Read Akha Doˆ-iˇ 8 Bible Online

Doˆ-iˇ 8 - Akha bible

Doˆ-iˇ 8

¹Kʼoeˇ naˇ, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Sahˬ paˬ jawˇ gaˇ iˇ-awˇ, Sahˬpaˬ Miˬyehˇ heu loꞈ-ehˇ ehˇ-eu meh lehˇ ehˇ nehˬ-iˇ-awˬ. ‘Ngaˬ-euˬ tsawˇ haˬ deuˬ ngaˬ-ahˇ uˬ duˬ tahˬ laˇ nya ni pyehˬ nehˬ-awˬ.

²Aˬ yawꞈ maꞈ-ahˇ maˬ pyehˬ nehˬ naˇ, miˇ kʼahˬ kʼahˬ lah ni kʼaˬ paˬ bi byah laˇ-eu laꞈ kʼoeˇ, nawˬ-euˬ miˇ kʼahˬ-ahˇ ngaˇ kʼehˬ nehˬ ma.

³Niˬlaˇ lawˇ baˬ laꞈ kʼoeˇ kʼaˬ paˬ myaˬ dui dui laˇ-eu miˇ neh, kʼaˬ paˬ kʼoeˇ deuˬ nawˬ-euˬ nymˇ-ahˇ keuˆ niˆ laˇ keuˆ-awˇ, nawˇ yuꞈ-eu kuˆ lawˆ laꞈ kʼoeˇ maˬ ehˇ, nawˬ-euˬ yuꞈ zaˇ kʼoeˇ taˆ maˬ ehˇ, nawˬ-euˬ gaˇ mˇ-eu yaw huiˬ yaw mahˇ deuˬ-euˬ nymˇ laꞈ kʼoeˇ maˬ ehˇ, nawˬ-euˬ miˇ kʼahˬ zaˬ deuˬ-euˬ nymˇ laꞈ kʼoeˇ maˬ ehˇ, nawˬ-euˬ miˬ dzaˬ tsawˬ bu-ahˇ maˬ ehˇ, nawˬ-euˬ guiˬ ba oeˬ lahˬ deuˬ hawˇ-eu kʼmˬ maˬ oeˬ tsaꞈ deuˬ laꞈ kʼoeˇ maˬ ehˇ, jawˇ byah jiˇ tehꞈ-a.

⁴Nawˬ-euˬ gʼawˇ mawˇ kʼoeˇ taˆ maˬ ehˇ, nawˬ-euˬ gaˇ mˇ-eu yaw huiˬ yaw mahˇ deuˬ-euˬ kʼoeˇ taˆ maˬ ehˇ, nawˬ-euˬ miˇ kʼahˬ zaˬ deuˬ kʼoeˇ taˆ maˬ ehˇ, kʼaˬ paˬ kʼoeˇ deuˬ tsawˬ daˆ leˇ tehꞈ-a lehˇ Sahˬpaˬ Miˬyehˇ ehˇ-eu meh’ lehˇ ehˇ nehˬ-iˇ-awˬ.”

⁵Moˇseˬ-ahˇ Sahˬpaˬ Miˬyehˇ ehˇ nehˬ-eu, “Iˇjiˇtuˆ miˇ kʼahˬ kʼahˬ lah ni byah jiˇ ngeh keuˆ ni kʼaˬ paˬ bi doˆ laˇ-eu gʼaˇ duˬ, lawˇ baˬ deuˬ, uiˇ kʼehˬ deuˬ , lah deuˬ kʼoeˇ taˆ, aˬ yawꞈ-euˬ gawˬ yoeˬ yuˇ-awˇ cawˬ ja-awˬ lehˇ, Aˬloˬ-ahˇ ehˇ nehˬ-awˬ.”

⁶Kʼoeˇ naˇ, Aˬloˬ aˬ yawꞈ-euˬ gawˬ yoeˬ yuˇ-awˇ, iˇ cuꞈ kʼaˇ jaˆ gaˇ cawˬ ja-euˬ miˇ neh, kʼaˬ paˬ doˆ laˇ-awˇ, miˇ kʼahˬ kʼoeˇ kʼahˬ kʼahˬ lah ni byah jiˇ-euˬ meh.

