Read Akha Yawˇbaˆ 38 Bible Online

Yawˇbaˆ 38 - Akha bible

Yawˇbaˆ 38

¹YAWˇBAˆ-AHˇ SAHˬPAˬ MIˬYEHˇ EHˇ KʼOꞈ NEHˬ-EUˬ DAWˬ Kʼoeˇ naˇ, jaˬ lehˇ lehˇ ma baw-eu laꞈ kʼoeˇ, Yawˇbaˆ-ahˇ Sahˬpaˬ Miˬyehˇ heu loꞈ-ehˇ dawˬ ngehˬ cawˬ kʼoꞈ nehˬ-euˬ meh.

²“Tsawˇ gahˇ maˬ ahˇ-eu dawˬ ngehˬ-awˇ ngaˬ-euˬ zaˬ siˬ tsawˇ gahˇ gaˇ kawˆ naˇ haˬ-eu aˬ suˇ gʼaˬ te.

³Kʼaˬ dzeˇ zaˬ loꞈ-ehˇ tsawˬ tuˇ-awˇ yawꞈ-awˇ, ngaˇ naˇ haˬ-eu jeˬ ehˇ kʼoꞈ-awˬ.

⁴Ngaˇ miˇ tsaˬ tahˬ kʼawˇ beh ngeh nawˇ kʼawꞈ kʼoeˇ gaˇ jawˇ teˬ loˇ. Nawˇ aˇ dzehˬ-ehˇ siˬ nya-eu tsawˇ haˬ ngeuˇ naˇ, gaˇ kawˆ kʼoeˇ ngaˬ-ahˇ dzawˇ mehˬ sheˇ.

⁵Miˇ tsaˬ tahˬ kʼawˇ heu aˇ hui ni ya bi huiˬ-awˇ aˇ mah ni ya bi mahˇ-eu aˬ suˇ gʼaˬ shaˇ noeˬ doˆ taˬ. Kʼoeˇ deuˬ dawˬ tawˆ luꞈ nawˇ ehˇ nya ma loˇ.

⁶Miˇ tsaˬ tahˬ kʼawˇ heu-ahˇ dehˬ toˆ taˬ-euˬ kʼawˇ zeuˇ aˬ suˇ gʼaˬ neh ka tuˇ-awˇ, laꞈ coeˇ-ahˇ aˬ suˇ gʼaˬ neh gawˬ tawꞈ taˬ-euˬ ta.

⁷Kʼoeˇ ngeh nah uˬ bya bya laˇ ngeh, aˬ guiˇ deuˬ tiˬ kawˆ loꞈ-ehˇ caˇ dawˬ caˇ-awˇ, mˬ taˆ gʼaˬ kʼehˇ deuˬ laˬ kʼaˬ cehˇ-awˇ guˇ-euˬ meh.

⁸Iˬ ma laˆ shaˆ iˇ cuꞈ deuˬ miˇ tsaˬ tahˬ kʼawˇ-euˬ uˬ maˆ-ahˇ neh yoeˇ doˆ laˇ ngeh, maˬ bi yoeˇ doˆ dzeh ni iˇ cuꞈ laˇ gʼoˆ aˬ suˇ gʼaˬ neh ciˬ tsoeˬ taˬ-euˬ ta.

⁹Iˬ ma laˆ shaˆ-ahˇ mˬ dmˇ neh dehˬ kaˬ-awˇ, yaw zahˇ neh lahˇ cuꞈ-euˬ gʼaˬ ngaˇ ma.

¹⁰Iˬ ma laˆ shaˆ miˇ kaˬ taw paˆ-awˇ, iˇ cuꞈ laˇ gʼoˆ ciˬ tsoeˬ-awˇ bi dahˬ-euˬ gʼaˬ ngaˇ ma.

¹¹Iˬ ma laˆ shaˆ iˇ cuꞈ aˬ geu gaˇ keuˆ ni ya dahˬ keuˆ-awˇ, iˇ luˆ dzeh keuˆ nya-eu jawˇ duˬ ngaˇ mehˬ duˬ taˬ-euˬ ma.

¹²Yawˇbaˆ-oˇ, nawˬ-euˬ ziˇ laꞈ kʼoeˇ, nah gʼahˇ-ahˇ uˬ shawˬ shawˬ-iˇ ni dawˬ biꞈ-awˇ laˆ pyeuꞈ nya-euˬ jaˆ te loˇ.

