Read Akha Yawˇbaˆ 29 Bible Online

Yawˇbaˆ 29 - Akha bible

Yawˇbaˆ 29

¹Kʼoeˇ naˇ, Yawˇbaˆ aˬ yawꞈ-euˬ gaˇ kawˆ heu loꞈ-ehˇ paˇ ehˇ-eu meh.

²“Ngaˇ yaw dehꞈ dehꞈ-eu heu, dzeuˇ laˇ ngeh Miˬyehˇ haw piˇ laꞈ ngeh loꞈ-ehˇ, paˇ ya dehꞈ poˆ law nmˇ duˇ nya.

³Kʼoeˇ ngeh Miˬyehˇ ngaˬ nehˬ-ehˇ aˬ myah luꞈ jawˇ-awˇ, yaw zahˇ laꞈ kʼoeˇ ngaˇ cah ngeh yaw shehꞈ bya nehˬ laꞈ-euˬ meh.

⁴Aˇ nah aˇ yamˬ kʼoeˇ yamˬ-ahˇ ngaˇ dehꞈ dzaˬ dui dui-awˇ, Miˬyehˇ-euˬ cawˬ cawˬ taꞈ-eu jeˬ ngaˬ-euˬ nymˇ jiˇ-ahˇ haw piˇ nehˬ laꞈ-euˬ meh.

⁵Kʼoeˇ ngeh Baoˬ huiˬ-eu Miˬyehˇ ngaˬ nehˬ-ehˇ jawˇ-awˇ, ngaˬ-euˬ zaˬ dawˬ tawˆ luꞈ ngaˬ-euˬ tiˬ jawˬ jawˇ-euˬ ma.

⁶Mawˇ neˇ aˬ coeˇ hawˇ-eu ciꞈ myehꞈ aˬ coeˇ tiˬ byah jaˆ-awˇ, kʼaˬ lo lo gahˬ-ahˇ saˬ loˬ yaˇ jaˆ-euˬ ma.

⁷Meuˬ-euˬ aˬ yuiꞈ aˬ tsu deuˬ tahˬ dzoeˇ-awˇ, aˬ yawꞈ maꞈ mehˬ shi ngaˇ kʼaˇ nuiˇ leˇ ngeh,

⁸Zaˬ guˬ deuˬ ngaˬ-ahˇ gaˇ pawˇ pawˇ-awˇ, tsawˇ mawˬ deuˬ tuˇ-awˇ yaw zeu baw nehˬ laꞈ-eu meh.

⁹Aˬ yuiꞈ aˬ tsu deuˬ dawˬ ja ja-eu naˬ leˇ-awˇ,

¹⁰huiˬ dui mahˇ dui dui-eu deuˬ kʼawꞈ ciˬ cuˇ ni jawˇ-eu meh.

¹¹Ngaˬ-ahˇ mawˇ haw-euˬ deuˬ hawˇ-eu ngaˬ-euˬ gaˇ kawˆ gaˬ haw-euˬ deuˬ yawˬ gʼaˬ na luꞈ, ngaˬ neh mˇ-euˬ muiˬ-eu jeˬ gaˇ kawˆ ja-eu meh.

¹²Yaw shaˬ zaˬ deuˬ guˇ-eu ya gaˬ ngeh, ngaˇ caw ba nehˬ-euˬ ma. Laꞈ jeuˬ shaˇ kʼaˇ maˬ za-eu muˇ coe aˬ nmˇ deuˬ-ahˇ ngaˇ ngehˬ gʼeh nehˬ-euˬ ma.

¹³Noeˬ dui noeˬ duiˇ-euˬ tsawˇ haˬ deuˬ ngaˬ-ahˇ ya ja ceuˬ-awˇ, miˬ coeˬ miˬ ma deuˬ nui saˇ oꞈ ni ngaˇ caw ba nehˬ-euˬ ma.

