Read Akha Doˆ-iˇ 34 Bible Online

Doˆ-iˇ 34 - Akha bible

Doˆ-iˇ 34

¹Moˇseˬ-ahˇ Sahˬpaˬ Miˬyehˇ ehˇ nehˬ-eu, “Kʼaˬ lo teˇ byaꞈ yaw beh kʼoeˇ nyiˬ byaꞈ-ahˇ duˇ-eu kʼaˬ lo teˇ byaꞈ nyiˬ byaꞈ taꞈ-awˬ. Nawˬ neh laˆ paˆ-euˬ kʼoeˇ nyiˬ byaꞈ kʼoeˇ taˆ boꞈ taˬ-euˬ dawˬ deuˬ, heu nyiˬ byaꞈ kʼoeˇ taˆ ngaˇ paˇ boꞈ ma.

²Ni shawˬ uˬ shawˬ lehˬ hmˬ-awˇ, Siˇnaˆ gawˬ jawˬ uˬ du ngaˬ-ahˇ tahˬ puˬ laˇ-awˬ.

³Nawˬ nehˬ-ehˇ tiˬ gʼaˬ-iˬ maˬ ya bi laˇ-a. Gawˬ jawˬ jawˬ lah ni kʼoeˇ taˆ, tsawˇ haˬ tiˬ gʼaˬ-iˬ maˬ ya bi laˇ-a. Gawˬ jawˬ dawˬ peh jeˬ zaˬ tiˬ mawˇ-iˬ maˬ ya bi gaˆ dzaˬ laˇ-a.”

⁴Sahˬpaˬ Miˬyehˇ neh dawˬ biꞈ-euˬ loꞈ-ehˇ, kʼaˬ lo teˇ byaꞈ nyiˬ byaꞈ Moˇseˬ taꞈ-awˇ, yawˬ nah yawˬ uˬ shawˬ yaw naꞈ-ehˇ, kʼaˬ lo teˇ byaꞈ kʼoeˇ nyiˬ byaꞈ baꞈ-awˇ, Siˇnaˆ gawˬ jawˬ-ahˇ daˆ leˇ-euˬ meh.

⁵Mˬ dmˇ laꞈ kʼoeˇ Sahˬpaˬ Miˬyehˇ zaꞈ le-awˇ, Moˇseˬ-euˬ dawˬ peh yawꞈ-awˇ, Sahˬpaˬ Miˬyehˇ lehˇ myahˇ-euˬ aˬ yawꞈ-euˬ muiˬ-eu shawˇ-eu tsawˇ myahˇ kʼoeˇ ehˇ doˆ nehˬ-euˬ meh.

⁶Kʼoeˇ naˇ, Moˇseˬ-euˬ mehˬ shi Sahˬpaˬ Miˬyehˇ iˇ tsehˆ gʼeh-awˇ ehˇ-eu. “Sahˬpaˬ Miˬyehˇ pyeuꞈ-eu ngaˇ-aˬ, gʼawˬ shaˬ gaˬ nya-awˇ, caw ba nya-eu ma. Yaw awˇ laꞈ-ehˇ nui ma maˬ pehˇ-eu uˬ taꞈ, gʼoeˇ-eu gaˬ-eu jeˬ tiˬ byah ni ahˇ-awˇ, saˇ jaˇ ziꞈ dui dui-eu Miˬyehˇ pyeuꞈ-eu ma.

⁷Ngaˬ-euˬ saˇ jaˇ-aˬ, tsawˇ haˬ zaˬ-euˬ ziˇ aˇ heˇ aˇ muiˇ ziˇ keuˆ ni ziꞈ-awˇ, maˬ muiˬ maˬ jaˬ-eu jeˬ hawˇ-eu iˬ baˇ-ahˇ ngaˇ oˇ dzeuˇ nya-eu ma. Ehˇ kʼawꞈ, aˬ ma aˬ da aˬ piˬ aˬ bawˇ deuˬ iˬ baˇ mˇ-eu baˬ da neh, aˬ yawꞈ maꞈ-euˬ aˬ buˇ aˬ li hawˇ-eu oeˬ paˬ oeˬ ma deuˬ-ahˇ, smˬ ziˇ oeˬ ziˇ keuˆ ni, maˬ bi dzeuˇ-iˇ ni ngaˇ kʼehˬ nehˬ ma.”

