Read Akha Doˆ-iˇ 3 Bible Online

Doˆ-iˇ 3 - Akha bible

Doˆ-iˇ 3

¹Nymˬ-mˇ poˆ jawˇ, Moˇseˬ-aˬ, Miˇdiˬyaˬ miˇ kʼahˬ-euˬ piˇ ma pyeuꞈ-eu, aˬ yawꞈ-euˬ tsawˇ mawˬ Yeˬdaˬyoˇ-euˬ jeˬ zaˬ deuˬ-ahˇ bo saˆ luꞈ-eu meh. Tiˬ nah keuˆ laˇ ngeh, Moˇseˬ jeˬ zaˬ kʼoeˇ deuˬ teh-awˇ, bawˇ tsahˬ bawˇ dahˇ le dzeuˇ leꞈ-awˇ, muiˬ-eu shawˇ-eu Siˇnaˆ gawˬ jawˬ-ahˇ le keuˆ-euˬ meh.

²Kʼoeˇ ngeh, aˇ bawˇ baw duˆ tiˬ duˆ-euˬ gʼahˇ ceh miˬ dzaˬ doꞈ laˇ-awˇ, miˬ dzaˬ miˬ lmˇ laꞈ kʼoeˇ, Sahˬpaˬ Miˬyehˇ-euˬ mˬ taˆ gʼaˬ kʼehˇ Moˇseˬ mehˬ shi doˆ le-euˬ meh. Baw duˆ kʼoeˇ duˆ-ahˇ miˬ dzaˬ doꞈ luꞈ-eu kʼawꞈ, baw duˆ kʼoeˇ duˆ maˬ puiˆ dzaˬ gaˇ Moˇseˬ ya mawˇ-euˬ meh.

³“Heu-aˬ, zahˬ dui dui leˇ paˬ-ehˇ gʼeh-eu nga. Aˬ jeˬ miˇ neh baw duˆ kʼoeˇ duˆ miˬ dzaˬ maˬ puiˆ dzaˬ-euˬ nga. Ngaˇ dawˬ peh le peh-awˇ haw duˬ leˇ la” lehˇ, Moˇseˬ shaˇ noeˬ-euˬ meh.

⁴Moˇseˬ dawˬ peh laˇ peh luꞈ gaˇ Sahˬpaˬ Miˬyehˇ ya mawˇ ngeh, baw duˆ kʼoeˇ duˆ-euˬ gʼahˇ ceh jawˇ-awˇ, “Moˇseˬ-oˇ, Moˇseˬ-oˇ” lehˇ kuˇ-euˬ meh. Moˇseˬ gʼeh, “Ngaˇ heu gaˇ jawˇ ma” lehˇ oˬ toˬ kʼoꞈ nehˬ-euˬ meh.

⁵Kʼoeˇ ngeh, Miˬyehˇ Moˇseˬ-ahˇ ehˇ nehˬ-eu, “Dawˬ peh taˬ paˇ jiˆ peh laˇ. Aˬ jeˬ miˇ neh ehˇ naˇ, muiˬ-eu shawˇ-eu jawˇ duˬ-ahˇ nawˇ yawꞈ luꞈ-eu meh.

⁶Ngaˇ-aˬ, nawˬ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-awˇ Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ ma” lehˇ ehˇ nehˬ-euˬ meh. Moˇseˬ Miˬyehˇ-ahˇ maˬ haw peuˬ-eu miˇ neh, yawˬ ha-euˬ myaˆ pyawˬ-ahˇ dehˬ kaˬ taˬ-euˬ meh.

⁷Kʼoeˇ naˇ, Miˬyehˇ ehˇ-eu, “Iˇjiˇtuˆ miˇ kʼahˬ laꞈ kʼoeˇ, ngaˬ-euˬ tsawˇ haˬ deuˬ-ahˇ aˬ cawˬ aˇ naˆ ni kʼehˬ nehˬ kʼaˆ nehˬ luꞈ-eu ngaˇ ya mawˇ gʼaˬ-euˬ ma. Aˬ yawꞈ maꞈ-ahˇ kʼehˬ luꞈ-eu, zaˬ kʼaˆ-ahˇ gaˇ bi mˇ-eu tsawˇ haˬ deuˬ-euˬ aˬ laꞈ laꞈ kʼoeˇ, aˬ yawꞈ maꞈ-ahˇ ka kʼoꞈ nehˬ laꞈ-awˬ lehˇ ngoeˇ luꞈ-eu teˇ saˇ-ahˇ ngaˇ ya gaˬ gʼaˬ-euˬ ma. Aˬ yawꞈ maꞈ ya daˬ luꞈ-eu jeˬ dawˬ tawˆ luꞈ, ngaˇ siˬ luꞈ mawˇ luꞈ ma.