⁷Ehˇ kʼawꞈ, mah loˬ nya-eu tsawˇ haˬ kʼoeˇ deuˬ kʼawꞈ, aˬ yawꞈ maꞈ-euˬ mah loˬ tsawˇ gahˇ-ahˇ gʼoe-awˇ miˇ kʼahˬ kʼoeˇ kʼahˬ kʼoeˇ taˆ kʼaˬ paˬ doˆ laˇ ni jahˇ-euˬ meh.

⁸Kʼoeˇ naˇ, sahˬ paˬ kʼoeˇ gʼaˬ Moˇseˬ hawˇ-eu Aˬloˬ-ahˇ kuˇ-awˇ ehˇ-eu, “Kʼaˬ paˬ heu deuˬ byoˆ-iˇ jiˇ ni, Sahˬpaˬ Miˬyehˇ-ahˇ guiˬ lahˬ shaˇ-awˬ. Sahˬpaˬ Miˬyehˇ-ahˇ lawˇ nehˬ shehˇ nehˬ-iˇ nya ni, naw maꞈ-euˬ tsawˇ haˬ deuˬ-ahˇ ngaˇ pyehˬ nehˬ ma.”

⁹Moˇseˬ ehˇ-eu, “Nawˬ-euˬ gʼaˇ duˬ guiˬ lahˬ ya shaˇ nehˬ-eu miˇ neh ngaˇ laˬ kʼaˬ cehˇ miˇ-a. Nawˬ-euˬ gʼaˇ duˬ maˬ ehˇ, nawˬ-euˬ gaˇ mˇ-eu yawˬ huiˬ yaw mahˇ deuˬ gʼaˇ duˬ maˬ ehˇ, nawˬ-euˬ miˇ kʼahˬ zaˬ deuˬ gʼaˇ duˬ maˬ ehˇ, ngaˇ guiˬ lahˬ shaˇ nehˬ-eu gʼaˇ duˬ aˇ yamˬ toꞈ nehˬ laꞈ-awˬ. Niˬ laˇ lawˇ baˬ laꞈ kʼoeˇ maˬ ngeuˇ naˇ, tiˬ gaˇ-iˬ kʼaˬ paˬ maˬ jawˇ-ehˇ pyeuꞈ-iˇ-awˇ, kʼaˬ paˬ maˬ bahˬ gʼa ni nawˇ ya jawˇ tehꞈ-a.”

¹⁰Moˇseˬ-ahˇ sahˬ paˬ ehˇ-eu, “Ni shawˬ nah ngaˬ-euˬ gʼaˇ duˬ guiˬ lahˬ shaˇ nehˬ laꞈ-awˬ.” Moˇseˬ ehˇ-eu, “Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ duˇ-eu miˬ yehˇ nui gʼaˬ maˬ jawˇ-eu gaˇ kawˆ nawˇ ya siˬ ni, nawˇ kʼaˇ shaˇ-eu loꞈ-ehˇ ngaˇ mˇ nehˬ ma.

¹¹Nawˬ-euˬ gʼawˇ mawˇ maˬ ehˇ, nawˬ-euˬ gaˇ mˇ-eu yaw huiˬ yaw mahˇ deuˬ maˬ ehˇ, nawˬ-euˬ miˇ kʼahˬ zaˬ deuˬ maˬ ehˇ, kʼaˬ paˬ bahˬ gʼa gaˇ ya buˬ-iˇ-awˇ, Niˬlaˇ lawˇ baˬ laꞈ kʼoeˇ maˬ ngeuˇ naˇ, kʼaˬ paˬ tiˬ gaˇ-iˬ maˬ paˇ jawˇ ni pyeuꞈ-iˇ tehꞈ-a” lehˇ, sahˬ paˬ kʼoeˇ gʼaˬ-ahˇ ehˇ nehˬ-euˬ meh.

¹²Kʼoeˇ naˇ, Moˇseˬ hawˇ-eu Aˬloˬ aˬ nyaꞈ, sahˬ paˬ kʼoeˇ gʼaˬ jawˇ gaˇ neh doˆ-iˇ-awˇ, sahˬ paˬ kʼoeˇ gʼaˬ kʼoeˇ taˆ bi keuˆ le-euˬ kʼaˬ paˬ kʼoeˇ deuˬ byoˆ-iˇ jiˇ ni, Sahˬpaˬ Miˬyehˇ-ahˇ Moˇseˬ guiˬ lahˬ shaˇ-euˬ meh.

