Read Akha Yawˇbaˆ 24 Bible Online

Yawˇbaˆ 24 - Akha bible

Yawˇbaˆ 24

¹“Aˬ jeˬ miˇ neh yaˇ kʼaˬ daˇ-eu aˇ yamˬ tiˬ yamˬ Miˬyehˇ maˬ tseˇ doˆ taˬ ta. Aˬ jeˬ miˇ neh aˬ yawꞈ-ahˇ gʼoe-eu deuˬ aˇ nah kʼoeˇ nah-ahˇ loꞈ loꞈ-ehˇ ya shaˬ ta.

²Tsawˇ haˬ zaˬ deuˬ yaˇ kaˬ biˇ-euˬ kʼaˬ lo kʼahˬ jiˆ-awˇ miˇ tsaˬ yuˇ lahˬ geuꞈ-eu meh. Aˬ yawꞈ maꞈ aˬ cawˬ-euˬ yawˇ kʼoeˬ-awˇ yawˬ ha-euˬ yawˇ maꞈ nehˬ-ehˇ teh keuˬ-eu meh.

³Muˇ coe aˬ nmˇ deuˬ-euˬ mahˬ tahˬ laˆ-ahˇ aˬ yawꞈ maꞈ teh geuꞈ-awˇ, miˬ coeˬ miˬ ma-euˬ mawˇ neˇ mawˇ gaw-ahˇ dziˇ dzoˆ maˬ tsoeˬ kʼoeˇ keuˆ ni paꞈ taˬ-eu meh.

⁴Shaˬ zaˬ zahˬ zaˬ-euˬ mˇ myawˬ-ahˇ aˬ yawꞈ maꞈ laˆ tsoeˬ-awˇ, maˬ jaˆ-eu tsawˇ haˬ deuˬ ya cehˆ zaꞈ gaˇ keuˆ ni aˬ yawꞈ maꞈ kʼaˆ dzaˬ-eu meh.

⁵“Yaw shaˬ zaˬ deuˬ bawˇ tsahˬ mahˬ tahˬ laˆ loꞈ-ehˇ, bawˇ tsahˬ bawˇ dahˇ kʼaˇ shuiꞈ deh yaˇ doe ni dzaˇ poˆ dzaˬ kʼawꞈ, yawˬ ha-euˬ zaˬ deuˬ-euˬ uˬ maˆ maˬ poˆ dehˆ nya-a.

⁶Yawˬ ha-ahˇ maˬ oꞈ-eu deh ma-ahˇ aˬ yawꞈ maꞈ cehˇ ya yehˬ-awˇ, haiˬ-eu tsawˇ haˬ deuˬ-euˬ aˬ gaꞈ yaˇ kmˇ laꞈ kʼoeˇ aˬ gaꞈ aˇ siˬ ya pyaˆ uiˬ nehˬ-eu meh.

⁷Uˬ ciꞈ paw yuꞈ ngeh dm gʼoeˬ-eu tiˬ jeˬ-iˬ maˬ jaˆ-ehˇ, tsehꞈ teuˆ ni ya ga bya-eu meh.

⁸Gawˬ jawˬ-ahˇ uˬ yehˇ jaˇ yoe ni deh-awˇ, lo kʼahˬ lo guˇ-ahˇ pyaˆ tehˬ-awˇ, uˬ yehˇ awˆ-eu shaˬ gʼa-euˬ meh.

⁹Haiˬ-eu tsawˇ haˬ deuˬ aˬ da maˬ baw-eu zaˬ deuˬ-ahˇ zaˬ kʼaˆ bi geuꞈ-awˇ, shaˬ zaˬ zahˬ zaˬ-euˬ aˬ buˇ aˬ li deuˬ-ahˇ dziˇ dzoˆ sawˇ geuꞈ-eu meh.

¹⁰Ehˇ kʼawꞈ, shaˬ zaˬ zahˬ zaˬ deuˬ mehˬ tsoeˬ maˬ ahˇ ni yaˇ smˇ ya iˇ-awˇ, cehˇ yehˬ luꞈ kʼawꞈ hawˬ mehꞈ dzahˬ dzahˬ-ehˇ ya shaˬ-eu meh.

¹¹Aˬ yawꞈ maꞈ saˬ loˬ tsiˇ hawˇ-eu aˬ gaꞈ dzaˇ uiˇ lehˬ luꞈ kʼawꞈ, kʼoeˇ deuˬ-ahˇ mehꞈ mehꞈ-ehˇ ya jawˇ-eu meh.

¹²Naˇ-eu gawˇ-eu deuˬ hawˇ-eu shiˇ leˇ luꞈ-eu deuˬ meuˬ laꞈ kʼoeˇ guˇ luꞈ kʼawꞈ, aˬ yawꞈ maꞈ-euˬ shaˇ dawˬ-ahˇ Miˬyehˇ maˬ naˇ haˬ nehˬ-a.