⁸Kʼoeˇ miˇ neh, aˬ yawꞈ maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ-awˇ, Kaˬnaˬ tsawˇ jeuˬ, Heˬtaˆ tsawˇ jeuˬ, Aˬmawˇliˆ tsawˇ jeuˬ, Paˬyehˆ tsawˇ jeuˬ, Hiˇbiˇ tsawˇ jeuˬ hawˇ-eu Yeˬbuˇ tsawˇ jeuˬ heu deuˬ jawˇ luꞈ-eu miˇ tsaˬ miˇ muiˬ muiˬ dui dui-awˇ baw le za le-eu, byaˬ byaˬ uiˇ hawˇ-eu mawˇ neˇ aˬ coeˇ maˬ tsehˆ-iˇ ni yoeˇ luꞈ-eu jeˇ lo ni gʼeh-eu miˇ kʼahˬ-ahˇ, aˬ yawꞈ maꞈ-ahˇ sheuˬ doˆ gʼeh-eu gʼaˇ duˬ, ngaˇ zaꞈ ka le-euˬ ma.

⁹Ngaˬ-euˬ tsawˇ haˬ deuˬ ngoeˇ luꞈ-eu teˇ saˇ-ahˇ, ngaˇ aˬ diˇ aˬ maˇ ya gaˬ gʼaˬ-awˇ, Iˇjiˇtuˆ tsawˇ haˬ deuˬ aˬ yawꞈ maꞈ-ahˇ aˬ joˆ-ehˇ kʼehˬ luꞈ-eu ngaˇ mawˇ duˬ gʼaˬ-euˬ ma.

¹⁰Nawˇ ngaˬ-euˬ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ gʼeh nehˬ nya-eu gʼaˇ duˬ, nymˬ-mˇ ngaˇ nawˬ-ahˇ Iˇjiˇtuˆ sahˬ paˬ jawˇ gaˇ kʼehˇ gʼeh-eu ma.”

¹¹Ehˇ kʼawꞈ, Moˇseˬ ehˇ-eu, “Ngaˇ-aˬ, gaˇ dahˇ tsoeˬ leˇ-eu tsawˇ haˬ maˬ ngeuˇ. Aˬ joˆ-ehˇ gʼeh-awˇ neh, sahˬ paˬ jawˇ gaˇ ngaˇ iˇ-awˇ, Iˇsaˬleˬlaˆ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ gʼeh nehˬ nya nmˇ.”

¹²Miˬyehˇ ehˇ-eu, “Ngaˇ nawˬ nehˬ-ehˇ jawˇ ma. Iˇsaˬleˬlaˆ tsawˇ haˬ deuˬ-ahˇ, Iˇjiˇtuˆ miˇ kʼahˬ laꞈ kʼoeˇ neh nawˇ sheuˬ doˆ laꞈ ngeh, gawˬ jawˬ heu jawˬ kʼoeˇ taˆ, ngaˬ-ahˇ uˬ duˬ ya tahˬ tehꞈ-a. Heu-aˬ, ngaˬ neh nawˬ-ahˇ kʼehˇ gʼeh-euˬ gaˇ kawˆ, bi siˬ bi mawˇ-eu jeˬ pyeuꞈ tehꞈ-a.”

