Read Akha Doˆ-iˇ 35 Bible Online

Doˆ-iˇ 35 - Akha bible

Doˆ-iˇ 35

¹Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ-ahˇ Moˇseˬ kuˇ uiˬ-awˇ, heu loꞈ-ehˇ ehˇ nehˬ-euˬ meh. “Naw maꞈ heu loꞈ-ehˇ ya mˇ meh lehˇ, Sahˬpaˬ Miˬyehˇ dawˬ biꞈ taˬ-euˬ meh.

²Naw maꞈ yawˬ ha-euˬ gaˇ mˇ-eu gʼaˇ duˬ, aˇ yamˬ koꞈ nah jaˆ-eu meh. Ehˇ kʼawꞈ, shiꞈ nah tiˬ nah-aˬ, Sahˬpaˬ Miˬyehˇ pyeuꞈ-eu ngaˬ-ahˇ a nehˬ taˬ-euˬ muiˬ-eu shawˇ-eu gʼaˬ naˬ-naˬ-eu aˇ nah pyeuꞈ-eu meh. Aˇ nah kʼoeˇ nah laꞈ kʼoeˇ, gaˇ mˇ-eu tsawˇ haˬ aˬ geu gʼaˬ maˬ kaˬ, sehꞈ nehˬ gaˇ ya daˬ tehꞈ-a.

³Jawˇ nah ngeh nah-ahˇ, naw maꞈ-euˬ nymˇ laꞈ kʼoeˇ, miˬ dzaˬ tehꞈ-ehˇ kʼawꞈ maˬ ya baw doꞈ-a lehˇ ehˇ-eu meh.”

⁴Iˇsaˬleˬlaˆ tsawˇ haˬ dawˬ tawˆ luꞈ-ahˇ Moˇseˬ ehˇ nehˬ-eu, “Sahˬpaˬ Miˬyehˇ heu loꞈ-ehˇ dawˬ biꞈ taˬ-euˬ meh.

⁵Sahˬpaˬ Miˬyehˇ-ahˇ damˬ-awˬ. Sahˬpaˬ Miˬyehˇ-ahˇ kʼaˇ damˬ mawꞈ-eu tsawˇ haˬ deuˬ, shuiˇ maˬ ehˇ, pyuˇ maˬ ehˇ, guiˬ shuiˇ maˬ ehˇ,

⁶shawˇ jehˆ ni gʼeh-eu saˬ paˇ maˬ ehˇ, nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ paˇ maˬ ehˇ, ciꞈ myehꞈ caꞈ hm neh zaꞈ taˬ-euˬ saˬ paˇ maˬ ehˇ,

⁷naˬ yawˬ neˇ taˬ-euˬ yawˇ aˬ buˬ-euˬ baˆ kʼoˆ maˬ ehˇ, shawˇ jehˆ ni gʼeh-eu shaˬ kʼoˆ maˬ ehˇ, aˬkaˬshaˇ daˇ kawˬ maˬ ehˇ,

⁸tsiˇ kʼmˬ doꞈ-eu tsiˇ maˬ ehˇ, tseˇ doˆ-euˬ deuˬ-ahˇ lehꞈ-eu tsiˇ hawˇ-eu, doꞈdamˬ-eu tsiˇ yaw saw jeˬ maˬ ehˇ,

⁹Piˇ ma Yaw huiˬ gʼaˬ-euˬ pehˇ kʼahˬ pehˇ nymˇ hawˇ-eu kʼahˬ-ahˇ dehˬ daˬ duˬ-ahˇ guꞈ tsoꞈ-eu gʼaˇ duˬ, neˇ tseuˆ ni gʼeh-eu kʼaˬ lo sehˇ deuˬ hawˇ-eu kʼaˬ lo sehˇ nui deuˬ maˬ ehˇ, yuˇ laꞈ-awˇ damˬ-awˬ.

¹⁰“Naw maꞈ laꞈ kʼoeˇ, laꞈ myawˬ laꞈ muˆ kʼaˇ nya-eu deuˬ dawˬ tawˆ luꞈ laˇ-awˇ, Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ mˇ laˇ-awˬ.

