Read Akha Yawˇbaˆ 15 Bible Online

Yawˇbaˆ 15 - Akha bible

Yawˇbaˆ 15

¹DAWˬ JA JA-EU NYIˬ DEUˆ TIˬ DEUˆ Kʼoeˇ naˇ, Teˬmaˬ meuˬ-ahˇ jawˇ-eu Eˇliˇpaˬ gʼaˬ ehˇ-eu,

²“Yawˇbaˆ-oˇ, nawˬ neh ngehˬ-euˬ dawˬ deuˬ yawꞈ ngehꞈ meh. Gaˇ dahˇ tsoeˬ leˇ-eu dawˬ maˬ ahˇ-a.

³Tsawˇ gahˇ ahˇ-eu tsawˇ haˬ tiˬ gʼaˬ-iˬ, nawˇ loꞈ-ehˇ gaˇ dahˇ maˬ tsoeˬ-eu dawˬ tmˇ-awˇ, yawˬ haˇ yawˬ ha maˬ ngehˬ piˇ-a.

⁴Ehˇ kʼawꞈ, nawˇ Miˬyehˇ-ahˇ ma guˆ-ehˇ, aˬ yawꞈ-ahˇ shaˇ ju-awˇ uˬ duˬ maˬ tahˬ mawꞈ-a.

⁵Nawˇ haiˬ-eu tsawˇ haˬ pyeuꞈ-eu gaˇ kawˆ, nawˬ neh ngehˬ-euˬ dawˬ deuˬ saˇ kiˇ kamˬ luꞈ meh. Tsawˇ gahˇ gahˇ-eu deuˬ-euˬ dawˬ nawˇ ngehˬ-eu meh.

⁶Nawˬ-euˬ iˬ baˇ-ahˇ ngaˇ ja doeˇ-eu maˬ loˬ-a. Nawˬ neh kʼaˇ ngehˬ-euˬ dawˬ yawˬ dawˬ na luꞈ nawˬ-ahˇ ja doeˇ luꞈ meh.

⁷Nawˇ dehꞈ beh beh le-euˬ tsawˇ haˬ zaˬ ma lehˇ yawˬ haˇ yawˬ ha noeˬ luꞈ te loˇ. Miˬyehˇ gawˬ jawˬ maˬ beh mi naˆ-ehˇ nawˇ dehꞈ le teˬ loˇ.

⁸Miˬyehˇ gaˇ mˇ-eu lehˇ gaˇ kawˆ kawˆ-euˬ nawˇ ya gaˬ te loˇ. Tsawˇ haˬ zaˬ-euˬ zaˬ siˬ tsawˇ gahˇ nawˇ tehꞈ-ehˇ jaˆ jiˇ te loˇ.

⁹Nga maꞈ maˬ siˬ nya gaˇ nawˇ siˬ nya taˬ-euˬ aˬ jeˬ jaˆ te. Nga maꞈ maˬ gʼoˆ shaw nya-ehˇ nawˇ tehꞈ-ehˇ gʼoˆ shaw nya-eu aˬ jeˬ jaˆ te.

¹⁰Nawˬ da maˬ dehꞈ le mi naˆ-ehˇ jawˇ luꞈ-eu, uˬ duˬ pyuˇ laˇ-euˬ tsawˇ haˬ deuˬ jawˇ gaˇ nga maꞈ tsawˇ gahˇ dzaw nya taˬ-euˬ ma.

¹¹“Miˬyehˇ nawˬ-ahˇ gʼawˬ shaˬ gaˬ nehˬ laꞈ gaˇ, nawˇ aˬ jeˬ gʼeh maˬ ha geuꞈ te. Aˬ yawꞈ dawˬ nahˬ yu ni ngehˬ gaˇ, nawˇ aˬ jeˬ gʼeh maˬ naˇ haˬ te.

¹²Ehˇ kʼawꞈ, nawˇ nui ma daˆ laˇ taˬ-awˇ, nga maꞈ-ahˇ mˇ guiˇ haw-eu meh.

¹³Nawˇ Miˬyehˇ-ahˇ nui ma pehˇ laˇ taˬ-awˇ, aˬ yawꞈ-ahˇ zaw leˇ-eu dawˬ ngehˬ-eu meh.