¹³Yaw shehꞈ-euˬ gaˇ kawˆ maˬ siˬ nya-ehˇ yaw shehꞈ sheuˬ gʼeh gaˇ maˬ iˇ-eu, yaw shehꞈ-ahˇ maˬ ha geuꞈ-eu tsawˇ haˬ deuˬ jawˇ-eu meh.

¹⁴Uˬ bya bya laˇ ngeh tsawˇ haˬ-ahˇ sehꞈ-eu gʼaˬ tuˇ laˇ-awˇ, shaˬ zaˬ zahˬ zaˬ deuˬ-ahˇ sehꞈ-awˇ, uˬ ciꞈ paw smˇ kʼoeˬ kʼoeˬ-eu meh.

¹⁵Aˬ cawˬ miˬ zaˬ-ahˇ bahˬ-eu tsawˇ haˬ zahˇ moˬ zahˇ shehˬ shehˬ le gaˇ dawˬ-awˇ, aˬ cawˬ tiˬ gʼaˬ-iˬ maˬ bi haw siˬ-eu gʼaˇ duˬ myaˆ pyawˬ-ahˇ kaꞈ kaˬ-eu meh.

¹⁶Smˇ kʼoeˬ deuˬ uˬ ciꞈ paw aˬ cawˬ-euˬ nymˇ doe ni uˇ-iˇ-awˇ, nah gʼahˇ paw yaw shehꞈ maˬ jaˆ gaˇ dzuˇ zaꞈ-eu meh.

¹⁷Nah gʼahˇ paw yaw shehꞈ-ahˇ aˬ yawꞈ maꞈ guˆ kʼawꞈ, yaw zahˇ laꞈ kʼoeˇ aˬ yawꞈ maꞈ tiˬ jeˬ-iˬ maˬ guˆ-a.

¹⁸Haiˬ-eu tsawˇ haˬ-ahˇ iˇ jeuˬ dehˬ dzaˬ-awˇ, aˬ yawꞈ-euˬ miˇ tsaˬ-ahˇ Miˬyehˇ yaˬ kʼehˇ yaˬ-euˬ miˇ neh, aˬ yawꞈ-euˬ aˬ gaꞈ yaˇ kmˇ-ahˇ iˇ-eu tsawˇ haˬ maˬ paˇ jawˇ meh.

¹⁹Nahˇ tsaˇ tsoꞈ-awˇ yaw lahˇ lahˇ gaˇ, ngehˇ ngehˇ km guiˇ byoˆ-eu loꞈ-ehˇ, iˬ baˇ mˇ-eu tsawˇ haˬ deuˬ dehꞈ-eu miˇ kʼahˬ laꞈ kʼoeˇ ya byoˆ-iˇ tehꞈ-a.

²⁰Aˬ yawꞈ-euˬ zaˬ baw aˬ ma kʼawꞈ aˬ yawꞈ-ahˇ ngehˇ-euˬ meh. Aˬ yawꞈ-euˬ gʼawˇ mawˇ-ahˇ buˬ joe neh bi dzaˬ jiˇ-awˇ, lawˇ-iˇ-euˬ aˇ bawˇ loꞈ-ehˇ cawˆ-iˇ-eu meh.

²¹Miˬ coeˬ miˬ ma deuˬ-ahˇ aˬ yawꞈ yehˬ bawˬ-ehˇ gʼeh-awˇ, zaˬ maˬ jawˇ-eu aˬ ma deuˬ-ahˇ gʼawˬ shaˬ maˬ gaˬ nehˬ-eu miˇ neh, aˬ yawꞈ kʼoeˇ taˆ kʼoeˇ loꞈ-ehˇ keuˆ le-eu meh.

²²Miˬyehˇ-aˬ, aˬ yawꞈ-euˬ gʼaˬ-ahˇ gʼoe-awˇ baoˬ huiˬ-eu tsawˇ haˬ deuˬ-ahˇ laˆ cawˆ nehˬ-eu meh. Aˬ yawꞈ maꞈ ziꞈ dah ni dehꞈ luꞈ kʼawꞈ, Miˬyehˇ luˆ laˇ ngeh ya shiˇ-eu meh.

²³Miˬyehˇ aˬ yawꞈ-ahˇ saˇ lehˆ ni bi dehꞈ tawˬ luꞈ kʼawꞈ, myaˆ nuiˆ tiˬ pyawˬ aˬ yawꞈ-ahˇ haw tsoˆ taˬ-euˬ meh.

²⁴Haiˬ-eu tsawˇ haˬ deuˬ tiˬ kʼehˇ laˇ kʼehˬ ya dehꞈ dzaˬ kʼawꞈ, yaˇ moꞈ loꞈ-ehˇ nyoeˬ-iˇ-awˇ, bi pyehˆ tsehˆ-euˬ cehˇ cehˇ nmˇ loꞈ-ehˇ tehꞈ meh.

²⁵Kʼoeˇ loꞈ-ehˇ maˬ ngeuˇ-a lehˇ aˬ suˇ gʼaˬ ehˇ nya te. Ngaˬ neh ehˇ-euˬ maˬ tsaˬ-a lehˇ aˬ geu gʼaˬ ja duˬ nya te.”