Read Akha Doˆ-iˇ 6 Bible Online

Doˆ-iˇ 6 - Akha bible

Doˆ-iˇ 6

¹Kʼoeˇ ngeh, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Sahˬ paˬ kʼoeˇ gʼaˬ-ahˇ ngaˇ aˬ joˆ-ehˇ jahˇ nehˬ-eu lehˇ gʼeh-eu gaˇ kawˆ, nymˬ-mˇ nawˇ ya mawˇ tehꞈ-a. Ngaˬ-euˬ tsawˇ haˬ-ahˇ maˬ pyehˬ nehˬ-ehˇ maˬ jawˇ tehˬ coeˇ ngeh keuˆ ni aˬ yawꞈ-ahˇ ngaˇ jahˇ nehˬ ma. Aˬ diˇ aˬ maˇ, aˬ yawꞈ maꞈ-ahˇ miˇ kʼahˬ heu kʼahˬ laꞈ kʼoeˇ neh ya teh doˆ gaˇ keuˆ ni, aˬ yawꞈ-ahˇ ngaˇ jahˇ nehˬ ma.”

²Moˇseˬ-ahˇ Miˬyehˇ ehˇ nehˬ-eu, “Ngaˇ-aˬ Sahˬpaˬ Miˬyehˇ ma.

³Aˬ byaˬ haˬ, Iˇtsaˆ hawˇ-eu Yaˬkoˆ-ahˇ, Baoˬ huiˬ-eu Miˬyehˇ loꞈ-ehˇ ngaˬ-euˬ gʼawˇ mawˇ ngaˇ pah mehˬ nehˬ-euˬ ma. Ehˇ kʼawꞈ, Sahˬpaˬ Miˬyehˇ lehˇ kuˇ-eu muiˬ-eu shawˇ-eu ngaˬ-euˬ tsawˇ myahˇ aˬ yawꞈ maꞈ-ahˇ maˬ bi siˬ-aˬ.

⁴Aˬ yawꞈ maꞈ nehˬ-ehˇ ngaˇ dawˬ ma saˇ jaˇ dzaˬ-eu laꞈ kʼoeˇ, boeˇ miˬ siˬ kʼaˬ loꞈ-ehˇ aˬ yawꞈ maꞈ ya dehꞈ ya jawˇ yaꞈ-euˬ Kaˬnaˬ miˇ kʼahˬ kʼoeˇ, aˬ yawꞈ maꞈ-ahˇ ngaˇ biꞈ ma lehˇ, ehˇ tsehˆ taˬ-euˬ ma.

⁵Nymˬ-mˇ, Iˇsaˬleˬlaˆ tsawˇ haˬ deuˬ Iˇjiˇtuˆ tsawˇ haˬ-euˬ zaˬ kʼaˆ geuꞈ-awˇ ngoeˇ luꞈ-eu teˇ saˇ-ahˇ ngaˇ ya gaˬ ngeh, ngaˬ neh dzaˬ taˬ-euˬ dawˬ ma saˇ jaˇ-ahˇ ngaˇ paˇ noeˬ keuˆ-eu ma.

⁶Kʼoeˇ miˇ neh, ngaˇ heu loꞈ-ehˇ ehˇ-eu meh lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ. Ngaˇ-aˬ, Sahˬpaˬ Miˬyehˇ ma. Iˇjiˇtuˆ tsawˇ haˬ deuˬ-euˬ laꞈ oˆ zaˬ kʼaˆ ya geuꞈ-eu laꞈ kʼoeˇ ngaˇ naw maꞈ-ahˇ bi buˬ-iˇ ma. Baoˬ ahˇ-eu ngaˬ-euˬ aˬ laꞈ cawˬ doˆ-awˇ, aˬ yawꞈ maꞈ kʼoeˇ taˆ guˆ dui dui laˇ paˬ-ehˇ gʼeh-eu kʼehˬ-eu kʼaˆ-eu jeˬ bi keuˆ le-eu laꞈ kʼoeˇ, naw maꞈ-ahˇ ngaˇ ka kʼoꞈ ma.

