Read Akha Doˆ-iˇ 17 Bible Online

Doˆ-iˇ 17 - Akha bible

Doˆ-iˇ 17

¹Iˇsaˬleˬlaˆ tsawˇ haˬ aˇ maꞈ maꞈ lah ni, Siˬ lehˇ kuˇ-eu bawˇ tsahˬ bawˇ dahˇ-ahˇ neh doˆ-iˇ-awˇ, Sahˬpaˬ Miˬyehˇ neh aˬ yawꞈ maˬ-ahˇ bi iˇ-euˬ loꞈ-ehˇ, mehˬ hu paw tiˬ gaˇ saˇ-iˬ tiˬ gaˇ iˇ gʼeh-euˬ meh. Aˬ yawꞈ maꞈ-aˬ, Leˬpiˇdeˬ lehˇ kuˇ-eu jawˇ duˬ-ahˇ sehˬ gʼawˆ gʼawˆ-awˇ naˬ-euˬ meh. Ehˇ kʼawꞈ, jawˇ duˬ kʼoeˇ tsahˇ-ahˇ, aˬ yawꞈ maꞈ dawˇ-eu gʼaˇ duˬ iˇ cuꞈ maˬ jaˆ-a.

²Aˬ yawꞈ maꞈ nui ma cawˆ-eu laꞈ kʼoeˇ, Moˇseˬ-ahˇ iˬ baˇ taˬ-awˇ, “Nga maꞈ dawˇ-eu gʼaˇ duˬ iˇ cuꞈ biꞈ nehˬ laꞈ-awˬ” lehˇ ehˇ nehˬ-euˬ meh. Moˇseˬ gʼeh, “Aˬ jeˬ miˇ neh naw maꞈ ngaˬ-ahˇ iˬ baˇ taˬ te. Aˬ jeˬ miˇ neh naw maꞈ Sahˬpaˬ Miˬyehˇ-ahˇ lawˬ haw te” lehˇ aˬ yawꞈ maꞈ-ahˇ ehˇ nehˬ-euˬ meh.

³Ehˇ kʼawꞈ, tsawˇ haˬ kʼoeˇ deuˬ iˇ cuꞈ mehꞈ-eu miˇ neh, Moˇseˬ-ahˇ iˬ baˇ taˬ-eu maˬ tsehˆ leˇ-a. “Aˬ jeˬ miˇ neh nga maꞈ-ahˇ nawˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ laꞈ teˬ. Nga maꞈ hawˇ-eu nga maꞈ-euˬ zaˬ deuˬ maˬ ehˇ, nga maꞈ-euˬ jeˬ zaˬ deuˬ maˬ ehˇ, bi shiˇ jiˇ-eu lehˇ sheuˬ doˆ laꞈ teˬ loˇ” lehˇ aˬ yawꞈ maꞈ ehˇ-euˬ meh.

⁴Kʼoeˇ naˇ, Moˇseˬ guiˬ lahˬ shaˇ-eu laꞈ kʼoeˇ, “Tsawˇ haˬ heu deuˬ-ahˇ ngaˇ aˬ joˆ-ehˇ ya jahˇ nehˬ nmˇ. Aˬ yawꞈ maꞈ ngaˬ-ahˇ kʼaˬ lo neh biˬ sehꞈ-eu lehˇ gʼeh-eu meh” lehˇ, Sahˬpaˬ Miˬyehˇ-ahˇ ehˇ nehˬ-euˬ meh.

⁵Moˇseˬ-ahˇ Sahˬpaˬ Miˬyehˇ ehˇ nehˬ-eu, “Iˇsaˬleˬlaˆ tsawˇ haˬ laꞈ kʼoeˇ, aˬ yuiꞈ aˬ tsu tiˬ paˆ na deuˬ sheuˬ-awˇ, mehˬ hu paw iˇ huˬ gʼeh-awˬ. Nawˬ neh Niˬlaˇ lawˇ baˬ-ahˇ juiꞈ-euˬ gawˬ yoeˬ kʼoeˇ hmˬ gʼeh yuˇ gʼeh-awˬ.

⁶Siˇnaˆ gawˬ jawˬ lo guˇ kʼoeˇ taˆ, nawˬ-euˬ mehˬ shi ngaˇ yawꞈ luꞈ ma. Lo guˇ-ahˇ juiꞈ-awˬ. Iˇsaˬleˬlaˆ tsawˇ haˬ deuˬ dawˇ-eu gʼaˇ duˬ iˇ cuꞈ yoeˇ doˆ le tehꞈ-a.” Iˇsaˬleˬlaˆ tsawˇ haˬ aˬ yuiꞈ aˬ tsu deuˬ-euˬ mehˬ shi, Moˇseˬ kʼoeˇ loꞈ-ehˇ mˇ-euˬ meh.