¹³Moˇseˬ-euˬ shaˇ dawˬ-ahˇ Sahˬpaˬ Miˬyehˇ naˇ haˬ-awˇ, nymˇ laꞈ kʼoeˇ kʼaˇ jawˇ-eu kʼaˬ paˬ deuˬ maˬ ehˇ, pu doe ni jawˇ-eu kʼaˬ paˬ deuˬ maˬ ehˇ, deh ma doe ni jawˇ-eu kʼaˬ paˬ deuˬ maˬ ehˇ, shiˇ jiˇ-euˬ meh.

¹⁴Iˇjiˇtuˆ tsawˇ haˬ deuˬ kʼaˬ paˬ kʼoeˇ deuˬ-ahˇ aˇ bymˇ bymˇ ma bymˇ ma-ehˇ gʼoˆ bymˇ-euˬ meh. Miˇ kʼahˬ kʼoeˇ kʼahˬ kʼahˬ lahˬ ni yaw buꞈ behꞈ laꞈ-eu meh.

¹⁵Kʼaˬ paˬ kʼoeˇ deuˬ shiˇ jiˇ-euˬ gaˇ sahˬ paˬ kʼoeˇ gʼaˬ ya mawˇ ngeh, Sahˬpaˬ Miˬyehˇ neh ehˇ taˬ-euˬ loꞈ-ehˇ, aˬ yawꞈ-euˬ nui ma paˇ gʼahˇ laˇ-awˇ, Moˇseˬ hawˇ-eu Aˬloˬ-euˬ ehˇ dawˬ maˬ naˇ haˬ ni pyeuꞈ-iˇ-euˬ meh.

¹⁶Kʼoeˇ naˇ, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Iˇjiˇtuˆ miˇ kʼahˬ laꞈ kʼoeˇ kʼaˇ jaˆ-eu kʼaˬ lehˇ dawˬ tawˆ luꞈ caˇ gawˬ pyeuꞈ jiˇ ni, gawˬ yoeˬ yuˇ-awˇ miˇ tsaˬ-ahˇ juiꞈ-awˬ lehˇ Aˬloˬ-ahˇ ehˇ nehˬ-awˬ” lehˇ,

¹⁷Aˬloˬ aˬ yawꞈ-euˬ gawˬ yoeˬ yuˇ doˆ-awˇ miˇ tsaˬ-ahˇ juiꞈ ngeh, Iˇjiˇtuˆ miˇ kʼahˬ laꞈ kʼoeˇ kʼaˇ jaˆ-eu kʼaˬ lehˇ dawˬ tawˆ luꞈ caˇ gawˬ pyeuꞈ jiˇ-awˇ, tsawˇ haˬ zaˬ hawˇ-eu jeˬ zaˬ deuˬ-ahˇ jawˇ gʼoeˬ jiˇ-euˬ meh.

¹⁸Mah loˬ nya-eu tsawˇ haˬ kʼoeˇ deuˬ aˬ yawꞈ maꞈ-euˬ mah loˬ tsawˇ gahˇ-ahˇ gʼoe-awˇ, caˇ gawˬ bi doˆ laˇ ni jahˇ-eu lehˇ leh jeh-euˬ kʼawꞈ, maˬ jahˇ pyeuꞈ nya-a. Yawˬ gaˇ yawˬ na luꞈ, caˇ gawˬ tehꞈ-ehˇ byah jiˇ-euˬ meh.

¹⁹Kʼoeˇ ngeh, “Heu-aˬ, Miˬyehˇ neh mˇ-euˬ jeˬ pyeuꞈ-eu ngaˇ” lehˇ, mah loˬ nya-eu tsawˇ haˬ kʼoeˇ deuˬ sahˬ paˬ-ahˇ ehˇ neh-euˬ meh. Ehˇ kʼawꞈ, Sahˬpaˬ Miˬyehˇ neh ehˇ taˬ-euˬ loꞈ-ehˇ, sahˬ paˬ kʼoeˇ gʼaˬ nui ma gʼahˇ-awˇ, Moˇseˬ hawˇ-eu Aˬ loˬ-euˬ ehˇ dawˬ maˬ naˇ haˬ ni jawˇ-euˬ meh.

