Read Akha Doˆ-iˇ 21 Bible Online

Doˆ-iˇ 21 - Akha bible

Doˆ-iˇ 21

¹“Zahˇ sahˇ kʼoꞈ heu deuˬ, Iˇsaˬleˬlaˆ tsawˇ haˬ deuˬ-ahˇ biꞈ nehˬ-awˬ.

²Heˬbyehˇ tsawˇ haˬ zaˬ kʼaˆ tiˬ gʼaˬ nawˇ zeuˇ naˇ, zaˬ kʼaˆ kʼoeˇ gʼaˬ nawˬ-euˬ gʼaˇ duˬ gaˇ koꞈ kʼoꞈ ya mˇ tehꞈ-a. Shiꞈ kʼoꞈ keuˆ laˇ naˇ, zaˬ kʼaˆ kʼoeˇ gʼaˬ-ahˇ nawˇ tiˬ jeˬ-iˬ maˬ shaˇ ni, yawꞈ ngehꞈ-ehˇ ya pyehˬ kʼoꞈ nehˬ meh.

³Aˬ yawꞈ nawˬ-euˬ zaˬ kʼaˆ geuꞈ le ngeh, miˬ zaˬ maˬ baw naˇ, miˬ zaˬ maˬ sheuˬ ni ya bi gʼoꞈ-iˇ tehꞈ-a. Ehˇ kʼawꞈ, aˬ yawꞈ nawˬ-eu zaˬ kʼaˆ geuꞈ le ngeh, miˬ zaˬ baw naˇ, miˬ zaˬ sheuˬ-awˇ ya bi gʼoꞈ-iˇ tehꞈ-a.

⁴Yaw sahˇ gʼaˬ aˬ yawꞈ-ahˇ cawˬ shaˇ baw nehˬ-awˇ, aˬ buˇ aˬ li jawˇ le naˇ, aˬ yawꞈ-euˬ miˬ zaˬ gʼaˬ hawˇ-eu zaˬ deuˬ-aˬ, yaw sahˇ gʼaˬ-ahˇ taꞈ-awˇ, aˬ yawꞈ tiˬ gʼaˬ tehꞈ-ehˇ ya gʼoꞈ-iˇ tehꞈ-a.

⁵Ehˇ kʼawꞈ, zaˬ kʼaˆ kʼoeˇ gʼaˬ aˬ yawꞈ-euˬ yaw sahˇ gʼaˬ hawˇ-eu, aˬ yawꞈ-euˬ miˬ sawˇ zaˬ-ahˇ maˬ byehˇ coeˇ-eu miˇ neh, maˬ gʼoꞈ-iˇ mawꞈ naˇ,

⁶yaw sahˇ gʼaˬ, zaˬ kʼaˆ kʼoeˇ gʼaˬ-ahˇ uˬ duˬ tahˬ-eu jawˇ duˬ-ahˇ ya sheuˬ gʼeh meh. Kʼoeˇ gaˇ, yaw sahˇ gʼaˬ gʼoˆ kʼehˬ mehˬ shi bi yawꞈ-awˇ, zaˬ kʼaˆ kʼoeˇ gʼaˬ-ahˇ naˬ bawˇ naˬ tahˇ ya tahˇ nehˬ meh. Kʼoeˇ naˇ, zaˬ kʼaˆ kʼoeˇ gʼaˬ maˬ shiˇ tiˬ ziˇ aˬ yawꞈ-euˬ zaˬ kʼaˆ ya geuꞈ meh.

⁷“Tsawˇ haˬ tiˬ gʼaˬ na, yawˬ ha-euˬ aˬ buˇ-ahˇ, zaˬ kʼaˆ bi geuꞈ-eu gʼaˇ duˬ ahˬ dzaˬ naˇ, zaˬ miˬ zaˬ zaˬ kʼaˆ kʼoeˇ gʼaˬ-ahˇ, kʼaˬ dzeˇ zaˬ zaˬ kʼaˆ tiˬ gʼaˬ-ahˇ pyehˬ nehˬ-eu loꞈ-ehˇ maˬ ya pyehˬ nehˬ-a.

