Read Akha Yawˇbaˆ 12 Bible Online

Yawˇbaˆ 12 - Akha bible

Yawˇbaˆ 12

¹Kʼoeˇ naˇ, Yawˇbaˆ paˇ ehˇ-eu,

²“Ngeuˇ meh. Naw maꞈ tsawˇ haˬ zaˬ-euˬ dawˬ ngehˬ luꞈ-eu meh. Naw maꞈ shiˇ ngeh, zaˬ siˬ tsawˇ gahˇ kʼawꞈ naw maꞈ nehˬ-ehˇ shiˇ caw tehꞈ-a.

³Ngaˇ kʼawꞈ naw maꞈ naˆ ni noeˬ siˬ noeˬ mawˇ nya ma. Ngaˇ naw maꞈ naˆ maˬ tseˇ teˬ-eu tsawˇ haˬ maˬ ngeuˇ. Naw maꞈ neh kʼaˇ ehˇ-euˬ jeˬ-ahˇ tsawˇ haˬ zaˬ yawˬ gʼaˬ na luꞈ siˬ nya meh.

⁴Ngaˬ-euˬ cawˬ deuˬ-ahˇ keuˆ ni nymˬ-mˇ ngaˬ-ahˇ haw haw-ehˇ uiˇ-eu meh. Ngaˇ iˬ baˇ maˬ ahˇ-eu yaw tsaˬ yaw dawˇ tsawˇ haˬ pyeuꞈ kʼawꞈ aˬ yawꞈ maꞈ ngaˬ-ahˇ uiˇ-eu meh. Ehˇ kʼawꞈ, ngaˬ-euˬ shaˇ dawˬ-ahˇ Miˬyehˇ naˇ haˬ nehˬ laꞈ-euˬ jaˆ ma.

⁵Naw maꞈ maˬ ya shaˬ maˬ ya zahˬ ni jawˇ-awˇ, ngaˬ-ahˇ haw-awˇ uiˇ-eu meh. Coˬ-iˇ luꞈ-eu tsawˇ haˬ tiˬ gʼaˬ-ahˇ naw maꞈ paˇ diˬ caw nehˬ-eu meh.

⁶Ehˇ kʼawꞈ, smˇ kʼoeˬ tahˇ joe deuˬ hawˇ-eu miˬ yehˇ maˬ baw-eu deuˬ-aˬ, yawˬ ha-euˬ gʼaˬ-ahˇ yawˬ ha-euˬ miˬ yehˇ loꞈ-ehˇ gʼoe kʼawꞈ, saˇ lehˆ ni ya dehꞈ luꞈ meh.

⁷“Jeˬ zaˬ hawˇ-eu aˇ jiˇ deuˬ kʼawꞈ naw maꞈ-ahˇ mehˬ nehˬ tsoˆ nehˬ-eu gʼawˬ mya jeˬ jaˆ meh.

⁸Miˇ tsaˬ kʼoeˇ taˆ jawˇ-eu jeˬ zaˬ deuˬ hawˇ-eu iˇ cuꞈ laꞈ kʼoeˇ jawˇ-eu ngaˬ shaˬ deuˬ-ahˇ, zaˬ siˬ tsawˇ gahˇ naˇ haˬ geuꞈ-awˬ.

⁹Jeˬ zaˬ kʼoeˇ deuˬ dawˬ tawˆ luꞈ Sahˬpaˬ Miˬyehˇ-euˬ aˬ laꞈ neh aˬ yawꞈ maꞈ-ahˇ beh-euˬ meh lehˇ siˬ nya meh.

¹⁰Yaw dehꞈ kʼaˇ dehꞈ-eu jeˬ dawˬ tawˆ luꞈ-euˬ saꞈ laˇ Miˬyehˇ-euˬ aˬ laꞈ laꞈ kʼoeˇ jaˆ-awˇ, tsawˇ haˬ aˬ yawꞈ gʼaˬ yawꞈ-euˬ saꞈ laˇ kʼawꞈ aˬ yawꞈ-euˬ baoˬ laꞈ kʼoeˇ jaˆ jiˇ-eu meh.

¹¹Nawˬ-euˬ mehˬ laˇ dzaˇ kuiˇ dzaˇ myehˇ siˬ nya-eu loꞈ-ehˇ, nawˬ-euˬ naˬ bawˇ kʼawꞈ teˇ saˇ gaˬ nya-eu meh.

¹²“Aˇ kʼoꞈ kʼawˆ laˇ-euˬ deuˬ nehˬ-ehˇ zaˬ siˬ tsawˇ gahˇ jawˇ-awˇ, dehꞈ myahˇ laꞈ-euˬ deuˬ nehˬ-ehˇ noeˬ siˬ noeˬ mawˇ nya-eu jeˬ jaˆ-eu meh.

