Read Akha Doˆ-iˇ 4 Bible Online

Doˆ-iˇ 4 - Akha bible

Doˆ-iˇ 4

¹Kʼoeˇ naˇ, Sahˬpaˬ Miˬyehˇ-ahˇ Moˇseˬ ehˇ nehˬ-eu, “Ehˇ kʼawꞈ, Iˇsaˬleˬlaˆ tsawˇ haˬ deuˬ ngaˬ-ahˇ maˬ jah-ehˇ, ngaˬ-euˬ ehˇ dawˬ maˬ naˇ haˬ ni, ‘Nawˬ-euˬ mehˬ shi Sahˬpaˬ Miˬyehˇ doˆ le--euˬ maˬ ngeuˇ-aˇ’ lehˇ ehˇ laˇ naˇ, ngaˇ aˬ joˆ-ehˇ ya jahˇ nmˇ.”

²“Nawˇ aˬ jeˬ tuˆ tehˬ luꞈ te” lehˇ, Moˇseˬ-ahˇ Sahˬpaˬ Miˬyehˇ naˇ haˬ ngeh, “Gawˬ yoeˬ tiˬ hmˬ tuˆ tehˬ luꞈ-eu ma” lehˇ, Moˇseˬ ehˇ kʼoꞈ nehˬ-euˬ meh.

³Kʼoeˇ naˇ, “Gawˬ yoeˬ teu hmˬ miˇ tsa pyehˬ dzeh-awˬ” lehˇ, Moˇseˬ-ahˇ Sahˬpaˬ Miˬyehˇ ehˇ nehˬ-euˬ meh. Moˇseˬ gawˬ yoeˬ kʼoeˇ hmˬ miˇ tsa pyehˬ dzeh ngeh, gawˬ yoeˬ kʼoeˇ aˇ lawˇ pyeuꞈ-iˇ-awˇ, Moˇseˬ cehˆ-euˬ meh.

⁴Kʼoeˇ ngeh, “Awˆ kʼoꞈ-awˇ aˇ lawˇ-euˬ dawˬ miˬ-ahˇ nyehꞈ-awˬ” lehˇ, Moˇseˬ-ahˇ Sahˬpaˬ Miˬyehˇ ehˇ nehˬ-euˬ meh. Moˇseˬ awˆ kʼoꞈ-awˇ, aˇ lawˇ kʼoeˇ mawˇ-euˬ dawˬ miˬ-ahˇ nyehꞈ ngeh, gawˬ yoeˬ paˇ pyeuꞈ-iˇ-euˬ meh.

⁵“Aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu, Aˬbyaˬhaˬ, Iˇtsaˆ hawˇ-eu Yaˬkoˆ-euˬ Sahˬpaˬ Miˬyehˇ nawˬ-euˬ mehˬ shi doˆ le-euˬ gaˇ aˬ yawꞈ maꞈ jah laˇ ni, kʼoeˇ loꞈ-ehˇ jahˇ mehˬ nehˬ-awˬ” lehˇ, Moˇseˬ-ahˇ Sahˬpaˬ Miˬyehˇ ehˇ nehˬ-euˬ meh.

⁶Kʼoeˇ naˇ, “Nawˬ-euˬ aˬ laꞈ nawˬ-euˬ pehˇ kʼahˬ laꞈ kʼoeˇ cawˬ ahˇ-awˬ” lehˇ, Moˇseˬ-ahˇ Sahˬpaˬ Miˬyehˇ ehˇ nehˬ-euˬ meh. Moˇseˬ pehˇ kʼahˬ laꞈ kʼoeˇ aˬ laꞈ cawˬ ahˇ-awˇ, paˇ cawˬ doˆ haw ngeh, ngehˇ loꞈ-ehˇ pyuˇ deuˬ ni gʼeh-eu maˇ naˇ gʼawˬ mya ni doˆ laˇ-awˇ, coiˬ doi-euˬ aˬ laꞈ loꞈ-ehˇ pyeuꞈ laˇ taˬ-euˬ gaˇ ya mawˇ-euˬ meh.

