Read Akha Doˆ-iˇ 28 Bible Online

Doˆ-iˇ 28 - Akha bible

Doˆ-iˇ 28

¹“Nawˬ-euˬ aˇ doˆ Aˬloˬ hawˇ-eu aˬ yawꞈ-euˬ aˬ li Naˬdehˇ, Aˬbiˇhuˬ, Eˇlaˬzaˬ hawˇ-eu Iˇdaˬmaˬ-ahˇ kuˇ-awˬ. Iˇsaˬleˬlaˆ tsawˇ haˬ laꞈ kʼoeˇ, aˬ yawꞈ maꞈ-ahˇ kuˇ doˆ-awˇ, ngaˬ-euˬ gaˇ mˇ-eu piˇ ma deuˬ bi geuꞈ-awˬ.

²Bi haw muiˬ-eu gʼaˇ duˬ maˬ ehˇ, aˬ cawˬ yaw zeu bi baw-eu gʼaˇ duˬ maˬ ehˇ, piˇ ma-euˬ dm gʼaˬ dm lmˇ deuˬ, Aˬloˬ-ahˇ guꞈ nehˬ-awˬ.

³Ngaˬ neh dm gʼaˬ dm lmˇ guꞈ-eu jeˬ-ahˇ taꞈ leˇ-eu zaˬ siˬ tsawˇ gahˇ kʼaˇ biꞈ taˬ-euˬ tsawˇ haˬ dawˬ tawˆ luꞈ kuˇ uiˬ-awˇ, ngaˬ-euˬ gaˇ bi mˇ-eu lehˇ, Aˬloˬ-euˬ gʼawˇ mawˇ ngaˬ-ahˇ a nehˬ-eu gʼaˇ duˬ, Aˬloˬ-ahˇ dm gʼaˬ dm lmˇ guꞈ nehˬ-awˬ lehˇ ehˇ nehˬ-awˬ.

⁴Kʼahˬ-ahˇ dehˬ daˬ duˬ, pehˇ kʼahˬ pehˇ nymˇ, pehˇ kʼahˬ pehˇ mahˇ, aˇ boꞈ boꞈ taˬ-euˬ pehˇ kʼahˬ, uˬ dzahˬ, dzoꞈ tsiˬ, heu deuˬ guꞈ-awˬ lehˇ aˬ yawꞈ maꞈ-ahˇ ehˇ nehˬ-awˬ. Nawˬ-euˬ aˇ doˆ Aˬloˬ hawˇ-eu aˬ yawꞈ-euˬ aˬ li deuˬ, ngaˬ-euˬ gaˇ mˇ-eu piˇ ma geuꞈ-eu gʼaˇ duˬ, piˇ ma-euˬ dm gʼaˬ dm lmˇ deuˬ ya guꞈ nehˬ meh lehˇ aˬ yawꞈ maꞈ-ahˇ nawˇ ehˇ nehˬ-awˬ.

⁵Nyoeˇ leuˬ leuˬ-eu, neˇ naˆ naˆ-eu hawˇ-eu, shawˇ jehˆ ni gʼeh-eu saˬ paˇ, shuiˇ saˬ kahˇ hawˇ-eu shawˇ jehˆ ni gʼeh-eu saˬ paˇ heu deuˬ-ahˇ, dm gʼaˬ dm lmˇ guꞈ-eu paw zaˬ siˬ tsawˇ gahˇ ahˇ-eu tsawˇ haˬ deuˬ ya zmˬ meh.

⁶“Nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ kahˇ deuˬ, shuiˇ saˬ kahˇ hawˇ-eu, shawˇ jehˆ ni gʼeh-eu saˬ paˇ heu deuˬ neh, pehˇ kʼahˬ pehˇ nymˇ aˬ yawꞈ maꞈ guꞈ-awˇ, aˇ boꞈ ya boꞈ meh.

⁷Pehˇ kʼahˬ kʼoeˇ dm ngeh gʼeu tawꞈ nya ni, baꞈ pu-euˬ kʼoeˇ paˆ maˇ paˆ-ehˇ, baꞈ pu aˇ caˆ nyiˬ caˆ ya bi tsoꞈ meh.