¹¹Sehˬ gʼawˆ maˬ ehˇ, sehˬ gʼawˆ-ahˇ joe kaˬ-eu jeˬ hawˇ-eu kʼoeˇ taˆ taˆ saˬ tiˆ-ahˇ joe kaˬ-eu jeˬ maˬ ehˇ, kuˆ seuˬ hawˇ-eu teˇ byaꞈ deuˬ maˬ ehˇ, laꞈ law hawˇ-eu kʼawˇ zeuˇ deuˬ maˬ ehˇ,

¹²Dawˬ ma saˇ jaˇ Bahˬ keuˆ hawˇ-eu kʼoeˇ-euˬ baꞈ kawˬ deuˬ maˬ ehˇ, kʼoeˇ-euˬ kʼmˬ pymˬ maˬ ehˇ, bahˬ keuˆ-ahˇ taw kaˬ taˬ-eu saˬ paˇ maˬ ehˇ,

¹³hawˬ jeh hawˇ-eu hawˬ jeh baꞈ kawˬ deuˬ maˬ ehˇ, kʼmˬ maˬ oeˬ tsaꞈ deuˬ dawˬ tawˆ luꞈ maˬ ehˇ, Miˬyehˇ-ahˇ damˬ-eu kaˬ muˇ maˬ ehˇ,

¹⁴tsiˇ kʼmˬ doꞈ taˬ duˬ hawˇ-eu kʼoeˇ-euˬ keu ka deuˬ maˬ ehˇ, tsiˇ kʼmˬ hawˇ-eu tsiˇ maˬ ehˇ,

¹⁵yaw saw jeˬ doꞈ damˬ-eu lawˇ duˬ hawˇ-eu kʼoeˇ-euˬ baꞈ kawˬ maˬ ehˇ, tseˇ doˆ-euˬ deuˬ-ahˇ lehꞈ-eu tsiˇ hawˇ-eu doꞈ-awˇ damˬ-eu yaw saw jeˬ maˬ ehˇ, sehˬ gʼawˆ laˇ gʼoˆ-ahˇ taw-eu saˬ paˇ maˬ ehˇ,

¹⁶guiˬ shuiˇ shmˇ kaˇ tsoꞈ-eu miˬ dzaˬ-ahˇ dzah puiˆ-awˇ lawˇ-eu jeˬ lawˇ duˬ maˬ ehˇ, kʼoeˇ-euˬ kʼaˆ baꞈ kawˬ hawˇ-eu kʼoeˇ gaˇ taꞈ-eu keu ka dawˬ tawˆ luꞈ maˬ ehˇ, aˬ kuiˇ aˬ laꞈ dzuiꞈ shawˇ-eu sehˇ byehˇ hawˇ-eu kʼoeˇ-euˬ keu ka deuˬ maˬ ehˇ,

¹⁷sehˬ gʼawˆ kmˇ cehˇ mˇ lahˇ gaˇ taw-eu saˬ paˇ hawˇ-eu kʼawˇ zeuˇ deuˬ maˬ ehˇ, kmˇ cehˇ gʼoˆ kʼehˬ-ahˇ taw-eu saˬ paˇ deuˬ maˬ ehˇ,

¹⁸sehˬ gʼawˆ tsoˆ gaˇ hawˇ-eu kmˇ cehˇ mˇ lahˇ gaˇ geuꞈ-eu taꞈ cmˬ hawˇ-eu aˇ caˆ deuˬ maˬ ehˇ,

¹⁹Aˬloˬ hawˇ-eu aˬ yawꞈ-euˬ aˬ li deuˬ bi dm-eu gʼaˇ duˬ, piˇ ma deuˬ muiˬ-eu shawˇ-eu jawˇ duˬ-ahˇ uˇ leˇ ngeh dm-eu kʼahˬ sehˇ jaˆ-eu muiˬ-eu shawˇ-eu dm gʼaˬ dm lmˇ deuˬ maˬ ehˇ, jahˇ-awˬ.”

²⁰Kʼoeˇ ngeh, Iˇsaˬleˬlaˆ tsawˇ haˬ dawˬ tawˆ luꞈ gʼoꞈ-iˇ-euˬ meh.

