Read Akha Yawˇbaˆ 16 Bible Online

Yawˇbaˆ 16 - Akha bible

Yawˇbaˆ 16

¹Kʼoeˇ naˇ, Yawˇbaˆ ehˇ-eu,

²“Teu loꞈ-ehˇ gʼeh-eu dawˬ ngaˇ gaˬ haw-euˬ ma. Naw maꞈ ngaˬ-ahˇ gʼaˬ biꞈ-eu dawˬ teu, ngaˬ-ahˇ ciˬ pi-eu dawˬ-ahˇ duˇ nya.

³Naw maꞈ ngehˬ gʼaˬ ehˇ gʼaˬ-eu maˬ baw ni ehˇ-eu gʼeh te loˇ. Aˬ jeˬ miˇ neh teu naˆ naˆ-ehˇ teh ngehˬ mawꞈ-eu nya.

⁴Naw maꞈ ngaˇ pyeuꞈ-awˇ, ngaˇ naw maꞈ pyeuꞈ law nmˇ-aˬ, naw maꞈ kʼaˇ ngehˬ-euˬ dawˬ teu deuˬ ngaˇ ngehˬ nya ma. Naw maꞈ ehˇ-eu maˬ ngeuˇ-a lehˇ ngaˇ uˬ duˬ juiꞈ-awˇ, lawˇ baˬ-ahˇ sheu bu-eu loꞈ-ehˇ ngaˬ-euˬ dawˬ laꞈ kʼoeˇ naw maꞈ-ahˇ bi bu dzaˬ nya ma.

⁵Muiˬ-eu nui noeˬ nui duˇ biꞈ-eu dawˬ neh naw maꞈ-ahˇ gʼaˬ biꞈ-awˇ, naw maꞈ nui ma saˇ laˇ ni kʼawꞈ, ngehˬ nya tmˇ nya ma.

⁶Ehˇ kʼawꞈ, nymˬ-mˇ ngaˇ ngehˬ kʼawꞈ tmˇ kʼawꞈ, gaˇ dahˇ maˬ tsoeˬ-ehˇ, ciˬ cuˇ ni paˇ jawˇ kʼawꞈ, naˇ-eu gawˇ-eu maˬ naˬ leˇ nya.

⁷Miˬyehˇ-oˇ, nawˇ ngaˬ-ahˇ juˆ lehˆ ni bi pyeuꞈ-iˇ laꞈ-awˇ, ngaˬ-euˬ nymˇ kʼahˬ zaˬ deuˬ-ahˇ nawˬ neh bi sehꞈ jiˇ-euˬ meh.

⁸Nawˇ ngaˬ-ahˇ nyehꞈ-awˇ, ngaˬ-ahˇ muiˇ-eu meh. Ngaˇ-aˬ, baˆ kʼoˆ hawˇ-eu shaˬ yoeˬ tehꞈ-ehˇ pyeuꞈ-iˇ taˬ-euˬ ma. Ngaˬ-euˬ iˬ baˇ baˬ da neh kʼoeˇ loꞈ-ehˇ pyeuꞈ-iˇ-euˬ nga lehˇ aˬ cawˬ ehˇ-eu meh.

⁹Miˬyehˇ nui ma pehˇ-awˇ ngaˬ-ahˇ ngawˬ paˆ ngawˬ shaˆ-euˬ meh. Aˬ yawꞈ ngaˬ-ahˇ bye-awˇ mˇ guiˇ haw laˇ-eu meh.

¹⁰Aˬ cawˬ ngaˬ-ahˇ naˬ gʼa-eu jeˬ-ehˇ uiˇ cawˬ laˇ-eu meh. Aˬ yawꞈ maꞈ ngaˬ-euˬ tiˬ jawˬ oe-awˇ ngaˬ-euˬ baˬ ba-ahˇ tehˆ laˇ-eu meh.

¹¹Miˬyehˇ ngaˬ-ahˇ haiˬ-eu tsawˇ haˬ deuˬ-euˬ aˬ laꞈ laꞈ kʼoeˇ a nehˬ-euˬ meh.

