Read Akha Doˆ-iˇ 26 Bible Online

Doˆ-iˇ 26 - Akha bible

Doˆ-iˇ 26

¹“Nyoeˇ leuˬ leuˬ-eu, neˇ naˆ naˆ-eu hawˇ-eu neˇ tseuˆ ni gʼeh-eu saˬ kahˇ deuˬ neh zaꞈ taˬ-awˇ, Jeˬluˇbeˬ aˇ baˇ aˇ boꞈ boꞈ taˬ-euˬ shawˇ jehˆ ni gʼeh-eu saˬ paˇ tseˇ dzeh yuˇ-awˇ, Ngaˇ jawˇ-eu gʼaˇ duˬ, muiˬ-eu shawˇ-eu sehˬ gʼawˆ tsoˆ-awˬ.

²Saˬ paˇ kʼoeˇ yawˬ dzeh na luꞈ, yaw mahˇ paw nyiˬ tseˇ yehꞈ caˆ, yaw jeˇ paw oeˬ caˆ byah-awˇ, aˬ yawꞈ tiˬ shehˆ tehꞈ-ehˇ ya bi pyeuꞈ meh.

³Saˬ paˇ kʼoeˇ ngaˬ dzeh-euˬ tiˬ gaˇ guꞈ tsaꞈ-awˇ, nyiˬ kahˇ tehꞈ-ehˇ guꞈ pyeuꞈ-awˬ.

⁴Guꞈ tsaꞈ taˬ-euˬ saˬ paˇ kʼoeˇ nyiˬ kahˇ luꞈ-euˬ gaˇ dzeˇ dzeˇ saˬ paw jaˆ-eu saˬ paˇ paˇ dzeh-euˬ mehˬ dzaˬ caw caw-ehˇ, nyoeˇ leuˬ leuˬ-eu saˬ kahˇ neh, laꞈ ma guꞈ tsoꞈ-awˬ.

⁵Yaw beh kahˇ-euˬ saˬ paˇ paˇ dzeh yaw beh dzeh mehˬ dzaˬ caw caw-ehˇ, laꞈ ma ngaˬ tseˇ ma guꞈ tsoꞈ-awˇ, laꞈ ma kʼoeˇ deuˬ nehˬ-ehˇ dawˇ ni, nyiˬ kahˇ tiˬ kahˇ-euˬ aˇ saˬ saˬ-euˬ saˬ paˇ paˇ dzeh-euˬ mehˬ dzaˬ caw caw-ehˇ, laꞈ ma ngaˬ tseˇ ma paˇ guꞈ tsoꞈ-awˬ.

⁶Saˬ paˇ paˇ dzeh guꞈ tsaꞈ taˬ-euˬ saˬ paˇ kʼoeˇ nyiˬ kahˇ tiˬ gaˇ gʼeu tawꞈ-eu gʼaˇ duˬ, shuiˇ kuˆ seuˬ ngaˬ tseˇ zeuˬ jahˇ-awˬ.

⁷“Sehˬ gʼawˆ-ahˇ joe kaˬ-eu gʼaˇ duˬ, ciꞈ myehꞈ caꞈ hm neh saˬ paˇ tseˇ tiꞈ dzeh zaꞈ-awˬ.

⁸Saˬ paˇ kʼoeˇ yawˬ dzeh na luꞈ, yaw mahˇ paw smˬ tseˇ caˆ, yaw jeˇ paw oeˬ caˆ byah-awˇ, aˬ yawꞈ tiˬ shehˆ tehꞈ-ehˇ ya bi pyeuꞈ meh.

⁹Saˬ paˇ kʼoeˇ deuˬ-ahˇ, ngaˬ dzeh tiˬ gaˇ, koꞈ dzeh tiˬ gaˇ lehˇ guꞈ tsaꞈ-awˇ, nyiˬ kahˇ tehꞈ-ehˇ guꞈ pyeuꞈ-awˬ. Koꞈ dzeh tiˬ dzeh-ahˇ, sehˬ gʼawˆ pyawˬ ma paw byaˆ dmˇ kʼoꞈ taˬ-awˬ.

