Read Akha Yawˇbaˆ 32 Bible Online

Yawˇbaˆ 32 - Akha bible

Yawˇbaˆ 32

¹EˇLIˇHUˆ-EUˬ DAWˬ Yawˇbaˆ-aˬ, yawˬ haˇ yawˬ ha iˬ baˇ maˬ ahˇ lehˇ noeˬ duˬ taˬ-euˬ miˇ neh, Yawˇbaˆ-euˬ cawˬ kʼoeˇ smˇ gʼaˬ aˬ yawꞈ-ahˇ dawˬ maˬ paˇ teh ngehˬ ni byehˇ-euˬ meh.

²Ehˇ kʼawˬ, Yawˇbaˆ yawˬ haˇ yawˬ ha tsaˬ ma lehˇ ehˇ-awˇ, Miˬyehˇ-ahˇ iˬ baˇ taˬ-eu miˇ neh, gaˇ dzeˇ paw yawꞈ-awˇ haw luꞈ-eu Eˇliˇhuˆ lehˇ myahˇ-euˬ tiˬ gʼaˬ nui ma pehˇ laˇ-awˇ, aˬ yawꞈ-euˬ nui ma-ahˇ maˬ nyehꞈ tehˬ coeˇ ni pyeuꞈ laˇ taˬ-euˬ meh. Eˇliˇhuˆ-aˬ, Lam aˇ jeuˬ Buˇzaˆ-euˬ aˬ li Baˬlaˬkeˬlaˇ-euˬ zaˬ pyeuꞈ-eu meh.

³Yawˇbaˆ-euˬ cawˬ kʼoeˇ smˇ gʼaˬ-ahˇ kʼawꞈ Eˇliˇhuˆ nui ma pehˇ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ Yawˇbaˆ-ahˇ maˬ ngehˬ kʼoꞈ nehˬ nya-euˬ miˇ neh, Miˬyehˇ lehˬ-eu loꞈ-ehˇ pyeuꞈ laˇ taˬ-euˬ meh.

⁴Eˇliˇhuˆ-aˬ, aˬ cawˬ naˆ maˬ tseˇ aˇ kʼoꞈ nyiˇ dzehˬ-eu gʼaˬ pyeuꞈ-eu miˇ neh, yawˬ gʼaˬ na luꞈ dawˬ ngehˬ gʼaˬ gaˇ keuˆ ni dawˬ luꞈ-eu meh.

⁵Tsawˇ haˬ kʼoeˇ smˇ gʼaˬ Yawˇbaˆ-ahˇ maˬ ehˇ kʼoꞈ nehˬ nya gaˇ ya mawˇ ngeh, aˬ yawꞈ nui ma pehˇ laˇ-euˬ meh.

⁶Kʼoeˇ naˇ, Buˇzaˆ aˇ jeuˬ Baˬlaˬkeˬlaˇ-euˬ aˬ li Eˇliˇhuˆ kʼoeˇ gʼaˬ heu loꞈ-ehˇ ehˇ-eu meh. “Ngaˇ aˇ kʼoꞈ nahˬ-awˇ, naw maꞈ aˇ kʼoꞈ kʼawˆ laˇ-euˬ miˇ neh, ngaˬ neh noeˬ-euˬ jeˬ maˬ ehˇ peuˬ ni jawˇ-euˬ ma.

⁷Naw maꞈ aˇ kʼoꞈ kʼawˆ laˇ-euˬ deuˬ, tsawˇ gahˇ byah dzehˬ-euˬ miˇ neh, naw maꞈ neh ehˇ-euˬ tsaˬ tehꞈ-a lehˇ, yawˬ haˇ yawˬ ha ngaˇ ehˇ-euˬ ma.

⁸Ehˇ kʼawꞈ, tsawˇ haˬ -ahˇ tsawˇ gahˇ biꞈ-eu gʼaˬ-aˬ, Baoˬ huiˬ-euˬ Miˬyehˇ-euˬ yaw sahˇ meh.