¹²Ngaˇ saˇ suˬ ni jawˇ luꞈ ngeh, Miˬyehˇ ngaˬ-ahˇ kuˬ byahˬ-ahˇ nyehꞈ-awˇ, ciˬ jeˬ ciˬ joˆ joˆ-awˇ, ciˬ tahˬ ciˬ tuˆ nehˬ laꞈ-euˬ meh. Aˇ pyaˇ daˬ-awˇ beuˆ haw-eu loꞈ-ehˇ, kʼaˇ jahˇ mawꞈ-eu jeˬ jahˇ nehˬ laꞈ-euˬ meh.

¹³Yawˬ pyawˬ na luꞈ jawˇ jawˇ-ehˇ ngaˬ-ahˇ kaˆ myaˬ neh beuˆ-awˇ, kaˆ myaˬ deh byoe-awˇ beuˆ tahˬ beuˆ naˇ jiˇ kʼawꞈ, gʼawˬ shaˬ gaˬ nehˬ laꞈ-eu maˬ baw-a.

¹⁴Aˬ yawꞈ ngaˬ-ahˇ tiˬ poˆ saˇ-iˬ tiˬ poˆ beuˆ tahˬ beuˆ naˇ-awˇ, nui ma pehˇ dui dui-awˇ uˬ-iˇ-euˬ yehˇ tiˬ gʼaˬ nui jaˆ mˇ-eu loꞈ-ehˇ, kʼoeˇ naˆ ni ngaˬ-ahˇ jahˇ nehˬ laꞈ-euˬ meh.

¹⁵Ngaˇ ngoeˇ ngoeˇ-ehˇ guˬ daˇ pehˇ zeuˇ mehˬ tsoeˬ dm-awˇ, kʼaˬ lehˇ tsahˬ-ahˇ nuiˇ pahˬ taˬ-euˬ ma.

¹⁶Ngaˬ-euˬ baˬ ba neˇ tseuˆ ni pyeuꞈ laˇ ngeh keuˆ ni ngaˇ ngoeˇ-awˇ, ngaˬ-euˬ myaˆ nuiˆ ngoeˇ puˬ-awˇ, jawˬ jawˬ-ehˇ nyoeˇ laˇ taˬ-euˬ ma.

¹⁷Ehˇ kʼawꞈ, ngaˇ yaw haiˬ jeˬ mˇ taˬ-euˬ maˬ jaˆ-ehˇ, ngaˬ-euˬ guiˬ lahˬ shaˇ dawˬ shawˇ jehˆ ni gʼeh-eu ma.

¹⁸Miˇ tsaˬ tahˬ kʼawˇ-oˇ, ngaˬ-euˬ kʼoeˇ taˆ mˇ lehˬ laꞈ-euˬ jeˬ-ahˇ taˬ zaꞈ taˬ. Yaw tsaˬ yaw dawˇ jeˬ bi keuˆ le-awˬ lehˇ ngaˬ neh guˇ-euˬ dawˬ taˬ bi byoˆ-iˇ nehˬ laꞈ.

¹⁹Ngaˇ jawˇ paw pyawˬ-awˇ ngaˬ-euˬ gʼaˇ duˬ yawꞈ dah-eu tsawˇ haˬ tiˬ gʼaˬ na, mˬ kʼoeˇ taˆ jawˇ luꞈ meh.

²⁰Ngaˬ-euˬ cawˬ deuˬ ngaˬ-ahˇ aˬ jaꞈ jaꞈ haw-awˇ, Miˬyehˇ mehˬ shi ngaˇ myaˆ biˇ yoeˇ le miˇ-a.

²¹Tsawˇ haˬ tiˬ gʼaˬ yawˬ ha-euˬ cawˬ gʼaˇ duˬ tahˬ shaˇ-eu loꞈ-ehˇ, ngaˬ-euˬ gʼaˇ duˬ Miˬyehˇ-ahˇ tiˬ gʼaˬ na bi tahˬ shaˇ leˇ mawꞈ nya.

²²Ngaˬ-euˬ aˇ kʼoꞈ aˇ la deuˬ dzeuˇ-iˇ luꞈ-awˇ, gʼoꞈ dmˇ dzeh laˇ-eu maˬ baw-eu gaˇ ma-ahˇ ngaˇ cah luꞈ-eu ma.