Read Akha Doˆ-iˇ 18 Bible Online

Doˆ-iˇ 18 - Akha bible

Doˆ-iˇ 18

¹Moˇseˬ hawˇ-eu Iˇsaˬleˬlaˆ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-eu laꞈ kʼoeˇ, aˬ yawꞈ maꞈ-ahˇ Sahˬpaˬ Miˬyehˇ neh kʼaˇ mˇ nehˬ-euˬ jeˬ dawˬ tawˆ luꞈ gaˇ kawˆ, Miˇdiˬyaˬ tsawˇ haˬ deuˬ-euˬ piˇ ma pyeuꞈ-eu Moˇseˬ-euˬ tsawˇ mawˬ Yeˬdaˬyoˇ ya gaˬ-euˬ meh.

²Kʼoeˇ ngeh, Yeˬdaˬyoˇ-aˬ, Moˇseˬ neh bi jawˇ yaꞈ-euˬ Moˇseˬ-euˬ miˬ zaˬ Ziˬpoˇlaˬ hawˇ-eu,

³Ziˬpoˇlaˬ-euˬ aˬ li Geˬlaˬshoˬ hawˇ-eu Eˇliˇzaˬ-ahˇ sheuˬ-awˇ, Moˇseˬ jawˇ gaˇ oe-euˬ meh. ‘Ngaˇ-aˬ, aˬ cawˬ-euˬ miˇ kʼahˬ laꞈ kʼoeˇ boeˇ miˬ shiˬ kʼaˬ tiˬ gʼaˬ pyeuꞈ-eu ma’ lehˇ ehˇ-awˇ, aˬ yawꞈ-euˬ aˬ li aˬ yuiꞈ gʼaˬ-ahˇ Geˬlaˬshoˬ[8] lehˇ myahˇ nehˬ yaꞈ-euˬ meh.

⁴‘Ngaˬ da-euˬ Miˬyehˇ ngaˬ-ahˇ caw ba-awˇ, Iˇjiˇtuˆ sahˬ paˬ neh maˬ bi sehꞈ-eu gʼaˇ duˬ ngaˬ-ahˇ ka kʼoꞈ-euˬ meh’ lehˇ Moˇseˬ paˇ ehˇ-awˇ, aˬ yawꞈ-euˬ aˬ li aˬ gʼahˇ gʼaˬ-ahˇ Eˇliˇzaˬ[9] lehˇ myahˇ nehˬ yaꞈ-euˬ meh.

⁵Yeˬdaˬyoˇ-aˬ, Moˇseˬ-euˬ miˬ zaˬ hawˇ-eu aˬ yawꞈ-euˬ aˬ li nyiˬ li nehˬ-ehˇ, muiˬ-eu shawˇ-eu gawˬ jawˬ dawˬ peh bawˇ tsahˬ bawˇ dahˇ laꞈ kʼoeˇ, Moˇseˬ sehˬ gʼawˆ gʼawˆ-awˇ jawˇ luꞈ gaˇ oe-euˬ meh.

⁶Yeˬdaˬyoˇ-aˬ, aˬ yawꞈ maꞈ oe luꞈ-eu gaˇ kawˆ, Moˇseˬ-ahˇ bi tsaꞈ gaˬ-iˇ-euˬ meh.

⁷Kʼoeˇ ngeh, Moˇseˬ aˬ yawꞈ-ahˇ tahˬ puˬ leˇ-awˇ, aˬ yawꞈ-euˬ mehˬ shi uˬ duˬ tahˬ moꞈ-awˇ, aˬ yawꞈ-ahˇ mehˬ cuˇ cuˇ-euˬ meh. Aˬ yawꞈ nyaꞈ tiˬ gʼaˬ tiˇ gʼaˬ dawˬ cawˬ puˬ-awˇ, Moˇseˬ-euˬ sehˬ gʼawˆ laꞈ kʼoeˇ uˇ-iˇ-euˬ meh.

⁸Iˇsaˬleˬlaˆ tsawˇ haˬ-ahˇ ka kʼoꞈ-eu gʼaˇ duˬ, Iˇjiˇtuˆ sahˬ paˬ hawˇ-eu aˬ yawꞈ-euˬ tsawˇ haˬ deuˬ-ahˇ, Sahˬpaˬ Miˬyehˇ neh kʼaˇ mˇ nehˬ-euˬ jeˬ dawˬ tawˆ luꞈ, Yeˬdaˬyoˇ-ahˇ Moˇseˬ dzawˇ mehˬ nehˬ-euˬ meh. Iˇsaˬleˬlaˆ tsawˇ haˬ deuˬ gaˇ pehˇ-ahˇ ya tahˬ puˬ yaꞈ-euˬ shaˬ-eu zahˬ-eu jeˬ hawˇ-eu, Sahˬpaˬ Miˬyehˇ aˬ yawꞈ maꞈ-ahˇ aˬ joˆ-ehˇ ka kʼoꞈ nehˬ-euˬ gaˇ kawˆ deuˬ kʼawꞈ dzawˇ mehˬ nehˬ-euˬ meh.

