Read Akha Yawˇbaˆ 2 Bible Online

Yawˇbaˆ 2 - Akha bible

Yawˇbaˆ 2

¹Mˬ taˆ gʼaˬ kʼehˇ deuˬ Sahˬpaˬ Miˬyehˇ mehˬ shi ya uiˬ laˇ-eu aˇ nah tiˬ poˆ paˇ keuˆ laˇ ngeh, nehꞈ Saˬdaˬ gʼaˬ kʼawꞈ laˇ taˬ-euˬ meh.

²“Nawˇ aˬ gaˇ iˇ teˬ” lehˇ Saˬdaˬ-ahˇ Sahˬpaˬ Miˬyehˇ naˇ haˬ ngeh, “Miˇ tsaˬ tahˬ kʼawˇ doe ni cah cah-ehˇ jawˇ luꞈ-eu ma” lehˇ Saˬdaˬ ehˇ-eu meh.

³Sahˬpaˬ Miˬyehˇ ehˇ-eu, “Ngaˬ-eu zaˬ kʼaˆ Yawˇbaˆ gaˇ kawˆ nawˇ shaˇ noeˬ haw maˬ loˇ. Aˬ yawꞈ loꞈ-ehˇ saˇ jaˇ ziꞈ-eu muiˬ-eu jaˬ-eu tsawˇ haˬ miˇ tsaˬ kʼoeˇ taˆ tiˬ gʼaˬ-iˬ maˬ jawˇ-a. Aˬ yawꞈ ngaˬ-ahˇ uˬ duˬ tahˬ-awˇ, yaw lehˬ yaw ca jeˬ maˬ ya mˇ ni yahˇ dui dui-eu laꞈ kʼoeˇ dehꞈ luꞈ meh. Aˬ yawꞈ yaw lehˬ tiˬ jeˬ-iˬ maˬ jaˆ gaˇ aˬ yawꞈ-ahˇ bi kʼehˬ-iˇ laꞈ lehˇ nawˇ ngaˬ-ahˇ shaˇ-euˬ meh. Ehˇ kʼawꞈ, Yawˇbaˆ-aˬ, dzeuˇ laˇ ngeh loꞈ-ehˇ saˇ jaˇ ziꞈ luꞈ meh.”

⁴Saˬdaˬ ehˇ-eu, “Tsawˇ haˬ tiˬ gʼaˬ yawˬ ha-euˬ uˬ kʼawˇ ya buˬ-iˇ ni yawˬ jeˬ na luꞈ-ahˇ byehˇ dzeh coeˇ tehꞈ-a.

⁵Ehˇ kʼawꞈ, nymˬ-mˇ nawˇ aˬ yawꞈ-euˬ gʼawˇ mawˇ-ahˇ laˆ tahˬ laˆ naˇ nehˬ law nmˇ-aˬ, nawˬ-euˬ myaˆ kʼeh tuˆ ni aˬ yawꞈ nawˬ-ahˇ yaˬ kʼehˇ yaˬ tehꞈ-a.”

⁶Kʼoeˇ ngeh, Saˬdaˬ-ahˇ Sahˬpaˬ Miˬyehˇ ehˇ nehˬ-eu, “Muiˬ tehꞈ-a. Nymˬ-mˇ aˬ yawꞈ-euˬ gʼawˇ mawˇ nawˬ-euˬ aˬ laꞈ laꞈ kʼoeˇ jaˆ luꞈ-eu miˇ neh, nawˇ jahˇ mawꞈ-eu loꞈ-ehˇ jahˇ nya tehꞈ-a. Ehˇ kʼawꞈ, aˬ yawꞈ-ahˇ nawˇ maˬ ya laˆ sehꞈ ni yahˇ-awˬ.”

⁷Kʼoeˇ naˇ, Saˬdaˬ gʼaˬ, Sahˬpaˬ Miˬyehˇ jawˇ gaˇ neh doˆ-iˇ-awˇ, Yawˇbaˆ-euˬ gʼawˇ mawˇ mawˇ lah-ehˇ, aˬ kuiˇ pehˬ zaˬ-ahˇ neh uˬ duˬ-ahˇ doˆ ni maˇ naˇ naˇ byah jiˇ ni jahˇ-euˬ meh.

