Read Akha Yawˇbaˆ 35 Bible Online

Yawˇbaˆ 35 - Akha bible

Yawˇbaˆ 35

¹Kʼoeˇ naˇ, Eˇliˇhuˆ heu loꞈ-ehˇ paˇ ehˇ-eu meh.

²“Yawˇbaˆ-oˇ Miˬyehˇ mehˬ shi iˬ baˇ maˬ ahˇ lehˇ nawˇ ehˇ-eu maˬ tsaˬ-a.

³‘Ngaˬ-euˬ iˬ baˇ nawˬ-ahˇ aˬ jeˬ coeˬ ta’ lehˇ hawˇ-eu, ‘Iˬ baˇ maˬ mˇ-euˬ baˬ da neh ngaˇ aˬ jeˬ za ta’ lehˇ, Miˬyehˇ-ahˇ nawˇ ehˇ-eu maˬ tsaˬ-a.

⁴Nawˇ hawˇ-eu nawˬ-euˬ cawˬ deuˬ-ahˇ ngaˇ heu loꞈ-ehˇ ehˇ kʼoꞈ nehˬ mawꞈ miˇ-a.

⁵Mˬ-ahˇ gʼawˇ leuˇ haw sheˇ. Mˬ dmˇ kʼoeˇ deuˬ aˇ naˆ ni goˇ-eu nga.

⁶Nawˇ iˬ baˇ mˇ kʼawꞈ Miˬyehˇ-ahˇ aˬ jeˬ coeˬ leˇ nmˇ. Nawˇ yaw lehˬ jeˬ gʼawˬ mya poˆ mˇ kʼawꞈ, aˬ yawꞈ-ahˇ aˬ joˆ-ehˇ deuˬ leˇ nya nmˇ.

⁷Nawˇ tsaˬ dui dawˇ dui dui-eu miˇ neh Miˬyehˇ-ahˇ mˇ tse nehˬ nya te loˇ.

⁸Nawˇ iˬ baˇ mˇ-eu baˬ da neh nawˬ-euˬ tsawˇ haˬ deuˬ ya daˬ-awˇ, nawˇ yaw muiˬ jeˬ mˇ ngeh, aˬ yawꞈ maꞈ gʼaˇ duˬ gaˇ dahˇ tsoeˬ-euˬ tehꞈ meh.

⁹Tsawˇ haˬ zaˬ aˬ cawˬ kʼehˬ gaˇ ya daˬ ngeh ngoeˇ-awˇ, ka kʼoꞈ nehˬ-eu tsawˇ haˬ-ahˇ poˆ-eu meh.

¹⁰Ehˇ kʼawꞈ, zahˇ dui dui-eu aˇ yamˬ-ahˇ aˬ yawꞈ maꞈ-ahˇ noeˬ tmˬ duˬ biꞈ-eu gʼaˬ pyeuꞈ-eu, aˬ yawꞈ maꞈ-ahˇ beh-euˬ Miˬyehˇ-ahˇ aˬ yawꞈ maꞈ laꞈ jeuˬ maˬ shaˇ-a.

¹¹Jeˬ zaˬ hawˇ-eu aˇ jiˇ deuˬ naˆ maˬ tseˇ aˬ dui tsawˇ gahˇ ahˇ ni, aˬ dui-ahˇ zaˬ siˬ tsawˇ gahˇ biꞈ laꞈ-euˬ Miˬyehˇ-ahˇ, aˬ yawꞈ maꞈ maˬ tahˬ shaˇ leˇ-a.

¹²Aˬ yawꞈ maꞈ nui ma huiˬ-eu mahˇ-eu haiˬ-eu tsawˇ haˬ pyeuꞈ-eu miˇ neh, caw ba nehˬ laꞈ lehˇ shaˇ kʼawꞈ, Miˬyehˇ maˬ naˇ haˬ nehˬ-a.

¹³Aˬ yawꞈ maꞈ yaw kʼaˆ-ehˇ guˇ-awˇ shaˇ kʼawꞈ, yawꞈ ngehꞈ meh. Baoˬ huiˬ-eu Miˬyehˇ maˬ siˬ maˬ mawˇ-euˬ geuꞈ-awˇ jawˇ-eu meh.

¹⁴Yawˇbaˆ-oˇ, Miˬyehˇ-ahˇ maˬ ya mawˇ nya lehˇ nawˇ ehˇ-eu meh. Ehˇ kʼawꞈ, oˇ oꞈ-awˇ tiˬ kʼehˬ dawˬ siˬ. Nawˬ-euˬ gaˇ kawˆ aˬ yawꞈ mehˬ shi le keuˆ taˬ-eu meh.

¹⁵Miˬyehˇ-aˬ, iˬ baˇ gaˇ kawˆ yaw kʼaˆ-ehˇ maˬ shaˇ noeˬ-ehˇ, maˬ kʼehˬ maˬ kʼaˆ nehˬ laꞈ-aˇ lehˇ nawˇ noeˬ-eu meh.

¹⁶Nawˇ dawˬ ja ja kʼawꞈ tiˬ jeˬ-iˬ gaˇ dahˇ maˬ tsoeˬ luꞈ-a. Yawˬ ha aˬ jeˬ ehˇ luꞈ-eu yawˬ ha maˬ siˬ duˬ-eu yaw duˬ baw ngaˇ.”