⁹Gaˇ kawˆ kʼoeˇ deuˬ dawˬ tawˆ luꞈ-ahˇ ya gaˬ ngeh, Yeˬdaˬyoˇ laˬ kʼaˬ cehˇ dui dui-eu meh.

¹⁰Yeˬdaˬyoˇ ehˇ-eu, “Iˇjiˇtuˆ sahˬ paˬ hawˇ-eu aˬ yawꞈ-euˬ tsawˇ haˬ deuˬ-euˬ aˬ laꞈ laꞈ kʼoeˇ naw maꞈ-ahˇ ka kʼoꞈ nehˬ laꞈ-euˬ Sahˬpaˬ Miˬyehˇ-ahˇ ja ceuˬ-awˬ. Aˬ yawꞈ-euˬ tsawˇ haˬ-ahˇ aˬ cawˬ zaˬ kʼaˆ ya geuꞈ-eu laꞈ kʼoeˇ ka kʼoꞈ nehˬ-euˬ Sahˬpaˬ Miˬyehˇ-ahˇ ja ceuˬ-awˬ.

¹¹Sahˬpaˬ Miˬyehˇ-aˬ, miˬ yehˇ dawˬ tawˆ luꞈ kʼoeˇ taˆ huiˬ dzehˬ mahˇ dzehˬ-eu nymˬ-mˇ ngaˇ ya siˬ-euˬ ma. Aˬ jeˬ miˇ neh ehˇ naˇ, Iˇjiˇtuˆ tsawˇ haˬ deuˬ Iˇsaˬleˬlaˆ tsawˇ haˬ deuˬ-ahˇ taˬ nyiˇ-awˇ, yehˬ bawˬ sehˇ lu-ehˇ jahˇ nehˬ ngeh, aˬ yawꞈ heu loꞈ-ehˇ mˇ-euˬ meh.”

¹²Kʼoeˇ ngeh, Moˇseˬ-euˬ tsawˇ mawˬ Yeˬdaˬyoˇ-aˬ, Miˬyehˇ-ahˇ lawˇ nehˬ-eu gʼaˇ duˬ, jeˬ zaˬ mawˇ lah-ehˇ miˬ dzaˬ-ahˇ dzah puiˆ-awˇ lawˇ nehˬ-eu jeˬ hawˇ-eu, aˬ nah aˬ dzeˇ lawˇ nehˬ-eu jeˬ yuˇ laꞈ-euˬ meh. Aˬloˬ hawˇ-eu Iˇsaˬleˬlaˆ tsawˇ haˬ aˬ yuiꞈ aˬ tsu deuˬ aˬ yawꞈ nehˬ-ehˇ le-awˇ, zahˇ jahˇ-eu dzaˬ byawˇ tiˬ kawˆ loꞈ-ehˇ dzaˬ taꞈ dawˇ taꞈ-eu laꞈ kʼoeˇ, Miˬyehˇ-ahˇ uˬ duˬ tahˬ-euˬ meh.

¹³Yawˬ nah yawˬ uˬ shawˬ paw neh aˇ dahˬ beh-awˇ, uˬ ciꞈ paw keuˆ ni, nah ga-ehˇ, Iˇsaˬleˬlaˆ tsawˇ haˬ deuˬ ja dzaˬ gaˇ Moˇseˬ yaˇ kʼaˬ daˇ nehˬ-euˬ meh.

¹⁴Yawˬ jeˬ yawˬ na luꞈ Moˇseˬ ya mˇ gaˇ Yeˬdaˬyoˇ mawˇ ngeh, Moˇseˬ-ahˇ ehˇ nehˬ-eu, “Nawˬ-euˬ tsawˇ haˬ heu deuˬ gʼaˇ duˬ, heu deuˬ dawˬ tawˆ luꞈ nawˇ ya mˇ ta loˇ. Nawˬ neh bi mehˬ bi tsoˆ-eu lehˇ, uˬ shawˬ paw neh uˬ ciꞈ ciꞈ le ngeh keuˆ ni heu gaˇ yawꞈ luꞈ-eu tsawˇ haˬ heu deuˬ-ahˇ, aˬ jeˬ miˇ neh nawˇ tiˬ gʼaˬ tehꞈ-ehˇ nuiˇ-awˇ yaˇ kʼaˬ daˇ nehˬ luꞈ te.”