¹³Uˬ bya yaw shehꞈ neh miˇ tsaˬ tahˬ kʼawˇ-ahˇ tsuˆ tehˬ-awˇ, dzuˇ zaꞈ taˬ-euˬ haiˬ-eu tsawˇ haˬ deuˬ-ahˇ byuˬ kʼaˇ doˆ-awˬ lehˇ nawˇ dawˬ biꞈ haw teˬ loˇ.

¹⁴Nah gʼahˇ yaw shehꞈ bya ngeh, gawˬ jawˬ gʼaˬ lawˬ deuˬ mehˬ tsoeˬ byaˆ dmˇ taˬ-euˬ loꞈ-ehˇ mawˇ duˬ laˇ-awˇ, shaˬ jehˆ kʼoeˇ taˆ jmˬ diˬ taˬ-euˬ loꞈ-ehˇ mawˇ shawˇ laˇ-eu meh.

¹⁵Nah gʼahˇ bya-eu yaw shehꞈ-aˬ, haiˬ-eu tsawˇ haˬ deuˬ gʼaˇ duˬ aˇ dzehˬ bya dzeuˇ-awˇ, yaw haiˬ jeˬ maˬ mˇ peuˬ ni bi pyeuꞈ-iˇ-eu meh.

¹⁶Iˬ ma laˆ shaˆ laꞈ oˆ iˇ cuꞈ iˇ beuˆ doˆ gaˇ nawˇ iˇ keuˆ haw maˬ loˇ. Iˬ ma laˆ shaˆ dawˬ dah nawˇ cah haw teˬ loˇ.

¹⁷Zahˇ tsui ni gʼeh-eu shiˇ-eu miˇ kʼahˬ-ahˇ iˇ-eu laˇ gʼoˆ-ahˇ, aˬ cawˬ nawˬ-ahˇ sheuˬ mehˬ nehˬ laꞈ haw taˬ loˇ.

¹⁸Miˇ tsaˬ tahˬ kʼawˇ heu aˇ hui ni ahˇ-eu nawˇ siˬ nya naˇ, ngaˬ-ahˇ ehˇ mehˬ nehˬ laꞈ haw sheˇ.

¹⁹Yaw shehꞈ aˬ gaˇ neh doˆ le-awˇ, yaw zahˇ-euˬ duˬ ciˇ aˬ gaˇ jaˆ-eu nawˇ siˬ nya te loˇ.

²⁰Yaw shehꞈ hawˇ-eu yaw zahˇ kʼoeˇ aˬ gaˇ keuˆ ni ya pyehˬ gʼeh-awˇ, aˬ joˆ-ehˇ ya laˆ luiˆ kʼoꞈ-eu nawˇ siˬ nya ma loˇ.

²¹Nawˇ-aˬ, miˇ tsaˬ tahˬ kʼawˇ-ahˇ beh ngeh neh jawˇ luꞈ-awˇ, mawˬ dui dui laˇ-euˬ miˇ neh, gaˇ kawˆ heu deuˬ siˬ nya jiˇ tehꞈ-a laˬ.

²²Ngaˬ neh ngehˇ hawˇ-eu uˬ yehˇ aˇ siˬ dawˆ ahˇ taˬ-euˬ kuˆ lawˆ deuˬ jaˆ gaˇ, nawˇ le keuˆ haw maˬ loˇ.

²³Shaˬ-eu zahˬ-eu aˇ yamˬ hawˇ-eu guiˇ deuˆ ceh ceh-eu aˇ yamˬ-ahˇ zmˬ-eu lehˇ, kʼoeˇ deuˬ-ahˇ ngaˇ jeˬ hmˬ taˬ-euˬ ma.

²⁴Nahˇ ma doˆ laˇ-eu jawˇ duˬ hawˇ-eu, nahˇ ma doˆ kʼehˬ paw neh laˇ-euˬ jaˬ lehˇ baw doˆ laˇ duˬ-ahˇ, nawˇ iˇ keuˆ haw maˬ loˇ.

²⁵Uˬ yehˇ bi yoeˇ le-eu uiˇ kʼehˬ caˬ-awˇ, mˬ jeˬ tsawˬ tehˆ bi oe-eu gaˇ ma laˆ dahˇ-euˬ gʼaˬ aˬ suˇ gʼaˬ-a.

²⁶Tsawˇ haˬ tiˬ gʼaˬ-iˬ maˬ jawˇ-eu jawˇ duˬ-ahˇ uˬ yehˇ bi yehˇ le-eu gʼaˬ aˬ suˇ gʼaˬ-a.