¹³Ehˇ kʼawꞈ, Miˬyehˇ laꞈ kʼoeˇ zaˬ siˬ tsawˇ gahˇ hawˇ-eu dawˬ tawˆ luꞈ-ahˇ siˬ nya mawˇ nya-eu jeˬ uˬ taꞈ, dawˬ tawˆ luꞈ mˇ pyeuꞈ nya-eu baoˬ jaˆ-eu meh.

¹⁴Miˬyehˇ neh laˆ pyaˆ-euˬ jeˬ-ahˇ aˬ suˇ gʼaˬ laˆ muiˬ nya-awˇ, Miˬyehˇ neh paꞈ tawꞈ-euˬ gʼaˬ-ahˇ aˬ suˇ gʼaˬ puiˇ pyehˬ nya nmˇ.

¹⁵Uˬ yehˇ-ahˇ Miˬyehˇ nyehꞈ tehˬ taˬ ngeh mˬ gʼmˇ gʼmˇ-awˇ, aˬ yawꞈ iˇ cuꞈ pyehˬ ka leꞈ ngeh iˇ jeuˬ oe-eu meh.

¹⁶Miˬyehˇ-aˬ, gʼaˬ huiˬ-awˇ aˬ myah luꞈ gʼaˬ leˇ-eu gʼaˬ pyeuꞈ-eu meh. Gahˇ dzaˬ-eu deuˬ maˬ ehˇ, bi gahˇ dzaˬ-euˬ deuˬ maˬ ehˇ, dawˬ tawˆ luꞈ aˬ yawꞈ-euˬ baoˬ laꞈ kʼoeˇ jawˇ-eu meh.

¹⁷Uˆ lahˇ-eu deuˬ-euˬ zaˬ siˬ tsawˇ gahˇ aˬ yawꞈ yuˇ dzeh-awˇ, aˬ yuiꞈ aˬ tsu deuˬ tsawˇ uˬ loꞈ-ehˇ pyeuꞈ-iˇ ni aˬ yawꞈ jahˇ-eu meh.

¹⁸Sahˬ paˬ deuˬ-ahˇ aˬ yawꞈ aˇ yaˬ yuˇ dzeh-awˇ tawˬ-ahˇ nyehꞈ uˇ-eu meh.

¹⁹Piˇ ma deuˬ hawˇ-eu baoˬ jaˆ-eu tsawˇ haˬ deuˬ-ahˇ aˬ yawꞈ dehˬ awˆ-eu meh.

²⁰Dawˬ mehˬ dawˬ tsoˆ nya-eu deuˬ-ahˇ aˬ yawꞈ mehˬ cuꞈ cuꞈ-awˇ, mawˬ laˇ-euˬ deuˬ-euˬ zaˬ siˬ tsawˇ gahˇ yuˇ dzeh-eu meh.

²¹Baoˬ jaˆ-eu tsawˇ haˬ deuˬ-ahˇ aˬ yawꞈ baoˬ bi byoˆ-iˇ-awˇ, uˆ lahˇ-eu tsawˇ haˬ deuˬ-ahˇ gʼaˬ bi juˬ-iˇ-eu meh.

²²Naꞈ suiˇ ni gʼeh gaˇ dehˬ kaˬ taˬ-euˬ yaw zahˇ-ahˇ aˬ yawꞈ yuˇ yawˬ-awˇ, zahˇ tsui ni gʼeh gaˇ yaw shehꞈ bi bya laˇ-eu meh.

²³Miˇ kʼahˬ kʼoeˇ deuˬ baoˬ huiˬ-awˇ gʼaˬ ahˇ ni aˬ yawꞈ jahˇ-eu meh. Ehˇ kʼawꞈ, aˬ yawꞈ maꞈ-ahˇ aˬ yawꞈ deuˆ gʼaˬ-awˇ paˇ laˆ cawˆ nehˬ-eu meh.

²⁴Aˬ yawꞈ maꞈ-euˬ aˬ yuiꞈ aˬ tsu deuˬ tsawˇ uˬ uˬ-iˇ ni aˬ yawˬ jahˇ-awˇ, aˬ yawꞈ maꞈ-ahˇ bi maoˬ leˇ-awˇ, bi cehˆ byoˆ jiˇ-euˬ meh.

²⁵Yaw zahˇ laꞈ kʼoeˇ laꞈ sawˆ sawˆ sawˆ-ehˇ cah-eu, jiˇ baˬ yehꞈ-eu tsawˇ haˬ loꞈ-ehˇ, aˬ yawꞈ maꞈ cah cah-ehˇ bi shaˬ-euˬ meh.