ tehꞈ-a.

²⁶‘Bawˬ-iˬ heu hmˬ-euˬ dawˬ tsuiꞈ aˬ jeˬ-a’ lehˇ naw maꞈ-euˬ zaˬ deuˬ naw maꞈ-ahˇ naˇ haˬ laˇ ngeh,

²⁷naw maꞈ heu loꞈ-ehˇ ya ehˇ mehˬ nehˬ tehꞈ-a. ‘Bawˬ-iˬ heu hmˬ-euˬ dawˬ tsuiꞈ-aˬ, Sahˬpaˬ Miˬyehˇ-ahˇ taˬ huiˬ taˬ mahˇ-eu laꞈ kʼoeˇ mˇ-eu buˬ-iˇ law-iˇ-eu lawˇ-eu shehˇ-eu jeˬ pyeuꞈ-eu meh. Aˬ jeˬ miˇ neh ehˇ naˇ, Iˇjiˇtuˆ miˇ kʼahˬ laꞈ kʼoeˇ, Iˇsaˬleˬlaˆ tsawˇ haˬ deuˬ-euˬ nymˇ deuˬ-ahˇ Sahˬpaˬ Miˬyehˇ bi buˬ bi law-iˇ-euˬ meh. Iˇjiˇtuˆ tsawˇ haˬ deuˬ-ahˇ aˬ yawꞈ sehꞈ-awˇ, aˬ dui maꞈ-ahˇ bi law-iˇ nehꞈ laꞈ-euˬ meh’ lehˇ ya ehˇ mehˬ nehˬ tehꞈ-a.” Kʼoeˇ ngeh, Iˇsaˬleˬlaˆ tsawˇ haˬ deuˬ pawˬ tsuiꞈ pawˬ dmˬ dmˬ-awˇ, uˬ duˬ tahˬ-euˬ meh.

²⁸Kʼoeˇ naˇ, aˬ yawꞈ maꞈ iˇ-awˇ, Moˇseˬ hawˇ-eu Aˬloˬ-ahˇ Sahˬpaˬ Miˬyehˇ neh dawˬ biꞈ-euˬ loꞈ-ehˇ mˇ-euˬ meh.

²⁹Uˬ ciꞈ sehˇ gʼahˇ ceh laˇ ngeh, sahˬ paˬ geuꞈ-eu gʼaˇ duˬ jeˬ biˇ oꞈ-eu sahˬ paˬ-euˬ aˬ li-ahˇ neh, paꞈ kuˆ-ahˇ uˇ luꞈ-eu tsawˇ haˬ-euˬ aˬ li-ahˇ keuˆ ni, Iˇjiˇtuˆ miˇ kʼahˬ laꞈ kʼoeˇ kʼaˇ jawˇ-eu dehꞈ beh beh le-euˬ aˬ li aˬ yuiꞈ deuˬ shiˇ jiˇ-euˬ meh. Jeˬ zaˬ deuˬ laꞈ kʼoeˇ dehꞈ beh beh le-euˬ deuˬ kʼawꞈ, shiˇ jiˇ-euˬ meh.

³⁰Kʼoeˇ ngeh miˇ, sahˬ paˬ maˬ ehˇ, sahˬ paˬ-euˬ gaˇ mˇ-eu yaw huiˬ yaw mahˇ deuˬ maˬ ehˇ, Iˇjiˇtuˆ tsawˇ haˬ dawˬ tawˆ luꞈ maˬ ehˇ, noeˬ laˇ jiˇ-euˬ meh. Kʼoeˇ ngeh, Iˇjiˇtuˆ miˇ kʼahˬ laꞈ kʼoeˇ, guˇ guˇ-ehˇ ngoeˇ-eu teˇ saˇ byah jiˇ-euˬ meh. Aˬ jeˬ miˇ neh ehˇ naˇ, aˬ li tiˬ li-iˬ maˬ bi shiˇ ni dzeuˇ-iˇ-euˬ nymˇ tiˬ nymˇ-iˬ maˬ jaˆ-a.