⁸Kʼoeˇ ngeh, Yawˇbaˆ kʼaˬ lehˇ lehˇ deh-ahˇ nuiˇ-awˇ, ciˬ cuˇ cuˇ pyehˬ tiˬ hmˬ neh maˇ naˇ kʼoeˇ deuˬ-ahˇ yaw dzuiˆ pyaˆ luꞈ-eu meh.

⁹Aˬ yawꞈ-euˬ miˬ zaˬ aˬ yawꞈ-ahˇ ehˇ-eu, “Nawˇ iˬ nah keuˆ ni saˇ jaˇ ziꞈ ziꞈ-ehˇ jawˇ luꞈ te siˬ loˇ. Nawˬ-euˬ Miˬyehˇ-ahˇ yaˬ kʼehˇ yaˬ-awˇ shiˇ-awˬ tawˇ.”

¹⁰Yawˇbaˆ ehˇ-eu, “Nawˇ tsawˇ uˬ-euˬ dawˬ ngehˬ luꞈ te loˇ. Miˬyehˇ aˬ dui-ahˇ muiˬ-eu jeˬ biꞈ laꞈ ngeh aˬ dui ha geuꞈ-euˬ maˬ ngeuˇ loˇ. Shaˬ-eu zahˬ-eu jeˬ bi keuˆ le ngeh jawˇ tehꞈ-ehˇ aˬ dui maˬ ha geuꞈ ni byehˇ nya ta loˇ.” Yawˇbaˆ-aˬ, kʼoeˇ naˆ naˆ-ehˇ gʼeh-eu jeˬ-ahˇ ya daˬ luꞈ kʼawꞈ, Miˬyehˇ-ahˇ iˬ baˇ taˬ-eu dawˬ tiˬ dawˬ-iˬ maˬ ngehˬ-a.

¹¹Yawˇbaˆ-euˬ cawˬ smˇ gʼaˬ-aˬ, Teˬmaˬ meuˬ-ahˇ jawˇ-euˬ Eˇliˇpaˬ, Shuˇaˬ miˇ kʼahˬ-ahˇ jawˇ-eu Biˇlaˬdaˇ hawˇ-eu Naˬmaˬ miˇ kʼahˬ-ahˇ jawˇ-eu Zoˇpaˬ meh. Yawˇbaˆ shaˬ zahˬ naꞈ dui dui luꞈ-eu gaˇ kawˆ aˬ ha smˇ gʼaˬ ya gaˬ ngeh, iˇ-awˇ gʼaˬ biꞈ-iˇ ma lehˇ aˬ yawꞈ maꞈ noeˬ tsehˆ-euˬ meh.

¹²Aˬ yawꞈ maꞈ maˬ iˇ keuˆ mi naˆ-ehˇ, ui cuiˆ gaˇ mahˇ kaˬ ngeh neh Yawˇbaˆ-ahˇ ya mawˇ-euˬ kʼawꞈ, maˬ haw siˬ nya-a. Yawˇbaˆ-ahˇ haw siˬ ngeh jawˇ, noeˬ shaˬ dui dui-eu laꞈ kʼoeˇ mehˬ tsoeˬ cehˬ pyaˬ-awˇ, kʼoeˇ taˆ paw kʼaˬ lehˇ byaˆ byaˆ-ehˇ yawˬ ha-euˬ uˬ duˬ-ahˇ byaˆ daˆ-awˇ, guˇ guˇ-ehˇ ngoeˇ-euˬ meh.

¹³Kʼoeˇ naˇ, aˬ yawꞈ maꞈ aˬ yawꞈ nehˬ-ehˇ tiˬ kawˆ loꞈ-ehˇ miˇ tsaˬ-ahˇ shiꞈ nah keuˆ ni nuiˇ-awˇ, dawˬ maˬ tmˇ ni jawˇ-euˬ meh. Aˬ jeˬ miˇ neh ehˇ naˇ, aˬ yawꞈ shaˬ zahˬ naꞈ dui dui gaˇ aˬ yawꞈ maꞈ ya mawˇ duˬ-euˬ meh.