⁸Moˇseˬ miˇ tsaˬ-ahˇ yaw kawˇ-ehˇ awˆ byaˆ-awˇ uˬ duˬ tahˬ-euˬ meh.

⁹Aˬ yawꞈ ehˇ-eu, “Sahˬpaˬ Miˬyehˇ-oˇ, nawˇ ngaˬ-ahˇ aˬ diˇ aˬ maˇ nui ma tsaˬ naˇ, nga maꞈ nehˬ-ehˇ tiˬ kawˆ loꞈ-ehˇ le nehꞈ laꞈ lehˇ shaˇ-eu ma. Tsawˇ haˬ heu deuˬ-aˬ, nui ma gʼahˇ dui dui-eu meh. Ehˇ kʼawꞈ, nga maꞈ-euˬ maˬ muiˬ maˬ jaˬ-eu jeˬ hawˇ-eu mˇ lehˬ laˆ lehˬ-euˬ deuˬ-ahˇ iˬ baˇ pyehˬ nehˬ laꞈ-awˇ, nawˬ-euˬ tsawˇ haˬ loꞈ-ehˇ nga maꞈ-ahˇ ha geuꞈ nehˬ laꞈ-awˬ.”

¹⁰Moˇseˬ-ahˇ Sahˬpaˬ Miˬyehˇ ehˇ nehˬ-eu, “Nymˬ-mˇ ngaˇ Iˇsaˬleˬlaˆ tsawˇ haˬ deuˬ nehˬ-ehˇ saˇ jaˇ dzaˬ-eu ma. Miˇ tsaˬ heu kʼoeˇ taˆ tsawˇ jeuˬ tiˬ jeuˬ-iˬ maˬ ya mawˇ haw-euˬ kʼaˆ jeˬ-ehˇ gʼeh-eu jeˬ, aˬ yawꞈ maꞈ mehˬ shi ngaˇ jahˇ mehˬ nehˬ ma. Sahˬpaˬ Miˬyehˇ pyeuꞈ-eu ngaˇ-aˬ, huiˬ dui dui-eu gaˇ deuˬ mˇ nya gaˇ, aˬ yawꞈ maꞈ dawˬ tawˆ luꞈ ya mawˇ tehꞈ-a. Aˬ jeˬ miˇ neh ehˇ naˇ, naw maꞈ-euˬ mehˬ shi zahˬ dui dui leˇ paˬ-ehˇ gʼeh-eu jeˬ mˇ mehˬ nehˬ-eu lehˇ, ngaˇ lehˬ hmˬ taˬ-euˬ ma.

¹¹Iˬ nah naw maꞈ-ahˇ ngaˇ biꞈ-eu lehˇ lehˬ hmˬ taˬ-euˬ zahˇ dawˬ kʼoꞈ dawˬ heu deuˬ-ahˇ naˇ haˬ geuꞈ-awˬ. Mehˬ hu paw naw maꞈ le ngeh, Aˬmoˬ tsawˇ jeuˬ, Kaˬnaˬ tsawˇ jeuˬ, Heˬtaˆ tsawˇ jeuˬ, Peˬyehˆ tsawˇ jeuˬ hawˇ-eu, Yeˬbuˇ tsawˇ jeuˬ heu deuˬ-ahˇ ngaˇ teh doˆ ma.

¹²Naw maꞈ le uˇ-eu miˇ kʼahˬ laꞈ kʼoeˇ jawˇ-eu tsawˇ haˬ deuˬ nehˬ-ehˇ saˇ jaˇ taˬ dzaˬ. Aˬ jeˬ miˇ neh ehˇ naˇ, kʼoeˇ loꞈ-ehˇ jahˇ-eu jeˬ-aˬ, naw maꞈ bi shiˇ-eu gʼaˇ duˬ lahˇ ju kʼmˇ gaˇ duˇ-eu meh.

¹³Ehˇ kʼawꞈ, aˬ yawꞈ maꞈ-euˬ lawˇ duˬ deh pyaˆ-awˇ, aˬ yawꞈ maꞈ-euˬ muiˬ-eu shawˇ-eu kʼawˇ zeuˇ deuˬ laˆ cawˆ nehˬ-awˬ. Aˬ yawꞈ maꞈ-euˬ miˬyehˇ ma Aˬsheˇlaˬ-euˬ tahˬ pahˬ aˬ ma mawˇ kawˇ kʼawꞈ, laˆ cawˆ nehˬ-awˬ.

