Read Akha Doˆ-iˇ 33 Bible Online

Doˆ-iˇ 33 - Akha bible

Doˆ-iˇ 33

¹Moˇseˬ-ahˇ Sahˬpaˬ Miˬyehˇ ehˇ nehˬ-eu, “Nawˇ hawˇ-eu nawˬ neh Iˇjiˇtuˆ miˇ kʼahˬ laꞈ kʼoeˇ neh sheuˬ doˆ laꞈ-euˬ tsawˇ haˬ deuˬ, jawˇ duˬ heu tsahˇ-ahˇ neh doˆ-iˇ-awˇ, Aˬbyaˬhaˬ, Iˇtsaˆ, Yaˬkoˆ hawˇ-eu aˬ yawꞈ maꞈ-euˬ zaˬ deuˬ uˆ deuˬ-ahˇ biꞈ ma lehˇ ngaˬ neh saˇ jaˇ dzaˬ taˬ-euˬ miˇ kʼah kʼoeˇ kʼahˬ-ahˇ le-awˬ.

²Naw maꞈ-ahˇ bi sheuˬ gʼeh-eu gʼaˇ duˬ, mˬ taˆ gʼaˬ kʼehˇ tiˬ gʼaˬ ngaˇ pyehˬ gʼeh ma. Kaˬnaˬ tsawˇ jeuˬ maˬ ehˇ, Heˬtaˆ tsawˇ jeuˬ maˬ ehˇ, Paˬyehˆ tsawˇ jeuˬ maˬ ehˇ, ngaˇ teh doˆ ma.

³Byaˬ byaˬ uiˇ hawˇ-eu mawˇ neˇ aˬ coeˇ yoeˇ-eu miˇ kʼahˬ-ahˇ naw maꞈ le-awˬ. Ehˇ kʼawꞈ, naw maꞈ nehˬ-ehˇ ngaˇ maˬ le. Aˬ jeˬ miˇ neh ehˇ naˇ, naw maꞈ nui ma gʼahˇ-eu miˇ neh, gaˇ pehˇ gaˇ laˆ naw maꞈ-ahˇ ngaˇ ya laˆ cawˆ gaˇ keuˆ tehꞈ-a.”

⁴Kʼoeˇ loꞈ-ehˇ ehˇ gaˇ Iˇsaˬleˬlaˆ tsawˇ haˬ deuˬ ya gaˬ ngeh, tsawˇ ngoeˇ ngoeˇ-awˇ, aˇ poeˬ kʼaˆ-eu myawˬ guˇ deuˬ maˬ paˇ geuꞈ ni byehˇ dzeh-euˬ meh.

⁵Moˇseˬ-ahˇ Sahˬpaˬ Miˬyehˇ dawˬ biꞈ-awˇ, Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ bi ehˇ nehˬ-euˬ meh. “Naw maꞈ-aˬ, nui ma gʼahˇ-eu tsawˇ haˬ deuˬ pyeuꞈ-eu meh. Naw maꞈ nehˬ-ehˇ tiˬ kʼehˇ laˇ kʼehˬ aˇ yamˬ laꞈ kʼoeˇ ngaˇ ya le taꞈ law hawˇ kʼawꞈ, naw maꞈ-ahˇ ngaˇ ya laˆ cawˆ jiˇ gaˇ keuˆ tehꞈ-a. Nymˬ-mˇ naw maꞈ-euˬ aˇ poeˬ kʼaˆ-eu myawˬ guˇ deuˬ lehˆ doˆ-awˬ. Naw maꞈ-ahˇ aˬ joˆ-ehˇ jahˇ nehˬ paˬ nga lehˇ ngaˇ noeˬ tsehˆ ma.”

⁶Kʼoeˇ miˇ neh, Siˇnaˆ gawˬ jawˬ-ahˇ neh aˬ yawꞈ maꞈ doˆ-iˇ ngeh tiˬ nah neh, aˇ poeˬ kʼaˆ-eu myawˬ guˇ deuˬ aˬ yawꞈ maꞈ maˬ paˇ geuꞈ luꞈ meh.