¹³Ehˇ kʼawꞈ, Moˇseˬ ehˇ-eu, “Iˇsaˬleˬlaˆ tsawˇ haˬ deuˬ jawˇ gaˇ ngaˇ iˇ-awˇ, ‘Naw maꞈ-euˬ aˬ poeˬ aˬ bawˇ deuˬ-euˬ Miˬyehˇ naw maꞈ jawˇ gaˇ ngaˬ-ahˇ kʼehˇ gʼeh leꞈ-euˬ meh’ lehˇ, aˬ yawꞈ maꞈ-ahˇ ngaˇ ehˇ nehˬ ngeh, ‘Aˬ yawꞈ-euˬ tsawˇ myahˇ aˬ joˆ-ehˇ-a’ lehˇ, aˬ yawꞈ maꞈ ngaˬ-ahˇ paˇ naˇ haˬ laˇ naˇ, ngaˇ aˬ joˆ-ehˇ ya ehˇ kʼoꞈ nehˬ nmˇ.”

¹⁴Miˬyehˇ ehˇ-eu, “Ngaˇ-aˬ, ngaˇ pyeuꞈ-eu ma. NGAˇPYEUꞈ-EU MA[3] lehˇ myahˇ-euˬ kʼoeˇ gʼaˬ, ngaˬ-ahˇ naw maꞈ jawˇ gaˇ kʼehˇ gʼeh leꞈ-euˬ meh lehˇ, aˬ yawꞈ maꞈ-ahˇ ehˇ nehˬ-awˬ.

¹⁵Aˬ yawꞈ maꞈ-euˬ aˬ poeˬ aˬ bawˇ deuˬ-euˬ Sahˬpaˬ Miˬyehˇ pyeuꞈ-eu, Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ neh, nawˬ-ahˇ aˬ yawꞈ maꞈ jawˇ gaˇ bi oe-euˬ meh lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ. Heu-aˬ, mˬ maˬ maˬ byaˆ zaˇ ziˇ ziꞈ-eu ngaˬ-euˬ tsawˇ myahˇ pyeuꞈ-eu ma. Tiˬ ziˇ saˇ-iˬ tiˬ ziˇ, ngaˬ-euˬ tsawˇ myahˇ-ahˇ heu loꞈ-ehˇ ya kuˇ tehꞈ-a.

¹⁶Iˇ-awˬ. Iˇsaˬleˬlaˆ tsawˇ haˬ aˬ yuiꞈ aˬ tsu deuˬ kuˇ uiˬ-awˇ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ Sahˬpaˬ Miˬyehˇ pyeuꞈ-awˇ, Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ pyeuꞈ-eu ngaˇ gʼaˬ, nawˬ-euˬ mehˬ shi doˆ le-euˬ meh lehˇ ehˇ nehˬ-awˬ. Aˬ yawꞈ maꞈ jawˇ gaˇ ngaˇ oe-awˇ, Iˇjiˇtuˆ tsawˇ haˬ deuˬ aˬ yawꞈ maꞈ-ahˇ aˬ joˆ-ehˇ kʼehˬ nehˬ-euˬ gaˇ kawˆ, ngaˇ ya mawˇ gʼaˬ-euˬ meh lehˇ ehˇ nehˬ-awˬ.

¹⁷Aˬ yawꞈ maꞈ-ahˇ aˬ cawˬ gʼawˬ shaˬ maˬ gaˬ ni, kʼaˇ jahˇ mawꞈ-eu jeˬ jahˇ nehˬ luꞈ-eu Iˇjiˇtuˆ miˇ kʼahˬ laꞈ kʼoeˇ neh, aˬ yawꞈ maꞈ-ahˇ ngaˇ sheuˬ doˆ-awˇ, miˇ tsaˬ miˇ muiˬ muiˬ dui dui-awˇ, baw le za le-eu (byaˬ byaˬ uiˇ hawˇ-eu mawˇ neˇ aˬ coeˇ maˬ tsehˆ-iˇ ni yoeˇ luꞈ-eu) miˇ kʼahˬ pyeuꞈ-eu, Kaˬnaˬ tsawˇ jeuˬ, Heˬtaˆ tsawˇ jeuˬ, Aˬmawˇliˆ tsawˇ jeuˬ, Paˬyehˆ tsawˇ jeuˬ, Hiˇbiˇ tsawˇ jeuˬ hawˇ-eu Yeˬbuˇ tsawˇ jeuˬ heu deuˬ jawˇ-eu miˇ kʼahˬ kʼoeˇ kʼahˬ laꞈ kʼoeˇ, aˬ yawꞈ maꞈ-ahˇ sheuˬ gʼeh ma lehˇ, ngaˇ noeˬ tsehˆ taˬ-euˬ ma.