¹⁰Saˬ paˇ paˇ dzeh kʼoeˇ deuˬ guꞈ tsoꞈ taˬ-euˬ yaw beh kahˇ-euˬ gaˇ dzeˇ dzeˇ saˬ paw jaˆ-eu saˬ paˇ paˇ dzeh-euˬ mehˬ dzaˬ caw caw-ehˇ, laꞈ ma ngaˬ tseˇ ma guꞈ tsoꞈ-awˇ, yawˬ kahˇ yawˬ-euˬ gaˇ dzeˇ dzeˇ saˬ dzeh-euˬ mehˬ dzaˬ caw caw-ehˇ kʼawꞈ, laꞈ ma ngaˬ tseˇ ma guꞈ tsoꞈ-awˬ.

¹¹Guiˬ shuiˇ kuˆ seuˬ ngaˬ tseˇ hmˬ jahˇ-awˇ, sehˬ gʼawˆ-ahˇ joe kaˬ-eu gʼaˇ duˬ, saˬ paˇ kʼoeˇ nyiˬ kahˇ tiˬ gaˇ gʼeu tawꞈ-awˬ.

¹²Dzehˬ laˇ-euˬ saˬ paˇ tiˬ paˆ-ahˇ, sehˬ gʼawˆ-euˬ naˇ kʼah paw bi ga gʼeu-awˬ.

¹³Pyawˬ zaˬ nyiˬ pyawˬ-ahˇ, tiˬ pyawˬ-euˬ tiˬ caˆ dzehˬ laˇ taˬ-eu saˬ paˇ mehˬ dzaˬ kʼoeˇ, sehˬ gʼawˆ-euˬ pyawˬ zaˬ-ahˇ dehˬ kaˬ-eu gʼaˇ duˬ bi ga gʼeu-awˬ.

¹⁴“Sehˬ gʼawˆ-ahˇ dehˬ kaˬ-eu gʼaˇ duˬ, naˬ yawˬ neˇ taˬ-euˬ yawˇ baˆ kʼoˆ hawˇ-eu, kʼoeˇ taˆ tiˬ tiˆ paˇ dehˬ kaˬ-eu gʼaˇ duˬ, shawˇ jehˆ ni gʼeh-eu shaˬ kʼoˆ guꞈ-awˬ.

¹⁵“Sehˬ gʼawˆ-ahˇ, cawˬ tuˇ jeˬ-ehˇ kaˇ pyawˇ taw-eu gʼaˇ duˬ, aˬ kaˬ shaˇ daˇ kawˬ neh teˇ byaꞈ taꞈ-awˬ.

¹⁶Taꞈ taˬ-euˬ daˇ kawˬ teˇ byaꞈ aˬ yawꞈ byaꞈ yawˬ yaw mahˇ paw tseˇ caˆ, yaw jeˇ paw tiˬ caˆ tiˬ toˇ bi byah-awˬ.

¹⁷Teˇ byaꞈ kʼoeˇ tiˬ byaꞈ tiˇ byaꞈ tiˬ gaˇ taw tsaꞈ nya-eu gʼaˇ duˬ, aˬ kuiˇ nyiˬ kahˬ jahˇ tsoꞈ-awˬ. Teˇ byaꞈ dawˬ tawˆ luꞈ kʼoeˇ loꞈ-ehˇ aˬ kuiˇ ya bi tsoꞈ meh.

¹⁸Sehˬ gʼawˆ laꞈ oˆ paw pyawˬ-ahˇ taw-eu gʼaˇ duˬ, teˇ byaꞈ nyiˬ tseˇ byaꞈ lehˬ hmˬ-awˬ.

¹⁹Teˇ byaꞈ aˬ yawꞈ byaꞈ yawꞈ-euˬ aˬ kuiˇ cawˬ ahˇ-eu gʼaˇ duˬ, kaˇ pyawˇ dawˬ pehˬ-ahˇ pyuˇ laꞈ duꞈ nyiˬ hmˬ ya jahˇ tsoꞈ meh.