¹⁴Shawˇ jehˆ ni gʼeh-eu tsawˇ haˬ maˇ maˇ ni jawˇ meh loˇ. Miˬyehˇ mehˬ shi tsaˬ-eu dawˇ-eu tsawˇ haˬ jawˇ meh loˇ.

¹⁵Aˬ jeˬ miˇ neh aˬ yawꞈ-euˬ mˬ taˆ gʼaˬ kʼehˇ deuˬ-ahˇ Miˬyehˇ maˬ jah coeˇ ta. Aˬ yawꞈ maꞈ kʼawꞈ Miˬyehˇ mehˬ shi maˬ muiˬ maˬ shawˇ-eu miˇ neh maˬ ngeuˇ-a loˇ.

¹⁶Tsawˇ haˬ zaˬ-aˬ, yaw haiˬ jeˬ-ahˇ iˇ cuꞈ dawˇ-eu loꞈ-ehˇ dawˇ-eu meh. Ngeuˇ meh. Tsawˇ haˬ zaˬ jawꞈ dui dui-awˇ gaˇ dahˇ maˬ tsoeˬ-a.

¹⁷Yawˆbaˆ-oˇ, ngaˬ neh siˬ haw mawˇ haw-euˬ gaˇ kawˆ-ahˇ tiˬ poˆ naˇ haˬ sheˇ.

¹⁸Tsawˇ gahˇ ahˇ-eu deuˬ neh aˬ yawꞈ maꞈ-euˬ aˬ poeˬ aˬ bawˇ deuˬ jawˇ gaˇ dzaw nya taˬ-euˬ gaˇ kawˆ deuˬ, tiˬ jeˬ-iˬ maˬ zaꞈ taˬ ni ngaˬ-ahˇ mehˬ jiˇ nehˬ laꞈ-euˬ meh.

¹⁹Aˬ yawꞈ maꞈ miˇ kʼahˬ laꞈ kʼoeˇ aˬ cawˬ tsawˇ jeuˬ tiˬ gʼaˬ-iˬ maˬ jawˇ-ehˇ, aˬ yawꞈ maꞈ-ahˇ Miˬyehˇ-ahˇ sheuˬ gʼawˬ nehˬ-eu tiˬ gʼaˬ-iˬ maˬ jawˇ-a.

²⁰Aˬ cawˬ kʼoeˇ taˆ kʼaˆ dzaˬ-eu haiˬ-eu tsawˇ haˬ-aˬ, ziˇ jiˇ ngeh keuˆ ni shaˬ zahˬ naꞈ tehꞈ-a.

²¹Guˆ-eu gaˆ-eu teˇ saˇ aˬ yawꞈ-euˬ naˬ bawˇ-ahˇ ya gaˬ-awˇ, kʼahˬ lahˇ kʼaˇ maˬ za ma lehˇ noeˬ ngeh, tahˇ joe joe gaˇ ya daˬ tehꞈ-a.

²²Yaw zahˇ laꞈ kʼoeˇ aˬ yawꞈ ya buˬ-iˇ-eu gaˇ ma maˬ dahˇ-a. Aˬ jeˬ miˇ neh ehˇ naˇ, aˬ yawꞈ-ahˇ sehꞈ-eu mi cehˇ loꞈ luꞈ meh.

²³Aˬ yawꞈ shiˇ taˬ gaˇ dzaˬ-eu lehˇ, jeˬ shiˇ kʼaˬ dzeˇ deuˬ loꞈ luꞈ meh. Aˬ yawꞈ gʼaˇ duˬ zahˇ tsui ni gʼeh-eu aˇ nah keuˆ le luꞈ-eu aˬ yawꞈ siˬ nya meh.

²⁴Guiˇ deuˆ-eu lehˬ hmˬ taˬ-euˬ baoˬ huiˬ-eu sahˬ paˬ tiˬ gʼaˬ loꞈ-ehˇ, luˬ-iˇ seˇ-iˇ-eu jeˬ aˬ yawꞈ kʼoeˇ taˆ keuˆ le-eu lehˇ lehˬ hmˬ luꞈ meh.

²⁵Baoˬ huiˬ-eu Miˬyehˇ-ahˇ laꞈ du cawˬ doˆ nehˬ-awˇ, yehˬ bawˬ sehˇ lu-ehˇ ehˇ nehˬ-eu gʼaˬ kʼoeˇ taˆ, kʼoeˇ loꞈ-ehˇ gʼeh-eu jeˬ keuˆ le tehꞈ-a.

