Read Akha Doˆ-iˇ 27 Bible Online

Doˆ-iˇ 27 - Akha bible

Doˆ-iˇ 27

¹“Aˬkaˬshaˇ daˇ kawˬ yuˇ-awˇ, yaw mahˇ paw ngaˬ caˆ, yaw jeˇ paw ngaˬ caˆ, yaw goˇ paw smˬ caˆ byah-eu lawˇ duˬ tiˬ hmˬ jahˇ-awˬ.

²Lawˇ duˬ-euˬ uˬ duˬ laꞈ coeˇ oeˬ coeˇ-ahˇ, uˬ coeˇ oeˬ kahˬ jahˇ tsoꞈ-awˬ. Uˬ coeˇ kʼoeˇ oeˬ kahˬ-ahˇ, lawˇ duˬ aˬ yawꞈ-ahˇ tiˬ poˆ tehꞈ-ehˇ bi tsoꞈ tawꞈ taˬ-awˇ, guiˬ shuiˇ yaw-awˬ.

³Tsiˇ keuˬ-eu kʼaˬ lehˇ tawˆ ahˇ duˬ mui za deuˬ maˬ ehˇ, kʼaˬ lehˇ tawˆ-eu gʼaˇ duˬ laꞈ yoeˬ tsoꞈ-eu kuˬ tseuˆ deuˬ maˬ ehˇ, iˇ cuꞈ byaˆ shehˬ-eu gʼaˇ duˬ naˬ bo deuˬ maˬ ehˇ, shaˬ jiˇ kuˆ seuˬ deuˬ maˬ ehˇ, miˬ dzaˬ kʼmˬ maˬ deuˬ maˬ ehˇ, guiˬ shuiˇ neh jahˇ-awˬ.

⁴Guiˬ shuiˇ shmˇ kaˇ tiˬ hmˬ jahˇ-awˇ, kʼoeˇ-euˬ laꞈ coeˇ oeˬ coeˇ-ahˇ laꞈ naˬ jahˇ tsoꞈ-awˬ.

⁵Guiˬ shuiˇ shmˇ kaˇ kʼoeˇ hmˬ-ahˇ, lawˇ daˆ duˬ-euˬ uˬ moˆ, lawˇ duˬ-euˬ gʼawˇ pah nyiˬ paˆ-ehˇ jahˇ tsoꞈ-awˬ.

⁶Aˬkaˬshaˇ daˇ kawˬ neh baꞈ kawˬ jahˇ-awˇ, guiˬ shuiˇ yaw-awˬ.

⁷Lawˇ duˬ kʼoeˇ -ahˇ baꞈ ngeh, gaˇ dzeˇ paw tsoꞈ-eu guiˬ shuiˇ shmˇ kaˇ laꞈ naˬ kʼoeˇ deuˬ-ahˇ baꞈ kawˬ cawˬ ahˇ-awˇ, ya baꞈ meh.

⁸Gawˬ jawˬ kʼoeˇ taˆ ngaˇ nawˬ-ahˇ mehˬ nehˬ-euˬ loꞈ-ehˇ, lawˇ duˬ kʼoeˇ hmˬ-ahˇ teˇ byaꞈ neh jahˇ-awˇ, coˇ hoˇ ni ya bi jaˆ meh.

⁹“Ngaˇ jawˇ duˬ sehˬ gʼawˆ-ahˇ, shawˇ jehˆ ni gʼeh-eu saˬ paˇ neh yaˇ kmˇ ya mˇ lahˇ meh. Laꞈ oˆ paw pyawˬ-ahˇ taw lahˇ-eu saˬ paˇ deuˬ, nyiˬ tseˇ ngaˬ lmˇ ya bi byah-eu meh.

¹⁰Saˬ paˇ kʼoeˇ taw-eu gʼaˇ duˬ, pyuˇ kuˆ seuˬ hawˇ-eu pyuˇ laꞈ law tsoꞈ-eu guiˬ shuiˇ kʼawˇ zeuˇ nyiˬ tseˇ zeuˇ hawˇ-eu, guiˬ shuiˇ zeuˇ dahˇ nyiˬ tseˇ dahˇ ya lehˬ hmˬ meh.

¹¹Kʼoeˇ loꞈ-ehˇ duˇ ni, laꞈ taˆ paw pyawˬ gʼaˇ duˬ kʼawꞈ, saˬ paˇ nyiˬ tseˇ lmˇ maˬ ehˇ, saˬ paˇ kʼoeˇ taw-eu gʼaˇ duˬ, pyuˇ kuˆ seuˬ hawˇ-eu pyuˇ laꞈ law tsoꞈ-eu guiˬ shuiˇ kʼawˇ zeuˇ nyiˬ tseˇ zeuˇ maˬ ehˇ, guiˬ shuiˇ zeuˇ dahˇ nyiˬ tseˇ dahˇ maˬ ehˇ, ya lehˬ hmˬ meh.

¹²Nahˇ ma ga kʼehˬ paw pyawˬ-ahˇ taw-eu gʼaˇ duˬ, tseˇ nyiꞈ lmˇ nui paˆ byah-eu saˬ paˇ maˬ ehˇ, kʼawˇ zeuˇ tseˇ zeuˇ hawˇ-eu zeuˇ dahˇ tseˇ dahˇ maˬ ehˇ, ya lehˬ hmˬ meh.

