Read Akha Doˆ-iˇ 37 Bible Online

Doˆ-iˇ 37 - Akha bible

Doˆ-iˇ 37

¹Baˬzeˬlaˇ-aˬ, aˬ kaˬ shaˇ daˇ kawˬ yuˇ-awˇ, yaw mahˇ paw nyiˬ caˆ tiˬ toˇ, yaw jeˇ paw tiˬ caˆ tiˬ toˇ, yaw goˇ paw tiˬ caˆ tiˬ toˇ byah-eu Dawˬ ma saˇ jaˇ Bahˬ keuˆ taꞈ-euˬ meh.

²Bahˬ keuˆ-euˬ laꞈ kʼoeˇ paw hawˇ-eu laꞈ nyiˇ paw shuiˇ yaw-awˇ, jawˬ jawˬ-ehˇ shuiˇ daˇ bahˇ bahˇ-euˬ meh.

³Bahˬ keuˆ-ahˇ baꞈ-eu gʼaˇ duˬ, shuiˇ daˇ kʼahˇ oeˬ kʼahˇ jahˇ-awˇ, bahˬ keuˆ-euˬ aˬ kuiˇ oeˬ kahˬ-ahˇ, tiˬ paw dzeˇ nyiˬ kʼahˇ pyawˇ-ehˇ, laꞈ naˬ loꞈ-ehˇ tsoꞈ-euˬ meh.

⁴Aˬ kaˬ shaˇ daˇ kawˬ neh kʼaˆ baꞈ kawˬ jahˇ-awˇ, shuiˇ yaw-euˬ meh.

⁵Kʼoeˇ naˇ, bahˬ keuˆ-euˬ kʼoeˇ paˆ maˇ paˆ tsoꞈ-eu shuiˇ daˇ kʼahˇ kʼoeˇ deuˬ-ahˇ, kʼaˆ baꞈ kawˬ cawˬ ahˇ-euˬ meh.

⁶Maˇ jawˆ ni gʼeh-eu shuiˇ yuˇ-awˇ, yaw mahˇ paw nyiˬ caˆ tiˬ toˇ, yaw jeˇ paw tiˬ caˆ tiˬ toˇ byah-eu bahˬ keuˆ kʼmˬ pymˬ tiˬ hmˬ aˬ yawꞈ jahˇ-euˬ meh.

⁷Kʼoeˇ naˇ, shuiˇ yuˇ-awˇ, Jeˬluˇbeˬ[15] aˇ baˇ nyiˬ hmˬ tehˆ-euˬ meh.

⁸Mawˇ kawˇ kʼoeˇ nyiˬ hmˬ, bahˬ keuˆ kʼmˬ pymˬ aˬ yawꞈ-ahˇ tiˬ poˆ tehꞈ-ehˇ jahˇ tsoꞈ-awˇ, tiˬ paw dzeˇ dzaˬ-ahˇ tiˬ hmˬ bi tsoꞈ-euˬ meh.

⁹Jeˬluˇbeˬ aˇ baˇ kʼoeˇ nyiˬ hmˬ, bahˬ keuˆ kʼmˬ pymˬ kʼoeˇ dzeˇ heu dzeˇ-ahˇ tiˬ hmˬ tiˇ hmˬ mehˬ shiˬ pyawˇ-ehˇ bi tsoꞈ-awˇ, aˬ dahˇ cawˬ ja-awˇ, bahˬ keuˆ kʼmˬ pymˬ-ahˇ bi dehˬ kaˬ taˬ-euˬ meh.

¹⁰Aˬkaˬshaˇ daˇ kawˬ yuˇ-awˇ, yaw mahˇ paw nyiˬ caˆ, yaw jeˇ paw tiˬ caˆ, yaw goˇ paw tiˬ caˆ tiˬ toˇ byah-eu hawˬ jeh tiˬ hmˬ aˬ yawꞈ jahˇ-euˬ meh.

¹¹Hawˬ jeh-ahˇ maˇ jawˆ ni gʼeh-eu shuiˇ yaw-awˇ, jawˬ jawˬ-ehˇ, shuiˇ daˇ bahˇ bahˇ-euˬ meh.

¹²Hawˬ jeh mehˬ dzaˬ caw caw-ehˇ laꞈ zaˬ tiˬ daˬ byah ni daˇ bahˇ jahˇ baw-awˇ, daˇ bahˇ kʼoeˇ jawˬ jawˬ-ehˇ, shuiˇ daˇ bahˇ paˇ bahˇ-euˬ meh.

¹³Shuiˇ daˇ kʼahˇ oeˬ hmˬ jahˇ-awˇ, hawˬ jeh-euˬ laꞈ coeˇ oeˬ pyawˬ-ahˇ tsoꞈ-eu aˬ kuiˇ oeˬ kahˬ-ahˇ laꞈ naˬ jahˇ tsoꞈ-euˬ meh.

¹⁴Kʼaˆ baꞈ kawˬ cawˬ ahˇ duˬ pyeuꞈ-eu shuiˇ daˇ kʼahˇ kʼoeˇ oeˬ kʼahˇ-ahˇ, hawˬ jeh mehˬ dzaˬ-ahˇ jaˆ-eu shuiˇ daˇ bahˇ dawˬ peh tehˬ ni, bi tsoꞈ-euˬ meh.

¹⁵Aˬkaˬshaˇ daˇ kawˬ neh, kʼaˆ baꞈ kawˬ jahˇ-awˇ, shuiˇ yaw-euˬ meh,

¹⁶Aˬ gaꞈ dzaˇ uiˇ lawˇ ngeh zmˬ-eu gʼaˇ duˬ, hawˬ gʼawˆ, kʼmˬ maˬ, ciˬ cuˇ hawˇ-eu naˬ bo deuˬ-ahˇ, maˇ jawˆ ni gʼeh-eu shuiˇ neh tehꞈ-ehˇ jahˇ-euˬ meh.