⁸Pehˇ kʼahˬ pehˇ nymˇ guꞈ-eu saˬ paˇ hawˇ-eu saˬ kahˇ kʼoeˇ neh, joꞈ paꞈ tiˬ kahˇ yaw muiˬ paˬ-ehˇ zaꞈ-awˇ, pehˇ kʼahˬ pehˇ nymˇ aˬ yawꞈ-ahˇ tiˬ poˆ tehꞈ-ehˇ ya guꞈ myahˬ taˬ meh.

⁹Neˇ tseuˆ ni gʼeh-eu kʼaˬ lo sehˇ nyiˬ siˬ yuˇ-awˇ, Yaˬkoˆ-euˬ aˬ li tseˇ nyiꞈ li-euˬ tsawˇ myahˇ toeˬ boꞈ-awˬ.

¹⁰Aˬ yawꞈ maꞈ-euˬ tsawˇ myahˇ deuˬ-ahˇ, aˇ kʼoꞈ huiˬ nyiˇ baw-ehˇ, tiˬ siˬ kʼoeˇ taˆ tsawˇ myahˇ koꞈ myahˇ toeˬ boꞈ-awˬ.

¹¹Aˇ boꞈ toeˬ nya-eu tsawˇ haˬ deuˬ neh, kʼaˬ lo kʼoeˇ nyiˬ siˬ kʼoeˇ taˆ Yaˬkoˆ-euˬ aˬ li tseˇ nyiꞈ li-euˬ tsawˇ myahˇ bi toeˬ boꞈ-awˇ, shuiˇ iˇ puˬ laꞈ kʼoeˇ dawˆ ahˇ-awˬ.

¹²Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ dah zaˇ pyeuꞈ-eu gʼaˇ duˬ, kʼaˬ lo sehˇ kʼoeˇ nyiˬ siˬ-ahˇ, pehˇ kʼahˬ pehˇ nymˇ-ahˇ tsoꞈ-eu baꞈ pu aˇ caˆ kʼoeˇ taˆ bi jaˆ-awˬ. Sahˬpaˬ Miˬyehˇ pyeuꞈ-eu ngaˇ, ngaˬ-eu tsawˇ haˬ deuˬ-ahˇ aˬ myah luꞈ noeˬ keuˆ-eu gʼaˇ duˬ, Aˬloˬ-aˬ, aˬ yawꞈ-euˬ baꞈ pu kʼoeˇ taˆ, aˬ yawꞈ maꞈ-euˬ tsawˇ myahˇ deuˬ-ahˇ, kʼoeˇ loꞈ-ehˇ ya pi tehꞈ-a.

¹³Shuiˇ iˇ puˬ nyiˬ siˬ jahˇ-awˬ.

¹⁴Kʼoeˇ naˇ, maˇ jawˆ ni gʼeh-eu shuiˇ neh, shuiˇ shuiˇ caˆ nyiˬ caˆ yeuꞈ-awˇ, iˇ puˬ-ahˇ tsoꞈ-awˬ.

¹⁵“Miˬyehˇ nui ma tsaˬ-eu loꞈ-ehˇ ngehˬ ngeh tmˇ ngeh maˬ ehˇ, yaˇ kʼaˬ daˇ ngeh maˬ ehˇ, zmˬ-eu gʼaˇ duˬ, piˇ ma yaw huiˬ gʼaˬ-ahˇ, kʼahˬ-ahˇ dehˬ daˬ duˬ tiˬ hmˬ ya guꞈ nehˬ meh. Pehˇ kʼahˬ pehˇ nymˇ guꞈ gaˇ zmˬ-eu saˬ paˇ hawˇ-eu saˬ kahˇ kʼoeˇ jeˬ neh, guꞈ-awˇ, aˇ boꞈ kʼawꞈ kʼoeˇ loꞈ-ehˇ ya boꞈ meh.

¹⁶Kʼoeˇ-aˬ, byaˆ dmˇ taˬ-awˇ, tiˬ toˇ oeˬ bawˬ ya bi byah meh.