⁷Naw maꞈ-ahˇ ngaˬ-euˬ tsawˇ haˬ bi pyeuꞈ laˇ-awˇ, ngaˇ-aˬ, naw maꞈ-euˬ Miˬ yehˇ pyeuꞈ ma. Iˇjiˇtuˆ miˇ kʼahˬ-ahˇ aˬ cawˬ zaˬ kʼaˆ ya geuꞈ-eu laꞈ kʼoeˇ ngaˇ naw maꞈ-ahˇ bi buˬ-iˇ ngeh, ngaˇ-aˬ naw maꞈ-euˬ Sahˬpaˬ Miˬyehˇ pyeuꞈ-eu naw maꞈ ya siˬ tehꞈ-a.

⁸Aˬ byaˬ haˬ, Iˇ tsaˆ hawˇ-eu Yaˬ koˆ-ahˇ biꞈ ma lehˇ ngaˬ neh ehˇ tsehˆ taˬ-euˬ miˇ kʼahˬ-ahˇ, naw maꞈ-ahˇ ngaˇ sheuˬ gʼeh-awˇ, miˇ kʼahˬ kʼoeˇ kʼahˬ naw maꞈ-ahˇ ngaˇ biꞈ tsehˆ nehˬ ma. Ngaˇ-aˬ, Sahˬpaˬ Miˬyehˇ ma lehˇ ehˇ nehˬ awˬ.”

⁹Gaˇ kawˆ heu Iˇsaˬleˬlaˆ tsawˇ haˬ deuˬ-ahˇ Moˇseˬ dzawˇ mehˬ nehˬ-euˬ meh. Ehˇ kʼawꞈ, Iˇsaˬleˬlaˆ tsawˇ haˬ deuˬ maˬ naˇ haˬ geuꞈ-a. Aˬ jeˬ miˇ neh ehˇ naˇ, kʼehˬ-eu kʼaˆ-eu jeˬ-ahˇ daˬ-awˇ, aˬ cawˬ zaˬ kʼaˆ ya geuꞈ luꞈ-eu miˇ neh, aˬ yawꞈ maꞈ nui ma cawˆ dui dui luꞈ-eu meh.

¹⁰Kʼoeˇ naˇ, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹¹“Iˇjiˇtuˆ sahˬ paˬ jawˇ gaˇ iˇ-awˇ, Iˇsaˬleˬlaˆ tsawˇ haˬ deuˬ-ahˇ ya pyehˬ nehˬ meh lehˇ ehˇ nehˬ-iˇ-awˬ.”

¹²Ehˇ kʼawꞈ, Moˇseˬ ehˇ-eu, “Iˇsaˬleˬlaˆ tsawˇ haˬ kʼawꞈ ngaˬ-euˬ ehˇ dawˬ maˬ naˇ haˬ-a. Aˬ joˆ-ehˇ jahˇ-awˇ, ngaˇ loꞈ-ehˇ dawˬ maˬ ngehˬ nya-eu tsawˇ haˬ-euˬ dawˬ-ahˇ sahˬ paˬ kʼoeˇ gʼaˬ naˇ haˬ nmˇ.”

¹³Moˇseˬ hawˇ-eu Aˬloˬ-ahˇ Sahˬpaˬ Miˬyehˇ dawˬ biꞈ-awˇ ehˇ nehˬ-eu, “Iˇsaˬleˬlaˆ tsawˇ haˬ deuˬ-ahˇ sheuˬ doˆ gʼeh-eu gʼaˇ duˬ, ngaˇ naw nyaꞈ-ahˇ dawˬ biꞈ laꞈ-euˬ meh lehˇ, Iˇsaˬleˬlaˆ tsawˇ haˬ deuˬ hawˇ-eu Iˇjiˇtuˆ sahˬ paˬ-ahˇ ehˇ nehˬ-iˇ-awˬ.”