⁸Zaˬ miˬ zaˬ kʼoeˇ gʼaˬ-ahˇ, aˬ yawꞈ-ahˇ sheuˬ mawꞈ-eu tsawˇ haˬ tiˬ gʼaˬ na-ahˇ ahˬ nehˬ-awˇ, tsawˇ haˬ kʼoeˇ gʼaˬ aˬ yawꞈ-ahˇ maˬ geuꞈ mawꞈ ni pyeuꞈ-iˇ naˇ, aˬ da gʼaˬ paˇ ya zeuˇ kʼoꞈ meh. Yaw sahˇ gʼaˬ zaˬ miˬ zaˬ kʼoeˇ gʼaˬ-ahˇ, boeˇ miˬ siˬ kʼaˬ deuˬ-ahˇ maˬ ya ahˬ nehˬ-a. Aˬ jeˬ miˇ neh ehˇ naˇ, zaˬ miˬ zaˬ kʼoeˇ gʼaˬ-ahˇ aˬ yawꞈ yehˬ baw sehˇ lu-ehˇ gʼeh gʼaˬ-euˬ meh.

⁹Tsawˇ haˬ tiˬ gʼaˬ na, yawˬ ha-euˬ aˬ li gʼaˇ duˬ, zaˬ miˬ zaˬ zaˬ kʼaˆ tiˬ gʼaˬ na zeuˇ nehˬ naˇ, zaˬ kʼaˆ kʼoeˇ gʼaˬ-ahˇ, yawˬ ha-euˬ aˬ buˇ loꞈ-ehˇ ya sawˇ-eu meh.

¹⁰Tsawˇ haˬ tiˬ gʼaˬ na ma nyiˇ sheuˬ naˇ, ma huiˬ gʼaˬ-ahˇ kʼawꞈ, dzeuˇ laˇ ngeh kʼaˇ mˇ cu nehˬ-euˬ loꞈ-ehˇ, dzaˬ dzaˬ dawˇ dawˇ hawˇ-eu dm gʼaˬ dm lmˇ tiˬ byah ni ya caw ba-eu uˬ taꞈ, miˬ zaˬ yo zaˬ-ahˇ taꞈ-eu gaˇ dawˬ tawˆ luꞈ ya mˇ byah nehˬ-eu meh.

¹¹Gaˇ heu deuˬ aˬ yawꞈ maˬ mˇ byah nehˬ naˇ, ma huiˬ gʼaˬ-ahˇ aˇ poeˬ maˬ shaˇ kʼoꞈ ni, yawꞈ ngehꞈ-ehˇ ya pyehˬ kʼoꞈ nehˬ meh.

¹²“Tsawˇ haˬ aˬ geu gʼaˬ maˬ kaˬ, tsawˇ haˬ tiˬ gʼaˬ na-ahˇ laˆ tahˬ-awˇ bi shiˇ naˇ, aˬ yawꞈ-ahˇ ya sehꞈ meh.

¹³Ehˇ kʼawꞈ, diˇ daˬ-ehˇ sehꞈ-euˬ jeˬ maˬ ngeuˇ-ehˇ, maˬ yehꞈ maˬ ca-ehˇ laˆ tahˬ-awˇ bi shiˇ-euˬ jeˬ pyeuꞈ naˇ, naw maꞈ gʼaˇ duˬ ngaˬ neh tsaˬ tsoˆ taˬ-euˬ jawˇ duˬ-ahˇ aˬ yawꞈ cehˆ-awˇ, shiˇ-eu jeˬ-ahˇ cehˆ buˬ nya meh.

¹⁴Ehˇ kʼawꞈ, tsawˇ haˬ tiˬ gʼaˬ na nui ma pehˇ laˇ-awˇ, yawˬ gʼaˬ yawˬ-ahˇ sehꞈ naˇ, ngaˬ-euˬ lawˇ duˬ-ahˇ aˬ yawꞈ cehˆ-iˇ-awˇ cehˆ buˬ-euˬ kʼawꞈ, aˬ yawꞈ-ahˇ gʼeu doˆ-awˇ ya sehꞈ tehꞈ-a.