¹⁵Moˇseˬ ehˇ-eu, “Miˬyehˇ bi mˇ mawꞈ-eu jeˬ-ahˇ aˬ yawꞈ maꞈ ya siˬ-eu gʼaˇ duˬ, tsawˇ haˬ heu deuˬ ngaˇ jawˇ gaˇ laˇ-eu miˇ neh, ngaˇ heu loꞈ-ehˇ ya mˇ-eu jeˬ pyeuꞈ-eu ma.

¹⁶Tsawˇ haˬ nyiˬ gʼaˬ yaw kaˬ dawˬ ja kʼaˇ doˆ laˇ ngeh, aˬ yawꞈ nyaꞈ laꞈ kʼoeˇ aˬ geu gʼaˬ tsaˬ-eu nga lehˇ yaˇ kʼaˬ daˇ nehˬ-awˇ, Miˬyehˇ-euˬ zahˇ dawˬ kʼoꞈ dawˬ deuˬ aˬ yawꞈ nyaꞈ-ahˇ ngaˇ mehˬ nehˬ-euˬ ma.”

¹⁷Kʼoeˇ ngeh, Moˇseˬ-ahˇ Yeˬdaˬyoˇ heu loꞈ-ehˇ ehˇ nehˬ-euˬ meh.

¹⁸“Nawˇ mˇ-eu maˬ tsaˬ nga siˬ. Heu loꞈ-ehˇ mˇ naˇ, nawˬ-euˬ gʼaˇ duˬ maˬ ehˇ, nawˬ-euˬ tsawˇ haˬ deuˬ gʼaˇ duˬ maˬ ehˇ, yaw shaˬ tehꞈ-a. Gaˇ heu hmˬ-aˬ, nawˇ tiˬ gʼaˬ tehꞈ-ehˇ mˇ gʼaˬ coeˇ-eu gaˇ maˬ ngeuˇ nga.

¹⁹Nymˬ-mˇ ngaˇ nawˬ-ahˇ heu loꞈ-ehˇ ja sawˇ-eu ma. Miˬyehˇ nawˬ nehˬ-ehˇ jawˇ luꞈ-uˇ. Nawˇ-aˬ, Miˬyehˇ mehˬ shi tsawˇ haˬ heu deuˬ-euˬ tsawˇ kaˬ geuꞈ-awˇ, aˬ yawꞈ maꞈ yaw kaˬ dawˬ ja doˆ laˇ ngeh, Miˬyehˇ-ahˇ a nehˬ-eu tsaˬ meh.

²⁰Miˬyehˇ-euˬ zahˇ dawˬ kʼoꞈ dawˬ deuˬ aˬ yawꞈ maꞈ-ahˇ mehˬ nehˬ tsoˆ nehˬ-awˇ, aˬ yawꞈ maꞈ aˬ joˆ-ehˇ ya dehꞈ ya jawˇ ya mˇ ya shaˇ-eu gaˇ kawˆ mehˬ duˬ nehˬ-eu tsaˬ tehꞈ-a.

²¹Kʼoeˇ uˬ taꞈ, tsawˇ haˬ heu deuˬ-ahˇ bi haw bi pyaˆ-eu gʼaˇ duˬ, gʼeh nya-eu deuˬ tseˇ doˆ-awˇ, aˇ heˇ gʼaˬ kʼoeˇ taˆ aˬ yuiꞈ geuꞈ-eu deuˬ, aˇ yaˇ gʼaˬ kʼoeˇ taˆ aˬ yuiꞈ geuꞈ-eu deuˬ, ngaˬ tseˇ gʼaˬ kʼoeˇ taˆ aˬ yuiꞈ geuꞈ-eu deuˬ hawˇ-eu, tseˇ gʼaˬ kʼoeˇ taˆ aˬ yuiꞈ geuꞈ-eu deuˬ lehˇ bi baw-eu tsaˬ tehꞈ-a. Aˬ yuiꞈ aˬ tsu geuꞈ-eu tsawˇ haˬ kʼoeˇ deuˬ-aˬ, Miˬyehˇ-ahˇ guˆ-awˇ, jah coeˇ paˬ-ehˇ gʼeh-eu uˬ taꞈ, pyuˇ shuiˇ myaˆ pyawˬ-ahˇ maˬ haw-eu yaw tsaˬ yaw dawˇ tsawˇ haˬ deuˬ ya bi pyeuꞈ tehꞈ-a.

