Read Akha Yawˇbaˆ 36 Bible Online

Yawˇbaˆ 36 - Akha bible

Yawˇbaˆ 36

¹Kʼoeˇ naˇ, Eˇliˇhuˆ heu loꞈ-ehˇ paˇ ehˇ-eu meh.

²“Miˬyehˇ gʼaˇ duˬ ngaˇ dawˬ ngehˬ gaˇ, oˇ-awˇ tiˬ kʼehˬ paˇ naˇ haˬ siˬ.

³Ngaˬ-euˬ zaˬ siˬ tsawˇ gahˇ-aˬ, naꞈ dui dui-eu ma. Ngaˬ-ahˇ beh-euˬ yaw sahˇ pyeuꞈ-eu Miˬyehˇ tsaˬ-eu dawˇ-eu gaˇ kawˆ, ngaˇ kʼaˇ siˬ kʼaˇ nya-eu loꞈ-ehˇ ja mehˬ ma.

⁴Ngaˇ kʼaˇ ngehˬ-eu jeˬ tiˬ hmˬ-iˬ yaw lehˬ maˬ ahˇ, tsawˇ gahˇ byah dui dui-eu tiˬ gʼaˬ nymˬ-mˇ naw maꞈ mehˬ shi jawˇ-eu naw maꞈ mawˇ luꞈ meh.

⁵“Miˬyehˇ-aˬ gʼaˬ kʼaˆ dui dui-eu meh. Ehˇ kʼawꞈ, aˬ cawˬ-ahˇ yehˬ bawˬ-ehˇ maˬ jahˇ-a. Aˬ yawꞈ maˬ siˬ nya-eu tiˬ jeˬ-iˬ maˬ jaˆ-a.

⁶Haiˬ-eu tsawˇ haˬ deuˬ-ahˇ aˬ yawꞈ maˬ bi dehꞈ-a. Ehˇ kʼawꞈ, shaˬ zaˬ zahˬ zaˬ-ahˇ yaw tsaˬ yaw dawˇ laꞈ kʼoeˇ haw nehˬ pyaˆ nehˬ-eu meh.

⁷Yaw tsaˬ yaw dawˇ tsawˇ haˬ deuˬ-ahˇ aˬ yawꞈ haw piˇ-eu laꞈ kʼoeˇ, aˬ cawˬ kʼoeˇ taˆ uˆ lahˇ-eu tsawˇ haˬ bi geuꞈ-awˇ, mˬ maˬ maˬ byaˆ zaˇ ziˇ bi taˬ huiˬ bi taˬ mahˇ nehˬ-eu meh.

⁸Ehˇ kʼawꞈ, yawˬ ha neh mˇ-euˬ loꞈ-ehˇ ya daˬ-awˇ, kuiˇ cuꞈ laꞈ cuꞈ bi cuꞈ-euˬ deuˬ-ahˇ,

⁹aˬ yawꞈ maꞈ-euˬ iˬ baˇ hawˇ-eu nui ma huiˬ-eu mahˇ-eu jeˬ Miˬyehˇ bi siˬ bi mawˇ-eu meh.

¹⁰Aˬ yawꞈ maꞈ yaw haiˬ jeˬ mˇ-eu byehˇ dzeh-awˇ, aˬ yawꞈ ehˇ dawˬ naˇ haˬ ni mehˬ paˇ nehˬ-eu meh.

¹¹Aˬ yawꞈ maꞈ Miˬyehˇ-euˬ ehˇ dawˬ naˇ haˬ-awˇ aˬ yawꞈ-eu gaˇ mˇ naˇ, aˬ yawꞈ maꞈ saˇ lehˆ ni ya dehꞈ ya jawˇ-awˇ baw le za le tehꞈ-a.

¹²Kʼoeˇ loꞈ-ehˇ maˬ mˇ naˇ, tsawˇ gahˇ maˬ ahˇ-ehˇ ya shiˇ-awˇ, shiˇ-eu miˇ kʼahˬ-ahˇ iˇ-eu lawˇ gawˆ ya tsehˆ tehꞈ-a.

¹³Miˬyehˇ maˬ baw-eu tsawˇ haˬ aˬ myah luꞈ nui ma pehˇ-awˇ, kʼehˬ gaˇ kʼaˆ gaˇ ya daˬ kʼawꞈ caw ba nehˬ laꞈ lehˇ shaˇ-eu maˬ siˬ nya-a.

¹⁴Aˬ yawꞈ maꞈ yaw dehꞈ dehꞈ-eu shaˬ zahˬ naꞈ-eu miˇ neh, maˬ mawˬ laˇ mi naˆ-ehˇ ya shiˇ-eu meh.

¹⁵Ehˇ kʼawꞈ, shaˬ-eu zahˬ-eu jeˬ laꞈ kʼoeˇ tsawˇ haˬ zaˬ-ahˇ Miˬyehˇ mehˬ nehˬ tsoˆ nehˬ-awˇ, bi siˬ bi mawˇ laˇ-eu gʼaˇ duˬ noeˬ shaˬ noeˬ zahˬ-eu jeˬ bi keuˆ le-eu meh.

¹⁶Shaˬ-eu zahˬ-eu jeˬ laꞈ kʼoeˇ Miˬyehˇ nawˬ-ahˇ sheuˬ doˆ-awˇ, nui saˇ oꞈ-eu laꞈ kʼoeˇ bi dehꞈ-euˬ meh. Nawˬ-euˬ hawˬ jeh kʼoeˇ taˆ dzaˬ dzaˬ dawˇ dawˇ tiˬ byah jaˆ-eu meh.