⁷“Nawˬ-euˬ aˬ laꞈ pehˇ kʼahˬ laꞈ kʼoeˇ tiˬ poˆ paˇ cawˬ ahˇ-awˬ” lehˇ, Moˇseˬ-ahˇ Sahˬpaˬ Miˬyehˇ paˇ ehˇ nehˬ-euˬ meh. Moˇseˬ gʼeh, aˬ yawꞈ-euˬ aˬ laꞈ pehˇ kʼahˬ laꞈ kʼoeˇ tiˬ poˆ paˇ cawˬ ahˇ-awˇ cawˬ doˆ haw ngeh, aˬ yawꞈ yaw oeˇ loꞈ-ehˇ paˇ muiˬ laˇ-euˬ meh.

⁸Moˇseˬ-ahˇ Sahˬpaˬ Miˬyehˇ ehˇ nehˬ-eu, “Zahˬ leˇ paˬ-ehˇ gʼeh-eu yaw beh jeˬ nawˇ jahˇ mehˬ nehˬ ngeh, aˬ yawꞈ maꞈ nawˬ-ahˇ maˬ jah naˇ, zahˬ leˇ paˬ-ehˇ gʼeh-eu nyiˬ jeˬ tiˬ jeˬ paˇ jahˇ mehˬ nehˬ-awˬ. Aˬ yawꞈ maꞈ nawˬ-ahˇ jah laˇ tehꞈ-a.

⁹Zahˬ leˇ paˬ-ehˇ gʼeh-eu kʼoeˇ nyiˬ jeˬ luꞈ jahˇ mehˬ nehˬ gʼaˬ-euˬ kʼawꞈ, aˬ yawꞈ maꞈ nawˬ-ahˇ maˬ jah-ehˇ nawˬ neh ehˇ nehˬ-euˬ jeˬ-ahˇ maˬ naˇ haˬ geuꞈ naˇ, Niˬlaˇ lawˇ baˬ-ahˇ iˇ cuꞈ ui cuiˆ kʼawꞈ doˆ-awˇ, miˇ tsa shehˆ dzeh mehˬ nehˬ-awˬ. Iˇ cuꞈ kʼoeˇ shiˬ pyeuꞈ-iˇ tehꞈ-a.”

¹⁰Ehˇ kʼawꞈ, Moˇseˬ paˇ ehˇ-eu, “Sahˬpaˬ Miˬyehˇ-oˇ, ngaˬ-ahˇ taˬ bi iˇ laꞈ. Ngaˇ-aˬ, dawˬ yaw muiˬ paˬ-ehˇ ngehˬ nya-eu tsawˇ haˬ pyeuꞈ-eu maˬ ngeuˇ. Nawˇ ngaˬ-ahˇ dawˬ ngehˬ cawˬ dahˬ beh ngeh neh nymˬ-mˇ keuˆ ni, dawˬ yaw muiˬ paˬ-ehˇ ngehˬ nya-eu tsawˇ haˬ ngaˇ maˬ pyeuꞈ laˇ-aˬ siˬ. Ngaˇ-aˬ, dawˬ ngehˬ-eu paw yaw laꞈ-i tiˬ gʼaˬ pyeuꞈ-awˇ, dawˬ yaw kawˇ-ehˇ maˬ ngehˬ doˆ nya-eu uˬ taꞈ, dawˬ ngehˬ-eu yaw myaꞈ nya.”

¹¹Moˇseˬ-ahˇ Sahˬpaˬ Miˬyehˇ ehˇ nehˬ-eu, “Tsawˇ haˬ zaˬ-ahˇ aˬ suˇ gʼaˬ neh kʼaˬ meh beh tsoꞈ nehˬ taˬ ta. Tsawˇ haˬ zaˬ naˬ bawˬ bawˬ-iˇ ni maˬ ehˇ, aˬ dzawˬ dzawˬ-iˇ ni maˬ ehˇ, aˬ suˇ gʼaˬ jahˇ nehˬ ta. Sahˬpaˬ Miˬyehˇ neh jahˇ nehˬ-euˬ maˬ ngeuˇ-a loˇ.