⁷Iˇsaˬleˬlaˆ tsawˇ haˬ deuˬ kʼaˇ jawˇ naˬ-euˬ tsahˇ-ahˇ, aˬ yawꞈ maꞈ-euˬ sehˬ gʼawˆ deuˬ nehˬ-ehˇ ui cuiˆ gaˇ mahˇ kaˬ gaˇ, muiˬ-eu shawˇ-eu Sehˬ gʼawˆ kʼoeˇ gʼawˆ Moˇseˬ bi jaˆ-euˬ meh. Sehˬ gʼawˆ kʼoeˇ gʼawˆ-ahˇ, Sahˬpaˬ Miˬyehˇ jawˇ-eu Sehˬ gʼawˆ lehˇ myahˇ-awˇ, Sahˬpaˬ Miˬyehˇ-ahˇ kʼaˇ tahˬ puˬ mawꞈ-eu tsawˇ haˬ deuˬ kʼoeˇ gaˇ ya le-eu meh.

⁸Sehˬ gʼawˆ kʼoeˇ gʼawˆ-ahˇ Moˇseˬ kʼaˇ le ngeh, Sehˬ gʼawˆ laꞈ kʼoeˇ maˬ le uˇ kʼoeˇ keuˆ ni, Iˇsaˬleˬlaˆ tsawˇ haˬ deuˬ yawˬ ha-euˬ sehˬ gʼawˆ gʼoˆ kʼehˬ-ahˇ yawꞈ-awˇ haw luꞈ-eu meh.

⁹Sehˬ gʼawˆ laꞈ kʼoeˇ Moˇseˬ le uˇ gʼaˬ ngeh, mˬ dmˇ kʼawˇ zeuˇ Sehˬ gʼawˆ gʼoˆ kʼehˬ-ahˇ zaꞈ le-awˇ, mˬ dmˇ laꞈ kʼoeˇ Moˇseˬ-ahˇ Sahˬpaˬ Miˬyehˇ dawˬ ngehˬ cawˬ-eu meh.

¹⁰Sehˬ gʼawˆ gʼoˆ kʼehˬ-ahˇ mˬ dmˇ kʼawˇ zeuˇ zaꞈ le taˬ-euˬ gaˇ Iˇsaˬleˬlaˆ tsawˇ haˬ deuˬ ya mawˇ ngeh, tiˬ poˆ tehꞈ-ehˇ awˆ byaˆ taˬ-eu meh.

¹¹Cawˬ nyiˬ gʼaˬ dawˬ ja ja cawˬ-eu loꞈ-ehˇ, Moˇseˬ-ahˇ Sahˬpaˬ Miˬyehˇ myaˆ pyawˬ ciˬ daˬ-awˇ dawˬ ngehˬ cawˬ-eu meh. Kʼoeˇ naˇ, Iˇsaˬleˬlaˆ tsawˇ haˬ deuˬ jawˇ gaˇ, Moˇseˬ gʼoꞈ-iˇ-eu meh.

¹²Sahˬpaˬ Miˬyehˇ-ahˇ Moˇseˬ ehˇ nehˬ-eu, “Tsawˇ haˬ heu deuˬ-ahˇ miˇ kʼahˬ kʼoeˇ kʼahˬ-ahˇ sheuˬ gʼeh-awˬ lehˇ, nawˇ ngaˬ-ahˇ kʼehˇ-eu meh. Ehˇ kʼawꞈ, ngaˬ nehˬ-ehˇ aˬ suˇ gʼaˬ bi le-eu gaˇ kawˆ nawˇ maˬ ehˇ-a. Nawˇ ngaˬ-ahˇ yaw muiˬ paˬ-ehˇ siˬ nya-awˇ, nui ma tsaˬ-eu ma lehˇ ehˇ taˬ-euˬ meh.

¹³Toˆ-ehˇ ngeuˇ naˇ, mehˬ hu paw dzeˇ kʼawꞈ nawˇ ngaˬ-ahˇ nui ma tsaˬ ni, nawˬ-euˬ gaˇ ngaˇ mˇ-eu gʼaˇ duˬ, nawˬ neh lehˬ hmˬ taˬ-euˬ gaˇ kawˆ deuˬ ngaˬ-ahˇ ehˇ mehˬ nehˬ laꞈ-awˬ. Tsawˇ jeuˬ heu jeuˬ-aˬ, nawˬ-euˬ tsawˇ jeuˬ bi pyeuꞈ laˇ-eu gʼaˇ duˬ, nawˬ neh tseˇ doˆ taˬ-euˬ tsawˇ jeuˬ pyeuꞈ-eu gaˇ noeˬ keuˆ-awˬ.”

¹⁴Sahˬpaˬ Miˬyehˇ ehˇ-eu, “Naw maꞈ nehˬ-ehˇ ngaˇ le-awˇ, naw maꞈ aˬ cawˬ-ahˇ gʼaˬ leˇ-eu tsawˇ jeuˬ bi pyeuꞈ laˇ ma.”