³¹Kʼoeˇ ngeh miˇ neh, sahˬ paˬ kʼoeˇ gʼaˬ Moˇseˬ hawˇ-eu Aˬloˬ-ahˇ bi kuˇ laˬ-iˇ-awˇ, “Naw nyaꞈ hawˇ-eu naw nyaꞈ-euˬ Iˇsaˬleˬlaˆ tsawˇ haˬ deuˬ doˆ-iˇ-awˬ. Nga maꞈ-euˬ miˇ kʼahˬ laꞈ kʼoeˇ neh doˆ-iˇ-awˇ, naw maꞈ shaˇ-eu loꞈ-ehˇ, naw maꞈ-euˬ Sahˬpaˬ Miˬyehˇ-ahˇ uˬ duˬ tahˬ-iˇ-awˬ.

³²Naw maꞈ-euˬ yawˇ, ciꞈ myehꞈ hawˇ-eu mawˇ neˇ deuˬ tehˆ-awˇ doˆ-iˇ-awˬ. Ngaˇ guiˬ lahˬ za ni, ngaˬ-euˬ gʼaˇ duˬ kʼawꞈ guiˬ lahˬ shaˇ-awˬ.”

³³Iˇjiˇtuˆ tsawˇ haˬ deuˬ Iˇsaˬleˬlaˆ tsawˇ haˬ deuˬ-ahˇ, “Naw maꞈ maˬ doˆ-iˇ naˇ, nga maꞈ ya shiˇ jiˇ-eu keuˆ laˇ-euˬ ngaˇ” lehˇ ehˇ nehˬ-awˇ, aˬ yawꞈ maꞈ yaw kawˇ-ehˇ doˆ-iˇ ni ehˇ tehˇ tehˬ luꞈ-eu meh.

³⁴Kʼoeˇ miˇ neh, Iˇsaˬleˬlaˆ tsawˇ haˬ deuˬ-aˬ, aˬ yawꞈ maꞈ-euˬ kaˬ muˇ jahˇ-eu oeˬ lahˬ deuˬ laꞈ kʼoeˇ, dehˬ tseˬ maˬ dawˆ-euˬ kaˬ muˇ yaw jmˬ tiˬ byah ni nmꞈ ahˇ-awˇ, oeˬ lahˬ kʼoeˇ deuˬ-ahˇ saˬ paˇ neh lahˇ cuꞈ-awˇ, baꞈ pu-ahˇ baꞈ-euˬ meh.

³⁵Moˇseˬ hawˇ-eu Aˬloˬ neh ehˇ nehˬ-euˬ loꞈ-ehˇ, Iˇsaˬleˬlaˆ tsawˇ haˬ deuˬ-aˬ, Iˇ jiˇ tuˆ tsawˇ haˬ deuˬ-ahˇ, pyuˇ myawˬ guˇ, shuiˇ myawˬ guˇ hawˇ-eu dm gʼaˬ dm lmˇ deuˬ shaˇ-euˬ meh.

³⁶Iˇ jiˇ tuˆ tsawˇ haˬ deuˬ Iˇ saˬ leˬ laˇ tsawˇ haˬ deuˬ-ahˇ yaw zeu baw-awˇ, aˬ yawꞈ maꞈ kʼaˇ shaˇ-eu jeˬ biꞈ ni, Iˇ jiˇ tuˆ tsawˇ haˬ deuˬ-euˬ nui ma-ahˇ Sahˬpaˬ Miˬyehˇ laˆ saˆ nehˬ-euˬ meh. Kʼoeˇ loꞈ-ehˇ jahˇ-awˇ, Iˇ jiˇ tuˆ tsawˇ haˬ deuˬ-euˬ pyuˇ shuiˇ myawˬ gahˬ, Iˇ saˬ leˬ laˇ tsawˇ haˬ deuˬ yuˇ geuꞈ gʼeh-euˬ meh.

³⁷Laˬmaˬsehˇ meuˬ-ahˇ neh, Suˇkoˆ lehˇ kuˇ-eu jawˇ duˬ-ahˇ, Iˇsaˬleˬlaˆ tsawˇ haˬ deuˬ kuiˇ zoˬ cah gʼeh-euˬ meh. Aˬ yawꞈ maꞈ-aˬ, zaˬ miˬ zaˬ hawˇ-eu zaˬ deuˬ maˬ gui ahˇ-ehˇ, kʼaˬ dzeˇ zaˬ tehꞈ-ehˇ koꞈ seh gʼaˬ byah-eu meh.

