Read Akha Doˆ-iˇ 31 Bible Online

Doˆ-iˇ 31 - Akha bible

Doˆ-iˇ 31

¹Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

²“Yuˇdaˆ tsawˇ haˬ Huˇyaˆ-euˬ oeˬ paˬ pyeuꞈ-awˇ, Uˇliˆ-euˬ aˬ li pyeuꞈ-eu Baˬzeˬlaˇ-ahˇ ngaˇ tseˇ doˆ gʼaˬ-euˬ ma.

³Laꞈ myawˬ laꞈ muˆ mˇ-eu jeˬ-ahˇ taꞈ leˇ-eu noeˬ doˆ mˇ doˆ nya-eu zaˬ siˬ tsawˇ gahˇ dawˬ tawˆ luꞈ, aˬ yawꞈ-ahˇ ngaˇ biꞈ gʼaˬ-euˬ ma.

⁴Shuiˇ, pyuˇ hawˇ-eu guiˬ shuiˇ myawˬ guˇ deuˬ noeˬ doˆ mˇ doˆ nya ni maˬ ehˇ,

⁵aˇ poeˬ kʼaˆ-eu kʼaˬ lo sehˇ deuˬ jeˬ juˇ-awˇ, guꞈ tsoꞈ taꞈ tsoꞈ nya-eu gʼaˇ duˬ maˬ ehˇ, daˇ kawˬ teˇ byaꞈ deuˬ-ahˇ laꞈ sawˆ sawˆ juˇ nya ni maˬ ehˇ, laꞈ myawˬ laꞈ muˆ mˇ-eu nui deuˬ gaˇ dawˬ tawˆ luꞈ-ahˇ aˬ yawꞈ mˇ nya ni maˬ ehˇ, zaˬ siˬ tsawˇ gahˇ deuˬ aˬ yawꞈ-ahˇ ngaˇ biꞈ gʼaˬ-euˬ ma.

⁶Aˬ yawꞈ nehˬ-ehˇ gaˇ mˇ-eu gʼaˇ duˬ, Daˬ tsawˇ haˬ Aˬhiˇsaˬmaˇ-euˬ aˬli Awˬhawˇleˬbaˇ-ahˇ ngaˇ tseˇ doˆ taˬ-euˬ ma. Laꞈ myawˬ laꞈ muˆ kʼaˇ nya-eu tsawˇ haˬ dawˬ tawˆ luꞈ-ahˇ kʼawꞈ, ngaˇ kʼaˇ bi mˇ-euˬ jeˬ mˇ nya ni, muiˬ-eu tsawˇ gahˇ biꞈ taˬ-euˬ ma.

⁷Ngaˇ jawˇ-eu Sehˬ gʼawˆ maˬ ehˇ, Dawˬ ma saˇ jaˇ Bahˬ keuˆ hawˇ-eu kʼoeˇ-euˬ kʼmˬ pymˬ maˬ ehˇ, Sehˬ gʼawˆ laꞈ kʼoeˇ jaˆ-eu keu ka deuˬ maˬ ehˇ,

⁸hawˬ jeh hawˇ-eu kʼmˬ maˬ oeˬ tsaꞈ deuˬ maˬ ehˇ, maˇ jawˆ ni gʼeh-eu shuiˇ neh jahˇ taˬ-euˬ tsiˇ kʼmˬ doꞈ taˬ duˬ hawˇ-eu kʼoeˇ gaˇ taꞈ leˇ-eu keu ka deuˬ maˬ ehˇ, yaw saw jeˬ doꞈ-awˇ damˬ-eu lawˇ duˬ maˬ ehˇ,

⁹miˬ dzaˬ dzah puiˆ-awˇ lawˇ-eu jeˬ lawˇ-eu lawˇ duˬ maˬ ehˇ, kʼoeˇ gaˇ taꞈ leˇ-eu keu ka deuˬ maˬ ehˇ, aˬ kuiˇ aˬ laꞈ dzuiꞈ shawˇ-eu sehˇ byehˇ hawˇ-eu kʼoeˇ-euˬ aˬ kuiˇ maˬ ehˇ,

¹⁰Aˬloˬ hawˇ-eu aˬ yawꞈ-euˬ aˬ li deuˬ piˇ ma geuꞈ-awˇ gaˇ mˇ ngeh dm-eu gʼaˇ duˬ, haw muiˬ dui dui-eu dm gʼaˬ dm lmˇ deuˬ maˬ ehˇ,

¹¹tseˇ doˆ-euˬ deuˬ-ahˇ lehꞈ-eu tsiˇ maˬ ehˇ, muiˬ-eu shawˇ-eu jawˇ duˬ laꞈ kʼoeˇ zmˬ-eu doꞈ damˬ-eu tsiˇ yaw saw jeˬ maˬ ehˇ, heu deuˬ-ahˇ jahˇ ngeh, ngaˇ nawˬ-ahˇ dawˬ biꞈ taˬ-euˬ loꞈ-ehˇ, tiˬ pawꞈ-iˬ maˬ bi lehˬ-iˇ ni ya jahˇ meh.”