¹⁵“Yawˬ ha-euˬ aˬ da aˬ ma-ahˇ laˆ tahˬ laˆ naˇ-eu tsawˇ haˬ aˬ geu gʼaˬ maˬ kaˬ, sehꞈ nehˬ gaˇ ya daˬ tehꞈ-a.

¹⁶“Ahˬ dzaˬ-eu gʼaˇ duˬ maˬ ehˇ, yawˬ ha-euˬ zaˬ kʼaˆ bi geuꞈ-eu gʼaˇ duˬ maˬ ehˇ, tsawˇ haˬ-ahˇ kʼoeˬ-eu tsawˇ haˬ aˬ geu gʼaˬ maˬ kaˬ, sehꞈ nehˬ gaˇ ya daˬ tehꞈ-a.

¹⁷“Yawˬ ha-euˬ aˬ ma aˬ da-ahˇ yaˬ kʼehˇ yaˬ-eu tsawˇ haˬ aˬ geu gʼaˬ maˬ kaˬ, sehꞈ nehˬ gaˇ ya daˬ tehꞈ-a.

¹⁸“Tsawˇ haˬ nyiˬ gʼaˬ yaw kaˬ dawꞈ-eu laꞈ kʼoeˇ, tiˬ gʼaˬ neh yawˬ gʼaˬ yawˬ-ahˇ kʼaˬ lo neh tuˆ-awˇ maˬ ehˇ, aˬ laꞈ neh teˇ-awˇ maˬ ehˇ, laˆ naˇ nehˬ-euˬ kʼawꞈ, shiˇ gaˇ maˬ keuˆ naˇ, laˆ naˇ nehˬ-euˬ gʼaˬ-ahˇ tiˬ jeˬ-iˬ maˬ ya jahˇ kʼoꞈ nehˬ-a. Bi laˆ naˇ-euˬ gʼaˬ yuꞈ zaˇ-ahˇ ya yuꞈ-awˇ,

¹⁹gʼawˬ myahˇ maˬ gʼeh-ehˇ, gawˬ yoeˬ toˆ-awˇ gaˇ ma cah nya laˇ naˇ, aˬ yawꞈ-ahˇ laˆ tahˬ laˆ naˇ nehˬ-eu gʼaˬ, aˬ yawꞈ gaˇ maˬ mˇ nya-ehˇ yuꞈ luꞈ ngeh sm-iˇ-euˬ gʼaˬ gaˇ aˇ poeˬ ya lawˬ nehˬ-awˇ, aˬ yawꞈ jawˇ saˇ doˆ laˇ ngeh keuˆ ni jaˆ gʼaˬ ya laˆ saˆ nehˬ meh.

²⁰“Tsawˇ haˬ tiˬ gʼaˬ na, yawˬ ha-euˬ zaˬ miˬ zaˬ zaˬ kʼaˆ-ahˇ maˬ ehˇ, kʼaˬ dzeˇ zaˬ zaˬ kʼaˆ-ahˇ maˬ ehˇ, daˇ kawˬ neh diˬ-awˇ, maˬ bi luˆ-iˇ ni, aˬ yawꞈ tsahˇ-ahˇ neh diˬ sehꞈ naˇ, kʼehˬ nehˬ kʼaˆ nehˬ-eu jeˬ-ahˇ ya daˬ tehꞈ-a.

²¹Ehˇ kʼawꞈ, zaˬ kʼaˆ kʼoeˇ gʼaˬ, nyiˬ nah smˬ nah keuˆ ni maˬ shiˇ tsehˆ-ehˇ dehꞈ naˇ, yaw sahˇ gʼaˬ kʼehˬ nehˬ kʼaˆ nehˬ-eu jeˬ-ahˇ maˬ ya daˬ-a. Aˬ jeˬ miˇ neh ehˇ naˇ, aˬ yawꞈ-euˬ zaˬ kʼaˆ tiˬ gʼaˬ shiˇ teˬ-euˬ tehꞈ-ehˇ kʼawꞈ, aˬ yawꞈ-ahˇ kʼehˬ nehˬ kʼaˆ nehˬ-euˬ gaˇ duˇ-eu meh.

