Read Akha Yawˇbaˆ 26 Bible Online

Yawˇbaˆ 26 - Akha bible

Yawˇbaˆ 26

¹Kʼoeˇ naˇ, Yawˇbaˆ paˇ ehˇ-eu,

²“Ngaˇ loꞈ-ehˇ gʼaˬ byehˆ byehˆ dui dui-eu shaˬ-eu zahˬ-eu tsawˇ haˬ-ahˇ, nawˇ caw ba nehˬ laꞈ-euˬ aˇ naˆ ni muiˬ-eu nga.

³Muiˬ-eu tsawˇ gahˇ hawˇ-eu muiˬ-eu nui noeˬ nui duˇ, ngaˇ loꞈ-ehˇ gʼeh-eu aˬ dzawˬ aˇ gah-ahˇ nawˇ biꞈ laꞈ-euˬ meh.

⁴Nawˬ-euˬ dawˬ heu deuˬ dawˬ tawˆ luꞈ-ahˇ aˬ suˇ gʼaˬ naˇ haˬ nmˇ lehˇ nawˇ noeˬ te. Nawˇ heu loꞈ-ehˇ gʼeh-eu dawˬ ngehˬ ni aˬ suˇ gʼaˬ neh bi noeˬ doˆ laꞈ ta.

⁵Shiˇ dzeuˇ-euˬ tsawˇ haˬ deuˬ-euˬ yaw sahˇ deuˬ, miˇ tsaˬ dawˬ dah jaˆ-eu iˇ cuꞈ laꞈ kʼoeˇ yaw dzuˬ dzuˬ luꞈ meh.

⁶Shiˇ-eu miˇ kʼahˬ dehˬ kaˬ taˬ-euˬ jeˬ maˬ jaˆ-ehˇ, Miˬyehˇ mehˬ shi bya tsehˆ ni jaˆ-eu meh.

⁷Laꞈ taˆ pyawˬ-ahˇ jaˆ-eu mˬ-ahˇ Miˬyehˇ toˆ pyeh-awˇ, miˇ tsaˬ tahˬ kʼawˇ-ahˇ tiˬ gaˇ-iˬ maˬ tuˆ ni jaˬ myawꞈ-ahˇ bi ceuˬ-euˬ meh.

⁸Mˬ dmˇ laꞈ kʼoeˇ iˇ cuꞈ tiˬ byah ni bi dahˬ-awˇ, iˇ cuꞈ kʼoeˇ yaw kah baˬ da neh mˬ dmˇ maˬ pehꞈ-iˇ ni jahˇ-euˬ gʼaˬ Miˬyehˇ meh.

⁹Ba la la loˆ-ahˇ mˬ dmˇ naˇ kʼah aˬ yawꞈ gʼoˆ zaꞈ-eu meh.

¹⁰Iˬ ma laˆ shaˆ kʼoeˇ taˆ yaw zah zah-ehˇ aˬ yawꞈ kawˆ boꞈ-awˇ, yaw shehꞈ hawˇ-eu yaw zahˇ biˇ paˆ-euˬ meh.

¹¹Mˬ-ahˇ toˆ diˇ taˬ-euˬ kʼawˇ zeuˇ deuˬ-ahˇ aˬ yawꞈ lmˬ guˆ ngeh, kʼawˇ zeuˇ kʼoeˇ deuˬ yaw dzuˬ dzuˬ-eu meh.

¹²Aˬ yawꞈ-euˬ gʼaˬ neh iˬ ma laˆ shaˆ-ahˇ aˬ yawꞈ gʼaˬ leˇ-awˇ, aˬ yawꞈ-euˬ tsawˇ gahˇ neh iˬ ma laˆ shaˆ byaˆ yahˬ Laˬhaˇ-ahˇ laˆ cawˆ-euˬ meh.

¹³Aˬ yawˬ-euˬ saꞈ neh mˬ baw shawˇ-awˇ, cehˆ dzeuˇ-eu lehˇ leh jeh-eu laˆ shaˆ byaˆ yahˬ-ahˇ, aˬ yawꞈ-euˬ aˬ laꞈ neh sehꞈ-euˬ meh.

¹⁴Ehˇ kʼawꞈ, heu deuˬ-aˬ aˬ yawꞈ-euˬ baoˬ aˇ kʼawꞈ tehꞈ-a siˬ. Aˬ yawꞈ jaˬ cehˇ cehˇ-eu ya gaˬ-eu naˆ ni tehꞈ-a siˬ. Aˬ diˇ aˬ maˇ Miˬyehˇ aˇ naˆ ni huiˬ-eu mahˇ-eu aˬ suˇ gʼaˬ siˬ nya nmˇ.”