¹²Nawˇ dawˬ ngehˬ nya ni ngaˇ caw ba-awˇ, nawˇ aˬ joˆ-ehˇ ya ngehˬ ya tmˇ-eu ngaˇ mehˬ nehˬ ma.”

¹³Ehˇ kʼawꞈ, Moˇseˬ ehˇ-eu, “Sahˬpaˬ Miˬyehˇ-oˇ, ngaꞈ-ahˇ maˬ ngeuˇ-ehˇ, aˬ geu gʼaˬ kʼawꞈ tiˬ gʼaˬ bi iˇ-awˬ lehˇ nawˬ-ahˇ ngaˇ shaˇ-eu ma.”

¹⁴Kʼoeˇ ngeh jawˇ, Moˇseˬ-ahˇ Sahˬpaˬ Miˬyehˇ nui ma pehˇ laˇ-awˇ, “Nawˬ-euˬ aˇ doˆ Leˬbiˇ tsawˇ haˬ Aˬloˬ jawˇ-eu maˬ ngeuˇ loˇ. Aˬ yawꞈ dawˬ yaw muiˬ paˬ-ehˇ ngehˬ nya-eu tsawˇ haˬ pyeuꞈ-eu ngaˇ siˬ nya ma. Nawˬ-ahˇ tahˬ puˬ laˇ-eu lehˇ, nymˬ-mˇ aˬ yawꞈ aˬ diˇ aˬ maˇ laˇ luꞈ meh. Nawˬ-ahˇ ya mawˇ ngeh, aˬ yawꞈ laˬ kʼaˬ cehˇ tehꞈ-a.

¹⁵Aˬ yawꞈ nehˬ-ehˇ nawˇ ja cawˬ-awˇ, aˬ joˆ-ehˇ ya ngehˬ ya tmˇ-eu gaˇ kawˆ aˬ yawꞈ-ahˇ nawˇ mehˬ nehˬ nya tehꞈ-a. Naw nyaꞈ nyiˬ gʼaˬ luꞈ dawˬ ngehˬ nya ni ngaˇ caw ba-awˇ, aˬ joˆ-ehˇ ya mˇ-eu gaˇ kawˆ naw nyaꞈ-ahˇ ngaˇ mehˬ nehˬ ma.

¹⁶Aˬ yawꞈ-aˬ, nawꞈ-euˬ gʼaˇ duˬ dawˬ ngehˬ dah-eu gʼaˬ geuꞈ-awˇ, nawˬ-euˬ dah zaˇ aˬ cawˬ-ahˇ dawˬ ngehˬ cawˬ tehꞈ-a. Nawˇ-aˬ, aˬ yawꞈ gʼaˇ duˬ Miˬ yehˇ loꞈ-ehˇ pyeuꞈ-awˇ, aˬ yawꞈ aˬ joˆ-ehˇ ya ngehˬ ya tmˇ-eu gaˇ kawˆ, aˬ yawꞈ-ahˇ nawˇ ya mehˬ nehˬ tehꞈ-a.

¹⁷Zahˬ leˇ paˬ-ehˇ gʼeh-eu jeˬ mˇ mehˬ-eu gʼaˇ duˬ, gawˬ yoeˬ heu hmˬ nawˇ yuˇ gʼeh-awˬ.”

¹⁸Aˬ yawꞈ-euˬ tsawˇ mawˬ Yeˬdaˬyoˇ jawˇ gaˇ Moˇseˬ gʼoꞈ-iˇ-awˇ, “Iˇjiˇtuˆ miˇ kʼahˬ laꞈ kʼoeˇ jawˇ-eu ngaˬ-eu aˬ yuiꞈ aˬ nyiˇ deuˬ dehꞈ luꞈ jawˇ luꞈ nga siˬ loˇ lehˇ haw-iˇ-eu gʼaˇ duˬ, ngaˬ-ahˇ Iˇjiˇtuˆ miˇ kʼahˬ-ahˇ bi gʼoꞈ-iˇ laꞈ-awˬ” lehˇ ehˇ nehˬ ngeh, “Gʼoꞈ-iˇ nya tehꞈ-a” lehˇ Yeˬdaˬyoˇ aˬ yawꞈ-ahˇ ehˇ nehˬ-euˬ meh.