²⁰Kʼoeˇ naˇ, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Ni shawˬ uˬ shawˬ yaw naꞈ-ehˇ, sahˬ paˬ kʼoeˇ gʼaˬ lawˇ baˬ-ahˇ oe ngeh, aˬ yawꞈ-ahˇ tahˬ puˬ-iˇ-awˬ. Sahˬpaˬ Miˬyehˇ heu loꞈ-ehˇ ehˇ-eu meh lehˇ ehˇ nehˬ-iˇ-awˬ. ‘Ngaˬ-euˬ tsawˇ haˬ deuˬ ngaˬ-ahˇ uˬ duˬ ya tahˬ ni, aˬ yawꞈ maꞈ-ahˇ pyehˬ nehˬ-awˬ.

²¹Aˬ yawꞈ maꞈ-ahˇ nawˇ maˬ pyehˬ nehˬ naˇ, nawˇ jawˇ gaˇ maˬ ehˇ, nawˬ-euˬ gaˇ mˇ-eu yaw huiˬ yaw mahˇ deuˬ jawˇ gaˇ maˬ ehˇ, nawˬ-euˬ miˇ kʼahˬ zaˬ deuˬ jawˇ gaˇ maˬ ehˇ, puˬ saˆ baˬ maꞈ pyehˬ gʼeh leꞈ-awˇ, nawˬ-ahˇ ngaˇ kʼehˬ nehˬ ma. Iˇjiˇtuˆ tsawˇ haˬ deuˬ-euˬ nymˇ laꞈ kʼoeˇ puˬ saˆ jawˇ byah jiˇ-awˇ, miˇ tsaˬ-ahˇ kʼawꞈ, puˬ saˆ dawꞈ byah jiˇ tehꞈ-a.

²²Ehˇ kʼawꞈ, ngaˬ-eu tsawˇ haˬ deuˬ jawˇ-eu Goˬsheˬ miˇ tsaˬ-ahˇ puˬ saˆ maˬ doˆ laˇ ni ngaˇ jahˇ ma. Sahˬpaˬ Miˬyehˇ pyeuꞈ-eu ngaˬ-euˬ mawˇ do miˇ kʼahˬ heu kʼahˬ laꞈ kʼoeˇ gaˇ mˇ luꞈ-eu nawˇ ya siˬ ni, ngaˇ heu loꞈ-ehˇ jahˇ-eu lehˇ gʼeh-eu ma.

²³Nawˬ-euˬ tsawˇ haˬ hawˇ-eu ngaˬ-euˬ tsawˇ haˬ tseˇ paˆ-awˇ, ngaˇ kʼoeˇ loꞈ-ehˇ mˇ ma. Zahˬ leˇ paˬ-ehˇ gʼeh-eu gaˇ heu hmˬ, ni shawˬ bi pyeuꞈ laˇ ma’ lehˇ Sahˬpaˬ Miˬyehˇ ehˇ-eu meh lehˇ aˬ yawꞈ-ahˇ ehˇ nehˬ-awˬ.”

²⁴Sahˬ paˬ kʼoeˇ gʼaˬ-euˬ nymˇ hawˇ-eu yaw huiˬ yaw mahˇ deuˬ-euˬ nymˇ deuˬ-ahˇ, myaˬ dui dui-eu puˬ saˆ baˬ maꞈ Sahˬpaˬ Miˬyehˇ pyehˬ gʼeh-euˬ meh.

²⁵Kʼoeˇ naˇ, Moˇseˬ hawˇ-eu Aˬloˬ-ahˇ sahˬ paˬ kuˇ-awˇ, “Iˇ-awˬ. Miˇ kʼahˬ heu kʼahˬ laꞈ kʼoeˇ, naw maꞈ-euˬ Miˬyehˇ-ahˇ lawˇ nehˬ shehˇ nehˬ-iˇ-awˬ” lehˇ ehˇ nehˬ-euˬ meh.

