Read Akha Yawˇbaˆ 21 Bible Online

Yawˇbaˆ 21 - Akha bible

Yawˇbaˆ 21

¹Kʼoeˇ naˇ, Yawˇbaˆ ehˇ-eu,

²“Ngaˇ ehˇ gaˇ yaw muiˬ-ehˇ naˇ haˬ sheˇ. Ngaˇ nui ma saˇ laˇ ni ngaˇ ehˇ gaˇ naˇ haˬ nehˬ laꞈ-awˬ lehˇ naw maꞈ-ahˇ ngaˇ shaˇ-eu ma.

³Ngaˬ-ahˇ dawˬ ngehˬ-eu aˇ yamˬ tiˬ kʼehˬ biꞈ laꞈ-awˇ, ngaˇ dawˬ ngehˬ gʼaˬ naˇ naw maꞈ ngaˬ-ahˇ kʼaˇ naˬ gʼa mawꞈ-eu loꞈ-ehˇ naˬ gʼa-awˬ.

⁴“Ngaˇ tsawˇ haˬ zaˬ nehˬ-ehˇ ceh dzaˬ luꞈ-eu maˬ ngeuˇ. Ngaˬ-euˬ nui ma maˬ oˇ oꞈ coeˇ-eu heu gaˇ kawˆ jaˆ ma.

⁵Ngaˬ-ahˇ haw sheˇ. Naw maꞈ dawˬ maˬ ngehˬ doˆ nya ni tsoˆ leˇ jiˇ paˬ-ehˇ maˬ gʼeh nya loˇ.

⁶Ngaˬ-euˬ kʼoeˇ taˆ keuˆ le-euˬ jeˬ-ahˇ ngaˇ shaˇ noeˬ ngeh, ngaˬ-ahˇ zahˬ leˇ-awˇ yaw dzuˬ dzuˬ dui dui nya.

⁷Aˬ jeˬ miˇ neh haiˬ-eu tsawˇ haˬ deuˬ-ahˇ Miˬyehˇ bi dehꞈ ta. Mawˬ le-awˇ pyuˇ shuiˇ jaˆ myaˬ laˇ ngeh keuˆ ni aˬ jeˬ gʼeh bi dehꞈ ta.

⁸Aˬ yawꞈ maꞈ-euˬ zaˬ deuˬ hawˇ-eu oeˬ paˬ oeˬ ma deuˬ bym laˇ jiˇ-euˬ gaˇ ya mawˇ ngeh keuˆ ni, aˬ yawꞈ maꞈ ya dehꞈ keuˆ-eu meh.

⁹Aˬ yawꞈ maꞈ-euˬ nymˇ jiˇ kʼoeˇ taˆ luˬ-iˇ seˇ-iˇ-eu jeˬ Miˬyehˇ maˬ bi keuˆ le-ehˇ, aˬ yawꞈ maꞈ yaw dehꞈ dehꞈ-eu guˆ kʼaˇ maˬ za-a.

¹⁰Aˬ yawꞈ maꞈ-euˬ jeˬ zaˬ deuˬ kʼawꞈ, maˬ byoˆ maˬ laˆ ni behˇ laˇ tehˇ tehˬ-eu meh.

¹¹Aˬ yawꞈ maꞈ-euˬ zaˬ deuˬ yawˇ zaˬ loꞈ-ehˇ cehˆ niˇ gʼa-awˇ,

¹²deuˇ-mˬ diˬ, bawˬ law baw gaˇ, gaˇ nyeh nyeh caw-eu meh.

¹³Aˬ yawꞈ maꞈ yaw dehꞈ dehꞈ-eu nui saˇ oꞈ-awˇ, saˇ lehˆ ni ziˇ jiˇ leˇ-eu meh.

¹⁴Haiˬ-eu tsawˇ haˬ Miˬyehˇ-ahˇ teh dzeh-eu meh. Aˬ yawꞈ maꞈ yaw dehꞈ dehꞈ-eu gʼaˇ duˬ Miˬyehˇ nui kʼahˇ aˬ joˆ-ehˇ jaˆ-eu aˬ yawꞈ maꞈ maˬ siˬ mawꞈ-a.

¹⁵Miˬyehˇ-euˬ nui kʼahˇ mˇ-eu maˬ loˬ-ehˇ, aˬ yawꞈ-ahˇ guiˬ lahˬ shaˇ-eu gaˇ dahˇ maˬ tsoeˬ-a lehˇ aˬ yawꞈ maꞈ noeˬ luꞈ meh.

¹⁶Yawˬ ha-euˬ gʼaˬ-ahˇ gʼoe-awˇ mˇ jaˆ-euˬ ma lehˇ aˬ yawꞈ maꞈ ehˇ-eu meh. Ehˇ kʼawꞈ, kʼoeˇ loꞈ-ehˇ gʼeh-eu nui noeˬ nui duˇ-ahˇ ngaˇ maˬ ha geuꞈ.

¹⁷Haiˬ-eu tsawˇ haˬ-euˬ tsiˇ kʼmˬ bi baw miˆ haw taˬ loˇ. Aˬ yawꞈ maꞈ tiˬ gʼaˬ na luˬ-iˇ seˇ-iˇ-eu jeˬ-ahˇ ya tahˬ puˬ haw taˬ loˇ. Haiˬ-eu tsawˇ haˬ-ahˇ Miˬyehˇ nui ma pehˇ-awˇ kʼehˬ nehˬ haw-euˬ jaˆ-awˇ,

¹⁸jaˬ lehˇ neh bi hehˇ dzaˬ gʼeh-euˬ gʼo yoeˬ loꞈ-ehˇ bi baw byoˆ gʼeh-awˇ, jaˬ lehˇ lehˇ ma neh bi baw ha gʼeh-euˬ kʼaˬ lehˇ loꞈ-ehˇ jahˇ nehˬ-euˬ jaˆ ta loˇ.