¹⁷Kʼoeˇ-euˬ kʼoeˇ taˆ, aˇ poeˬ kʼaˆ-eu kʼaˬ lo sehˇ oeˬ cehˆ guꞈ tsoꞈ taˬ-awˬ. Yaw beh cehˆ-ahˇ, yaw neˇ neˇ-eu kʼaˬ lo sehˇ, shuiˇ nyehˆ ni gʼeh-eu kʼaˬ lo sehˇ hawˇ-eu neˇ shuiˇ shuiˇ-eu kʼaˬ lo sehˇ maˬ ehˇ,

¹⁸nyiˬ cehˆ tiˬ cehˆ-ahˇ, nyoeˇ naˆ naˆ-eu kʼaˬ lo sehˇ, nyoeˇ leuˬ leuˬ-eu kʼaˬ lo sehˇ hawˇ-eu gʼahˇ dui dui-eu kʼaˬ lo sehˇ maˬ ehˇ,

¹⁹smˬ cehˆ tiˬ cehˆ-ahˇ, neˇ leuˬ leuˬ-eu kʼaˬ lo sehˇ, pyuˇ deuˬ ni gʼeh-eu kʼaˬ lo sehˇ hawˇ-eu, neˇ naˆ naˆ-eu kʼaˬ lo sehˇ maˬ ehˇ,

²⁰oeˬ cehˆ tiˬ cehˆ-ahˇ, nyoeˇ shuiˇ shuiˇ-eu kʼaˬ lo sehˇ, neˇ tseuˆ ni gʼeh-eu kʼaˬ lo sehˇ hawˇ-eu, yaw shehꞈ gʼawˬ mya jeˬ ahˇ-eu kʼaˬ lo sehˇ maˬ ehˇ, guꞈ tsoꞈ-awˬ. Heu deuˬ-ahˇ, shuiˇ iˇ puˬ laꞈ kʼoeˇ ya dawˆ ahˇ taˬ-eu meh.

²¹Kʼaˬ lo sehˇ heu tseˇ nyiꞈ siˬ-aˬ, Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ dah zaˇ pyeuꞈ-eu gʼaˇ duˬ, aˬ yawꞈ siˬ yawꞈ kʼoeˇ taˆ, Yaˬkoˆ-euˬ aˬ li tiˬ li-euˬ tsawˇ myahˇ ya toeˬ boꞈ taˬ meh.

²²Kʼahˬ ahˇ dehˬ daˬ duˬ-ahˇ tsoꞈ-eu gʼaˇ duˬ, maˇ jawˆ ni gʼeh-eu shuiˇ neh, shuiˇ shuiˇ caˆ yeuꞈ-awˬ.

²³Shuiˇ laꞈ behˬ nyiˬ behˬ jahˇ-awˇ, kʼahˬ-ahˇ dehˬ daˬ duˬ-euˬ uˬ duˬ paw, kʼoeˇ coeˇ heu coeˇ-ehˇ tsoꞈ-awˬ.

²⁴Shuiˇ caˆ caˆ yeuꞈ nyiˬ caˆ yuˇ-awˇ, shuiˇ laꞈ behˬ kʼoeˇ nyiˬ behˬ-ahˇ tsoꞈ-awˬ.

²⁵Shuiˇ shuiˇ caˆ kʼoeˇ nyiˬ caˆ-euˬ mehˬ dzaˬ nyiˬ dzaˬ yuˇ-awˇ, shuiˇ iˇ puˬ kʼoeˇ nyiˬ siˬ-ahˇ tsoꞈ-awˬ. Kʼoeˇ loꞈ-ehˇ jahˇ-awˇ, pehˇ kʼahˬ pehˇ nymˇ-euˬ baꞈ pu aˇ caˆ mehˬ shi paw bi tsoꞈ-awˬ.

²⁶Kʼoeˇ naˇ, shuiˇ laꞈ behˬ nyiˬ behˬ jahˇ-awˇ, pehˇ kʼahˬ pehˇ nymˇ-euˬ laꞈ taˆ paw paˆ, kʼahˬ-ahˇ dehˬ daˬ duˬ-euˬ dawˬ dahˬ paw, laꞈ coeˇ nyiˬ coeˇ-euˬ laꞈ kʼoeˇ paw tsoꞈ-awˬ.

²⁷Shuiˇ laꞈ behˬ nyiˬ behˬ paˇ jahˇ-awˇ, pehˇ kʼahˬ pehˇ nymˇ-euˬ baꞈ pu aˇ caˆ nyiˬ caˆ-euˬ laꞈ oˆ dzaˬ mehˬ shi mehˬ dzaˬ dawˬ peh tehˬ ni, muiˬ dui dui-eu joꞈ paꞈ-euˬ laꞈ taˆ guꞈ tsoꞈ-awˬ.