¹⁷Maˇ jawˆ ni gʼeh-eu shuiˇ yuˇ-awˇ, tsiˇ kʼmˬ doꞈ taˬ duˬ aˬ yawꞈ jahˇ-euˬ meh. Dawˬ pehˬ hawˇ-eu gʼawˇ pah kʼawˇ zeuˇ-ahˇ shuiˇ neh tehˆ-awˇ, aˇ cuˬ aˇ yehˆ aˇ baˇ deuˬ kʼawꞈ, tiˬ poˆ tehꞈ-ehˇ kʼoeˇ gaˇ jahˇ tsoꞈ-euˬ meh.

¹⁸Uˬ laꞈ koꞈ laꞈ jahˇ tsoꞈ-awˇ, tiˬ paw paˆ smˇ laꞈ bi tsoꞈ-euˬ meh.

¹⁹Uˬ laꞈ kʼoeˇ koꞈ laꞈ aˬ yawꞈ laꞈ yawꞈ-ahˇ, aˇ cuˬ aˇ yehˆ yehˆ luꞈ-eu aˬ laˬ moˬ aˇ yehˆ aˇ baˇ smˬ baˇ jahˇ tsoꞈ-euˬ meh.

²⁰Gʼawˇ pah kʼawˇ zeuˇ-ahˇ, aˇ cuˬ aˇ yehˆ yehˆ luꞈ-eu aˬ laˬ moˬ aˇ yehˆ aˇ baˇ oeˬ baˇ jahˇ tsoꞈ-euˬ meh.

²¹Uˬ laꞈ kʼoeˇ smˬ gu aˬ yawꞈ gu yawꞈ-euˬ dawˬ pehˬ-ahˇ, aˇ yehˆ aˇ cuˬ tiˬ hmˬ jahˇ tsoꞈ-euˬ meh.

²²Aˇ yehˆ aˇ cuˬ kʼoeˇ deuˬ hawˇ-eu, uˬ laꞈ kʼoeˇ deuˬ, tsiˇ kʼmˬ doꞈ taˬ duˬ kʼoeˇ hmˬ nehˬ-ehˇ tiˬ gaˇ tsoꞈ tawꞈ ni, maˇ jawˆ ni gʼeh-eu shuiˇ neh tehˆ taˬ-euˬ meh.

²³Tsiˇ kʼmˬ doꞈ taˬ duˬ kʼoeˇ taˆ ciˬ daˆ-eu gʼaˇ duˬ, tsiˇ kʼmˬ shiꞈ kʼmˬ jahˇ-awˇ, ciˆ nyawˆ hawˇ-eu tsiˇ diꞈ deh kʼaˇ ahˇ duˬ kʼmˬ maˬ-ahˇ, maˇ jawˆ ni gʼeh-eu shuiˇ neh jahˇ-euˬ meh.

²⁴Tsiˇ kʼmˬ doꞈ taˬ duˬ hawˇ-eu, kʼoeˇ-euˬ keu ka jahˇ-eu gʼaˇ duˬ, maˇ jawˆ ni gʼeh-eu shuiˇ nyiˬ tseˇ tiꞈ jawꞈ-iˬ aˬ yawꞈ zmˬ-euˬ meh.

²⁵Tiˬ caˆ oeˬ bawˬ byah-awˇ, nyiˬ caˆ goˇ-eu yaw saw jeˬ doꞈ-awˇ damˬ-eu lawˇ duˬ tiˬ hmˬ aˬkaˬshaˇ daˇ kawˬ neh aˬ yawꞈ jahˇ-euˬ meh. Laꞈ coeˇ oeˬ coeˇ-ahˇ tsoꞈ-eu uˬ coeˇ oeˬ kahˬ kʼawꞈ, tiˬ poˆ tehꞈ-ehˇ lawˇ duˬ aˬ yawꞈ-ahˇ jahˇ tsoꞈ-euˬ meh.

²⁶Lawˇ duˬ-euˬ uˬ duˬ pyawˬ naˬ oeˬ pyawˬ luꞈ hawˇ-eu, uˬ coeˇ deuˬ-ahˇ, maˇ jawˆ ni gʼeh-eu shuiˇ yaw-awˇ, lawˇ duˬ jawˬ jawˬ-ehˇ shuiˇ daˇ bahˇ bahˇ-euˬ meh.

²⁷Kʼaˆ baꞈ kawˬ cawˬ ahˇ-awˇ baꞈ nya ni, lawˇ duˬ kʼoeˇ paˆ maˇ paˆ-ehˇ, shuiˇ daˇ bahˇ-euˬ laꞈ oˆ paw dzeˇ, shuiˇ daˇ kʼahˇ nyiˬ hmˬ jahˇ tsoꞈ-euˬ meh.

²⁸Kʼaˆ baꞈ kawˬ-ahˇ aˬ kaˬ shaˇ daˇ kawˬ neh jahˇ-awˇ, shuiˇ yaw-euˬ meh.

²⁹Tsiˇ yaw saw jeˬ jahˇ ngeh, gʼawˬ mya jeˬ keuˬ-awˇ jahˇ-euˬ loꞈ-ehˇ, tseˇ doˆ-euˬ deuˬ-ahˇ lehꞈ-eu gʼaˇ duˬ, muiˬ-eu shawˇ-eu tsiˇ hawˇ-eu saw dui dui-eu doꞈ-awˇ damˬ-eu jeˬ kʼawꞈ aˬ yawꞈ jahˇ-euˬ meh.