²²Aˬ yawꞈ maꞈ-ahˇ, Iˇsaˬleˬlaˆ tsawˇ haˬ deuˬ kʼoeˇ taˆ aˬ myah luꞈ yaˇ kʼaˬ daˇ nehˬ-eu yaˇ kʼaˬ daˇ-eu tsawˇ haˬ deuˬ bi geuꞈ-awˬ. Huiˬ dui dui-eu gaˇ deuˬ-aˬ, nawˇ jawˇ gaˇ aˬ yawꞈ maꞈ ya yuˇ laꞈ meh. Ehˇ kʼawꞈ, gaˇ yaw nyiˇ deuˬ-ahˇ, aˬ yawꞈ maꞈ yawˬ haˇ yawˬ ha jahˇ jiˇ nya tehꞈ-a. Kʼoeˇ loꞈ-ehˇ jahˇ-awˇ, nawˬ-euˬ kʼaˆ behˆ aˬ yawꞈ maꞈ caw pi naˇ, nawˇ gaˇ mˇ-eu awˬ dzehˬ laˇ tehꞈ-a.

²³Miˬyehˇ nawˬ-ahˇ dawˬ biꞈ-euˬ loꞈ-ehˇ, nawˇ kʼoeˇ loꞈ-ehˇ mˇ naˇ, gʼaˬ doeˇ maˬ doeˇ-eu uˬ taꞈ, tsawˇ haˬ heu deuˬ dawˬ tawˆ luꞈ kʼawꞈ, tiˬ gʼaˬ tiˇ gʼaˬ kʼaˇ ja dzaˬ-eu jeˬ dawˬ tawˆ luꞈ, laˆ tsaˬ geuꞈ jiˇ-awˇ ya gʼoꞈ-iˇ tehꞈ-a.”

²⁴Yeˬdaˬyoˇ neh ja sawˇ nehˬ-euˬ gaˇ Moˇseˬ ha geuꞈ-awˇ, aˬ yawꞈ neh kʼaˇ ehˇ-euˬ loꞈ-ehˇ mˇ-euˬ meh.

²⁵Aˬ yuiꞈ aˬ tsu bi geuꞈ-eu gʼaˇ duˬ, Iˇsaˬleˬlaˆ tsawˇ haˬ dawˬ tawˆ luꞈ laꞈ kʼoeˇ, gʼeh nya-eu tsawˇ haˬ deuˬ aˬ yawꞈ tseˇ doˆ-awˇ, aˇ heˇ gʼaˬ kʼoeˇ taˆ aˬ yuiꞈ geuꞈ-eu deuˬ, aˇ yaˇ gʼaˬ kʼoeˇ taˆ aˬ yuiꞈ geuꞈ-eu deuˬ, ngaˬ tseˇ gʼaˬ kʼoeˇ taˆ aˬ yuiꞈ geuꞈ-eu deuˬ hawˇ-eu, tseˇ gʼaˬ kʼoeˇ taˆ aˬ yuiꞈ geuꞈ-eu deuˬ lehˇ bi baw-euˬ meh.

²⁶Aˬ yawꞈ maꞈ-aˬ, Iˇsaˬleˬlaˆ tsawˇ haˬ deuˬ kʼoeˇ taˆ, aˬ myah luꞈ yaˇ kʼaˬ daˇ nehˬ-eu yaˇ kʼaˬ daˇ-eu tsawˇ haˬ deuˬ geuꞈ-awˇ, huiˬ-eu gaˇ deuˬ tehꞈ-ehˇ Moˇseˬ jawˇ gaˇ bi keuˆ leˇ-awˇ, nyiˇ-eu gaˇ deuˬ-ahˇ yawˬ haˇ yawˬ ha jahˇ jiˇ-euˬ meh.

²⁷Kʼoeˇ naˇ, Moˇseˬ-aˬ, aˬ yawꞈ-euˬ tsawˇ mawˬ Yeˬdaˬyoˇ-ahˇ bi gʼoꞈ leˇ-euˬmeh. Kʼoeˇ ngeh, aˬ yawꞈ jawˇ-eu miˇ kʼahˬ-ahˇ Yeˬdaˬyoˇ gʼoꞈ leˇ-euˬ meh.