²¹Kʼoeˇ naˇ, Sahˬpaˬ Miˬyehˇ jawˇ-eu sehˬ gʼawˆ tsoˆ gaˇ nui ma keuˆ-eu tsawˇ haˬ yawˬ gʼaˬ na luꞈ, Sahˬpaˬ Miˬyehˇ-ahˇ damˬ nehˬ laˇ-euˬ meh. Uˬ duˬ tahˬ ngeh zmˬ-eu gʼaˇ duˬ loˬ-eu jeˬ hawˇ-eu, piˇ ma deuˬ-euˬ dm gʼaˬ dm lmˇ guꞈ-eu gʼaˇ duˬ loˬ-eu jeˬ, aˬ yawꞈ maꞈ damˬ nehˬ laˇ-euˬ meh.

²²Kʼaˬ dzeˇ zaˬ maˬ ehˇ, zaˬ miˬ zaˬ maˬ ehˇ, nui ma keuˆ-eu tsawˇ haˬ yawˬ gʼaˬ na luꞈ, aˇ boꞈ boꞈ taˬ-euˬ taꞈ cmˬ deuˬ, shuiˇ naˬ bawˇ naˬ yoˆ deuˬ, shuiˇ laꞈ behˬ deuˬ, lahˇ dah deuˬ hawˇ-eu, kʼaˇ jaˆ-eu shuiˇ myawˬ guˇ deuˬ yuˇ laꞈ-awˇ, Sahˬpaˬ Miˬyehˇ-ahˇ damˬ nehˬ-euˬ meh.

²³Shawˇ jehˆ ni gʼeh-eu saˬ paˇ, nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ paˇ deuˬ, ciꞈ myehꞈ caꞈ hm neh zaꞈ taꞈ-euˬ saˬ paˇ deuˬ, naˬ yawˬ neˇ taˬ-eu yawˇ aˬ buˬ baˆ kʼoˆ hawˇ-eu shawˇ jehˆ ni gʼeh-eu shaˬ kʼoˆ, heu deuˬ kʼaˇ jaˆ-eu tsawˇ haˬ yawˬ gʼaˬ na luꞈ, heu deuˬ yuˇ laꞈ-eu meh.

²⁴Gʼeh nya-eu tsawˇ haˬ dawˬ tawˆ luꞈ, pyuˇ hawˇ-eu guiˬ shuiˇ yuˇ-awˇ, Sahˬpaˬ Miˬyehˇ-ahˇ damˬ nehˬ laˇ-euˬ meh. Aˬkaˬshaˇ daˇ kawˬ kʼaˇ jaˆ-eu tsawˇ haˬ deuˬ kʼawꞈ, loˬ-eu tsahˇ-ahˇ bi zmˬ-eu gʼaˇ duˬ, aˬkaˬshaˇ daˇ kawˬ deuˬ yuˇ laꞈ-euˬ meh.

²⁵Saˬ nmˇ saˬ paˇ kʼaˇ mˇ nya-eu zaˬ mi zaˬ dawˬ tawˆ luꞈ, aꞈ yawꞈ maꞈ neh shuiˇ taˬ-euˬ shawˇ jehˆ ni gʼeh-eu saˬ kahˇ pyuˇ hawˇ-eu, nyoeˇ leuˬ leuˬ-eu, neˇ naˆ naˆ-eu hawˇ-eu neˇ tseuˆ ni gʼeh-eu saˬ kahˇ deuˬ yuˇ laꞈ-euˬ meh.

²⁶Ciꞈ myehꞈ caꞈ hm neh kʼawꞈ, aˬ yawꞈ maꞈ saˬ kahˇ shuiˇ-euˬ meh.

²⁷Aˬ yuiꞈ aˬ tsu geuꞈ-eu tsawˇ haˬ deuˬ-aˬ, muiˬ-eu shawˇ-eu pehˇ kʼahˬ pehˇ mahˇ hawˇ-eu, kʼahˬ-ahˇ dehˬ daˬ duˬ-ahˇ guꞈ tsoꞈ-eu gʼaˇ duˬ, neˇ tseuˆ ni gʼeh-eu kʼaˬ lo sehˇ hawˇ-eu, kʼaˬ lo sehˇ nui deuˬ yuˇ laꞈ-euˬ meh.