¹⁴“Miˬ yehˇ nui taw nui gʼaˬ-ahˇ naw maꞈ uˬ duˬ taˬ tahˬ. Aˬ jeˬ miˇ neh ehˇ naˇ, Sahˬpaˬ Miˬyehˇ pyeuꞈ-eu ngaˬ-euˬ mehˬ shi, miˬ yehˇ nui gʼaˬ ngaˇ maˬ bi jawˇ nya-a.

¹⁵Aˬ jeˬ miˇ neh ehˇ naˇ, lawˇ ciꞈ zaˬ kʼoeˇ deuˬ-aˬ, aˬ yawꞈ maꞈ-euˬ miˬyehˇ-ahˇ lawˇ-eu shehˇ-eu jeˬ mˇ ngeh, naw maꞈ-ahˇ kuˇ-awˇ, lawˇ gʼaˬ shehˇ gʼaˬ-euˬ dzaˇ deuˬ dzaˬ-awˬ lehˇ muˇ tehꞈ-a.

¹⁶Naw maꞈ-euˬ zaˬ yo aˬ li deuˬ, lawˇ ciꞈ zaˬ kʼoeˇ deuˬ-euˬ zaˬ miˬ aˬ buˇ deuˬ-ahˇ sheuˬ-awˇ, ngaˬ-ahˇ saˇ jaˇ puiˬ-eu laꞈ kʼoeˇ, lawˇ ciꞈ zaˬ deuˬ-euˬ miˬyehˇ-ahˇ uˬ duˬ tahˬ ni, zaˬ mi aˬ buˇ kʼoeˇ deuˬ aˬ yawꞈ maꞈ-ahˇ sheuˬ gʼeh tehꞈ-a.

¹⁷“Naw maꞈ tahˬ pahˬ aˬ ma mawˇ kawˇ tehˆ-awˇ uˬ duˬ maˬ ya tahˬ-a.

¹⁸“Dehˬ tseˬ maˬ ahˇ-eu Kaˬ muˇ dzaˬ-eu Bawˬ-iˬ ya gʼeh meh. Aˬbiˇbaˬ ba la laꞈ kʼoeˇ, shiꞈ nah keuˆ ni, dehˬ tseˬ maˬ ahˇ-eu kaˬ muˇ dzaˬ-awˬ lehˇ, naw maꞈ-ahˇ ngaˇ dawˬ biꞈ taˬ-euˬ ma. Aˬ jeˬ miˇ neh ehˇ naˇ, ba la kʼoeˇ siˬ-ahˇ, Iˇjiˇtuˆ miˇ kʼahˬ laꞈ kʼoeˇ neh naw maꞈ doˆ laˇ-euˬ meh.

¹⁹“Dehꞈ beh beh le-euˬ aˬ li aˬ yuiꞈ deuˬ hawˇ-eu, naw maꞈ neh cu taˬ-euˬ jeˬ zaˬ deuˬ laꞈ kʼoeˇ, dehꞈ beh beh le-euˬ jeˬ zaˬ aˬ buˬ deuˬ dawˬ tawˆ luꞈ, ngaˬ-euˬ myawˬ pyeuꞈ-eu ma.

²⁰Ehˇ kʼawꞈ, dehꞈ beh beh le-euˬ mahˬ tahˬ laˆ-ahˇ, yawˇ zaˬ lawˇ dah nehˬ-awˇ, naw maꞈ zeuˇ kʼoꞈ geuꞈ nya meh. Kʼoeˇ loꞈ-ehˇ maˬ zeuˇ kʼoꞈ geuꞈ naˇ, mahˬ tahˬ laˆ-euˬ kawˬ lahˇ ngawˬ kʼehꞈ dzeh-awˬ. Dehꞈ beh beh le-euˬ aˬ li yawˬ gʼaˬ na luꞈ-ahˇ zeuˇ kʼoꞈ geuꞈ-awˬ. “Ngaˬ-ahˇ lawˇ nehˬ-eu jeˬ tiˬ jeˬ-iˬ maˬ ahˇ ni, tsawˇ haˬ tiˬ gʼaˬ-iˬ ngaˬ-euˬ dawˬ peh maˬ ya laˇ-a.