¹⁹Miˇdiˬyaˬ miˇ kʼahˬ laꞈ kʼoeˇ Moˇseˬ jawˇ luꞈ ngeh, “Iˇjiˇtuˆ miˇ kʼahˬ-ahˇ gʼoꞈ-iˇ-awˬ. Nawˬ-ahˇ kʼaˇ sehꞈ mawꞈ-eu tsawˇ haˬ deuˬ maˬ paˇ dehꞈ meh” lehˇ, aˬ yawꞈ-ahˇ Sahˬpaˬ Miˬyehˇ ehˇ nehˬ-euˬ meh.

²⁰Kʼoeˇ ngeh, aˬ yawꞈ-euˬ nymˇ dahˬ hawˇ-eu aˬ yawꞈ-euˬ aˬ li deuˬ-ahˇ mahˬ tahˬ laˆ kʼoeˇ taˆ bi dziˬ-awˇ, Iˇjiˇtuˆ miˇ kʼahˬ-ahˇ gʼoꞈ-iˇ-eu lehˇ, Moˇseˬ doˆ-iˇ-euˬ meh. Miˬyehˇ neh aˬ yawꞈ-ahˇ yuˇ gʼeh-awˬ lehˇ ehˇ nehˬ-euˬ gawˬ yoeˬ kʼoeˇ hmˬ, Iˇjiˇtuˆ miˇ kʼahˬ-ahˇ Moˇseˬ yuˇ gʼeh-euˬ meh.

²¹Moˇseˬ-ahˇ Sahˬpaˬ Miˬyehˇ ehˇ nehˬ-eu, “Iˇjiˇtuˆ miˇ kʼahˬ-ahˇ nawˇ gʼoꞈ keuˆ-iˇ ngeh, ngaˬ neh nawˬ-ahˇ baoˬ biꞈ nehˬ-awˇ bi mˇ-euˬ zahˬ leˇ paˬ-ehˇ gʼeh-eu jeˬ, sahˬ paˬ mehˬ shi maˬ ngehˇ ni mˇ mehˬ nehˬ-awˬ. Ehˇ kʼawꞈ, sahˬ paˬ kʼoeˇ gʼaˬ Iˇsaˬleˬlaˆ tsawˇ haˬ deuˬ-ahˇ maˬ pyehˬ nehˬ ni nui ma gʼahˇ laˇ-eu gʼaˇ duˬ ngaˇ jahˇ nehˬ ma.

²²Kʼoeˇ ngeh, Sahˬpaˬ Miˬyehˇ heu loꞈ-ehˇ ehˇ-eu meh lehˇ aˬ yawꞈ-ahˇ nawˇ ehˇ nehˬ-awˬ. ‘Iˇsaˬleˬlaˆ tsawˇ haˬ-aˬ, ngaˬ-euˬ aˬ li aˬ yuiꞈ yuiꞈ saˬ gʼaˬ pyeuꞈ-eu ma.

²³Ngaˬ-ahˇ uˬ duˬ bi tahˬ laˇ-eu gʼaˇ duˬ, ngaˬ li-ahˇ pyehˬ nehˬ-awˬ lehˇ, ngaˇ nawˬ-ahˇ ehˇ-euˬ kʼawꞈ, nawˇ maˬ pyehˬ nehˬ-eu miˇ neh, nymˬ-mˇ ngaˇ nawˬ-euˬ aˬ li aˬ yuiꞈ yuiꞈ saˬ gʼaˬ-ahˇ sehꞈ-eu lehˇ gʼeh-eu ma’ lehˇ ehˇ nehˬ-awˬ.”

²⁴Gaˇ pehˇ-ahˇ sehˬ gʼawˆ gʼawˆ-awˇ yaꞈ luꞈ ngeh, Sahˬpaˬ Miˬyehˇ Moˇseˬ-ahˇ tahˬ puˬ-awˇ sehꞈ-eu lehˇ leh jeh-euˬ meh.