²²“Tsawˇ haˬ tiˬ deuˬ na dawꞈ ngeh ceh ngeh, aˬ nyiˇ pi luꞈ-eu zaˬ miˬ zaˬ tiˬ gʼaˬ na-ahˇ laˆ tahˬ-eu laꞈ kʼoeˇ, zaˬ dzeh-eu kʼawꞈ, zaˬ mi zaˬ kʼoeˇ gʼaˬ-ahˇ nui gaˇ laˆ zaw-euˬ maˬ jaˆ naˇ, laˆ tahˬ laˆ naˇ nehˬ-euˬ tsawˇ haˬ kʼoeˇ gʼaˬ, zaˬ mi zaˬ kʼoeˇ gʼaˬ-euˬ kʼaˬ dzeˇ zaˬ gʼaˬ kʼaˇ shaˇ-eu myaˆ ni, yaˇ kʼaˬ daˇ-eu deuˬ neh guiˇ oꞈ tiꞈ nehꞈ-eu loꞈ-ehˇ ya doˆ meh.

²³Ehˇ kʼawꞈ, zaˬ miˬ zaˬ kʼoeˇ gʼaˬ-euˬ gʼawˇ mawˇ-ahˇ laˆ zaw-euˬ jaˆ naˇ, saꞈ laˇ dah zaˇ saꞈ laˇ,

²⁴myaˆ nuiˆ dah zaˇ myaˆ nuiˆ, seuˬ dah zaˇ seuˬ, aˬ laꞈ dah zaˇ aˬ laꞈ, aˬ kuiˇ dah zaˇ aˬ kuiˇ,

²⁵miˬ dzaˬ lahˇ-euˬ dah zaˇ miˬ dzaˬ lahˇ-eu jeˬ, maˇ kʼehˬ maˇ naˇ dah zaˇ maˇ kʼehˬ maˇ naˇ, puˬ laˇ lu laˇ-euˬ dah zaˇ puˬ laˇ lu laˇ-eu jeˬ, laˆ tahˬ laˆ naˇ nehˬ-euˬ gʼaˬ ya biꞈ tsoeˬ nehˬ meh.

²⁶“Tsawˇ haˬ tiˬ gʼaˬ na, yawˬ ha-euˬ zaˬ miˬ zaˬ zaˬ kʼaˆ-ahˇ maˬ ehˇ, kʼaˬ dzeˇ zaˬ zaˬ kʼaˆ-ahˇ maˬ ehˇ, myaˆ nuiˆ diˬ cawˆ nehˬ naˇ, myaˆ nuiˆ laˆ cawˆ nehˬ-euˬ aˇ poeˬ zaˬ kʼaˆ kʼoeˇ gʼaˬ-ahˇ ya pyehˬ nehˬ meh.

²⁷Seuˬ diˬ juˆ nehˬ naˇ, seuˬ laˆ juˆ-euˬ aˇ poeˬ aˬ yawꞈ-ahˇ ya pyehˬ nehˬ meh.

²⁸“Mawˇ neˇ mawˇ gaw tiˬ mawˇ tsawˇ haˬ tiˬ gʼaˬ-ahˇ tahˬ sehꞈ naˇ, mawˇ neˇ kʼoeˇ mawˇ-ahˇ kʼaˬ lo neh ya biˬ sehꞈ-awˇ, mawˇ neˇ kʼoeˇ mawˇ-euˬ shaˬ jiˇ maˬ ya dzaˬ-a. Mawˇ neˇ-euˬ yaw sahˇ gʼaˬ-ahˇ maˬ ya kʼehˬ nehˬ-a.

²⁹Ehˇ kʼawꞈ, mawˇ neˇ kʼoeˇ mawˇ dzeuˇ laˇ ngeh tsawˇ haˬ-ahˇ tahˬ-euˬ jaˆ-awˇ, yaw sahˇ gʼaˬ-ahˇ ehˇ nehˬ-euˬ kʼawꞈ, maˬ paꞈ ni pyehˬ taˬ-awˇ, tsawˇ haˬ-ahˇ paˇ tahˬ sehꞈ-euˬ jeˬ pyeuꞈ naˇ, mawˇ neˇ kʼoeˇ mawˇ-ahˇ kʼaˬ lo neh biˬ sehꞈ-awˇ, yaw sahˇ gʼaˬ kʼawꞈ, sehꞈ nehˬ gaˇ ya daˬ tehꞈ-a.

