Read Akha Doˆ-iˇ 19 Bible Online

Doˆ-iˇ 19 - Akha bible

Doˆ-iˇ 19

¹Iˇsaˬleˬlaˆ tsawˇ haˬ deuˬ-aˬ, Leˬpiˇdeˬ lehˇ kuˇ-eu jawˇ duˬ-ahˇ neh doˆ-iˇ-awˇ, Iˇjiˇtuˆ miˇ kʼahˬ-ahˇ neh aˬ yawꞈ maꞈ doˆ le-euˬ ba la smˇ siˬ tiˬ siˬ laꞈ kʼoeˇ uˇ leˇ-euˬ aˇ nah yaw beh nah-ahˇ, Siˇnaˆ bawˇ tsahˬ bawˇ dahˇ laꞈ kʼoeˇ oe keuˆ-euˬ meh. Aˬ yawꞈ maꞈ-aˬ, Siˇnaˆ gawˬ jawˬ dawˬ dahˬ-ahˇ sehˬ gʼawˆ gʼawˆ-awˇ naˬ-euˬ meh.

³Kʼoeˇ ngeh, Miˬyehˇ-ahˇ tahˬ puˬ leˇ-eu gʼaˇ duˬ, gawˬ jawˬ-ahˇ Moˇseˬ le daˆ-euˬ meh. Sahˬpaˬ Miˬyehˇ gawˬ jawˬ-ahˇ jawˇ-awˇ Moˇseˬ-ahˇ kuˇ-eu laꞈ kʼoeˇ, Yaꞈkoˆ-euˬ zaˬ deuˬ uˆ deuˬ pyeuꞈ-eu Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ bi ehˇ nehˬ-iˇ-euˬ meh.

⁴“Sahˬpaˬ Miˬyehˇ pyeuꞈ-eu ngaˇ-aˬ, Iˇsaˬleˬlaˆ tsawˇ haˬ deuˬ-ahˇ aˬ joˆ-ehˇ jahˇ nehˬ-awˇ, kʼaˬ dzeˇ dzeˇ ma tiˬ mawˇ, yawˬ ha-euˬ zaˬ-ahˇ aˬ dahˇ kʼoeˇ taˆ euˬ-awˇ zaw gʼeh-eu loꞈ-ehˇ, ngaˇ jawˇ-eu jawˇ duˬ heu tsahˇ-ahˇ, naw maꞈ-ahˇ ngaˇ sheuˬ doˆ laꞈ-euˬ naw maꞈ siˬ nya-eu meh.

⁵Nymˬ-mˇ naw maꞈ ngaˬ-euˬ ehˇ dawˬ naˇ haˬ-awˇ, ngaˬ-euˬ dawˬ ma saˇ jaˇ laꞈ kʼoeˇ ziꞈ naˇ, naw maꞈ ngaˬ-euˬ tsawˇ haˬ pyeuꞈ tehꞈ-a. Miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ, ngaˬ-euˬ tsawˇ haˬ deuˬ pyeuꞈ-eu ma.

⁶Ehˇ kʼawꞈ, naw maꞈ-aˬ, ngaˬ neh tseˇ doˆ-euˬ tsawˇ jeuˬ pyeuꞈ tehꞈ-a. Naw maꞈ-aˬ, ngaˇ tiˬ gʼaˬ-ahˇ tehꞈ-ehˇ damˬ nehˬ taˬ-euˬ ngaˬ-euˬ tsawˇ jeuˬ pyeuꞈ-awˇ, ngaˬ-euˬ gaˇ mˇ-eu piˇ ma deuˬ ya geuꞈ tehꞈ-a.”

⁷Kʼoeˇ naˇ, Moˇseˬ-aˬ, gawˬ jawˬ kʼoeˇ taˆ neh zaꞈ ka le-awˇ, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ kuˇ uiˬ-awˇ, Sahˬpaˬ Miˬyehˇ neh aˬ yawꞈ maꞈ-ahˇ kʼaˇ ehˇ nehˬ-euˬ jeˬ dawˬ tawˆ luꞈ, aˬ yawꞈ maꞈ-ahˇ dzawˇ nehˬ-euˬ meh.