¹⁴Yaˬkoˆ-euˬ aˬ li aˬ yuiꞈ yuiꞈ saˬ gʼaˬ pyeuꞈ-eu Luˇbeˬ-aˬ, Haˬnoˆ, Paˬloˆ, Heˬzaˬloˬ hawˇ-eu Kaˬmiˬ lehˇ myahˇ-euˬ aˬ li oeˬ gʼaˬ jawˇ-awˇ, aˬ yawꞈ maꞈ-aˬ, aˬ yawꞈ maꞈ-euˬ tsawˇ myahˇ kʼaˇ pi luꞈ-eu tsawˇ jeuˬ deuˬ-euˬ aˬ da yaw dzahˇ deuˬ pyeuꞈ-eu meh.

¹⁵Suˇmoˬ-aˬ, Yeˬmoeˬlaˇ, Yaˬmeˬ, Awˇhaˆ, Yaˬciˬ, Zoˇhaˬlaˇ hawˇ-eu Shawˇlaˆ lehˇ myahˇ-euˬ aˬ li koꞈ gʼaˬ jawˇ-awˇ, aˬ yawꞈ maꞈ-aˬ, aˬ yawꞈ maꞈ-euˬ tsawˇ myahˇ kʼaˇ pi luꞈ-eu tsawˇ jeuˬ deuˬ-euˬ aˬ da yaw dzahˇ deuˬ pyeuꞈ-eu meh.

¹⁶Leˬbiˇ-aˬ, Gaˬshoˬ, Kawˇhaˆ hawˇ-eu Meˬlaˬliˇ lehˇ myahˇ-euˬ aˬ li smˇ gʼaˬ jawˇ-eu meh. Aˬ yawꞈ maꞈ-aˬ, aˬ yawꞈ maꞈ-euˬ tsawˇ myahˇ kʼaˇ pi luꞈ-eu tsawˇ jeuˬ deuˬ-euˬ aˬ da yaw dzahˇ deuˬ pyeuꞈ-eu meh. Leˬbiˇ-aˬ, tiˬ yaˇ smˬ tseˇ shiꞈ kʼoꞈ byah ni dehꞈ-euˬ meh.

¹⁷Gaˬshoˬ-aˬ, Liˇbaˬniˇ hawˇ-eu Shiˇmiˇ lehˇ myahˇ-euˬ aˬ li nyiˬ gʼaˬ jawˇ-awˇ, aˬ yawꞈ nyaꞈ nmˇ-euˬ zaˬ deuˬ myaˬ laˇ behˇ laˇ-euˬ meh.

¹⁸Kawˇhaˆ-aˬ, Aˬmaˬlamˬ, Iˇzaˬhaˬ, Heˬbyoˬ hawˇ-eu Awˇzeˬlaˇ lehˇ myahˇ-euˬ aˬ li oeˬ gʼaˬ jawˇ-eu meh. Kawˇhaˆ-aˬ, tiˬ yaˇ smˬ tseˇ smˇ kʼoꞈ keuˆ ni dehꞈ-euˬ meh.

¹⁹Meˬlaˬliˇ-aˬ, Maˬhaˬliˇ hawˇ-eu Muˇshiˇ lehˇ myahˇ-euˬ aˬ li nyiˬ gʼaˬ jawˇ-eu meh. Heu deuˬ-aˬ, Leˬbiˇ-euˬ aˇ jeuˬ aˇ ca deuˬ hawˇ-eu aˬ yawꞈ maꞈ-euˬ zaˬ deuˬ uˆ deuˬ pyeuꞈ-eu meh.

²⁰Aˬmaˬlamˬ-aˬ, aˬ yawꞈ-euˬ aˬ da-euˬ dmˇ ma pyeuꞈ-eu Yawˇkeˬbehˇ-ahˇ sheuˬ-awˇ, Aˬloˬ hawˇ-eu Moˇseˬ jawˇ le-euˬ meh. Aˬmaˬlamˬ-aˬ, tiˬ yaˇ smˬ tseˇ shiꞈ kʼoꞈ dehꞈ-euˬ meh.