¹⁹Aˬ da gʼaˬ-euˬ iˬ baˇ baˬ da neh zaˬ gʼaˬ-ahˇ Miˬyehˇ kʼehˬ-eu meh lehˇ naw maꞈ ehˇ-eu meh. Toˆ-ehˇ maˬ ngeuˇ-ehˇ, iˬ baˇ ahˇ-eu gʼaˬ-euˬ mawˇ do-ahˇ Miˬyehˇ kʼehˬ luꞈ-uˇ. Aˬ yawꞈ maꞈ iˬ baˇ ahˇ-eu miˇ neh kʼoeˇ loꞈ-ehˇ kʼehˬ nehˬ-euˬ gaˇ kawˆ aˬ yawꞈ maꞈ-ahˇ bi siˬ leˇ luꞈ-uˇ.

²⁰Iˬ baˇ mˇ-eu tsawˇ haˬ deuˬ yawˬ ha-euˬ iˬ baˇ yawˬ ha pi luꞈ-uˇ. Baoˬ huiˬ-eu Miˬyehˇ nui ma pehˇ-eu jeˬ-ahˇ aˬ yawꞈ maꞈ ya daˬ luꞈ-uˇ.

²¹Tsawˇ haˬ tiˬ gʼaˬ shiˇ dzeuˇ gʼaˬ ngeh, yawˬ ha-euˬ nymˇ jiˇ gʼaˇ duˬ kʼahˇ kʼoꞈ nya ta loˇ.

²²Yaw goˇ-ahˇ jawˇ-eu deuˬ-ahˇ yaˇ kʼaˬ daˇ luꞈ-eu Miˬyehˇ-ahˇ tsawˇ haˬ zaˬ mehˬ nehˬ tsoˆ nehˬ nya ta loˇ.

²³Tsawˇ haˬ tiˬ gʼaˬ pyuˇ shuiˇ myawˬ gahˬ tiˬ byah jaˆ-awˇ, laˬ kʼaˬ cehˇ nui saˇ za-eu laꞈ kʼoeˇ ziˇ dehꞈ jiˇ-euˬ meh.

²⁴Aˬ yawꞈ-euˬ gʼawˇ mawˇ tsuˇ dahˬ ni gʼeh-awˇ, aˬ yawꞈ-euˬ shaˬ yoeˬ puˇ nmꞈ byah-eu meh.

²⁵Yawˬ gʼaˬ yawˬ-aˬ, yaw dehꞈ dehꞈ-eu laˬ kʼaˬ cehˇ-eu jeˬ tiˬ pawꞈ-iˬ maˬ ahˇ-ehˇ, nui saˇ maˬ oꞈ ni ziˇ dehꞈ jiˇ-euˬ meh.

²⁶Ehˇ kʼawꞈ, nyiˬ gʼaˬ luꞈ tiˬ kawˆ loꞈ-ehˇ bi duˬ pahˬ-awˇ, buˬ joe kuˬ lah bi lah leˇ jiˇ-euˬ meh.

²⁷Ngaˬ-euˬ kʼoeˇ taˆ naw maꞈ nui gʼoꞈ ahˇ-eu ngaˇ siˬ nya ma.

²⁸Yaw haiˬ jeˬ mˇ-euˬ, tsawˇ myahˇ doˆ-eu tsawˇ haˬ kʼoeˇ gʼaˬ-euˬ nymˇ aˬ geu gaˇ jaˆ ta lehˇ naw maꞈ naˇ haˬ-eu meh.

²⁹Iˇ tsehˆ laˇ tsehˆ-eu tsawˇ haˬ deuˬ-ahˇ naw maꞈ maˬ ngehˬ cawˬ haw-aˬ loˇ. Aˬ yawꞈ maꞈ ja luꞈ-eu dawˬ, naw maꞈ maˬ siˬ te loˇ.

³⁰Miˬyehˇ nui ma pehˇ-awˇ kʼehˬ nehˬ kʼaˆ nehˬ ngeh nah, haiˬ-eu tsawˇ haˬ deuˬ aˬ myah luꞈ dzeuˇ-iˇ-eu meh.

³¹Haiˬ-eu tsawˇ haˬ neh mˇ-euˬ jeˬ-ahˇ ja doˆ-awˇ aˬ yawꞈ neh mˇ-euˬ loꞈ-ehˇ jahˇ kʼoꞈ nehˬ-eu tiˬ gʼaˬ-iˬ maˬ jawˇ-a.

³²Yaw muiˬ paˬ-ehˇ loꞈ piˇ taˬ-euˬ aˬ yawꞈ-euˬ lmˬ bymˇ lo kʼahˬ-ahˇ, aˬ cawˬ aˬ yawꞈ-ahˇ baꞈ gʼeh ngeh,

³³tsawˇ haˬ aˇ heˇ gʼaˬ sheuˬ ha-eu jawˇ-awˇ, miˇ tsaˬ tahˬ kʼawˇ kʼawꞈ aˬ yawꞈ kʼoeˇ taˆ aˬ za za lehˇ kʼawˬ tehˬ nehˬ-eu meh.

³⁴Naw maꞈ-aˬ, tiˬ jeˬ-iˬ gaˇ dahˇ maˬ tsoeˬ-eu dawˬ neh ngaˬ-ahˇ gʼaˬ biꞈ-eu meh. Naw maꞈ kʼaˇ ngehˬ-eu dawˬ yawˬ dawˬ na luꞈ jaˬ myawꞈ meh.”