²¹“Naw maꞈ yawˬ ha-euˬ gaˇ mˇ-eu gʼaˇ duˬ aˇ nah koꞈ nah jaˆ-eu meh. Ehˇ kʼawꞈ, shiꞈ nah tiˬ nah-ahˇ, naw maꞈ gaˇ taˬ mˇ. Gaˇ tehˬ dui dui-eu deh yaˇ tsehˬ yamˬ hawˇ-eu cehˇ laˆ luiˆ yamˬ-ahˇ kʼawꞈ, aˇ nah heu nah-ahˇ naw maꞈ gaˇ maˬ ya mˇ-a.

²²“Naw maꞈ cehˇ yehˬ cehˇ diˬ dahˬ beh-eu yamˬ-ahˇ, cehˇ yehˬ cehˇ diˬ-eu bawˬ-iˬ gʼeh-awˇ, aˇ siˬ aˇ lu deuˬ pyaˆ uiˬ-eu tsahˬ gaˆ yamˬ-ahˇ, aˇ siˬ aˇ lu pyaˆ ahˇ-eu bawˬ-iˬ gʼeh-awˬ.

²³“Iˇsaˬleˬlaˆ tsawˇ haˬ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˬ-ahˇ, kʼaˬ dzeˇ zaˬ dawˬ tawˆ luꞈ tiˬ kʼoꞈ smˬ poˆ uˬ duˬ ya tahˬ laˇ meh.

²⁴Naw maꞈ-ahˇ muiˇ-eu tsawˇ haˬ deuˬ-ahˇ, naw maꞈ-euˬ mehˬ shi ngaˇ teh doˆ-awˇ, naw maꞈ jawˇ duˬ miˇ kʼahˬ jeˇ laˇ gʼaˬ ngeh, bawˬ-iˬ heu smˇ hmˬ gʼeh-eu aˇ yamˬ laꞈ kʼoeˇ, tsawˇ haˬ tiˬ gʼaˬ-iˬ naw maꞈ-euˬ miˇ kʼahˬ-ahˇ maˬ paˇ ceh geuꞈ laˇ meh.

²⁵“Naw maꞈ ngaˬ-ahˇ jeˬ zaˬ lawˇ ngeh, dehˬ tseˬ keuˬ taˬ-euˬ kaˬ muˇ maˬ ya lawˇ-a. Baˬsaˬkaˬ Bawˬ-iˬ gʼeh gaˇ sehꞈ-euˬ jeˬ zaˬ-euˬ shaˬ jiˇ, yawˬ nah yawˬ uˬ shawˬ paw keuˆ ni maˬ ya bi jaˆ keuˆ-a.

²⁶“Yawˬ kʼoꞈ na luꞈ, keuˆ beh beh le-eu dzaˬ la gʼo cehˇ deuˬ, Sahˬpaˬ Miˬyehˇ-euˬ nymˇ-ahˇ ya yuˇ laꞈ meh. Yawˇ zaˬ maˬ ehˇ, ciꞈ myehꞈ ciꞈ zaˬ maˬ ehˇ, aˬ ma mawˇ-euˬ aˬ coeˇ nehˬ-ehˇ maˬ ya caꞈ keuˬ-a.”

²⁷Kʼoeˇ naˇ, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Dawˬ heu deuˬ boꞈ ahˇ taˬ-awˬ. Aˬ jeˬ miˇ neh ehˇ naˇ, dawˬ heu deuˬ-ahˇ gʼoe-awˇ, nawˇ hawˇ-eu Iˇsaˬleˬlaˆ tsawˇ haˬ deuˬ-ahˇ ngaˇ dawˬ ma saˇ jaˇ dzaˬ-eu jeˬ pyeuꞈ-eu ma.”

²⁸Oeˬ tseˇ nah oeˬ tseˇ miˇ keuˆ ni, Moˇseˬ tiˬ jeˬ-iˬ maˬ dzaˬ maˬ dawˇ ni, Sahˬpaˬ Miˬyehˇ nehˬ-ehˇ kʼoeˇ gaˇ jawˇ-euˬ meh. Dawˬ ma saˇ jaˇ dawˬ deuˬ pyeuꞈ-eu zahˇ dawˬ kʼoꞈ dawˬ tseˇ dawˬ-ahˇ, kʼaˬ lo teˇ byaꞈ kʼoeˇ taˆ aˬ yawꞈ boꞈ-euˬ meh.