²¹Iˇzaˬhaˬ-aˬ, Kawˇlaˆ, Neˬpehˇ hawˇ-eu Ziˇkaˬliˇ lehˇ myahˇ-euˬ aˬ li smˬ li jawˇ-eu meh.

²²Awˇzeˬlaˇ-aˬ, Miˇsheˬlaˇ, Eˇlaˬzaˬpaˬ hawˇ-eu Shiˇtaˬliˇ lehˇ myahˇ-euˬ aˬ li smˬ li jawˇ-eu meh.

²³Aˬloˬ-aˬ, Aˇmiˇnaˬdehˇ-euˬ aˬ buˇ pyeuꞈ-eu Naˬshoˬ-euˬ dmˇ ma Eˇliˇsheˬba-ahˇ sheuˬ-awˇ, Naˬdehˇ, Aˬbiˇhuˬ, Eˇlaˬzaˬ hawˇ-eu Iˇdaˬmaˬ jawˇ le-euˬ meh.

²⁴Kawˇlaˆ-aˬ, Aˬsiˇlaˆ, Eˇlaˬkaˬnaˬ hawˇ-eu Aˬbyaˬsaˇ lehˇ myahˇ-euˬ aˬ li smˬ li jawˇ-eu meh. Aˬ yawꞈ maꞈ-aˬ, Kawˇlaˆ-euˬ aˇ jeuˬ aˇ ca deuˬ-euˬ aˬ da yaw dzahˇ deuˬ pyeuꞈ-eu meh.

²⁵Aˬloˬ-euˬ aˬ li Eˇlaˬzaˬ-aˬ, Puˬtiˬlaˇ-euˬ aˬ buˇ-ahˇ sheuˬ dahˬ dzaˬ-awˇ, Piˇnaˬhaˇ jawˇ le-euˬ meh. Heu deuˬ-aˬ, Leˬbiˇ tsawˇ jeuˬ tsawˇ ca dawˬ tawˆ luꞈ-euˬ aˬ da yaw dzahˇ deuˬ pyeuꞈ-eu meh.

²⁶“Iˇsaˬleˬlaˆ tsawˇ jeuˬ tsawˇ ca dawˬ tawˆ luꞈ-ahˇ, Iˇjiˇtuˆ miˇ kʼahˬ laꞈ kʼoeˇ neh sheuˬ doˆ gʼeh-awˬ” lehˇ, Miˬyehˇ neh kʼehˇ-euˬ tsawˇ haˬ-aˬ, Moˇseˬ hawˇ-euˬ Aˬloˬ aˬ nyaꞈ nmˇ meh.

²⁷Iˇsaˬleˬlaˆ tsawˇ haˬ deuˬ-ahˇ pyehˬ nehˬ-awˬ lehˇ, Iˇjiˇtuˆ sahˬ paˬ-ahˇ ehˇ nehˬ iˇ-euˬ kʼoeˇ-aˬ, aˬ yawꞈ nyaꞈ meh.

²⁸Iˇjiˇtuˆ miˇ kʼahˬ laꞈ kʼoeˇ Moˇseˬ-ahˇ Sahˬpaˬ Miˬyehˇ dawˬ ngehˬ cawˬ le ngeh nah,

²⁹Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Ngaˇ-aˬ, Sahˬpaˬ Miˬyehˇ pyeuꞈ-eu ma. Ngaˬ neh nawˬ-ahˇ kʼaˇ ehˇ nehˬ-euˬ jeˬ dawˬ tawˆ luꞈ, Iˇjiˇtuˆ sahˬ paˬ-ahˇ ehˇ nehˬ iˇ-awˬ.”

³⁰Ehˇ kʼawꞈ, Moˇseˬ ehˇ-eu, “Ngaˇ dawˬ yaw muiˬ paˬ-ehˇ maˬ ngehˬ nya-eu nawˇ siˬ nya-eu meh. Aˬ joˆ-ehˇ jahˇ-awˇ sahˬ paˬ kʼoeˇ gʼaˬ ngaˬ-euˬ ehˇ dawˬ naˇ haˬ nmˇ.”