²⁷Yaˇ moꞈ bi dehꞈ doˆ laˇ nya ni, gui coˇ ni gʼeh-eu miˇ tsaˬ-ahˇ, iˇ cuꞈ shehˬ-eu gʼaˬ aˬ suˇ gʼaˬ-a.

²⁸Uˬ yehˇ hawˇ-eu ceuˬ aˬ da baw meh loˇ.

²⁹Ngehˇ ngehˇ km-euˬ aˬ ma aˬ suˇ gʼaˬ-a.

³⁰Iˇ cuꞈ kʼaˬ lo loꞈ-ehˇ gʼahˇ-iˇ-awˇ, laˆ shaˆ iˇ cuꞈ ngehˇ pyeuꞈ-iˇ ni aˬ suˇ gʼaˬ neh jahˇ-euˬ siˬ nya ma loˇ.

³¹Aˬ guiˇ koꞈ la koꞈ dzahˬ-ahˇ nawˇ dzahˬ tehˬ nya-awˇ, Oˇliˇoˬ[4] aˬ guiˇ-ahˇ nawˇ puiˇ pyehˬ nya te loˇ.

³²Aˬ guiˇ deuˬ-ahˇ aˬ yawꞈ yamˬ aˬ yawꞈ law yawꞈ nawˇ gaˇ ma mehˬ nya-awˇ, Kʼaˬhmˇzaˬ hawˇ-eu Kʼaˬhmˇhmˇma lehˇ myahˇ-euˬ aˬ guiˇ deuˬ-ahˇ gaˇ ma sheuˬ dawˇ nehˬ nya ma loˇ.

³³Mˬ kʼoeˇ taˆ zmˬ luꞈ-eu zahˇ sahˇ kʼoꞈ deuˬ-ahˇ nawˇ siˬ nya-awˇ, kʼoeˇ deuˬ-ahˇ miˇ tsaˬ kʼoeˇ taˆ nawˇ zmˬ nya ma loˇ.

³⁴Mˬ dmˇ-ahˇ nawˇ guˇ gaˬ-awˇ, nawˬ-ahˇ uˬ yehˇ bi yehˇ shehˬ le ni dawˬ biꞈ nya ma loˇ.

³⁵Mˬ jeˬ tsawˬ tehˆ-ahˇ nawˇ dawˬ biꞈ ngeh, nawˇ jawˇ gaˇ zaꞈ ka le-awˇ nawˬ neh kʼaˇ kʼehˇ-euˬ loꞈ-ehˇ mˇ ma lehˇ ehˇ le tehꞈ-a loˇ.

³⁶Niˬlaˇ lawˇ baˬ iˇ jeuˬ jeuˬ le meh lehˇ iˇbiˇ aˇ jiˇ[5] -ahˇ aˬ suˇ gʼaˬ ehˇ nehˬ-awˇ, uˬ yehˇ yehˇ le meh lehˇ ya ciˆ ya poeˇ-ahˇ aˬ suˇ gʼaˬ ehˇ gaˬ ta.

³⁷Mˬ dmˇ-ahˇ gui jiˇ nya ni zaˬ siˬ tsawˇ gahˇ ahˇ-eu aˬ suˇ gʼaˬ-a. Uˬ yehˇ ga doˆ le ni mˬ dmˇ-ahˇ ngawˬ kʼaˇ nya-eu aˬ suˇ gʼaˬ-a.

³⁸Uˬ yehˇ bi yehˇ le-awˇ kʼaˬ lehˇ-ahˇ bi tawˇ leˇ nya-eu aˬ suˇ gʼaˬ-a.

³⁹Aˇ laˬ jaˬ shiˇ-ahˇ nawˇ dzaˇ sha nehˬ nya-awˇ, aˇ laˬ jaˬ shiˇ zaˬ deuˬ-euˬ uˬ maˆ poˆ dehˆ nehˬ nya ma loˇ.

⁴⁰Lo kʼahˬ lo byoe doe ni aˬ yawꞈ maꞈ dzuˇ zaꞈ-awˇ loꞈ ngeh, nawˇ dzaˇ sha dehˆ nehˬ nya ma loˇ.

⁴¹Awꞈ-aꞈ deuˬ dzaˇ mehꞈ mehꞈ-ehˇ zaw-awˇ, aˬ yawꞈ maꞈ-euˬ zaˬ deuˬ dzaˇ bi dzaˬ laꞈ lehˇ ngaˬ-ahˇ shaˇ ngeh, awꞈ-aꞈ kʼoeˇ deuˬ-ahˇ aˬ suˇ gʼaˬ dzaˇ biꞈ nehˬ ta.