¹⁴Ngaˇ aˬ myah luꞈ yaw tsaˬ yaw dawˇ dawˇ-ehˇ dehꞈ-awˇ,

¹⁵myaˆ behꞈ deuˬ gʼaˇ duˬ myaˆ nuiˆ geuꞈ-awˇ, kuiˇ kuˆ deuˬ gʼaˇ duˬ aˬ kuiˇ geuꞈ-euˬ ma.

¹⁶Shaˬ zaˬ zahˬ zaˬ deuˬ gʼaˇ duˬ ngaˇ aˬ da loꞈ-ehˇ pyeuꞈ-awˇ, boeˇ miˬ siˬ kʼaˬ deuˬ shaˬ laˇ ngeh caw ba nehˬ-euˬ ma.

¹⁷Haiˬ-eu tsawˇ haˬ deuˬ-euˬ juiˇ ngaˇ ngawˬ kʼehꞈ-awˇ, aˬ yawꞈ maꞈ-euˬ laꞈ-ahˇ ahˇ-eu deuˬ-ahˇ ka kʼoꞈ-euˬ ma.

¹⁸Ngaˇ ziˇ baw ziˇ za-awˇ, iˇ kahˇ laꞈ kʼoeˇ saˇ lehˆ ni ziˇ jiˇ mawꞈ-eu nui kʼahˇ jaˆ-euˬ ma.

¹⁹Ngaˇ-aˬ, duˬ ciˇ-ahˇ aˬ myah luꞈ iˇ cuꞈ dahˬ-awˇ, uˬ pyaˬ uˬ laꞈ-ahˇ ceuˬ ga aˬ taˬ-euˬ aˇ bawˇ tiˬ bawˇ-ahˇ duˇ-euˬ ma.

²⁰Tsawˇ haˬ yawˬ gʼaˬ na luꞈ ngaˬ-ahˇ aˬ myah luꞈ ja ceuˬ-awˇ, aˬ myah luꞈ gʼaˬ juˬ-iˇ-eu maˬ baw ni dehꞈ-euˬ ma.

²¹Ngaˇ nui noeˬ nui duˇ kʼaˇ biꞈ ngeh, dawˬ tawˆ luꞈ ciˬ cuˇ ni jawˇ-awˇ, yaw muiˬ paˬ-ehˇ naˇ haˬ geuꞈ-eu meh.

²²Ngaˬ neh ngehˬ gʼaˬ tmˇ gʼaˬ-euˬ gaˇ, aˬ yawꞈ maꞈ ja kʼaˇ maˬ za-a. Ngaˬ-euˬ dawˬ uˬ yehˇ deh-euˬ loꞈ-ehˇ nyiꞈ leˇ-eu meh.

²³Mˇ dzaˬ-eu tsawˇ haˬ deuˬ jawˇ la yamˬ-ahˇ yehˇ le-eu uˬ yehˇ-ahˇ laˬ kʼaˬ cehˇ-eu loꞈ-ehˇ, ngaˬ-euˬ dawˬ-ahˇ yawˬ gʼaˬ na luꞈ laˬ kʼaˬ cehˇ-eu meh.

²⁴Aˬ yawꞈ maꞈ nui ma cawˆ luꞈ gaˇ ngaˇ uiˇ cawˬ nehˬ-awˇ, shiˬ deuˬ ni gʼeh-eu ngaˬ-euˬ myaˆ pyawˬ aˬ yawꞈ maꞈ-ahˇ gʼaˬ bi ahˇ-euˬ ma.

²⁵Aˬ yawꞈ maꞈ-ahˇ ngaˇ sheuˬ gʼeh-awˇ, ngehˬ tsehˆ ehˇ tsehˆ-eu gʼaˬ geuꞈ-euˬ ma. Guiˇ maꞈ-ahˇ sheuˬ gʼeh-eu sahˬ paˬ loꞈ-ehˇ aˬ yawꞈ maꞈ-ahˇ ngaˇ sheuˬ gʼeh-awˇ, nui ma cawˆ ngeh gʼaˬ biꞈ nehˬ-euˬ ma.