³⁰Ehˇ kʼawꞈ, yaw sahˇ gʼaˬ maˬ shiˇ mawꞈ-eu miˇ neh, guiˇ oꞈ doˆ naˇ, kʼaˇ shaˇ-eu myaˆ ni ya doˆ tehꞈ-a.

³¹Mawˇ neˇ kʼoeˇ mawˇ aˬ buˇ aˬ li tiˬ gʼaˬ na-ahˇ tahˬ sehꞈ-euˬ kʼawꞈ, kʼoeˇ loꞈ-ehˇ ya jahˇ tehꞈ-a.

³²Zaˬ miˬ zaˬ zaˬ kʼaˆ tiˬ gʼaˬ na-ahˇ maˬ ehˇ, kʼaˬ dzeˇ zaˬ zaˬ kʼaˆ tiˬ gʼaˬ na-ahˇ maˬ ehˇ, mawˇ neˇ kʼoeˇ mawˇ neh tahˬ sehꞈ naˇ, mawˇ neˇ yaw sahˇ gʼaˬ zaˬ kʼaˆ-euˬ yaw sahˇ gʼaˬ-ahˇ, pyuˇ maˇ byaˆ smˬ tseˇ byaˆ ya biꞈ-awˇ, mawˇ neˇ kʼoeˇ mawˇ-ahˇ kʼaˬ lo neh ya biˬ sehꞈ tehꞈ-a.

³³“Tsawˇ haˬ tiˬ gʼaˬ na, duˬ kʼahˬ-euˬ kʼawˬ pymˬ pah taˬ-awˇ bi jaˆ-euˬ miˇ neh maˬ ehˇ, duˬ kʼahˬ kʼahˬ-awˇ maˬ dehˬ kaˬ taˬ ni bi jaˆ-euˬ miˇ neh maˬ ehˇ, mawˇ neˇ maˬ ngeuˇ naˇ mahˬ tahˬ laˆ tiˬ mawˇ na duˬ kʼahˬ-ahˇ ga ahˇ naˇ,

³⁴ya tsoeˬ meh. Shiˇ-euˬ jeˬ zaˬ kʼoeˇ mawˇ aˬ yawꞈ ya geuꞈ-awˇ, jeˬ zaˬ yaw sahˇ gʼaˬ-ahˇ pyuˇ ya biꞈ meh.

³⁵Tsawˇ haˬ tiˬ gʼaˬ-euˬ mawˇ neˇ mawˇ gaw neh, yawˬ gʼaˬ yawˬ-euˬ mawˇ neˇ mawˇ gaw tahˬ sehꞈ naˇ, yaw dehꞈ mawˇ-ahˇ ahˬ-awˇ, za-euˬ aˇ poeˬ aˬ yawꞈ nyaꞈ tiˬ kawˆ loꞈ-ehˇ ya biˇ geuꞈ meh. Shiˇ-euˬ mawˇ kʼawꞈ pyaˆ-awˇ, tiˬ kawˆ loꞈ-ehˇ ya biˇ dzaˬ meh.

³⁶Ehˇ kʼawꞈ, mawˇ neˇ kʼoeˇ mawˇ-aˬ, dzeuˇ laˇ ngeh aˬ cawˬ-ahˇ tahˬ haw-euˬ mawˇ neˇ yaw gʼeh tiˬ mawˇ pyeuꞈ-awˇ, yaw sahˇ gʼaˬ maˬ paꞈ ni pyehˬ taˬ-awˇ bi tahˬ sehꞈ-euˬ jeˬ pyeuꞈ naˇ, aˬ yawꞈ-euˬ mawˇ neˇ mawˇ gaw kʼoeˇ mawˇ aˬ cawˬ-ahˇ ya tsahˇ nehˬ-awˇ, aˬ cawˬ-euˬ mawˇ neˇ yaw shiˇ kʼoeˇ mawˇ aˬ yawꞈ ya geuꞈ meh.