²⁰Sehˬ gʼawˆ laꞈ taˆ paw pyawˬ-ahˇ taw-eu gʼaˇ duˬ, teˇ byaꞈ nyiˬ tseˇ byaꞈ lehˬ hmˬ-awˬ.

²¹Teˇ byaꞈ aˬ yawꞈ byaꞈ yawꞈ aˬ kuiˇ cawˬ ahˇ-eu gʼaˇ duˬ, kaˇ pyawˇ dawˬ pehˬ-ahˇ pyuˇ laꞈ duꞈ nyiˬ duꞈ jahˇ tsoꞈ-awˇ, pyuˇ laꞈ duꞈ dawˬ tawˆ luꞈ, oeˬ tseˇ kʼahˇ ya jahˇ tsoꞈ meh.

²²Nahˇ ma ga kʼehˬ paw pyawˇ-eu sehˬ gʼawˆ-euˬ naˇ kʼah paw dzeˇ pyawˬ-ahˇ taw-eu gʼaˇ duˬ, teˇ byaꞈ koꞈ byaꞈ lehˬ hmˬ-awˬ.

²³Laꞈ coeˇ nyiˬ pyawˬ-ahˇ taw-eu gʼaˇ duˬ, teˇ byaꞈ nyiˬ byaꞈ lehˬ hmˬ-awˬ.

²⁴Laꞈ coeˇ-ahˇ taw-eu teˇ byaꞈ kʼoeˇ-aˬ, dawˬ pehˬ-ahˇ neh uˬ duˬ-ahˇ doˆ ni, tiˬ byaꞈ tiˇ byaꞈ ya bi tsoꞈ tawꞈ meh. Laꞈ coeˇ-ahˇ taw-eu teˇ byaꞈ kʼoeˇ nyiˬ byaꞈ-ahˇ, kʼoeˇ loꞈ-ehˇ taw-awˬ.

²⁵Kʼoeˇ loꞈ-ehˇ, teˇ byaꞈ yehꞈ byaꞈ hawˇ-eu pyuˇ daˇ kʼahˇ tseˇ koꞈ kʼahˇ ya bi jaˆ meh. Teˇ byaꞈ tiˬ byaꞈ gʼaˇ duˬ, pyuˇ laꞈ duꞈ nyiˬ duꞈ meh.

²⁶“Aˬkaˬshaˇ daˇ kawˬ neh, laꞈ law tseˇ ngaˬ kahˬ pyaꞈ-awˬ. Ngaˬ kahˬ-aˬ, sehˬ gʼawˆ laꞈ oˆ paw pyawˬ-ahˇ teˇ byaꞈ kaˇ pyawˇ taw-eu gʼaˇ duˬ meh.

²⁷Ngaˬ kahˬ-aˬ, sehˬ gʼawˆ laꞈ taˆ paw pyawˬ-ahˇ teˇ byaꞈ kaˇ pyawˇ taw-eu gʼaˇ duˬ pyeuꞈ-awˇ, ngaˬ kahˬ-aˬ, sehˬ gʼawˆ naˇ kʼah paw, nahˇ ma ga kʼehˬ paw dzeˇ pyawˬ-ahˇ kaˇ pyawˇ taw-eu gʼaˇ duˬ meh.

²⁸Gʼahˇ ceh tsaˬ-eu laꞈ yoꞈ kʼoeˇ kahˬ-aˬ, sehˬ gʼawˆ kʼoeˇ dzeˇ heu dzeˇ miˇ ni ya bi mahˇ meh.

²⁹Daˇ kawˬ teˇ byaꞈ kʼoeˇ deuˬ-ahˇ shuiˇ yaw-awˇ, laꞈ yoꞈ tsoꞈ nya ni, shuiˇ daˇ kʼahˇ ya jahˇ tsoꞈ meh. Laꞈ yoꞈ kʼoeˇ deuˬ-ahˇ kʼawꞈ shuiˇ ya yaw meh.