¹⁵Moˇseˬ ehˇ-eu, “Nga maꞈ nehˬ-ehˇ nawˇ maˬ le te lehˇ ngeuˇ naˇ, jawˇ duˬ heu tsahˇ-ahˇ neh nga maꞈ-ahˇ taˬ bi doˆ-iˇ laꞈ.

¹⁶Nga maꞈ nehˬ-ehˇ nawˇ maˬ le naˇ, ngaˇ hawˇ-eu ngaˬ-euˬ tsawˇ haˬ deuˬ-ahˇ nawˇ nui ma tsaˬ-eu gaˇ kawˆ, aˬ suˇ gʼaˬ aˬ joˆ-ehˇ ya siˬ nmˇ. Nawˇ nga maꞈ nehˬ-ehˇ jawˇ naˇ, miˇ tsaˬ kʼoeˇ taˆ jawˇ-eu tsawˇ jeuˬ aˬ geu jeuˬ nehˬ-ehˇ maˬ kaˬ, nga maꞈ beu gaˇ tehꞈ-a.”

¹⁷Moˇseˬ-ahˇ Sahˬpaˬ Miˬyehˇ ehˇ nehˬ-eu, “Nawˇ ngaˬ-ahˇ kʼaˇ shaˇ-eu loꞈ-ehˇ ngaˇ mˇ ma. Aˬ jeˬ miˇ neh ehˇ naˇ, nawˬ-ahˇ ngaˇ yaw muiˬ paˬ-ehˇ siˬ nya-awˇ, nui ma tsaˬ-eu ma.”

¹⁸Kʼoeˇ naˇ, “Nawˬ-euˬ yaw shehꞈ kʼahˬ sehˇ ngaˬ-ahˇ bi mawˇ laꞈ” lehˇ, Sahˬpaˬ Miˬyehˇ-ahˇ Moˇseˬ ehˇ nehˬ-euˬ meh.

¹⁹Sahˬpaˬ Miˬyehˇ ehˇ-eu, “Ngaˬ-euˬ yaw muiˬ yaw jaˬ jeˬ dawˬ tawˆ luꞈ nawˬ-euˬ dawˬ peh bi oe tsehˆ-awˇ, muiˬ-eu shawˇ-eu ngaˬ-euˬ tsawˇ myahˇ-ahˇ nawˬ-euˬ mehˬ shi ngaˇ kuˇ ma. Ngaˇ-aˬ, Sahˬpaˬ Miˬyehˇ pyeuꞈ-awˇ, ngaˇ caw ba mawꞈ-eu deuˬ-ahˇ ngaˇ caw ba-awˇ, ngaˇ gʼawˬ shaˬ gaˬ mawꞈ-eu deuˬ-ahˇ ngaˇ gʼawˬ shaˬ gaˬ ma.

²⁰Ngaˬ-euˬ myaˆ pyawˬ nawˬ-ahˇ maˬ bi mawˇ. Aˬ jeˬ miˇ neh ehˇ naˇ, ngaˬ-euˬ myaˆ pyawˬ-ahˇ ya haw mawˇ-euˬ tsawˇ haˬ tiˬ gʼaˬ-iˬ yaw dehꞈ maˬ ya dehꞈ-a.

²¹Ehˇ kʼawꞈ, heu gaˇ, ngaˇ jawˇ luꞈ-eu kʼaˬ lo dawˬ peh nawˇ yawꞈ nya tehꞈ-a.

²²Ngaˬ-euˬ yaw shehꞈ kʼahˬ sehˇ iˇ tsehˆ gʼeh ngeh, ngaˇ nawˬ-ahˇ kʼaˬ lo lo kʼahˬ laꞈ kʼoeˇ ciˬ uˇ-awˇ, ngaˇ iˇ dzeuˇ gʼeh ngeh keuˆ ni, ngaˬ-euˬ aˬ laꞈ neh nawˬ-ahˇ dehˬ kaˬ taˬ ma.

²³Kʼoeˇ naˇ, ngaˬ-euˬ aˬ laꞈ ngaˇ paˇ cawˬ kʼoꞈ ngeh, ngaˬ-ahˇ nawˇ naˇ kʼah paw jeˬ-ehˇ ya mawˇ tehꞈ-a. Ehˇ kʼawꞈ, ngaˬ-euˬ myaˆ pyawˬ nawˇ maˬ mawˇ kʼmˬ-a.”