²⁸Yaw saw jeˬ, tsiˇ kʼmˬ doꞈ-eu tsiˇ, tseˇ doˆ-euˬ deuˬ-ahˇ lehꞈ-eu tsiˇ hawˇ-eu, doꞈ-awˇ damˬ-eu yaw saw jeˬ kʼawꞈ, aˬ yawꞈ maꞈ yuˇ laꞈ-euˬ meh.

²⁹Moˇseˬ-ahˇ Sahˬpaˬ Miˬyehˇ dawˬ biꞈ taˬ-euˬ loꞈ-ehˇ, nui ma keuˆ-eu Iˇsaˬleˬlaˆ tsawˇ haˬ dawˬ tawˆ luꞈ, Sahˬpaˬ Miˬyehˇ-ahˇ damˬ nehˬ laˇ-euˬ meh.

³⁰Iˇsaˬleˬlaˆ tsawˇ haˬ deuˬ-ahˇ Moˇseˬ ehˇ nehˬ-eu, “Yuˇdaˆ tsawˇ haˬ Huˇyaˆ-euˬ oeˬ paˬ pyeuꞈ-awˇ, Uˇliˆ-euˬ aˬ li pyeuꞈ-eu Baˬzeˬlaˇ-ahˇ Sahˬpaˬ Miˬyehˇ tseˇ doˆ gʼaˬ-euˬ meh.

³¹Aˬ yawꞈ-ahˇ Miˬyehˇ-euˬ baoˬ biꞈ nehˬ-awˇ, laꞈ myawˬ laꞈ sawˆ mˇ-eu jeˬ-ahˇ taꞈ leˇ-eu noeˬ doˆ mˇ doˆ nya-eu zaˬ siˬ tsawˇ gahˇ biꞈ gʼaˬ taˬ-euˬ meh.

³²Shuiˇ, pyuˇ hawˇ-eu, guiˬ shuiˇ myawˬ guˇ deuˬ noeˬ doˆ mˇ doˆ nya-eu gʼaˇ duˬ maˬ ehˇ,

³³aˇ poeˬ kʼaˆ-eu kʼaˬ lo sehˇ deuˬ jeˬ juˇ nya-awˇ, taꞈ tsoꞈ guꞈ tsoꞈ nya-eu gʼaˇ duˬ maˬ ehˇ, laꞈ myawˬ laꞈ sawˆ mˇ-eu nui deuˬ gaˇ dawˬ tawˆ luꞈ mˇ nya-eu gʼaˇ duˬ maˬ ehˇ, zaˬ siˬ tsawˇ gahˇ biꞈ gʼaˬ-euˬ meh.

³⁴Aˬ yawꞈ hawˇ-eu Daˬ tsawˇ haˬ Aˬhiˇsaˬmaˇ-euˬ aˬ li Oˬhoˬliˆ aˬ nyaꞈ-ahˇ, laꞈ myawˬ laꞈ muˆ mˇ-eu gaˇ kawˆ aˬ cawˬ-ahˇ mehˬ nehˬ nya ni, zaˬ siˬ nui gahˇ biꞈ taˬ-euˬ meh.

³⁵Mawˇ kawˇ deuˬ hawˇ-eu aˇ boꞈ deuˬ taꞈ-eu ba jiˬ-euˬ gaˇ maˬ ehˇ, shawˇ jehˆ ni gʼeh-eu saˬ paˇ, nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ paˇ deuˬ hawˇ-eu, saˬ paˇ nui deuˬ zaꞈ nya-eu tsawˇ gahˇ maˬ ehˇ, heu deuˬ dawˬ tawˆ luꞈ-ahˇ yaw muiˬ paˬ-ehˇ mˇ nya ni, aˬ yawꞈ nyaꞈ-ahˇ tsawˇ gahˇ biꞈ taˬ-euˬ meh. Aˬ yawꞈ nyaꞈ-aˬ, yawˬ jeˬ na luꞈ mˇ nya-awˇ, gʼawˬ mya jeˬ noeˬ doˆ mˇ doˆ nya-eu gahˇ dui dui-eu tsawˇ haˬ pyeuꞈ-eu meh.