⁸Kʼoeˇ ngeh, tsawˇ haˬ dawˬ tawˆ luꞈ, “Sahˬpaˬ Miˬyehˇ neh kʼaˇ ehˇ-euˬ loꞈ-ehˇ nga maꞈ mˇ ma” lehˇ ehˇ-awˇ, gaˇ kawˆ kʼoeˇ Sahˬpaˬ Miˬyehˇ-ahˇ Moˇseˬ paˇ tsaꞈ nehˬ leˇ-euˬ meh.

⁹Moˇseˬ-ahˇ Sahˬpaˬ Miˬyehˇ ehˇ nehˬ-eu, “Ngaˇ nawˬ-ahˇ dawˬ ngehˬ cawˬ gaˇ tsawˇ haˬ heu deuˬ ya gaˬ-awˇ, aˬ kaˇ naˇ, aˬ yawꞈ maꞈ nawˬ-ahˇ jah laˇ ni, zahˇ tsui ni gʼeh-eu mˬ dmˇ laꞈ kʼoeˇ nawˇ jawˇ gaˇ ngaˇ oe ma.” Tsawˇ haˬ kʼoeˇ deuˬ neh ehˇ-euˬ dawˬ kʼoeˇ dawˬ, Sahˬpaˬ Miˬyehˇ-ahˇ Moˇseˬ tsaꞈ nehˬ leˇ-euˬ meh.

¹⁰Kʼoeˇ ngeh, Moˇseˬ-ahˇ Sahˬpaˬ Miˬyehˇ ehˇ-eu, “Iˇsaˬleˬlaˆ tsawˇ haˬ deuˬ jawˇ gaˇ iˇ-awˇ, uˬ duˬ tahˬ-eu gʼaˇ duˬ, iˬ nah hawˇ-eu ni shawˬ nah laꞈ kʼoeˇ yawˬ ha-euˬ gʼawˇ mawˇ shawˇ-awˬ lehˇ ehˇ nehˬ-awˬ. Yawˬ ha-euˬ dm gʼaˬ dm lmˇ deuˬ aˬ yawꞈ maꞈ ya lehˬ tsiˬ shawˇ meh.

¹¹Saˇ pehˬ nah maˬ keuˆ laˇ miˇ naˆ-ehˇ, aˬ yawꞈ maꞈ ya lehˬ hmˬ dah meh. Aˬ jeˬ miˇ neh ehˇ naˇ, saˇ pehˬ nah tsawˇ haˬ dawˬ tawˆ luꞈ mawˇ nya gaˇ, Siˇnaˆ gawˬ jawˬ kʼoeˇ taˆ ngaˇ zaꞈ le ma.

¹²Tsawˇ haˬ maˬ bi le tsehˆ-eu gʼaˇ duˬ, gawˬ jawˬ heu siˬ jawˬ jawˬ-ehˇ kmˇ tuiˆ mˇ jawˬ taˬ-awˇ, gawˬ jawˬ-ahˇ tiˬ gʼaˬ-iˬ maˬ ya le daˆ-eu uˬ taꞈ, dawˬ peh tehꞈ-ehˇ kʼawꞈ maˬ ya le peh-a lehˇ aˬ yawꞈ maꞈ-ahˇ ehˇ nehˬ-awˬ. Tsawˇ haˬ tiˬ gʼaˬ na, gawˬ jawˬ-ahˇ laˆ ciˆ leˇ naˇ, ya shiˇ tehꞈ-a.