²⁸Kʼahˬ-ahˇ dehˬ daˬ duˬ kʼoeˇ maˬ ga ka le-ehˇ, joꞈ paꞈ-euˬ kʼoeˇ taˆ paw jaˆ ziꞈ nya ni, kʼahˬ-ahˇ dehˬ daˬ duˬ-ahˇ tsoꞈ-eu shuiˇ laꞈ behˬ deuˬ hawˇ-eu, pehˇ kʼahˬ pehˇ nymˇ-ahˇ tsoꞈ-eu shuiˇ laꞈ behˬ deuˬ-ahˇ, nyoeˇ leuˬ leuˬ-eu aˇ caˆ neh paꞈ tawꞈ-awˬ.

²⁹“Sahˬpaˬ Miˬyehˇ pyeuꞈ-eu ngaˇ, ngaˬ-euˬ tsawˇ haˬ deuˬ-ahˇ aˬ myah luꞈ noeˬ keuˆ-eu gʼaˇ duˬ, Muiˬ-eu shawˇ-eu jawˇ duˬ-ahˇ Aˬloˬ uˇ leˇ ngeh, Iˇsaˬleˬlaˆ tsawˇ jeuˬ deuˬ-euˬ tsawˇ myahˇ boꞈ ahˇ taˬ-euˬ kʼahˬ-ahˇ dehˬ daˬ duˬ heu hmˬ-ahˇ, aˬ yawꞈ ya dm meh.

³⁰Ngaˇ jawˇ gaˇ Aˬloˬ laˇ ngeh bi hehˇ laꞈ-eu gʼaˇ duˬ, kʼahˬ-ahˇ dehˬ daˬ duˬ laꞈ kʼoeˇ Uˇleˬ hawˇ-eu Duˇmeˬ[14] dawˆ ahˇ taˬ-awˬ. Iˇsaˬleˬlaˆ tsawˇ haˬ deuˬ kʼoeˇ taˆ ngaˇ nui ma aˬ joˆ-ehˇ taˬ-euˬ aˬ yawꞈ siˬ nya-awˇ mˇ nya ni, ngaˇ jawˇ gaˇ kʼaˇ laˇ ngeh, kʼahˬ-ahˇ dehˬ daˬ duˬ heu hmˬ aˬ yawꞈ ya dm tehꞈ-a.

³¹“Pehˇ kʼahˬ pehˇ nymˇ kʼoeˇ taˆ dm daˆ-eu pehˇ kʼahˬ pehˇ mahˇ-ahˇ, nyoeˇ leuˬ leuˬ-eu saˬ kahˇ neh ya zaꞈ meh.

³²Pehˇ kʼahˬ pehˇ mahˇ kʼoeˇ, uˬ duˬ cawˬ ahˇ duˬ lahˇ baˆ maˇ byoe ya bi dahˇ-awˇ, maˇ byoe kʼoeˇ maˬ ya bi pyaˬ-iˇ ni, mehˬ dzaˬ jawˬ jawˬ-ehˇ, siˬ dahˬ ya dahˬ meh.

³³Pehˇ kʼahˬ pehˇ mahˇ pehˇ dahˬ caw caw-ehˇ, nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ kahˇ neh aˇ siˬ aˇ boꞈ boꞈ-awˬ. Aˇ siˬ aˇ boꞈ kʼoeˇ deuˬ-euˬ yaw kaˬ-ahˇ, shuiˇ jaˇ cuˇ guꞈ tsoꞈ-awˬ.

³⁴Aˇ siˬ aˇ boꞈ tiˬ boꞈ yaw kaˬ-ahˇ shuiˇ jaˇ cuˇ tiˬ siˬ, pehˇ kʼahˬ pehˇ mahˇ-euˬ pehˇ dahˬ caw caw-ehˇ guꞈ tsoꞈ-awˬ.

³⁵Aˬloˬ piˇ ma geuꞈ ngeh, pehˇ kʼahˬ pehˇ mahˇ heu kahˇ ya dm meh. Muiˬ-eu shawˇ-eu jawˇ duˬ-ahˇ, ngaˇ jawˇ gaˇ aˬ yawꞈ laˇ ngeh, aˬ yawꞈ maˬ ya shiˇ-eu gʼaˇ duˬ, jaˇ cuˇ teˇ saˇ ya bi mahˇ meh.

³⁶“Maˇ jawˆ ni gʼeh-eu shuiˇ neh, daˇ gʼawˆ tiˬ gʼawˆ jahˇ-awˇ, Sahˬpaˬ Miˬyehˇ-ahˇ a nehˬ taˬ-euˬ lehˇ toeˬ boꞈ taˬ-awˬ.