³⁰Gawˬ jawˬ kʼoeˇ taˆ, ngaˬ neh nawˬ-ahˇ mehˬ nehˬ-euˬ loꞈ-ehˇ, sehˬ gʼawˆ tsoˆ-awˬ.

³¹“Nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ kahˇ deuˬ neh zaꞈ taˬ-awˇ, Jeˬluˇbeˬ[13] aˇ baˇ aˇ boꞈ boꞈ taˬ-eu saˬ paˇ yuˇ-awˇ, lawˆ kaˬ taw paˆ-eu saˬ paˇ paˇ ma ya jahˇ meh.

³²Saˬ paˇ paˇ ma kʼoeˇ hmˬ-ahˇ shuiˇ kuˆ seuˬ tsoꞈ-awˇ, pyuˇ zeuˇ dahˇ oeˬ dahˇ kʼoeˇ taˆ ka tuˇ taˬ-euˬ, shuiˇ yaw taˬ-euˬ aˬkaˬshaˇ kʼawˇ zeuˇ oeˬ zeuˇ kʼoeˇ taˆ sheu taw taˬ-awˬ.

³³Saˬ paˇ paˇ ma kʼoeˇ hmˬ-ahˇ, sehˬ gʼawˆ nymˇ mˬ-ahˇ yaw cehˆ yaw cehˆ-ehˇ jaˆ-eu kuˆ seuˬ-ahˇ bi ceuˬ-awˇ, kʼaˬ lo teˇ byaꞈ nyiˬ byaꞈ ahˇ-eu dawˬ ma saˇ jaˇ bahˬ keuˆ kʼoeˇ siˬ-ahˇ, lawˆ kaˬ taw taˬ-euˬ saˬ paˇ paˇ ma-euˬ naˇ kʼah paw ya bi jaˆ meh. Saˬ paˇ paˇ ma kʼoeˇ hmˬ-aˬ, muiˬ-eu shawˇ-eu jawˇ duˬ hawˇ-eu Muiˬ dui Shawˇ dui dui-eu jawˇ duˬ yaw kaˬ-ahˇ, aˇ kaˬ taw paˆ taˬ-euˬ meh.

³⁴Dawˬ ma saˇ jaˇ bahˬ keuˆ-ahˇ kʼmˬ pymˬ pymˬ tehˬ taˬ-awˬ.

³⁵Muiˬ dui shawˇ dui dui-eu jawˇ duˬ-euˬ laꞈ nyiˇ paw dzeˇ, laꞈ taˆ paw pyawˬ-ahˇ hawˬ jeh maˬ ehˇ, laꞈ oˆ paw pyawˬ-ahˇ tsiˇ kʼmˬ doꞈ taˬ duˬ maˬ ehˇ, kʼoeˇ paw heu paw-ehˇ bi jaˆ-awˬ.

³⁶“Nyoeˇ leuˬ leuˬ-eu, neˇ naˆ naˆ-eu hawˇ-eu neˇ tseuˆ ni gʼeh-eu saˬ kahˇ deuˬ neh zaꞈ-awˇ, aˇ boꞈ boꞈ taˬ-euˬ shawˇ jehˆ ni gʼeh-eu saˬ paˇ paˇ ma yuˇ-awˇ, sehˬ gʼawˆ gʼoˆ kʼehˬ-ahˇ sheu taw taˬ-awˬ.

³⁷Saˬ paˇ paˇ ma kʼoeˇ sheu taw-eu gʼaˇ duˬ, aˬ kaˬ shaˇ daˇ kawˬ neh kʼawˇ zeuˇ ngaˬ zeuˇ jahˇ-awˇ, shuiˇ yaw-awˇ, shuiˇ kuˆ seuˬ jahˇ tsoꞈ-awˬ. Kʼawˇ zeuˇ kʼoeˇ deuˬ ka tuˇ-eu gʼaˇ duˬ, guiˬ shuiˇ zeuˇ dahˇ ngaˬ hmˬ jahˇ-awˬ.