¹³Tsawˇ haˬ kʼoeˇ gʼaˬ-ahˇ tsawˇ haˬ tiˬ gʼaˬ-iˬ maˬ toeˬ ciˆ ni, kʼaˬ lo biˬ-awˇ maˬ ehˇ, kaˆ beuˆ-awˇ maˬ ehˇ, ya sehꞈ tehꞈ-a. Heu-aˬ, tsawˇ haˬ zaˬ-ahˇ maˬ ehˇ, dzeˬ zaˬ-ahˇ maˬ ehˇ, taꞈ leˇ-eu dawˬ pyeuꞈ-awˇ, kʼoeˇ loꞈ-ehˇ kʼaˇ mˇ-eu deuˬ ya shiˇ tehꞈ-a. Ehˇ kʼawꞈ, daˇ heh baw laˇ ngeh, gawˬ jawˬ kʼoeˇ taˆ aˬ yawꞈ maꞈ ya daˆ leˇ tehꞈ-a.”

¹⁴Kʼoeˇ naˇ, Moˇseˬ gawˬ jawˬ kʼoeˇ taˆ neh yaꞈ ka le-awˇ, uˬ duˬ tahˬ-eu gʼaˇ duˬ lehˬ hmˬ dah-awˬ lehˇ Iˇsaˬleˬlaˆ tsawˇ haˬ deuˬ-ahˇ ehˇ nehˬ-euˬ meh. Kʼoeˇ ngeh, tsawˇ haˬ kʼoeˇ deuˬ yawˬ ha-euˬ dm gʼaˬ dm lmˇ deuˬ lehˬ tsiˬ-euˬ meh.

¹⁵“Saˇ pehˬ nah keuˆ laˇ ngeh, yawˬ gʼaˬ na luꞈ lehˬ hmˬ dah jiˇ-awˇ, heu yaw kaˬ-ahˇ, zaˬ miˬ zaˬ hawˇ-eu kʼaˬ dzeˇ zaˬ yaw kaˬ taˬ yuꞈ taꞈ” lehˇ aˬ yawꞈ maꞈ-ahˇ Moˇseˬ ehˇ nehˬ-euˬ meh.

¹⁶Smˬ nah tiˬ nah uˬ shawˬ paw keuˆ le ngeh, mˬ jeˬ jeˬ-awˇ, mˬ myawꞈ myawꞈ-euˬ meh. Zahˇ tsui ni gʼeh-eu mˬ dmˇ gawˬ jawˬ kʼoeˇ jawˬ kʼoeˇ taˆ jaˆ le-awˇ, kʼaˆ dui dui-eu daˇ heh baw-eu teˇ saˇ mahˇ doˆ laˇ-euˬ meh. Kʼoeˇ ngeh, sehˬ gʼawˆ laꞈ kʼoeˇ jawˇ luꞈ-eu Iˇsaˬleˬlaˆ tsawˇ haˬ dawˬ tawˆ luꞈ guˆ dui dui-awˇ, yaw dzuˬ dzuˬ-euˬ meh.

¹⁷Miˬyehˇ-ahˇ tahˬ puˬ leˇ-eu gʼaˇ duˬ, Moˇseˬ aˬ yawꞈ maꞈ-ahˇ sheuˬ doˆ gʼeh-awˇ, gawˬ jawˬ dawˬ dahˬ-ahˇ aˬ yawꞈ maꞈ yawꞈ luꞈ-eu meh.

¹⁸Siˇnaˆ gawˬ jawˬ tiˬ jawˬ jawˬ lah ni, miˬ dzaˬ uˬ kʼoeˬ uꞈ uꞈ-ehˇ jaˆ-eu meh. Aˬ jeˬ miˇ neh ehˇ naˇ, Sahˬpaˬ Miˬyehˇ-aˬ, miˬ dzaˬ laꞈ kʼoeˇ gawˬ jawˬ kʼoeˇ jawˬ kʼoeˇ taˆ zaꞈ le-euˬ meh. Miˬ dzaˬ uˬ kʼoeˬ kʼoeˇ-aˬ, miˬ dzaˬ tsawˬ bu-ahˇ doˆ-eu miˬ dzaˬ uˬ kʼoeˬ loꞈ-ehˇ, kʼoeˇ taˆ paw le daˆ-awˇ, gawˬ jawˬ jawˬ lah-ehˇ, miˇ luˆ luˆ-eu meh.