⁷Jawˇ duˬ kʼoeˇ tsahˇ-ahˇ, Maˬsaˬ hawˇ-eu Meˬliˇbaˬ[7] lehˇ kuˇ-euˬ meh. Aˬ jeˬ miˇ neh ehˇ naˇ, Iˇsaˬleˬlaˆ tsawˇ haˬ deuˬ nui ma cawˆ-eu laꞈ kʼoeˇ, “Sahˬpaˬ Miˬyehˇ aˬ dui maꞈ nehˬ-ehˇ jawˇ nga loˇ, maˬ jawˇ nga loˇ” lehˇ aˬ yawꞈ maꞈ ehˇ-awˇ, Sahˬpaˬ Miˬyehˇ-ahˇ lawˬ haw-euˬ meh.

⁸Aˬmaˬlehˇ tsawˇ haˬ deuˬ oe-awˇ, Leˬpiˇdeˬ lehˇ kuˇ-eu jawˇ duˬ-ahˇ, Iˇsaˬleˬlaˆ tsawˇ haˬ deuˬ-ahˇ guiˇ deuˆ le-euˬ meh.

⁹Yawˇshuˆ-ahˇ Moˇseˬ ehˇ nehˬ-eu, “Ni shawˬ nah Aˬmaˬlehˇ tsawˇ haˬ deuˬ-ahˇ guiˇ deuˆ leˇ-eu gʼaˇ duˬ, tsawˇ haˬ tseˇ doˆ-awˬ. Sahˬpaˬ Miˬyehˇ neh ngaˬ-ahˇ bi yuˇ laꞈ-euˬ gawˬ yoeˬ kʼoeˇ hmˬ ngaˇ yuˇ-awˇ, gawˬ jawˬ uˬ du yawꞈ ma.”

¹⁰Moˇseˬ, Aˬloˬ hawˇ-eu, Huˇyaˆ aˬ ha smˇ gʼaˬ gawˬ jawˬ uˬ du daˆ leˇ luꞈ ngeh, Yawˇshuˆ-aˬ, Moˇseˬ neh aˬ yawꞈ-ahˇ ehˇ nehˬ taˬ-euˬ loꞈ-ehˇ mˇ-awˇ, Aˬmaˬlehˇ tsawˇ haˬ-ahˇ guiˇ deuˆ leˇ-eu lehˇ, doˆ leˇ-euˬ meh.

¹¹Moˇseˬ-euˬ aˬ laꞈ kʼaˇ baꞈ diˇ taˬ kʼoeˇ keuˆ ni, Iˇsaˬleˬlaˆ tsawˇ haˬ deuˬ guiˇ deuˆ-eu gʼaˬ leˇ-euˬ meh. Ehˇ kʼawꞈ, Moˇseˬ-euˬ aˬ laꞈ baꞈ ka ngeh jawˇ, Aˬmaˬlehˇ tsawˇ haˬ deuˬ paˇ gʼaˬ leˇ-euˬ meh.

¹²Moˇseˬ aˬ laꞈ gʼah laˇ ngeh, Aˬloˬ hawˇ-eu Huˇyaˆ aˬ nyaꞈ kʼaˬ lo tiˬ siˬ yuˇ-awˇ, Moˇseˬ-ahˇ bi nuiˇ-euˬ meh. Aˬ yawꞈ nyaꞈ-aˬ, Moˇseˬ-euˬ kʼoeˇ dzeˇ heu dzeˇ yawꞈ-awˇ, aˬ yawꞈ-euˬ aˬ laꞈ tiˬ paw laꞈ-ahˇ tiˬ gʼaˬ yuˇ-awˇ, nahˇ ma ga ahˇ ngeh keuˆ ni baꞈ diˇ nehˬ taˬ-euˬ meh.

¹³Kʼoeˇ loꞈ-ehˇ jahˇ-awˇ, Aˬmaˬlehˇ guiˇ maꞈ-ahˇ, Yawˇshuˆ guiˇ deuˆ gʼaˬ-euˬ meh.

¹⁴Moˇseˬ-ahˇ Sahˬpaˬ Miˬyehˇ ehˇ nehˬ-eu, “Guiˇ deuˆ-eu gʼaˬ leˇ-euˬ gaˇ kawˆ heu-ahˇ maˬ ya ngehˇ-eu gʼaˇ duˬ, sahˬ boꞈ boꞈ taˬ-awˬ. Aˬmaˬlehˇ tsawˇ jeuˬ-ahˇ ngaˇ yaw muiˇ paˬ-ehˇ laˆ cawˆ nehˬ ma lehˇ Yawˇshuˆ-ahˇ ehˇ nehˬ-awˬ.”

¹⁵Moˇseˬ lawˇ duˬ tiˬ tsahˇ tsoˆ-awˇ, lawˇ duˬ kʼoeˇ hmˬ-ahˇ, ‘Sahˬpaˬ Miˬyehˇ-aˬ, ngaˬ-euˬ Paˇloˬpaˇlehˇ pyeuꞈ-eu meh’ lehˇ myahˇ nehˬ-euˬ meh.

¹⁶Moˇseˬ ehˇ-eu, “Sahˬpaˬ Miˬyehˇ-euˬ paˇloˬpaˇlehˇ ka tuˇ-awˬ. Sahˬpaˬ Miˬyehˇ-aˬ, aˬ kaˇ kaˇ ziˇ keuˆ ni, Aˬmaˬlehˇ tsawˇ jeuˬ-ahˇ guiˇ deuˆ tehꞈ-a.”