⁹Aˇ kʼoꞈ kʼawˆ laˇ-euˬ baˬ da neh tehꞈ-ehˇ tsawˇ gahˇ ahˇ-awˇ, yaw muiˬ yaw doeˇ tseˇ paˆ nya-eu maˬ ngeuˇ-a.

¹⁰Teu miˇ neh, nymˬ-mˇ naw maꞈ ngaˇ ehˇ gaˇ naˇ haˬ-awˬ. Ngaˬ neh noeˬ taˬ-euˬ jeˬ naw maꞈ-ahˇ ngaˇ ja nehˬ nyaˇ.

¹¹Naw maꞈ ja gaˇ ngaˇ ciˬ cuˇ ni naˇ haˬ-awˇ, aˇ poeˬ kʼaˆ-eu dawˬ ngehˬ doˆ laˇ gaˇ dawˬ luꞈ-eu ma.

¹²Ngaˇ yaw muiˬ-ehˇ naˇ haˬ duˬ leꞈ ngeh, naw maꞈ maˬ ja gʼaˬ nya gaˇ ya gaˬ-euˬ ma. Yawˇbaˆ neh ehˇ-euˬ dawˬ maˬ tsaˬ-a lehˇ naw maꞈ maˬ ja duˬ nehˬ nya-a.

¹³Naw maꞈ tsawˇ gahˇ poˆ mawˇ taˬ-euˬ ma lehˇ, aˬ joˆ-ehˇ ehˇ nya te. Yawˇbaˆ-ahˇ naw maꞈ maˬ ja gʼaˬ nya-eu miˇ neh, Miˬyehˇ ya ja gaˇ keuˆ tehꞈ-a.

¹⁴Yawˇbaˆ naw maꞈ nehˬ-ehˇ ja luꞈ-eu meh. Ngaˬ nehˬ-ehˇ ja-eu maˬ ngeuˇ. Ehˇ kʼawꞈ, naw maꞈ ngehˬ kʼoꞈ-euˬ loꞈ-ehˇ ngaˇ maˬ ngehˬ.

¹⁵Yawˇbaˆ-oˇ, aˬ yawꞈ maꞈ ngehˬ-euˬ dawˬ jiˇ-awˇ, nawˬ-ahˇ maˬ paˇ teh ngehˬ laˇ nya meh.

¹⁶Aˬ yawꞈ maꞈ ciˬ cuˇ ni naˬ leˇ-awˇ jawˇ gaˇ, ngaˇ maˬ paˇ dawˬ coeˇ miˇ-a. Aˬ yawꞈ maꞈ ngehˬ jiˇ ehˇ jiˇ-awˇ yawꞈ luꞈ meh.

¹⁷Ngaˬ neh noeˬ-euˬ jeˬ ngaˇ ngehˬ-awˇ, nawˬ nehˬ-ehˇ ja haw ma.

¹⁸Ngaˇ dawˬ ngehˬ mawꞈ-eu maˬ dzahˬ tehˬ coeˇ laˇ-euˬ miˇ neh, maˬ ngehˬ maˬ tmˇ ni maˬ jawˇ coeˇ nya.

¹⁹Ngaˇ dawˬ maˬ ya ngehˬ te lehˇ ngeuˇ naˇ, aˬ gaꞈ dzaˇ uiˇ yaw shuiꞈ tiˬ byah dahˬ-eu shaˬ kʼoˆ pehˇ zeuˇ loꞈ-ehˇ tsawˬ paˆ-iˇ-eu keuˆ laˇ-euˬ nya.

²⁰Maˬ dzahˬ tehˬ coeˇ laˇ-euˬ miˇ neh dawˬ ya ngehˬ-eu miˇ-a.

²¹Ngaˇ tiˬ paw-iˬ maˬ pyawˬ-ehˇ, myaˆ pyawˬ huiˬ nyiˇ maˬ tseˇ ni ja ma.

²²Ngaˬ-ahˇ myaˆ pyawˬ huiˬ nyiˇ maˬ tseˇ nya nya. Kʼoeˇ loꞈ-ehˇ jahˇ naˇ, Miˬyehˇ ngaˬ-ahˇ ja pyuˬ ni kʼehˬ nehˬ laꞈ tehꞈ-a.