¹⁹Daˇ heh baw-eu teˇ saˇ kʼoeˇ tiˬ poˆ saˇ-iˬ tiˬ poˆ kʼaˆ dzehˬ laˇ-euˬ meh. Moˇseˬ dawˬ ngehˬ ngeh, mˬ jeˬ jeˬ-eu laꞈ kʼoeˇ, Miˬyehˇ aˬ yawꞈ-ahˇ dawˬ ngehˬ cawˬ-euˬ meh.

²⁰Sahˬpaˬ Miˬyehˇ-aˬ, Siˇnaˆ gawˬ jawˬ uˬ du zaꞈ le-awˇ, Moˇseˬ-ahˇ gawˬ jawˬ uˬ du kuˇ daˆ-euˬ meh. Kʼoeˇ ngeh, Moˇseˬ gawˬ jawˬ uˬ du daˆ leˇ-euˬ meh.

²¹Moˇseˬ-ahˇ Sahˬpaˬ Miˬyehˇ ehˇ nehˬ-eu, “Nawˇ zaꞈ ka-iˇ-awˇ, ngaˬ-ahˇ haw laˇ-eu gʼaˇ duˬ, kmˇ tuiˆ maˬ ya tsehˆ laˇ-a lehˇ Iˇsaˬleˬlaˆ tsawˇ haˬ deuˬ-ahˇ ehˇ nehˬ-iˇ-awˬ. Aˬ yawꞈ maꞈ kmˇ tuiˆ laˇ tsehˆ te lehˇ ngeuˇ naˇ, tsawˇ haˬ gʼawˬ mya ni ya shiˇ tehꞈ-a.

²²Piˇ ma deuˬ kʼawꞈ, ngaˬ-euˬ dawˬ peh laˇ ngeh, aˬ yawꞈ maꞈ-euˬ gʼawˇ mawˇ shawˇ jehˆ ni ya bi jaˆ tehꞈ-a. Kʼoeˇ loꞈ-ehˇ maˬ ngeuˇ naˇ, aˬ yawꞈ maꞈ-ahˇ ngaˇ kʼehˬ nehˬ kʼaˆ nehˬ ma.”

²³Sahˬpaˬ Miˬyehˇ-ahˇ Moˇseˬ ehˇ nehˬ-eu, “Iˇsaˬleˬlaˆ tsawˇ haˬ deuˬ heu gaˇ maˬ laˇ daˆ nya-a. Aˬ jeˬ miˇ neh ehˇ naˇ, gawˬ jawˬ heu jawˬ-aˬ, muiˬ-eu shawˇ-eu gawˬ jawˬ pyeuꞈ-awˇ, gawˬ jawˬ heu-euˬ jawˬ jawˬ-ehˇ kmˇ tuiˆ ya tuiˆ taˬ meh lehˇ nawˬ neh dawˬ biꞈ taˬ-euˬ jaˆ-eu meh.”

²⁴Sahˬpaˬ Miˬyehˇ ehˇ-eu, “Nawˇ zaꞈ ka-iˇ-awˇ, Aˬloˬ-ahˇ sheuˬ daˆ laꞈ-awˬ. Ehˇ kʼawꞈ, piˇ ma deuˬ hawˇ-eu tsawˇ haˬ kʼoeˇ deuˬ-aˬ, ngaˇ jawˇ gaˇ laˇ-eu gʼaˇ duˬ, kmˇ tuiˆ maˬ ya laˇ dzeuˇ-a. Laˇ dzeuˇ naˇ, aˬ yawꞈ maꞈ-ahˇ ngaˇ kʼehˬ ma.”

²⁵Kʼoeˇ naˇ, Iˇsaˬleˬlaˆ tsawˇ haˬ deuˬ jawˇ gaˇ Moˇseˬ zaꞈ ka-iˇ-awˇ, Sahˬpaˬ Miˬyehˇ neh aˬ yawꞈ-ahˇ kʼaˇ ehˇ nehˬ-euˬ jeˬ, aˬ yawꞈ maꞈ-ahˇ dzawˇ nehˬ-euˬ meh.