³⁸Nui deuˬ tsawˇ jeuˬ gʼawˬ mya ni maˬ ehˇ, myaˬ dui dui-eu yawˇ, ciꞈ myehꞈ hawˇ-eu mawˇ neˇ deuˬ maˬ ehˇ, aˬ yawꞈ maꞈ nehˬ-ehˇ iˇ gʼeh-euˬ meh.

³⁹Aˬ yawꞈ maꞈ Iˇjiˇtuˆ miˇ kʼahˬ laꞈ kʼoeˇ neh yuˇ leꞈ-euˬ kaˬ muˇ yaw jmˬ kʼoeˇ yuˇ-awˇ, dehˬ tseˬ maˬ ahˇ-eu kaˬ muˇ aˬ yawꞈ maꞈ jahˇ-euˬ meh. Aˬ jeˬ miˇ neh ehˇ naˇ, Iˇjiˇtuˆ miˇ kʼahˬ laꞈ kʼoeˇ neh, tehˬ law baw law-ehˇ aˬ yawꞈ maꞈ-ahˇ teh doˆ nehˬ-euˬ miˇ neh, dehˬ tseˬ ahˇ-eu kaˬ muˇ yaw jmˬ lehˬ hmˬ-eu aˇ yamˬ aˬ yawꞈ maꞈ maˬ za-aˬ.

⁴⁰Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ oeˬ yaˇ smˬ tseˇ kʼoꞈ jawˇ byah-euˬ meh.

⁴¹Oeˬ yaˇ smˬ tseˇ kʼoꞈ byah laˇ ngeh nah, Sahˬpaˬ Miˬyehˇ-euˬ tsawˇ haˬ pyeuꞈ-eu Iˇsaˬleˬlaˆ tsawˇ jeuˬ tsawˇ ca dawˬ tawˆ luꞈ, Iˇjiˇtuˆ miˇ kʼahˬ laꞈ kʼoeˇ neh doˆ-iˇ-euˬ meh.

⁴²Kʼoeˇ ngeh miˇ-aˬ, Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-eu gʼaˇ duˬ, Sahˬpaˬ Miˬyehˇ aˬ yawꞈ maꞈ-ahˇ loꞈ luꞈ-eu uˬ ciꞈ tiˬ miˇ pyeuꞈ-eu meh. Uˬ ciꞈ kʼoeˇ miˇ-aˬ, Iˇsaˬleˬlaˆ tsawˇ haˬ deuˬ tiˬ ziˇ saˇ-iˬ tiˬ ziˇ, Sahˬpaˬ Miˬyehˇ-ahˇ ya loꞈ-eu gʼaˇ duˬ, aˬ yawꞈ-ahˇ damˬ nehˬ taˬ-euˬ uˬ ciꞈ tiˬ miˇ kʼawꞈ pyeuꞈ-eu meh.

⁴³Moˇseˬ hawˇ-eu Aˬloˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Heu-aˬ, Baˬsaˬkaˬ Bawˬ-iˬ dzaˬ gaˇ taꞈ leˇ-eu zahˇ sahˇ kʼoꞈ pyeuꞈ-eu meh. Baˬsaˬkaˬ Bawˬ-iˬ dzaˬ gaˇ, aˬ cawˬ tsawˇ jeuˬ deuˬ maˬ ya uˇ leˇ-a.

⁴⁴Ehˇ kʼawꞈ, naw maꞈ neh zeuˇ tsehˆ-awˇ, baˆ kʼoˆ mehˬ dzaˬ yehˬ gʼaˬ-euˬ zaˬ kʼaˆ deuˬ, Bawˬ-iˬ heu hmˬ dzaˬ gaˇ uˇ leˇ nya meh.