²⁶Ehˇ kʼawꞈ, sahˬ paˬ kʼoeˇ gʼaˬ-ahˇ Moˇseˬ ehˇ nehˬ-eu, “Kʼoeˇ loꞈ-ehˇ mˇ-eu maˬ tsaˬ-a. Aˬ jeˬ miˇ neh ehˇ naˇ, nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ jeˬ zaˬ lawˇ nehˬ-eu jeˬ-aˬ, Iˇjiˇtuˆ tsawˇ haˬ-euˬ mehˬ shi maˬ muiˬ maˬ shawˇ-eu jeˬ mˇ gaˇ duˇ-eu meh. Iˇjiˇtuˆ tsawˇ haˬ deuˬ-euˬ mehˬ shi nga maꞈ jeˬ zaˬ lawˇ naˇ, aˬ yawꞈ maꞈ nga maꞈ-ahˇ kʼaˬ lo neh biˬ sehꞈ tehꞈ-a.

²⁷Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh nga maꞈ-ahˇ ehˇ taˬ-euˬ loꞈ-ehˇ, smˬ nah gaˇ ma kaˬ-eu bawˇ tsahˬ bawˇ dahˇ laꞈ kʼoeˇ nga maꞈ iˇ-awˇ, aˬ yawꞈ-ahˇ ya lawˇ ya shehˇ meh.”

²⁸Sahˬ paˬ ehˇ-eu, “Gaˇ mahˇ kaˬ dui dui-eu jawˇ duˬ-ahˇ naw maꞈ maˬ iˇ byoˆ gʼeh naˇ, bawˇ tsahˬ bawˇ dahˇ-ahˇ iˇ-awˇ, naw maꞈ-euˬ Sahˬpaˬ Miˬyehˇ-ahˇ lawˇ nehˬ shehˇ nehˬ-iˇ-eu gʼaˇ duˬ, ngaˇ naw maꞈ-ahˇ pyehˬ nehˬ ma. Ngaˬ-euˬ gʼaˇ duˬ guiˬ lahˬ shaˇ nehˬ laꞈ-awˬ.”

²⁹Moˇseˬ ehˇ-eu, “Nawˇ jawˇ gaˇ maˬ ehˇ, nawˬ-euˬ gaˇ mˇ-eu yaw huiˬ yaw mahˇ deuˬ jawˇ gaˇ maˬ ehˇ, nawˬ-euˬ miˇ kʼahˬ zaˬ deuˬ jawˇ gaˇ maˬ ehˇ, ni shawˬ nah puˬ saˆ byoˆ-iˇ jiˇ ni, heu gaˇ neh doˆ-iˇ-eu nehˬ-ehˇ, Sahˬpaˬ Miˬyehˇ-ahˇ ngaˇ guiˬ lahˬ shaˇ ma. Ehˇ kʼawꞈ, nga maꞈ-ahˇ nawˇ jaˬ myawꞈ paˇ myawꞈ-awˇ, Sahˬpaˬ Miˬyehˇ-ahˇ lawˇ-eu shehˇ-eu gʼaˇ duˬ, Iˇsaˬleˬlaˆ tsawˇ haˬ deuˬ-ahˇ maˬ bi iˇ ni maˬ ya laˆ tsoeˬ-a.”

³⁰Kʼoeˇ naˇ, sahˬ paˬ kʼoeˇ gʼaˬ jawˇ gaˇ neh Moˇseˬ doˆ-iˇ-awˇ, sahˬ paˬ miˬ yehˇ-ahˇ guiˬ lahˬ shaˇ-euˬ meh.

³¹Moˇseˬ-euˬ shaˇ dawˬ-ahˇ Sahˬpaˬ Miˬyehˇ naˇ haˬ-awˇ, sahˬ paˬ kʼoeˇ gʼaˬ jawˇ gaˇ maˬ ehˇ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ jawˇ gaˇ maˬ ehˇ, aˬ yawꞈ-euˬ miˇ kʼahˬ zaˬ deuˬ jawˇ gaˇ maˬ ehˇ, puˬ saˆ tiˬ mawˇ-iˬ maˬ jawˇ ni byoˆ jiˇ-euˬ meh.

³²Kʼoeˇ ngeh poˆ jawˇ kʼawꞈ, sahˬ paˬ kʼoeˇ gʼaˬ nui ma paˇ gʼahˇ laˇ-awˇ, Iˇsaˬleˬlaˆ tsawˇ haˬ-ahˇ maˬ pyehˬ nehˬ ni jawˇ-euˬ meh.