¹²Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ-euˬ meh.

¹³“Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Ngaˬ-euˬ gʼaˬ naˬ naˬ-eu aˇ nah pyeuꞈ-eu jawˇ nah ngeh nah, naw maꞈ lah-awˬ daw-awˬ. Aˬ jeˬ miˇ neh ehˇ naˇ, lah-eu daw-eu kʼoeˇ-aˬ, Sahˬpaˬ Miˬyehˇ pyeuꞈ-eu ngaˇ, naw maꞈ-ahˇ ngaˬ-euˬ tsawˇ haˬ bi pyeuꞈ laˇ-euˬ gaˇ kawˆ, mˬ maˬ maˬ byaˆ zaˇ ziˇ jiˇ ni saˇ kiˇ pyeuꞈ-eu meh.

¹⁴Gʼaˬ naˬ naˬ-eu aˇ nah kʼoeˇ nah-ahˇ, naw maꞈ ya lah ya daw meh. Aˬ jeˬ miˇ neh ehˇ naˇ, kʼoeˇ-aˬ, muiˬ-eu shawˇ-eu aˇ nah pyeuꞈ-eu meh. Aˇ nah kʼoeˇ nah-ahˇ maˬ lah maˬ daw-ehˇ gaˇ mˇ-eu tsawˇ haˬ aˬ geu gʼaˬ maˬ kaˬ, sehꞈ nehˬ gaˇ ya daˬ tehꞈ-a.

¹⁵Naw maꞈ yawˬ ha-euˬ gaˇ mˇ-eu gʼaˇ duˬ, aˇ nah koꞈ nah jaˆ-eu meh. Ehˇ kʼawꞈ, shiꞈ nah tiˬ nah-aˬ, ngaˬ-ahˇ a nehˬ taˬ-euˬ muiˬ-eu jaˬ-eu aˇ nah meh. Aˇ nah kʼoeˇ nah laꞈ kʼoeˇ gaˇ mˇ-eu tsawˇ haˬ aˬ geu gʼaˬ maˬ kaˬ, sehꞈ gaˇ ya daˬ tehꞈ-a.

¹⁶Aˇ nah kʼoeˇ nah-aˬ, dawˬ ma saˇ jaˇ dzaˬ taˬ-euˬ gaˇ kawˆ saˇ kiˇ pyeuꞈ-eu loꞈ-ehˇ, aˇ nah kʼoeˇ nah-ahˇ, Iˇsaˬleˬlaˆ tsawˇ haˬ deuˬ ya lah ya daw meh.

¹⁷Aˇ nah kʼoeˇ nah-aˬ, ngaˇ hawˇ-eu Iˇsaˬleˬlaˆ tsawˇ haˬ-euˬ yaw kaˬ-ahˇ, mˬ maˬ maˬ byaˆ zaˇ ziˇ saˇ kiˇ pyeuꞈ-eu meh. Aˬ jeˬ miˇ neh ehˇ naˇ, Sahˬpaˬ Miˬyehˇ pyeuꞈ-eu ngaˇ-aˬ, koꞈ nah laꞈ kʼoeˇ mˬ beh miˇ beh beh-awˇ, shiꞈ nah aˬ yawꞈ nah-ahˇ gaˇ maˬ mˇ ni naˬ-euˬ ma.”

¹⁸Siˇnaˆ gawˬ jawˬ kʼoeˇ taˆ, Moˇseˬ-ahˇ Miˬyehˇ dawˬ ngehˬ cawˬ gʼaˬ ngeh, Miˬyehˇ neh zahˇ dawˬ kʼoꞈ dawˬ boꞈ ahˇ taˬ-euˬ kʼaˬ lo teˇ byaꞈ nyiˬ byaꞈ Moˇseˬ-ahˇ Miˬyehˇ biꞈ nehˬ-euˬ meh.