⁴⁵Aˬ cawˬ miˇ kʼahˬ-ahˇ neh tiˬ kʼehˬ tiˬ yamˬ cehˆ jawˇ le-euˬ tsawˇ haˬ deuˬ hawˇ-eu, gʼaˬ mahˇ mahˇ dzaˬ luꞈ-eu zaˬ kʼaˆ deuˬ, Bawˬ-iˬ heu hmˬ dzaˬ gaˇ maˬ ya uˇ leˇ-a.

⁴⁶Bawˬ-iˬ heu hmˬ dzaˬ-eu gʼaˇ duˬ laˆ saˆ taˬ-euˬ dzaˬ byawˇ-ahˇ, nymˇ laꞈ kʼoeˇ tehꞈ-ehˇ ya dzaˬ jiˇ meh. Laꞈ nyiˇ paw yuˇ doˆ-awˇ maˬ ya dzaˬ-a. Bawˬ-iˬ dzaˬ luꞈ ngeh, shaˬ yoeˬ maˬ ya laˆ kʼehꞈ-a.

⁴⁷Iˇsaˬleˬlaˆ tsawˇ haˬ dawˬ tawˆ luꞈ, Bawˬ-iˬ heu hmˬ ya jahˇ meh.

⁴⁸Ehˇ kʼawꞈ, baˆ kʼoˆ mehˬ dzaˬ maˬ yehˬ-euˬ tsawˇ haˬ deuˬ, Bawˬ-iˬ heu hmˬ dzaˬ gaˇ maˬ ya uˇ leˇ-a. Aˬ cawˬ tsawˇ jeuˬ tiˬ gʼaˬ na, naw maꞈ nehˬ-ehˇ jawˇ myahˇ laꞈ-awˇ, Sahˬpaˬ Miˬyehˇ-ahˇ taˬ huiˬ taˬ mahˇ-eu gʼaˇ duˬ, Baˬsaˬkaˬ bawˬ-iˬ dzaˬ gaˇ uˇ leˇ mawꞈ naˇ, aˬ yawꞈ-euˬ nymˇ jiˇ laꞈ kʼoeˇ kʼaˇ jawˇ-eu kʼaˬ dzeˇ zaˬ dawˬ tawˆ luꞈ-ahˇ baˆ kʼoˆ mehˬ dzaˬ jeˬ huˬ yehˬ nehˬ-awˬ. Kʼoeˇ naˇ, naw maꞈ jawˇ gaˇ dehꞈ le-euˬ Iˇsaˬleˬlaˆ tsawˇ haˬ tiˬ gʼaˬ loꞈ-ehˇ aˬ yawꞈ-ahˇ sawˇ nehˬ-awˇ, bawˬ-iˬ dzaˬ gaˇ bi uˇ leˇ nya tehꞈ-a. Ehˇ kʼawꞈ, baˆ kʼoˆ mehˬ dzaˬ maˬ yehˬ-euˬ tsawˇ haˬ aˬ geu gʼaˬ maˬ kaˬ, bawˬ-iˬ heu hmˬ dzaˬ gaˇ maˬ ya uˇ leˇ-a.

⁴⁹Bawˬ-iˬ heu hmˬ-ahˇ taꞈ leˇ-eu zahˇ sahˇ kʼoꞈ heu deuˬ-aˬ, naw maꞈ jawˇ gaˇ dehꞈ le-euˬ Iˇsaˬleˬlaˆ tsawˇ haˬ deuˬ-ahˇ maˬ ehˇ, naw maꞈ nehˬ-ehˇ jawˇ le-euˬ aˬ cawˬ tsawˇ jeuˬ deuˬ-ahˇ maˬ ehˇ, taꞈ leˇ-eu zahˇ sahˇ kʼoꞈ pyeuꞈ-eu meh.”

⁵⁰Moˇseˬ hawˇ-eu Aˬloˬ-ahˇ Sahˬpaˬ Miˬyehˇ neh dawˬ biꞈ nehˬ-euˬ loꞈ-ehˇ, Iˇsaˬleˬlaˆ tsawˇ haˬ dawˬ tawˆ luꞈ naˇ haˬ-awˇ mˇ-euˬ meh.

⁵¹Kʼoeˇ ngeh nah laꞈ kʼoeˇ, Sahˬpaˬ Miˬyehˇ Iˇsaˬleˬlaˆ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-euˬ meh.