²⁶Tsawˇ haˬ kʼoeˇ gʼaˬ nui ma gʼahˇ dui dui-eu laꞈ kʼoeˇ, tuˇ dui dui-eu dehˬ daˬ duˬ baꞈ-awˇ, Miˬyehˇ-ahˇ ceh leˇ mawꞈ-eu meh.

²⁷Aˬ jeˬ miˇ neh ehˇ naˇ, aˬ yawꞈ-euˬ baˬ ba tsuˇ dahˬ ni gʼeh -awˇ, aˬ yawꞈ-euˬ joꞈ-ahˇ shaˬ tsuˇ dawꞈ byah jiˇ gaˇ keuˆ ni, aˬ yawꞈ ya dzaˬ ya dawˇ dehˆ luꞈ-eu meh.

²⁸Tsawˇ haˬ kʼoeˇ gʼaˬ meuˬ deuˬ-ahˇ deuˆ gʼaˬ-awˇ, nymˇ sahˇ deuˬ cehˆ byoˆ-euˬ nymˇ deuˬ yuˇ geuꞈ-eu meh. Ehˇ kʼawꞈ, guiˇ deuˆ-eu laꞈ kʼoeˇ meuˬ kʼoeˇ deuˬ hawˇ-eu nymˇ kʼoeˇ deuˬ ya cawˆ-iˇ tehꞈ-a.

²⁹Aˬ yawꞈ gʼawˬ myahˇ ni smˇ muiˬ maˬ paˇ ya muiˬ meh. Aˬ yawꞈ kʼaˇ jaˆ-eu tiˬ jeˬ-iˬ maˬ gmˬ-a. Aˬ yawꞈ-euˬ kʼahˬ sehˇ kʼawꞈ byoˆ jiˇ tehꞈ-a.

³⁰Kʼoeˇ naˇ yaw zahˇ laꞈ kʼoeˇ aˬ yawꞈ maˬ doˆ-iˇ nya-ehˇ ya shaˬ tehꞈ-a. Uˬ laꞈ deuˬ bi puiˆ sehꞈ jiˇ-awˇ, aˇ yehˆ deuˬ jaˬ lehˇ bi baw byoˆ jiˇ-euˬ aˇ bawˇ tiˬ bawˇ-ahˇ aˬ yawꞈ duˇ leˇ tehꞈ-a.

³¹Yaw haiˬ jeˬ-ahˇ gʼoe gaˇ keuˆ ni aˬ yawꞈ aˬ dzawˬ dzawˬ naˇ, yaw haiˬ jeˬ-euˬ laꞈ sawˬ aˬ yawꞈ za tehꞈ-a.

³²Aˬ yawꞈ-euˬ aˇ yamˬ maˬ jiˇ le mi naˆ-ehˇ aˬ yawꞈ liˬ-iˇ koˆ-iˇ tehꞈ-a. Aˇ bawˇ uˬ laꞈ loꞈ-ehˇ koˆ-iˇ-awˇ, maˬ paˇ nyoeˇ laˇ nya meh.

³³Maˬ gʼahˇ laˇ-euˬ aˇ siˬ deuˬ bi ga jiˇ-euˬ aˬ gaꞈ baw duˆ hawˇ-eu, aˇ yehˆ ga jiˇ-euˬ saˬ loˬ aˇ bawˇ-ahˇ aˬ yawꞈ duˇ leˇ tehꞈ-a.

³⁴Miˬyehˇ maˬ baw-eu tsawˇ haˬ, zaˬ maˬ ya cu ehˇ, laꞈ nmꞈ nmꞈ-euˬ pyuˇ neh tsoˆ taˬ-euˬ nymˇ deuˬ-ahˇ miˬ dzaˬ puiˆ dzaˬ jiˇ tehꞈ-a.

³⁵Tsawˇ haˬ kʼoeˇ deuˬ-aˬ, aˬ cawˬ-ahˇ laˆ shaˬ laˆ zahˬ-eu jeˬ shaˇ noeˬ-awˇ, yaw haiˬ jeˬ mˇ doˆ laꞈ-eu meh. Aˬ cawˬ-ahˇ myawꞈ dzaˬ gahˇ dzaˬ-eu nui noeˬ aˬ yawꞈ maꞈ-euˬ nui ma laꞈ kʼoeˇ aˬ myah luꞈ byah luꞈ-eu meh.”