¹⁸“Nawˬ neh kʼaˇ ehˇ-euˬ jeˬ-ahˇ, ngaˬ-euˬ tsawˇ haˬ deuˬ naˇ haˬ tehꞈ-a. Kʼoeˇ naˇ, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ nehˬ-ehˇ, Iˇjiˇtuˆ sahˬ paˬ jawˇ gaˇ nawˇ iˇ-awˇ, heu loꞈ-ehˇ ehˇ nehˬ-iˇ-awˬ. ‘Heˬbyehˇ tsawˇ haˬ deuˬ-euˬ Sahˬpaˬ Miˬyehˇ nga maꞈ-ahˇ pah mehˬ le-euˬ meh. Bawˇ tsahˬ bawˇ dahˇ-ahˇ nga maꞈ iˇ-awˇ, nga maꞈ-euˬ Sahˬpaˬ Miˬyehˇ-ahˇ lawˇ-eu shehˇ-eu gʼaˇ duˬ, nga maꞈ-ahˇ aˇ yamˬ smˬ nah biꞈ nehˬ laꞈ’ lehˇ ehˇ nehˬ-awˬ.

¹⁹Maˬ bi iˇ-ehˇ maˬ gʼeh nya ni maˬ pyeuꞈ laˇ kʼoeˇ keuˆ ni, Iˇjiˇtuˆ sahˬ paˬ naw maꞈ-ahˇ maˬ bi iˇ nehꞈ laꞈ ni piˬ lahˇ tehꞈ-a lehˇ ngaˇ siˬ nya ma.

²⁰Ehˇ kʼawꞈ, baoˬ zmˬ-awˇ, guˆ laˇ paˬ-ehˇ gʼeh-eu jeˬ mˇ-eu laꞈ kʼoeˇ, Iˇjiˇtuˆ miˇ kʼahˬ-ahˇ ngaˇ kʼehˬ nehˬ ma. Kʼoeˇ ngeh, aˬ yawꞈ naw maꞈ-ahˇ pyehˬ nehˬ laꞈ tehꞈ-a.

²¹“Ngaˬ-euˬ tsawˇ haˬ deuˬ ya doˆ-iˇ-eu gʼaˇ duˬ, Iˇjiˇtuˆ tsawˇ haˬ deuˬ naw maꞈ-ahˇ yaw zeu baw laˇ ni ngaˇ jahˇ nehˬ ma.

²²Iˇsaˬleˬlaˆ tsawˇ haˬ zaˬ miˬ zaˬ yawˬ gʼaˬ yawˬ na luꞈ, yawˬ ha nehˬ-ehˇ nymˇ kaˬ taꞈ-eu Iˇjiˇtuˆ tsawˇ haˬ deuˬ jawˇ gaˇ maˬ ehˇ, yawˬ ha-euˬ nymˇ laꞈ kʼoeˇ jawˇ luꞈ-eu Iˇjiˇtuˆ tsawˇ haˬ zaˬ miˬ zaˬ deuˬ jawˇ gaˇ maˬ ehˇ, iˇ-awˇ, dm gʼaˬ dm lmˇ, pyuˇ, shuiˇ hawˇ-eu aˇ poeˬ kʼaˆ-eu myawˬ guˇ deuˬ shaˇ-iˇ tehꞈ-a. Iˇsaˬleˬlaˆ tsawˇ haˬ deuˬ-aˬ, mˇ myawˬ kʼoeˇ deuˬ yuˇ-awˇ, yawˬ ha-euˬ aˬ buˇ aˬ li deuˬ-ahˇ bi geuꞈ jiˇ tehꞈ-a. Kʼoeˇ loꞈ-ehˇ jahˇ-awˇ, Iˇsaˬleˬlaˆ tsawˇ haˬ deuˬ, Iˇjiˇtuˆ tsawˇ haˬ deuˬ-euˬ pyuˇ shuiˇ myawˬ gahˬ yuˇ geuꞈ gʼeh tehꞈ-a.”