¹³Sehˬ gʼawˆ gʼoˆ kʼehˬ pyawˇ-eu nahˇ ma doˆ kʼehˬ paw dzeˇ pyawˬ-ahˇ kʼawꞈ, tseˇ nyiꞈ lmˇ nui paˆ ya taw lahˇ meh.

¹⁴Gʼoˆ kʼehˬ-euˬ aˇ maˇ paw pyawˬ-ahˇ taw-eu gʼaˇ duˬ, saˬ paˇ smˬ lmˇ nui paˆ uˬ taꞈ tiˬ caˆ, kʼawˇ zeuˇ smˬ zeuˇ hawˇ-eu, zeuˇ dahˇ smˬ dahˇ ya lehˬ hmˬ meh.

¹⁶Nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ kahˇ deuˬ neh zaꞈ-awˇ, ngaˬ lmˇ byah-eu aˇ boꞈ boꞈ taˬ-euˬ shawˇ jehˆ ni gʼeh-eu saˬ paˇ, gʼoˆ kʼehˬ aˬ yawꞈ-ahˇ ya gʼeu taw taˬ meh. Zeuˇ dahˇ oeˬ dahˇ kʼoeˇ taˆ ka tuˇ taˬ-euˬ kʼawˇ zeuˇ oeˬ zeuˇ kʼoeˇ taˆ, saˬ paˇ kʼoeˇ ya bi ceuˬ-eu meh.

¹⁷Sehˬ gʼawˆ tiˬ jawˬ ka tuˇ taˬ-euˬ yaˇ kmˇ kʼawˇ zeuˇ kʼoeˇ deuˬ dawˬ tawˆ luꞈ-ahˇ, pyuˇ laꞈ law ya tsoꞈ meh. Kuˆ seuˬ dawˬ tawˆ luꞈ-ahˇ pyuˇ neh ya jahˇ-awˇ, zeuˇ dahˇ dawˬ tawˆ luꞈ-ahˇ guiˬ shuiˇ neh ya jahˇ meh.

¹⁸Sehˬ gʼawˆ-ahˇ mˇ lahˇ-eu yaˇ kmˇ kʼoeˇ, yaw mahˇ paw nyiˬ tseˇ ngaˬ lmˇ, yaw jeˇ paw tseˇ nyiꞈ lmˇ nui paˆ, yaw goˇ paw tiˬ lmˇ uˬ taꞈ tiˬ caˆ ya bi byah meh. Sheu taw-eu saˬ paˇ kʼoeˇ deuˬ-aˬ. shawˇ jehˆ ni gʼeh-eu saˬ paˇ ya bi pyeuꞈ-awˇ, zeuˇ dahˇ deuˬ-aˬ, guiˬ shuiˇ zeuˇ dahˇ ya bi pyeuꞈ meh.

¹⁹Sehˬ gʼawˆ laꞈ kʼoeˇ zmˬ-eu keu ka dawˬ tawˆ luꞈ maˬ ehˇ, sehˬ gʼawˆ tsoˆ gaˇ haw-eu sehˬ gʼawˆ yaˇ kmˇ mˇ gaˇ zmˬ-eu taꞈ cmˬ dawˬ tawˆ luꞈ maˬ ehˇ, guiˬ shuiˇ neh jahˇ taˬ-euˬ keu ka deuˬ tehꞈ-ehˇ ya bi pyeuꞈ meh.

²⁰“Yawˬ miˇ na luꞈ maˬ bi tsehˆ leˇ ni, tsiˇ kʼmˬ doꞈ taˬ nya-eu gʼaˇ duˬ, muiˬ dui dui-eu saˬ loˬ tsiˇ deuˬ yuˇ laꞈ lehˇ, Iˇsaˬleˬlaˆ tsawˇ haˬ deuˬ-ahˇ nawˇ dawˬ biꞈ nehˬ-awˬ.

²¹Ngaˇ jawˇ-eu sehˬ gʼawˆ laꞈ kʼoeˇ, dawˬ ma saˇ jaˇ bahˬ keuˆ mehˬ shi gʼeu taw taˬ-euˬ saˬ paˇ paˇ ma-euˬ laꞈ nyiˇ paw, Aˬloˬ hawˇ-eu aˬ yawꞈ-euˬ aˬ li deuˬ tsiˇ kʼmˬ kʼoeˇ ya doꞈ taˬ meh. Ngaˬ-euˬ mehˬ shi, jawˇ duˬ kʼoeˇ tsahˇ-ahˇ, tsiˇ kʼmˬ kʼoeˇ uˬ ciꞈ uˬ bya bya ni ya bi doꞈ meh. Dawˬ heu dawˬ-aˬ, Iˇsaˬleˬlaˆ tsawˇ haˬ deuˬ hawˇ-eu, aˬ kaˇ aˬ yawꞈ maꞈ-euˬ zaˬ deuˬ uˆ deuˬ dawˬ tawˆ luꞈ, mˬ maˬ maˬ byaˆ zaˇ ziˇ ya naˇ haˬ geuꞈ-eu dawˬ pyeuꞈ-eu meh.