Read Akha Yawˇbaˆ 11 Bible Online

Yawˇbaˆ 11 - Akha bible

Yawˇbaˆ 11

¹Kʼoeˇ naˇ, Naˬmaˬ miˇ kʼahˬ-ahˇ jawˇ-eu Zoˇpaˬ gʼaˬ ehˇ-eu,

²“Dawˬ heu deuˬ-ahˇ ngehˬ cawˬ tmˇ cawˬ-eu tiˬ gʼaˬ-iˬ maˬ jawˇ-a loˇ. Dawˬ ja myaˬ-eu tsawˇ haˬ tsaˬ meh loˇ.

³Yawˇbaˆ-oˇ, nawˬ-euˬ dawˬ teu deuˬ-ahˇ nga maꞈ maˬ ehˇ kʼoꞈ nya-a lehˇ nawˇ noeˬ te loˇ. Nawˇ aˬ jaꞈ jaꞈ haw-eu dawˬ-ahˇ nga maꞈ ciˬ cuˇ ni naˇ haˬ tehꞈ-a lehˇ noeˬ te loˇ.

⁴Nawˬ neh ngehˬ-euˬ tsaˬ ma lehˇ nawˇ ehˇ-eu meh. Miˬyehˇ mehˬ shi nawˇ yaw muiˬ yaw shawˇ ma lehˇ ehˇ-eu meh.

⁵Miˬyehˇ nawˬ-ahˇ ehˇ kʼoꞈ nehˬ law nmˇ-aˬ lehˇ ngaˇ noeˬ miˇ-a.

⁶Zaˬ siˬ nui gahˇ-ahˇ taꞈ leˇ-awˇ gʼawˬ mya pyawˬ jaˆ-eu gaˇ kawˆ aˬ yawꞈ nawˬ-ahˇ ehˇ tehꞈ-a. Tsawˇ haˬ zaˬ-euˬ nui gahˇ maˬ teh miˇ coeˇ gaˇ keuˆ ni naꞈ dui dui-eu gʼawˬ mya jeˬ jaˆ meh. Nawˇ ya daˬ geuˇ-eu naˆ maˬ tseˇ sawˇ teˬ-eu laꞈ kʼoeˇ, Miˬyehˇ nawˬ-ahˇ kʼehˬ-euˬ meh lehˇ nawˇ siˬ nya-awˬ.

⁷Miˬyehˇ-euˬ yaw shehꞈ kʼahˬ sehˇ hawˇ-eu baoˬ aˇ hui ni ahˇ-awˇ aˬ gaˇ keuˆ ni jaˆ-eu nawˇ poˆ mawˇ duˬ nya ma loˇ.

⁸Miˬyehˇ-aˬ, mˬ mah maˬ tseˇ goˇ-eu meh. Mˬ-ahˇ nawˇ beuˬ miˇ coeˇ ma loˇ. Shiˇ-eu miˇ kʼahˬ-ahˇ Miˬyehˇ siˬ nya meh. Ehˇ kʼawꞈ nawˇ noeˬ mawˇ coeˇ ma loˇ.

⁹Miˬyehˇ-euˬ yaw shehꞈ kʼahˬ sehˇ-aˬ, miˇ tsaˬ tahˬ kʼawˇ naˆ maˬ tseˇ huiˬ-awˇ, iˬ ma laˆ shaˆ naˆ maˬ tseˇ jeˇ-eu meh.

¹⁰Miˬyehˇ nawˬ-ahˇ nyehꞈ-awˇ yaˇ kʼaˬ daˇ naˇ, laˆ tsoeˬ peuˬ-eu aˬ suˇ gʼaˬ jawˇ nmˇ.

¹¹Tsawˇ haˬ aˬ geu deuˬ gaˇ dahˇ maˬ tsoeˬ-eu Miˬyehˇ siˬ nya-awˇ, aˬ yawꞈ maꞈ yaw haiˬ jeˬ mˇ-eu Miˬyehˇ mawˇ luꞈ meh.

¹²Bawˇ tsahˬ mahˬ tahˬ laˆ yah dehˬ ni baw doˆ leꞈ ngeh nah, aˬ dzawˬ aˇ gah deuˬ zaˬ siˬ nui gahˇ ahˇ laˇ tehꞈ-a.

¹³Yawˇbaˆ-oˇ, nawˬ-euˬ nui ma dawˇ coe ni taˬ-awˇ, Miˬyehˇ jawˇ paw aˬ laꞈ cawˬ ja-awˬ.

¹⁴Nawˬ-euˬ nymˇ jiˇ laꞈ kʼoeˇ yaw haiˬ jeˬ hawˇ-eu yaw lehˬ jeˬ taˬ paˇ bi jaˆ.

¹⁵Kʼoeˇ naˇ nui ma ziꞈ dah ni taˬ-awˇ, kʼaˬ duˬ ni yaw dehꞈ paˇ dehꞈ daˆ leꞈ haw-awˬ.

¹⁶Iˇ jeuˬ oe-euˬ myahˇ laˇ ngeh ngehˇ-eu loꞈ-ehˇ, nawˬ-euˬ shaˬ zahˬ nawˇ ngehˇ byoˆ jiˇ tehꞈ-a.

¹⁷Nawˬ-euˬ dehꞈ jeˬ dehꞈ kawˆ nah gʼahˇ paw jaˆ-eu nahˇ ma yaw shehꞈ naˆ maˬ tseˇ bya-awˇ shaˬ zahˬ keuˆ le kʼawꞈ mˬ bya shawˇ laˇ ngeh loꞈ-ehˇ pyeuꞈ tehꞈ-a.

¹⁸Nawˇ yaw dehꞈ dehꞈ-eu kʼahˬ lahˇ kʼaˇ maˬ za-ehˇ, noeˬ tmˬ duˬ tiˬ byah jaˆ-eu uˬ taꞈ, Miˬyehˇ nawˬ-ahˇ haw piˇ-awˇ gʼaˬ naˬ bi naˬ laꞈ tehꞈ-a.

¹⁹Nawˬ-ahˇ muiˇ-eu deuˬ-ahˇ nawˇ guˆ kʼaˇ maˬ za-ehˇ, tsawˇ haˬ gʼawˬ mya ni nawˬ-ahˇ laꞈ jeuˬ shaˇ tehꞈ-a.

²⁰Maˬ tsaˬ maˬ dawˇ-eu tsawˇ haˬ nui ma cawˆ-eu laꞈ kʼoeˇ, jawˬ jawˬ-ehˇ haw sehꞈ leꞈ kʼawꞈ, buˬ-iˇ law-iˇ-eu gaˇ ma maˬ dahˇ-a. Aˬ yawꞈ maꞈ-euˬ noeˬ tmˬ duˬ-aˬ shiˇ-eu jeˬ keuˆ le-eu kʼoeˇ meh.”