²⁹Moˇseˬ zahˇ dawˬ kʼoꞈ dawˬ tseˇ dawˬ yuˇ-awˇ, Siˇnaˆ gawˬ jawˬ-ahˇ neh zaꞈ ka le ngeh, aˬ yawꞈ-euˬ myaˆ pyawˬ yaw shehꞈ bya luꞈ-eu meh. Aˬ jeˬ miˇ neh ehˇ naˇ, Sahˬpaˬ Miˬyehˇ-ahˇ aˬ yawꞈ dawˬ ngehˬ cawˬ yaꞈ-euˬ miˇ neh meh. Ehˇ kʼawꞈ, aˬ yawꞈ-euˬ myaˆ pyawˬ yaw shehꞈ bya luꞈ-eu aˬ yawꞈ maˬ siˬ nya-a.

³⁰Aˬloˬ hawˇ-eu Iˇsaˬleˬlaˆ tsawˇ haˬ deuˬ Moˇseˬ-ahˇ haw ngeh, aˬ yawꞈ-euˬ myaˆ pyawˬ yaw shehꞈ bya luꞈ gaˇ ya mawˇ-awˇ, dawˬ peh maˬ le peuˬ-a.

³¹Ehˇ kʼawꞈ, Moˇseˬ aˬ yawꞈ maꞈ-ahˇ kuˇ ngeh, Aˬloˬ hawˇ-eu aˬ yuiꞈ aˬ tsu deuˬ dawˬ tawˆ luꞈ le-awˇ, aˬ yawꞈ maꞈ-ahˇ Moˇseˬ dawˬ ngehˬ cawˬ-euˬ meh.

³²Kʼoeˇ naˇ, Iˇsaˬleˬlaˆ tsawˇ haˬ dawˬ tawˆ luꞈ aˬ yawꞈ dawˬ peh uiˬ leˇ-awˇ, Siˇnaˆ gawˬ jawˬ kʼoeˇ taˆ, Sahˬpaˬ Miˬyehˇ neh aˬ yawꞈ-ahˇ biꞈ nehˬ-euˬ zahˇ dawˬ kʼoꞈ dawˬ dawˬ tawˆ luꞈ, aˬ yawꞈ maꞈ-ahˇ Moˇseˬ biꞈ nehˬ-euˬ meh.

³³Aˬ yawꞈ maꞈ-ahˇ a yawꞈ dawˬ ngehˬ cawˬ gʼaˬ ngeh, aˬ yawꞈ-euˬ myaˆ pyawˬ-ahˇ paˇ jeh yuˇ-awˇ dehˬ kaˬ-euˬ meh.

³⁴Sahˬpaˬ Miˬyehˇ jawˇ-eu Sehˬ gʼawˆ-ahˇ Moˇseˬ kʼaˇ le uˇ ngeh, aˬ yawꞈ-euˬ myaˆ pyawˬ-ahˇ dehˬ kaˬ taˬ-euˬ paˇ jeh kʼoeˇ lehˆ dzeh-eu meh. Aˬ yawꞈ paˇ doˆ le ngeh, Sahˬpaˬ Miˬyehˇ neh aˬ yawꞈ-ahˇ kʼaˇ bi ehˇ-euˬ jeˬ, Iˇsaˬleˬlaˆ tsawˇ haˬ deuˬ-ahˇ aˬ yawꞈ dzawˇ nehˬ le-eu meh.

³⁵Kʼoeˇ ngeh, a yawꞈ-euˬ myaˆ pyawˬ yaw shehꞈ bya gaˇ aˬ yawꞈ maꞈ ya mawˇ-euˬ meh. Kʼoeˇ naˇ, Sahˬpaˬ Miˬyehˇ-ahˇ yawˬ poˆ yawˬ maˬ ngehˬ cawˬ leˇ kʼoeˇ keuˆ ni, aˬ yawꞈ-euˬ myaˆ pyawˬ-ahˇ dehˬ kaˬ taˬ-euˬ meh.