³⁷Daˇ gʼawˆ kʼoeˇ hmˬ-ahˇ, nyoeˇ leuˬ leuˬ-eu saˬ kahˇ neh, uˬ dzahˬ-euˬ mehˬ shi paꞈ tawꞈ taˬ-awˬ.

³⁸Sahˬpaˬ Miˬyehˇ pyeuꞈ-eu ngaˬ-ahˇ, Iˇsaˬleˬlaˆ tsawˇ haˬ deuˬ lawˇ-eu shehˇ-eu jeˬ mˇ ngeh, tiˬ jeˬ paˬ laˆ lehˬ-eu baw kʼawꞈ, aˬ yawꞈ maꞈ-euˬ lawˇ-eu shehˇ-eu jeˬ-ahˇ ngaˇ ha geuꞈ nya ni, Aˬloˬ-euˬ naˇ kʼawˇ kʼoeˇ taˆ, daˇ gʼawˆ kʼoeˇ hmˬ ya geuꞈ taˬ meh.

³⁹“Shawˇ jehˆ ni gʼeh-eu saˬ kahˇ neh saˬ paˇ zaꞈ-awˇ, Aˬloˬ gʼaˇ duˬ pehˇ kʼahˬ hawˇ-eu uˬ dzahˬ guꞈ-awˇ, aˇ boꞈ boꞈ taˬ-euˬ joꞈ tsiˬ kʼawꞈ, aˬ yawꞈ gʼaˇ duˬ guꞈ-awˬ.

⁴⁰“Bi haw muiˬ-eu gʼaˇ duˬ maˬ ehˇ, aˬ cawˬ yaw zeu bi baw-eu gʼaˇ duˬ maˬ ehˇ, Aˬloˬ-euˬ aˬ li deuˬ gʼaˇ duˬ, pehˇ kʼahˬ, joꞈ tsiˬ hawˇ-eu, uˬ dzahˬ guꞈ-awˬ.

⁴¹Dm gʼaˬ dm lmˇ heu deuˬ, nawˬ-euˬ aˇ doˆ hawˇ-eu aˬ yawꞈ-euˬ aˬ li deuˬ-ahˇ bi dm-awˬ. Kʼoeˇ naˇ, ngaˬ-euˬ gaˇ mˇ-eu piˇ ma bi geuꞈ-eu gʼaˇ duˬ, aˬ yawꞈ maꞈ-ahˇ saˬ loˬ tsiˇ lehꞈ nehˬ-awˇ, aˇ yaˬ biꞈ nehˬ-eu laꞈ kʼoeˇ, ngaˬ-ahˇ a nehˬ-awˬ.

⁴²Aˬ yawꞈ maꞈ laꞈ kʼoeˇ shaꞈ dawˇ-eu jeˬ maꞈ ya doˆ laˇ ni, aˬ yawꞈ ha-euˬ gʼawˇ mawˇ-ahˇ dm kaˬ-eu gʼaˇ duˬ, joꞈ-ahˇ neh shaˬ pyaˬ-ahˇ keuˆ ni gʼoeˬ-eu laꞈ di laꞈ deu guꞈ nehˬ-awˬ.

⁴³Ngaˇ jawˇ-eu sehˬ gʼawˆ-ahˇ uˇ laˇ ngeh maˬ ehˇ, piˇ ma geuꞈ-awˇ, muiˬ-eu shawˇ-eu jawˇ duˬ laꞈ kʼoeˇ lawˇ duˬ dawˬ peh le ngeh maˬ ehˇ, aˬ yawꞈ maꞈ laꞈ kʼoeˇ, shaꞈ dawˇ paˬ-ehˇ gʼeh-eu jeˬ pyeuꞈ doˆ laˇ-eu baˬ da neh maˬ ya shiˇ ni, Aˬloˬ hawˇ-eu aˬ yawꞈ-eu aˬ li deuˬ, aˬ myah luꞈ laꞈ di laꞈ deu kʼoeˇ ya dm meh. Heu-aˬ, Aˬloˬ hawˇ-eu aˬ yawꞈ-euˬ aˬ li deuˬ gʼaˇ duˬ, aˬ myah luꞈ maˬ paˇ laˇ ni ya bi jaˆ-eu zahˇ sahˇ kʼoꞈ tiˬ jeˬ meh.