¹⁷Ehˇ kʼawꞈ, nawˬ-ahˇ geuˇ-eu kʼehˬ-eu kʼaˆ-eu jeˬ-ahˇ nymˬ-mˇ nawˇ ya daˬ luꞈ-eu meh.

¹⁸Laꞈ nmꞈ nmꞈ-eu jeˬ neh nawˬ-ahˇ mehˇ shuiˇ bi shuiˇ-awˇ, pyuˇ shuiˇ myawˬ gahˬ neh gaˇ ma maˬ bi sheuˬ bah ni yahˇ-awˬ.

¹⁹Caw ba nehˬ laꞈ-awˬ lehˇ nawˇ guˇ kʼawꞈ tiˬ jeˬ-iˬ gaˇ dahˇ maˬ tsoeˬ-a. Nawˇ gʼaˬ kʼaˇ jaˆ-eu yuˇ doˆ kʼawꞈ yawꞈ ngehꞈ meh.

²⁰Tsawˇ jeuˬ dawˬ tawˆ luꞈ ya luˬ ya seˇ-iˇ-eu, uˬ ciꞈ aˇ yamˬ keuˆ le gaˇ taˬ paˇ noeˬ tmˬ.

²¹Yaw haiˬ jeˬ mˇ-eu lehˇ taˬ paˇ leh jeh. Kʼoeˇ loꞈ-ehˇ maˬ bi mˇ-eu gʼaˇ duˬ nawˬ-euˬ kʼoeˇ taˆ shaˬ zahˬ naˇ gawˇ bi keuˆ le-euˬ meh.

²²“Miˬyehˇ-euˬ baoˬ aˇ naˆ ni huiˬ gaˇ noeˬ keuˆ-awˬ. Aˬ yawꞈ-aˬ, dawˬ tawˆ kʼoeˇ taˆ huiˬ-eu mehˬ-eu tsoˆ-eu gʼaˬ meh.

²³Miˬyehˇ gaˇ mˇ gaˇ tiˬ gʼaˬ-iˬ maˬ mehˬ maˬ tsoˆ nya-a. Aˬ yawꞈ yaw haiˬ jeˬ mˇ nga lehˇ tiˬ gʼaˬ-iˬ maˬ ehˇ leˇ nya-a.

²⁴Aˬ yawꞈ neh mˇ-euˬ gaˇ baˬ da neh aˬ yawꞈ-ahˇ aˬ myah luꞈ ja ceuˬ-eu meh. Naw maꞈ kʼawꞈ aˬ yawꞈ-ahˇ ya ja ceuˬ meh.

²⁵Aˬ yawꞈ neh mˇ-euˬ gaˇ-ahˇ yawˬ gʼaˬ na luꞈ ya mawˇ kʼawꞈ, tiˬ gʼaˬ-iˬ maˬ haw siˬ duˬ nya-a.

²⁶Aˬ yawꞈ aˇ naˆ ni huiˬ-eu mahˇ-eu aˬ dui maˬ siˬ duˬ nya-ehˇ, aˬ yawꞈ-euˬ aˇ kʼoꞈ aˇ la aˬ dui maˬ toꞈ nya-a.

²⁷“Miˇ tsaˬ-ahˇ dahˬ-eu iˇ cuꞈ yuˇ-awˇ, uˬ yehˇ jahˇ pyeuꞈ-eu gʼaˬ Miˬyehˇ meh.

²⁸Tsawˇ haˬ zaˬ dawˬ tawˆ luꞈ gʼaˇ duˬ, mˬ dmˇ-ahˇ aˬ yawꞈ uˬ yehˇ bi yehˇ doˆ le-eu meh.

²⁹Miˬyehˇ jawˇ-eu mˬ kʼoeˇ taˆ yaw goˇ-ahˇ, mˬ dmˇ aˬ joˆ-ehˇ zaw-awˇ, mˬ jeˬ aˬ joˆ-ehˇ jeˬ-eu gaˇ kawˆ, tsawˇ haˬ tiˬ gʼaˬ-iˬ maˬ siˬ nya-a.

³⁰Mˬ doe ni aˬ yawꞈ mˬ myawꞈ bi myawꞈ kʼawꞈ, iˬ ma laˆ shaˆ dawˬ dah zahˇ tsui ni jaˆ-eu meh.

³¹Kʼoeˇ loꞈ-ehˇ jahˇ-eu laꞈ kʼoeˇ tsawˇ haˬ zaˬ-ahˇ aˬ yawꞈ bi dzaˬ bi dawˇ-awˇ, dzaˬ dzaˬ dawˇ dawˇ tiˬ byah ni biꞈ-eu meh.

³²Mˬ jeˬ tsawˬ tehˆ-ahˇ aˬ yawꞈ tuˆ tehˬ-awˇ, kʼaˇ noeˬ-euˬ gaˇ bi zaw leˇ-eu gʼaˇ duˬ dawˬ biꞈ-eu meh.

³³Jaˬ lehˇ lehˇ ma oe luꞈ meh lehˇ mˬ jeˬ guˇ gaˬ-awˇ, jeˬ zaˬ deuˬ gʼoˆ siˬ nya-eu meh.