²⁵Kʼoeˇ ngeh, aˬ yawꞈ-euˬ nymˇ dahˬ Ziˬpoˇlaˬ-aˬ, mi cehˇ mi seuˬ loꞈ-ehˇ taˆ-eu kʼaˬ lo lo pyehˬ neh aˬ yawꞈ-euˬ aˬ li-ahˇ baˆ kʼoˆ mehˬ dzaˬ yehˬ-awˇ, Moˇseˬ-euˬ aˬ kuiˇ-ahˇ baˆ kʼoˆ mehˬ dzaˬ kʼoeˇ neh toeˬ ciˆ-awˇ, “Aˬ diˇ aˬ maˇ nawˇ-aˬ, shiˬ-ahˇ taꞈ leˇ-eu ngaˬ-euˬ kʼaˬ dzeˇ zaˬ pyeuꞈ-eu ma” lehˇ ehˇ-eu meh. Kʼoeˇ naˇ, Sahˬpaˬ Miˬyehˇ Moˇseˬ-ahˇ maˬ sehꞈ ni byehˇ-euˬ meh.

²⁷Aˇ yamˬ kʼoeˇ yamˬ laꞈ kʼoeˇ, “Moˇseˬ-ahˇ tahˬ puˬ-iˇ-eu gʼaˇ duˬ, bawˇ tsahˬ bawˇ dahˇ-ahˇ iˇ-awˬ” lehˇ, Aˬloˬ-ahˇ Sahˬpaˬ Miˬyehˇ ehˇ nehˬ-euˬ meh. Kʼoeˇ ngeh, Aˬloˬ iˇ-awˇ, Moˇseˬ-ahˇ muiˬ-eu shawˇ-eu gawˬ jawˬ-ahˇ tahˬ puˬ-awˇ, mehˬ cuˇ cuˇ nehˬ-euˬ meh.

²⁸Kʼoeˇ naˇ, aˬ joˆ-ehˇ ya ngehˬ ya tmˇ-eu gaˇ kawˆ, Sahˬpaˬ Miˬyehˇ neh Moˇseˬ-ahˇ kʼaˇ ehˇ nehˬ-euˬ jeˬ dawˬ tawˆ luꞈ maˬ ehˇ, Sahˬpaˬ Miˬyehˇ neh bi mˇ-euˬ zahˬ leˇ paˬ-ehˇ gʼeh-eu jeˬ gaˇ kawˆ dawˬ tawˆ luꞈ maˬ ehˇ, Aˬloˬ-ahˇ Moˇseˬ dzawˇ nehˬ-euˬ meh.

²⁹Kʼoeˇ naˇ, Moˇseˬ hawˇ-eu Aˬloˬ aˬ nyaꞈ iˇ-awˇ, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ dawˬ tawˆ luꞈ-ahˇ, tiˬ gaˇ kuˇ uiˬ-euˬ meh.

³⁰Moˇseˬ-ahˇ Sahˬpaˬ Miˬyehˇ neh kʼaˇ bi ehˇ-euˬ jeˬ dawˬ tawˆ luꞈ, aˬ yawꞈ maꞈ-ahˇ Aˬ loˬ ehˇ nehˬ-awˇ, zahˬ leˇ paˬ-ehˇ gʼeh-eu jeˬ, aˬ yawꞈ maꞈ-euˬ mehˬ shi Moˇseˬ mˇ mehˬ nehˬ-euˬ meh.

³¹Kʼoeˇ ngeh, tsawˇ haˬ kʼoeˇ deuˬ jah laˇ-awˇ, Iˇsaˬleˬlaˆ tsawˇ haˬ deuˬ jawˇ gaˇ Sahˬpaˬ Miˬyehˇ oe-awˇ, aˬ yawꞈ maꞈ ya daˬ luꞈ-eu jeˬ-ahˇ mawˇ gʼaˬ-euˬ gaˇ kawˆ ya gaˬ ngeh, aˬ yawꞈ maꞈ miˇ tsaˬ-ahˇ awˆ byaˆ-awˇ, Sahˬpaˬ Miˬyehˇ-ahˇ uˬ duˬ tahˬ-euˬ meh.